23
To'o moon-metan, sia naruka Paulus naloos aan. Nia titu di'a-di'ak ema nia sia, hotu katak na'ak, “Mamaluk sia! Ha'u kariik iha ne'e kodi neon loos. Hori sei ki'ik to'o oras ne'e, ha'u ne'e la koo sala iha Na'i Maromak oin.”2 Rona Paulus dale nunia, na'ilulik ulun boot naran Ananiasa krakat tebe-tebes. Nia naruka ema mak nariik kre'is baa Paulus, basa Paulus ibun.”
3 Mais Paulus nataa fila na'ak, “Nebee Na'i Maromak moos basa fila o. O ne'e hanesan rii mak ema kaser luan, mais isin dodok ti'an. O makara ukun ha'u iha moon-metan ne'e, tuir itakaan ukun. Mais o na'in du'uk makur ukun nia ti'an, tan o maruka basa ha'u.”b
4 Rona Paulus dale nunia, ema iha nia sia de'an nia na'ak, “Hoi! Notar lalek! Keta dale nunia baa itakaan na'ilulik ulun boot!”
5 Natene nola nunia, Paulus nataa na'ak, “Tebes ka? Kalo nunia, ha'u kusu pardua, tan ha'u la katene ema ne'e itakaan ulun boot. Tebes! Maromak mako'an nakerek nela ti'an na'ak, ‘Keta dale aat baa emikaan ulun sia.’”c
6-8 Paulus natene ti'an na'ak ema mak tuur iha moon-metan nia nakfa'ek ti'an baa partee rua. Balu tuir partee Saduki. Sia la fiar ema mak mate bele moris nikar. Sia la fiar noo makbukar lale'an. Sia moos la fiar noo ema kukun. Balu tenik tuir partee Farisi. Sia fiar na'ak ema mak mate bele moris nikar. Sia moos fiar na'ak noo makbukar noo iha lale'an, no ema kukun moos iha.
Paulus natene sia hotu-hotu nakfa'ek ti'an tan lia nia sia, nia dale nodi lian maka'as na'ak, “Mamaluk sia! Surak emi hatene, ha'u ne'e, ema Farisi. Ha'ukaan ama no ha'ukaan bei sia moos ema Farisi. Oras ne'e, emi hakara ukun ha'u, tan ha'u kfiar Na'i Maromak bele nalo ema mak mate moris nikar.”d
Rona Paulus dale nunia, ema Farisi no ema Saduki sia toe malu, 9 to'o sia la kona malu. Manorik ukun na'in hira nosi partee Farisi, nariik nodi naloos Paulus na'ak, “Ema ne'e, la sala! See mak natene! Arumak makbukar lale'an, lale, ema kukun, mak tuun dale no nia!”
10 Ema nia sia toe nima-nimak, to'o sondadu ulun boot nia nata'uk. Nia naneo na'ak, keta to'o sia ta'e lisuk no'o Paulus. Tan baa nia, nia naruka ain-liman sia dada natama Paulus baa sondadu fatin.
11 Baa kalan nia, Na'i Yesus moos mai natadu aan baa Paulus. Nia nakbiit Paulus neon nodi na'ak, “Paulus! Keta mata'uk! Oras ne'e, o dale lia nosi Ha'u ti'an iha kota Yerusalem ne'e. Nosi ikus, o moos musti dale lia nosi Ha'u nunia iha kota Roma nebaa.”
Ema ko'a kabuar lia atu no'o Paulus
12-13 Baa awan seisawan, ema Yahudi na'in haat nulu resin, ko'a kabuar lia atu no'o Paulus. Sia nalo mamenon na'ak, “Kalo ami la ho'o Paulus dauk, ami la haa-hemu.” 14 Nunia hotu, sia baa nasara lia nia baa na'ilulik ulun sia no fukun Yahudi sia na'ak, “Ama sia! Ami halo mamenon ti'an. Kalo ami la ho'o Paulus dauk, ami la haa-hemu. 15 Tan lia nia, ami hakara nune'e. Ama sia musti baa hasoru sondadu ulun boot, husu nia nodi Paulus baa moon-metan. Halo aan hanesan ama sia hakara leno hikar niakaan lia. Oras sia nodi Paulus baa, ami atu saka hein iha dalan, nebee ami ho'o Paulus.”
16 Mais Paulus feton oan mane ida rona nola siakaan lia kabuar nia. Hotu, nia nalai baa katak Paulus iha sondadu fatin. 17 Rona oan dale ti'an, Paulus bolu sondadu makdaka ida na'ak, “Ne'e, ha'ukaan oan. Modi nia lai-lais baa ulun boot, tan nia nakara katak lia ida.”
18 Sondadu nia no oan nia baa niakaan ulun boot nodi nasara na'ak, “Ama! Paulus, mak ita heti nia, nusu ha'u ko oan ne'e mai nasoru ama. Oa ne'e nakara katak lia ida baa ama.”
19 Hotu sondadu ulun boot nia nodi oa nia baa fatin ida nebee sia rua dale mesan. Hotu nia nusu baa oa nia na'ak, “Oa, o makara katak saa baa ha'u?”
20 Oa nia nasara na'ak, “Ema Yahudi na'in hira ko'a kabuar lia atu no'o tua Paulus. Sia atu mai nusu ama, nebee awan ama nodi tua Paulus baa moon-metan, tan sia atu leno asufanu niakaan lia. 21 Mais ama keta tuir. Tan ema haat nulu resin atu saka hein ama niakaan sondadu sia iha dalan, nebee sia no'o tua Paulus. Sia hotu-hotu nalo mamenon ti'an na'ak, kalo sia la no'o tua Paulus dauk, sia la naa-nemu. Oras ne'e, sia hotu-hotu nadi'a aan ti'an. Sia nein loos ama nataa na'ak saa.”
22 Rona oa nia dalen, sondadu ulun boot nia moos dale baa nia na'ak, “Oa! Keta katak baa se-see ma'ak o mai ne'e katak lia ne'e baa ha'u.” Dale notu nunia, naruka oa nia fila.
Sondadu Roma nodi Paulus baa Gubernur Feliks iha kota Kaisarea
23 Nunia hotu, sondadu ulun boot nia bolu nola niakaan sondadu na'in rua. Nia naruka sia na'ak, “Hadi'a sondadu makla'o rai na'in atus rua, no sondadu maksa'e kuda na'in hitu nulu, no sondadu makaer diman na'in atus rua. Emi hotu-hotu musti la'o kedan baa kota Kaisarea tuku siwi kalan ne'e. 24 Hadi'a kuda ida bodik Paulus. Emi musti la'o ho nia di'a-di'ak to'o baa gubernur Feliks.”
25 Naruka ti'an nunia, nia moos nalo hakerek bodik gubernur Feliks, na'ak nune'e:
26 “Ama Gubernur Feliks, mak ha'u kakneter. Tabe nosi ha'u, Klaudius Lisias.
27 Ha'u ksolok baa ama, ema ida naran Paulus. Ema Yahudi sia kaer nola nia ti'an, kre'is atu no'o. Baa oras nia, ha'ukaan sondadu sia dada nasai nia nosi ema Yahudi liman laran. Hotu, katene kola ema ne'e, ema Roma. 28 Ha'u kakara katene malorek tan saa ema Yahudi atu no'o nia. Dadi ha'u kodi nia baa siakaan moon-metan. 29 Mais sia la netan niakaan salan sa-saa. Tebes ama, nia la sala. Tan lia nia, ha'u la kbele katama nia baa bui, no la kbele taa ukun mate baa nia. Oras leno niakaan lia, ema iha moon-metan nia nakaat malu, tan siakaan hanorin la kona malu. Tan baa nia, ha'u kodi kikar ema ne'e baa sondadu fatin. 30 Mais baa awan ha'u krona ka'ak, ema Yahudi sia ko'a kabuar lia atu no'o nia. Tan nunia, karuka kedan ema ne'e mai baa ama. Ha'u moos katak baa ema Yahudi mak nalo lia sakar nia, nebee sia moos mai nasoru ama. Hodi nunia, ama bele rona du'uk sia tula sala saa baa nia.
Ha'ukaan hakerek, nunia dei. Dame!”
31 Hotu sondadu sia nadi'a aan nala'ok siakaan ulun harukan. Baa kalan nia moos, sia la'o kedan no Paulus to'o kota ida naran Antipatris. 32 Baa awan, sondadu maksa'e kuda sia no Paulus to'o kota Kaisarea. Sondadu seluk sia fila nikar baa Yerusalem. 33 To'o Kaisarea, sia foo hakerek nia baa gubernur nodi latan Paulus. 34 Leno hotu hakerek nia, gubernur nusu Paulus na'ak, “O ema nabee?”
Paulus nataa na'ak, “Ha'u kosi rai Kilikia, ama.”
35 Rona nola Paulus dale nunia, gubernur natene kedan Paulus ema renu Roma tebes. Hotu gubernur nalore na'ak, “Ha'u mak kaer ukun iha ne'e. Tan nunia, ha'u na'in du'uk mak atu leno okaan lia. Mais ita musti hein ema mak nakara nalo lia sakar o, foin ha'u kleno.” Hotu gubernur naruka sondadu sia daka Paulus iha siakaan fatin iha gubernur tofatik. Fatin nia, Na'i Herodes mak nariik.