Sondadu ulun Roma ida naran Kornelius, bolu Petrus
10
Baa oras nia, noo sondadu ulun ki'ik ida, naran Kornelius. Nia ulun bodik sondadu na'in atus ida. Sia mai nosi rai dook Italia, nein iha kota Kaisarea atu serwisu bodik ukunrai Roma. 2 Kornelius nia, lisan seluk nosi ema Roma wa'in, tan nia beer Na'i Maromak. Niakaan ema uma laran isin tomak moos nunia. Dala wa'in nia tulun ema mukit sia. Sura loron nia moos namulak baa Na'i Maromak. 3 Baa loro malirin ida, takseer tuku tolu, nia noran nu'u me'i. Nia naree lo-loren Maromak Niakaan makbukar lale'an ida mai bolu nia na'ak, “Kornelius!”
4 Naree nunia, Kornelius nata'uk tebes. Nia nusu na'ak, “Saa, Ama Boot?”
Makbukar nia nataa na'ak, “Na'i Maromak rona okaan hamulak ti'an. Nia moos nanoin okaan laran di'ak baa ema. 5 Oras ne'e, maruka ema baa kota Yope, baa bolu nola ema ida naran Simon Petrus. 6 Nia nein iha uma ida iha tasi tehen. Uma na'in, naran Simon. Niakaan serwisu, namoos kulit.”
7 Dale hotu nunia, makbukar lale'an nia la'o nela Kornelius. Hotu Kornelius bolu nola niakaan ema serwisu na'in rua no niakaan sondadu ida. Sondadu nia moos fiar baa Na'i Maromak. 8 Kornelius katak lia ohin nia baa sia, hotu naruka sia baa kota Yope.
Petrus mai Kornelius uman
9 Baa awan, oras Kornelius eman sia kre'is baa Yope, Petrus sa'e baa namulak iha Simon uma tetu leten.
10 Kre'is loro natetu, Petrus salaen ti'an. Nia sei nein ema nadi'a haan, Na'i Maromak natudu lia ida baa nia nu'u me'i. 11 Petrus naree lale'an nakloke, hotu tais fafalun boot ida mosu tuun mai. Tais nia nawisa baa lidun haat. 12 Iha tais nia laran Petrus naree osa no lotuk oi-oik. Balu ain haat, balu mane'ek no manu oi-oik.
13 Hotu Petrus rona lia maliak ida naruka na'ak, “Petrus! Madeer! Mo'o osa no lotuk ne'e sia, maa ona!”
14 Mais Petrus nataa na'ak, “La bele, Ama Boot! Ha'u la kaa kokon, tan ami ema Yahudi hakribi buat nia sia.”
15 Mais lia maliak nia dale nikar na'ak, “Kalo Na'i Maromak katak na'ak la hakribi ona, o la bele katak ma'ak sei hakribi!” 16 Tais nia mosu nunia to'o isin tolu, foin ni'it aan sa'e nikar baa lale'an.
17 Me'i notu nunia, Petrus nanoin baa-mai buka me'i isin. Baa oras nia moos, Kornelius eman sia to'o Simon uman, hotu nariik iha odamatan oin. 18 Sia bolu uma na'in, hotu nusu na'ak, “Ama, ami mai buka bainaka ida mak nein iha uma ne'e. Nia naran Simon Petrus. Arumak ama natene nia ka?”
19 Baa oras nia Petrus sei iha tetu leten nodi nanoin baa-mai buka me'i isin. Maromak Kmalar Lulik katak baa nia na'ak, “Petrus! Noo emaa mai buka o. 20 Tuun ona, baa tuir sia. Lalika makerat! Masik sia lahoos ema Yahudi moos, keta makribi sia. Tan Ha'u mak karuka sia mai saka o.” 21 Rona nola nunia, Petrus moos tuun baa nasoru sia nodi dale na'ak, “Ha'u mak emi buka. Emi hakara saa?”
22 Sia nataa na'ak, “Sondadu Roma ida mak naruka ami mai. Nia ulun bodik sondadu na'in atus ida. Nia neon loos. Nia moos beer Na'i Maromak. Ema Yahudi wa'in natene niakaan dadi'ak. Hori sehik Maromak Niakaan makbukar lale'an ida tuun mai, naruka nia nusu ita boot mai iha niakaan uma, nebee nia rona du'uk nosi ita boot.”
23 Rona nola nunia, Petrus moos simu. Mais nia tene sia toba baa kalan nia. Baa awan, sia nadeer, hotu sia baa no Petrus. Yesus eman na'in hira nosi Yope moos namalu sia.
24 Sia la'o loron ida tomak, awan foin sia to'o kota Kaisarea. To'o nebaa, Kornelius no'i nein sia, bele-bele no niakaan ema uma laran no belun sia. 25 Oras Petrus atu tama baa Kornelius uman, Kornelius nalai baa nakni'a iha Petrus ain, atu sudur baa nia. 26 Mais Petrus foti nariik nia nodi katak na'ak, “Ama! Mariik! Keta sudur baa ha'u, tan ha'u moos hanesan ama.”
27 Rona nola nunia, Kornelius moos nariik. Hotu sia rua la'o nodi dale baa malu, atu tama baa Kornelius uman. Sia sei la tama dauk, Petrus naree ema wa'in libur malu, nein nia ti'an. 28 Naree nunia, nia dale na'ak, “Maluk sia. Emi hatene ha'ak, ami ne'e ema Yahudi. Tuir amikaan adat, ami hakribi ema seluk. Saa tenik, tama baa siakaan uma. Mais foin da-dauk ne'e, Na'i Maromak katak baa ha'u na'ak, ha'u la kbele kakribi ema ona, mais ha'u kmusti kahur ko sia kodi kafoli sia, hanesan ha'ukaan ema uma laran du'uk. 29 Tan baa nia, baa oras emi bolu ha'u kmai, ha'u moos mai kedan. Ha'u la kbele kase'i lia oi-oik, tan Na'i Maromak katak kedan nunia baa ha'u! Oras ne'e, emi katak kokon! Emi hakara saa?”
30 Hotu Kornelius katak lia hotu-hotu na'ak, “Loron haat foin liu ne'e, baa oras loro atu malirin, ha'u kamulak iha uma ne'e. Teki-tekis mane ida nariik iha ha'ukaan oin. Niakaan tais molen naksinak. 31 Nia moos bolu ha'u na'ak, ‘Kornelius! Na'i Maromak rona ti'an okaan hamulak. Nia moos nanoin okaan laran di'ak baa ema hotu-hotu. 32 Oras ne'e o maruka ema baa kota Yope, baa bolu ema ida naran Simon Petrus. Nia nein iha uma ida iha tasi tehen. Uma na'in naran Simon. Niakaan serwisu, namoos kulit.’ 33 Tan lia nia, ha'u karuka kedan ema baa bolu ita boot. Ami sera dodan tebe-tebes, tan ita boot nakara mai ti'an. Oras ne'e ami libur malu iha ne'e, atu rona du'uk lia mak Na'i Maromak naruka ita boot katak baa ami.”
Petrus katak Lia Di'ak nosi Yesus baa ema mak lahoos Yahudi
34 Rona Kornelius dale nunia, Petrus nataa na'ak, “Oras ne'e, foin ha'u katene Na'i Maromak nafoli ema hotu-hotu manesak. Nia la fihir oin.b 35 Ema nosi hunun nabee dei, kalo nia neon loos, nia beer namulak baa Na'i Maromak, nodi tuir Niakaan hakaran, ema nia nanis nalo Na'i Maromak neon di'ak. 36 Lia di'ak ne'e mak Na'i Maromak katak ti'an baa ami ema Isra'el. Yesus mate atu nalo ema raiklaran di'a-di'ak nikar no Na'i Maromak. Yesus moos Na'in bodik ema hotu-hotu.
37 Emi hatene ti'an lia mak dadi iha rai Yudea tomak, nahuu nosi Yohanis nala'o niakaan serwisu. Nia katak baa ema na'ak sia musti soe siakaan salan no simu sarani atu dadi tadak na'ak sia di'a-di'ak nikar no Na'i Maromak ti'an. 38 Emi moos hatene ha'ak, Na'i Maromak natuun Niakaan Kmalar Lulik baa Yesus ema Nasaret nia. Hotu Yesus nodi Na'i Maromak beran la'o sura leo, nalo lia di'ak bodik ema. Nia moos tulun ema mak diabu ulun nasusar. Nia bele nalo nunia, tan Na'i Maromak namutuk no Nia. 39 Ami haree du'uk saa mak Yesus nalo iha kota Yerusalem no iha rai Yahudi tomak.
Mais nosi ikus, ema nedi no'o Nia baa ai karuus to'o mate. 40 Mais to'o wainrua,c Na'i Maromak nalo Nia moris nikar. Hotu Nia natadu aan baa ema. 41 Mais ami mesan mak haree Nia, lahoos ema hotu-hotu. Tan Na'i Maromak boi nola ami dadi ain-liman. Tan lia nia, oras Yesus moris nikar, ami mak haa-hemu hamutuk ho Nia.
42 Yesus moos naruka ami baa katak halore ha'ak, Nia ne'e, Kristus mak Na'i Maromak nameno kedan hori uluk. Na'i Maromak foti Nia dadi Makotu Lia. Nosi ikus Nia atu tetu lia bodik ema moris no ema mate, na'ak see mak bele moris nima-nimak no Na'i Maromak, no see mak lale. 43 Hori uluk fohon Maromak mako'an sia nakerek nosi Yesus ne'e na'ak, see mak fiar baa Nia, Na'i Maromak nanis simu sia. Nia moos kasu siakaan salan.”
Ema mak lahoos Yahudi simu Maromak Kmalar Lulik
44 Petrus sei dale nunia, teki-tekis Maromak Kmalar Lulik tuun baa ema nia sia hotu-hotu. 45 Petrus niakaan mamaluk ema Yahudi sia nosi kota Yope moos iha nia. Oras sia naree ema wa'in nia simu Maromak Kmalar Lulik, sia blaar karin, tan sia foin naree Na'i Maromak natuun Niakaan Kmalar Lulik bodik ema mak lahoos Yahudi. 46 Sia moos rona ema nia sia dale nodi lia oi-oik no tonu-naboot Na'i Maromak.
Naree nunia, Petrus katak baa niakaan mamaluk sia na'ak, 47 “Emi haree du'uk baa! Ema ne'e sia simu Maromak Kmalar Lulik ti'an, nu'u ita. Tan baa nia, kalo ita sarani sia, la noo ema ida mak bele saseni ita.” 48 Hotu Petrus naruka sia sarani Kornelius bele-bele no niakaan ema sia, nebee sia dadi Yesus Kristus eman. Sarani notu, Kornelius sia nusu Petrus nein loron hira tenik, foin fila baa Yerusalem.