Ema seluk Na'i Maromak ukun-badu nodi ukun-badu raiklaran
15
Baa loron ida, ema manorik ukun Yahudi no ema Farisi sia mai nosi Yerusalem atu nalo lia no Yesus, 2 tan sia rona nola ti'an na'ak Yesus Niakaan maktuir sia naa la fasi uluk liman tuir adat. Sia kanarak, tan sia kaer metin siakaan adat Yahudi. Tan lia nia, sia mai tula sala baa Yesus na'ak, “Tan saa okaan maktuir sia naa, mais la fasi uluk liman? Lia nia sakar ti'an itakaan bei uluk siakaan ukun!”3 Mais Yesus nataa na'ak, “Emi ne'e dale seluk, halo seluk! Emi matenek sakar Na'i Maromak hakaran hodi seluk bei uluk siakaan hakaran dei. 4 Na'i Maromak naruka ti'an na'ak, ‘Hakneter emikaan inan-aman.’ Tu'an tenik na'ak, ‘Kalo ema ida de'an aat baa inan-aman, musti taa ukun mate baa ema nia.’a 5-6 Na'i Maromak nanorin tebes nunia, mais emi hanorin seluk. Emi ha'ak, ‘Ema ida lalika nodi niakaan naha atu tulun inan-aman, kalo nia nameno ti'an atu sera naha nia baa Na'i Maromak. Masik inan-aman susar basuk moos, lalika foo.’ Hodi hanorin nunia, emi soe ti'an Na'i Maromak ukun, seluk hodi emikaan ukun du'uk. 7 Tan baa nia, Ha'u katak ohin ka'ak, emi ne'e dale seluk, halo seluk! Maromak mako'an Yesaya nakerek kedan hori uluk nosi emi na'ak,
8 ‘Ema nia sia tonun Ha'u,
nodi ibun dei, la nodi neon.
9 Tonun oin nunia, butan dei.
Sia la nikir Ha'ukaan ukun,
sia nikir loos ema raiklaran ukun dei.’”b
Lia aat sai nosi ema neon
10 Nunia hotu, Yesus bolu nola ema seluk iha nia, hotu nanorin sia na'ak, “Ta'an tilun di'a-di'ak, nebee emi bele tolan! 11 Saa mak tama baa ema ibun laran la nalo ema kadoor. Mais saa mak sai nosi ibun mak nalo kadoor.”
12 Hotu Yesus Niakaan maktuir sia mai nusu Nia na'ak, “Ama, matene ka lale? Ema Farisi sia laran moras, tan rona Ama dale nia.”
13 Mais Yesus nataa na'ak, “Ha'ukaan Ama iha lale'an atu fokit soe ema mak la nanorin tuir Niakaan beer. Nia atu fokit sia hanesan ema fokit mohu ai horis mak ema la beer. 14 Dadi lalika hanoin baa ema Farisi nia sia! Sia nia, hanesan ema matan delek mak nadaek malu. To'o ikus, sia monu bele-bele tama baa kuak laran.”c
15 Hotu Petrus dale na'ak, “Ama, malore baa ami lai lia hatetek nia isin!”
16 Yesus nataa na'ak, “Emi moos sei la hatene dauk ka? 17 Lia isin nune'e: Saa mak ema haa, tama tuir ibun, liu baa kabun, hotu sai nikar baa luan. 18 Mais saa mak sai nosi ibun, lia nia mak nalo ema kadoor, to'o Na'i Maromak nakribi ema nia.d 19 Lia aat wa'in sai nosi ema neon! Hanesan hanoin aat, ho'o ema, hakur biti-kluni, halo lia kfo'er, hana'o, hataa lia tolek, no dale hahaat ema. 20 Lia oin nunia sia mak nalo ema kadoor. Mais, kalo ema naa nodi la fasi uluk liman tuir adat, nia la dadi baa lia.”
Yesus tulun feto ida mak lahoos ema Yahudi
21 Hotu Yesus la'o nela fatin nia, baa rai mak kre'is no kota Tirus no kota Sidon. 22 Iha nia, noo feto ida nosi rai nia. Feto nia lahoos ema Yahudi. Mais baa oras rona Yesus mai ti'an, nia mai nusu tulun baa Yesus na'ak, “Na'i Daud husar-binan! Madomi ha'u lai! Diabu tekar ha'ukaan oan feto to'o nia susar basuk.”
23 Mais Yesus no-nook dei, la nataa saa ida. Hotu Niakaan maktuir sia mai nasara na'ak, “Ama, feto ne'e nahii nalau aan dei. Di'ak liu Ama naruka nia sees nosi ne'e ona!”
24 Yesus nataa na'ak, “Na'i Maromak naruka Ha'u kmai atu tulun itakaan ema Yahudi, tan sia hanesan bibi malae mak la'o sala dalan. Nia la naruka Ha'u kmai tulun ema seluk.”
25 Mais feto nia mai kre-re'is tenik baa Yesus. Nia nakni'a nusu tulun na'ak, “Ama Boot! Ama tulun ha'u lai!”
26 Hotu Yesus soe lia na'ak, “La kona kalo hola haan hosi lawarik oan, foo baa asu.” [Lia isin subar na'ak, Yesus musti tulun Niakaan ema Yahudi, lahoos ema seluk.]
27 Mais feto nia nataa na'ak, “Tebes, Ama! Mais asu nia iha hadak ohak. Nia moos bele naa saa mak monu nosi lawarik oan bikan.” [Lia isin subar na'ak, baa oras lawarik oan naa, asu moos bele naa. Masik Yesus tulun Niakaan ema sia moos, Nia musti tulun no ema seluk.]
28 Rona nola nunia, Yesus katak baa feto nia na'ak, “Ina, tan o fiar tebe-tebes, fila ona. Saa mak o musu nia dadi ti'an!” Hotu feto nia fila. To'o uma baa, naree oan di'ak tebes ti'an.
Yesus nadi'ak nola ema moras lear
29 Nunia hotu, Yesus no Niakaan maktuir sia la'o nela fatin nia, la'o nalolon tuir debu Galilea tehen. Hotu sia sa'e liu baa foho ida atu nein heik iha nia. 30 Ema lear moos mai baa Yesus. Sia nodi ema ai kma'as, ema matan delek, ema ai asak, ema nunuk, no ema moras seluk sia. Sia rai ema moras nia sia kre-re'is baa Yesus ain. Hotu Nia nadi'ak nola sia. 31 Titu-naree nunia, ema lear nia moos blaar. Sia dale na'ak, “Maka'as liu resik! Ema ai kma'as, bele la'o. Ema matan delek, bele naree. Ema ai asak, bele di'ak. Ema nunuk, bele dale! Ne'e nanis Na'i Maromak mak nalo. Nia mak ema Yahudi sia lo'u-sudur baa.”
Yesus nahaan ema na'in rihun haat
32 Nunia hotu, Yesus bolu nola Niakaan maktuir sia nodi dale na'ak, “Ha'u kdodan tebes ema lear ne'e sia. Balu mai nosi dook. Sia namutuk iha ne'e loron tolu ti'an, to'o haan la noo ona. Di'ak liu sia keta fila nodi kabun mamuk. Keta to'o sia nakloti iha dalan klaran tan salaen.”
33 Mais Yesus Niakaan maktuir sia nataa na'ak, “Ama! Fatik ne'e dook nosi leo. Ita la bele hahaan ema lear nune'e.”
34 Mais Yesus nusu sia na'ak, “Emi hoo tubi baluk hira?”
Sia nataa na'ak, “Baluk hitu dei! No na'an tasi oan ida!”
35 Hotu Yesus naruka ema nia sia hotu-hotu tuur baa rai. 36 Nia nola tubi baluk hitu no na'an tasi nia, hotu sera dodan baa Na'i Maromak. Hotu Nia tohi fa'e, foo baa maktuir sia nebee fa'e baa ema nia sia hotu-hotu. 37 Sia hotu-hotu moos naa to'o bosu. Naa notu, maktuir sia libur nola haan resin sia, nakonu ko'e boot hitu. 38 Ema hotu-hotu mak naa nia, takseer mane na'in rihun haat. Sei la sura dauk feto no lawarik oan sia. 39 Nunia hotu, Yesus naruka ema lear nia fila nikar. Hotu Nia sa'e baa bero atu baa rai Magadan.e