Maria nahoris Yesus
2
1-2 Baa oras Kireneus dadi gubernur iha Siria, Liurai Agustus nasai ukun na'ak, “Ema hotu-hotu mak iha ukunrai Roma liman laran, ida-idak musti fila baa natama naran iha leo huun!” Oras nia, oras dala uluk bodik ukunrai Roma sura hutun-renu nunia.
Lukas 2:1-24
4-5 Baa oras nia, noo mane ida naran Yusuf. Nia nein iha leo Nasaret iha rai Galilea. Nia sasudin ti'an no feto nurak ida, naran Maria. Maria nia no'i ko'us. Tan Yusuf nia, Na'i Daud husar-binan, nia musti fila baa natama naran iha Na'i Daud niakaan kota Betlehem iha rai Yudea.
Tan lia nia, sia rua baa kota Betlehem. 6 To'o nebaa, Maria loron nahoris moos to'o mai. 7 Iha Betlehem nia, noo uma bodik ema hein heik, mais sia la netan fatik iha nia. Tan baa nia, sia tama baa natar ida laran. Iha nia Maria nahoris oa ulun, oa mane ida. Maria nafu'ut Nia nodi tais, hotu natoba baa bibi no karau haan fatik.
Na'i Maromak nato'o lia di'ak baa makbalin sia
8 Baa kalan nia, makbalin na'in hira daka bibi malae iha kota luan.
9 Teki-tekis, sia naree Maromak Niakaan makbukar lale'an ida. Hotu, Na'i Maromak kroman naksinak baa sia, to'o sia nata'uk liu. 10 Mais makbukar nia katak na'ak:
“Keta hata'uk! Rona mai! Ha'u kmai katak lia di'ak baa emi. Ema hotu-hotu mak rona lia ne'e, nanis neon di'ak.
11 Lia di'ak nia nune'e:
Baa loron ne'e, feto ida nahoris Kristus iha Betlehem, Na'i Daud niakaan kota!
Kristus nia, mak Na'i Maromak nameno ti'an hori uluk.
Na'i Maromak solok Nia mai atu sori ema nosi sala!
Nia ne'e, mak ema atu temi na'ak ‘Ulun’!
12 Emi bele hatene Nia nune'e: Emi atu hasoru kau mea oan ida mak inan nafu'ut nodi tais. Nia toba iha bibi no karau haan fatik laran.”
13 Teki-tekis, Maromak Niakaan makbukar lale'an lear mai namutuk no makbukar uluk nia. Sia tonu-naboot Na'i Maromak nodi nananu na'ak,
14 “Ita foti-hahaas Na'i Maromak naran!
Nia mak nabesi aan kaer ukun iha lale'an mak aas kaliuk.
Nia atu foo dame baa ema raiklaran
mak kona baa Niakaan neon!”
15 Hotu makbukar sia fila baa lale'an. Makbalin nia sia dale baa malu na'ak, “Hei! Mai ita baa Betlehem atu haree oa nia lai! Tan Na'i Maromak solok lia nia baa ita ti'an.”
16 Hotu, sia lai-lais baa Betlehem. To'o nebaa, sia netan Maria no Yusuf no kau mea oan mak no'i toba iha bibi no karau haan fatik laran.
17 Naree oa nia, sia moos katak baa ema na'ak, “Ohin nia, Maromak Niakaan makbukar lale'an sia katak lia oa ne'e baa ami!” Hotu sia katak lia nia to'o mohu.
18 Ema hotu-hotu mak rona, blaar karin. 19 Mais Maria rai lia nia sia baa neon laran, nodi naneo atu buka lia nia sia isin. 20 Makbalin sia naree notu oa nia, sia moos fila nikar baa siakaan bibi malae. Sia tonu-naboot Na'i Maromak naran nodi sera dodan baa Nia, tan saa mak sia rona no sia naree, manesak no saa mak Maromak Niakaan makbukar dale ti'an baa sia.
Sia nanaran kau mea oan nia, Yesus
21 Kau mea oa nia, otas loron walu ti'an, sia nalo lahan hamane aan baa Nia, tuir ema Yahudi siakaan ukun-badu. Niakaan inan no aman nanaran Nia, ‘Yesus’. Naran nia mak uluk makbukar lale'an katak kedan baa oras Yesus inan sei la ko'us Nia dauk.a
Yusuf no Maria nodi oan Yesus baa Uma Hamulak Huun
22 Ukun-badu ida nosi Bei Musa na'ak, feto mak nahoris loron haat nulu ti'an, musti nala'ok adat hamoos aan iha Uma Hamulak Huun. Hodi nunia, nia bele tama nikar baa ema Yahudi siakaan uma hamulak. Tan nunia, Yusuf no Maria baa nala'ok adat nia iha kota Yerusalem. Sia moos nodi siakaan oan Yesus baa Uma Hamulak Huun, atu latan baa Na'i Maromak.b 23 Hodi nunia, sia tuir Na'i Maromak ukun-badu mak na'ak, “Feto mak nahoris oa ulun mak mane, musti latan oan nia baa Na'i Maromak.”c 24 Tuir Na'i Maromak ukun-badu, kalo inan no aman latan oan baa Na'i Maromak, sia musti sera lakateu inan ida no aman ida, lale, lakateu sina tulan matan rua. Yusuf no Maria moos nala'ok ukun-badu nia.d
Katuas Simeon nasee kedan na'ak, kau mea oan Yesus nia, Kristus mak Na'i Maromak nameno ti'an
25-26 Natoon baa nia, noo katuas ida naran Simeon. Nia nein iha kota Yerusalem. Nia ema moon mak beer Na'i Maromak. Kmalar Lulik katak kedan baa nia ti'an na'ak, nia atu naree uluk Kristus lai, foin nia bele mate.
Lukas 2:25-52
27 Baa oras Yesus inan no aman nodi Nia baa Uma Hamulak Huun atu latan baa Na'i Maromak, Kmalar Lulik moos nala'o nodi Simeon baa. 28 Oras naree oan nia, katuas Simeon naka'u nola, nodi tonu-naboot Na'i Maromak na'ak:
29 “Ha'u ktonu Na'i Maromak!
Tan Nia nala'ok mamenon baa ha'u ti'an.
Oras ne'e, Na'i Maromak bele nabusik ha'u,
nebee ha'u kmate no-nook ona.
30 Ha'u karee ti'an Ema mak Na'i Maromak solok mai
atu sori ita nosi itakaan salan!
31 Na'i Maromak nakara nodi oan ne'e
atu sori ema klubun hotu-hotu.
32 Nia atu dadi hanesan kroman.
Nia atu nodi kneter bodik Na'i Maromak eman Isra'el sia.
Nia moos atu natudu Na'i Maromak dalan loos
baa ema seluk sia.”e
33 Rona nola nunia, Yusuf no Maria blaar karin tan katuas Simeon nasee nunia. 34 Hotu, Simeon nusu matak-malirin bodik sia. Nia moos katak kedan baa Maria na'ak, “Yesus inan! Ema wa'in iha Isra'el ne'e atu dudu sees oan ne'e. Mais nosi ikus, siakaan hahalok nia atu nahonu fila sia. Oan ne'e moos atu nalo ema wa'in neon boot. 35 Hodi nunia, Na'i Maromak loke hotu ema neon. Mais rona! Ina atu hetan susar todan, hanesan surik naruk sona borut okaan hirus.”
Ferik Hana sera dodan baa Na'i Maromak, tan Yesus
36-37 Iha Uma Hamulak Huun nia moos, noo ferik ida naran Hana. Niakaan otas tinan walu nulu resin haat ti'an. Aman, naran Fanuel, nosi ema hunun Aser. Ferik nia foin noo la'en tinan hitu, la'en mate nela ti'an. Ferik nia moos Maromak mako'an ida mak namulak no nalirin aan loron-kalan iha Uma Hamulak Huun.
38 Baa oras Simeon dale baa Yusuf no Maria, ferik nia mai kre-re'is nanono sia. Nia rona Simeon dale nunia, nia tonu-naboot Na'i Maromak. Nia moos dale kedan lia Yesus bodik ema hotu-hotu mak sei no'i nei-nein siakaan Na'in mak Na'i Maromak nameno atu solok mai sori ema Isra'el.
Yusuf no Maria nodi oan fila baa leo Nasaret
39 Yusuf no Maria nala'ok mohu Bei Musa Ukun-badu sia iha kota Yerusalem ti'an, sia moos fila baa siakaan leo Nasaret iha rai Galilea.f 40 Hotu Yesus hetak boot, hetak biit, hetak matenek to'o natene lia wa'in. Na'i Maromak moos natudu laran di'ak baa Nia.
Yesus iha Na'i Maromak Niakaan Uma Hamulak Huun
41 Sura tinan, Yusuf no Maria baa kota Yerusalem atu tuir nadahur Paska.g 42 Dala ida, baa oras Yesus otas tinan sanulu resin rua, sia baa kota Yerusalem bele-bele atu tuir dahur nia. 43-44 Dahur Paska nia hotu ti'an, Yusuf no Maria fila baa Nasaret no ema lear mak fila bele-bele baa rai Galilea. Sia la natene na'ak, Yesus sei nein iha Yerusalem. Sia naneo na'ak, Nia la'o namutuk no Niakaan mamaluk sia. Mais to'o loro malirin, sia sei la naree Nia dauk. Hotu sia buka baa-mai iha siakaan familin no mamaluk sia. 45 Mais sia la netan, sia fila nikar baa buka Nia iha Yerusalem.
46 To'o nebaa, sia buka Nia loron tolu laran, foin netan iha Uma Hamulak Huun. Nia no'i taruka lia fuan no ema manorik ukun Yahudi sia. 47 Ema hotu-hotu mak tuur nanono, blaar karin, tan Nia natene tebe-tebes Hakerek Moon isin. Nia moos nataa sia di'a-di'ak. 48 Naree nola nunia, Yesus inan no aman moos blaar. Hotu inan katak na'ak, “Yesus! Tan saa O masusar ami nune'e? Ami rua O aman benar karin ti'an buka O!”
49 Mais Yesus nataa na'ak, “Tan saa ina no ama hasusar aan buka Ha'u? Musti hatene! Ha'u koo serwisu iha Ha'ukaan Ama Uman.” 50 Mais sia la natene Niakaan hakara nia.