8
1a Oras Stefanus mate nia, Saulus moos iha nia. Nia neon di'ak tan Stefanus mate ti'an.
Saulus nasusar Yesus eman sia
1b-2 Baa oras Stefanus mate, noo ema mak fiar Yesus na'in hira iha nia. Stefanus mate ti'an, sia nola maten nia, hotu nodi baa nakoi. Sia moos tanis Stefanus maten.
Nahuu baa loron nia, ema nasusar tebe-tebes Yesus eman sia iha kota Yerusalem, to'o sia nalai keen karin malu baa rai Yudea no rai Samaria. Hela mesan Kristus klosan sia iha Yerusalem.
3 Saulus moos buka dalan bei-beik atu nadodok Yesus eman sia iha fatin hotu-hotu. Nia tama-sai uma, dada sarat feto no mane, natama baa bui.a
Filipus katak Lia Di'ak iha rai Samaria
4 Masik ema nasusar Yesus eman sia to'o nalai keen karin malu moos, sia la nanawa katak nalore Lia Di'ak nosi Yesus baa ema iha fatin hotu-hotu. 5 Hatete baa Filipus. Baa oras nia, nia baa kota ida iha rai Samaria atu katak lia nosi Yesus, nebee ema natene Yesus nia Kristus mak Na'i Maromak natudu kedan hori uluk. 6 To'o baa, Filipus nalo tadak blaar oi-oik. Ema lear naree saa mak nia nalo, sia moos libur malu atu rona niakaan dale.
7 Baa oras nia, ema mak diabu tekar sia moos iha nia. Diabu sia sai nela ema nia sia, nodi nakrake maka'as. Ema kma'as no ema ai asak moos dadi di'ak. 8 Naree nunia, ema iha kota nia neon di'ak tebe-tebes.
9 Iha kota nia moos noo ema ida naran Simon. Nia matenek aitahan kukun. Kleur ti'an, nia nalo ema Samaria sia fiar niakaan matenek. Nia loko aan na'ak, “Ha'u ne'e, ema maka'as!”
10-11 Tan nunia, ema ki'ik-boot, feto-mane, hotu-hotu fiar baa nia. Sia dale niakaan naran iha kota nia na'ak, “Ema ne'e, maka'as tebes! Saa mak nia nalo, nanis mai nosi Maromak beran!”
12 Mais oras Filipus to'o iha siakaan kota nia, nia nanorin Lia Di'ak nosi Yesus baa sia. Nia moos natudu dalan, nebee sia bele tama dadi baa Na'i Maromak eman. Rona nola nunia, ema lear feto-mane fiar baa Yesus, hotu sia nusu simu sarani. 13 Simon moos fiar baa Yesus, hotu nusu simu sarani. Sarani hotu ti'an, Simon tuir Filipus baa fatin hotu-hotu. Oras nia naree Filipus nalo tadak blaar no lia kasalak basuk sia, nia kaku ulun nodi na'ak, “Maka'as tebes!”
14 Baa oras nia, Kristus klosan sia iha Yerusalem rona nola ema iha rai Samaria sia, simu ti'an Na'i Maromak Manfatin. Hotu sia solok tenik Petrus no Yohanis baa nebaa. 15-17 To'o nebaa, foin sia rona ema Samaria sei la simu dauk Maromak Kmalar Lulik. Sia simu loos sarani nodi Yesus naran dei. Hotu Petrus no Yohanis rai liman baa ema nia sia ulun nodi namulak nusu nebee, ema nia sia moos bele simu Maromak Kmalar Lulik. Namulak notu ti'an, sia moos simu.
18 Oras Simon naree nunia, nia lolo osan baa Petrus no Yohanis nodi nusu na'ak, 19 “Ama sia! Foo beran nia baa ha'u, nebee ha'u krai liman baa ema, sia moos bele simu Maromak Kmalar Lulik.”
20-23 Mais Petrus nakanas na'ak, “O atu kona kastikar mo okaan osan nia! O manoin o bele sosa Na'i Maromak beran modi osan ka? La bele! O la fatan serwisu mo ami, tan okaan neon la loos! Ha'u katene o ne'e, ema mahirus ema. Lia aat wa'in moos kesi o! Di'ak liu, soe lakon okaan a'aat, hotu mamulak baa Na'i Maromak, nebee Nia kasu okaan neon dois nia. ”
24 Rona nola nunia, Simon nakro'an na'ak, “Adeei, ama sia! Tulun hamulak lai, nebee kastikar nia keta kona ha'u!”
25 Hotu, Petrus no Yohanis katak nalore Na'i Yesus Manfatin iha kota nia. Hotu, sia fila nikar baa Yerusalem. Iha dalan, sia tuli leo-leo iha rai Samaria atu keke Lia Di'ak nosi Yesus.
Filipus nasoru ema boot Afrika ida
26 Baa loron ida, Maromak Niakaan makbukar lale'an ida katak baa Filipus na'ak, “Filipus! Baa lorokbelan, mais la'o tuir dalan tuan mak nosi kota Yerusalem borut sai rai Gasa.” 27-28 Rona nola nunia, Filipus moos la'o kedan. Iha dalan, nia naree ema boot ida.b Ema nia mai nosi rai Etiopia. Baa oras nia, rai Etiopia noo na'i feto ida naran Kandake. Ema boot ne'e mak babilan Na'i Feto Kandake sasoin hotu-hotu iha na'in tofatik. Nia foin tuir namulak iha kota Yerusalem. Oras ne'e, nia fila nikar baa niakaan rai. Oras Filipus naree nia, nia no'i sa'e kareta nodi leno hakerek. 29 Maromak Kmalar Lulik katak baa Filipus nebee nare'is aan baa kareta nia, hotu nasoru ema boot nia. 30 Kre'is ti'an, nia rona ema boot nia leno Yesaya niakaan hakerek. Hotu nia nusu na'ak, “Ama! Ita hatene hakerek mak ita leno nia ka lale?”
31 Ema boot nia nataa na'ak, “Lale! Musti noo ema nalore baa ha'u lai, foin bele katene. Sa'e mai, tuur mo ha'u iha ne'e.” 32 Hakerek mak ema boot leno nia, lian nune'e:
“Nia hanesan bibi malae
mak ema dada nodi atu sona no'o.
Nia hanesan bibi malae oan mak ema teri rahun,
mais Nia la nakmee kois.
Nia la loke ibun.
Nia la nataa lia fuan rohan ida.
33 Ema de'an nahaat Nia.
Ema nakotu Niakaan lia la nodi moon.
Masik Nia la noo sala moos,
ema no'o luku.
See mak bele dale nosi Niakaan husar-binan? La noo, tan ema no'o Nia iha raiklaran ti'an.”c
34 Leno hotu ti'an, ema boot nia nusu Filipus na'ak, “Nu'unabee? Bei Yesaya dale nosi niakaan isin lolon du'uk ka, nosi ema seluk?”
35 Rona nunia, Filipus moos nanorin lia Yesus baa ema boot nia nosi Yesaya niakaan hakerek ohin nia, nebee nia bele natene dalan moris atu tuir Yesus. 36 Sia sei no'i la'o, ema boot nia naree wee iha mota ida. Nia dale teri Filipus na'ak, “Ama! Maree! Noo wee iha nebaa. Kalo la noo saseni, ita tuun ona nebee ama sarani ha'u.”
37 [Filipus nataa na'ak, “Di'ak! Kalo ama fiar tebe-tebes baa Na'i Yesus, la noo saa ida mak saseni! Mai tuun ona, nebee ha'u ksarani ama.”
Hotu, ema boot nia katak na'ak, “Ha'u kfiar tebe-tebes ka'ak Yesus nia, Na'i Maromak Oan mak Nia natudu kedan hori uluk.”]d
38 Hotu, ema boot nia naruka kareta nanawa. Sia tuun baa wee, Filipus moos sarani kedas nia.