Paulus nasala'e aon nai mane' Agripa matan
26
Boe ma mane' Agripa nadenu Paulus nae, “Besa' ia, o bole masala'e aom. Ami basa sadia nenene.”Paulus tudu lima na ela lahenda sira nenee', ana dedea nae,
2 “Papa mane' Agripa fo au hada-horomata. Au aua-anale, nana huu papa fee au lela' fo bole au tui papa sara, basa hihii-nanau' fo lahenda Yahudi ra kolaa' au a. 3 Au bubulu' papa malela' matetu' ita lahenda Yahudi hadas na, ma la'e-neu' ita mamate-masodan. De au hule papa nenene matalolole au.
4 Au eme aana ka mai, ara ranori-rafada au asoda tuka ita lahenda Yahudi hadas na. Masososa na au hapu nanori-nafada' nai au koro-taduk; basa de au sakola tamba nai Yerusalem. Lahenda Yahudi fo rai Yerusalem bubulu' au eno masoda ka, ma ara ralela' matetu' au. 5 Kalu malaka agama ra nau, sona ara bisa tui rae, ara ralela' au neme ulu' mai. Huu fo au boe maso' partei agama Farisi. Basa lahenda bubulu' ami lahenda Farisi a, homu mahere atoran agama Yahudi katema'.a 6-8 Au ma basa lahenda Israel leo kasanahulu dua' ara, ami mahani Manetualain natetu na Ria hehelu-barataan. Neme fai a ulu na mai Ana tao hehelu-barataa' ria no ita bei-ba'in. De losa besa' ia, ita hule-haradoi hatu-leledon, ela Manetualain hehelu-barataan ria dadi leo. Hehelu-barataa' ria isi-liin nae, neu' ko Ana fee lahenda mana mate' ara rasoda selu'.
Papa mane' Agripa fo au hada-horomata! Huu no au amahere neu' ko Manetualain fee lahenda mana mate' ara rasoda selu', huu ria naa ara radedea ro au. Au nau atane: ubea' taon de neme emi mai, ta mamahere Manetualain bisa fee lahenda mana mate' ara rasoda selu'? Tantu Ana bisa!
9 Maulu na tebe au tao sudi ubea', soa' lahenda fo ri' tuka Yesus, lahenda Nasaret. 10-11 Tepo' ria, malaka agama Yahudi malaka nara fee au kuasa, fo tao asususa' Yesus lahenda nara rai basa mamana' ain. Au hopu aa si ma hela oo si leo Yerusalem reu, fo tee si leo bui dale' reu. Au boe aetu' fo huku raisa ruma. Au leo uma mamaso' ara dale' uu, fo tao doidoso si, ma aseti si fo ralena Yesus. Kadodou na, au usi si no nasa'. Sadi au amanene lahenda fo ramahere Yesus rai bea a, leo mae losa nusa dea boe, au usi tuka si.”b
Paulus tui selu' hata fo nita ma namanene
12 Paulus dedea naroo nae, “Lai' esa de malaka agama Yahudi ra fee au susura kuasa fo uu hopu Yesus lahenda nara rai kota Damsik, boe ma au uu. 13 Papa mane' Agripa! Ami bei la'o-la'o nai eno talada', bate ledo a namatetu, kekeneu te, makaledo' esa neme lalai mai tande na seli', haa la'e au oo nonoo kara. 14 Ami basa leku-bara meu, nana huu makaledo' ria tande na seli. Boe ma au amanene haraoe' esa dedea no au pake dedea Aramc nae, ‘Saulus! Saulus! Ubea' taon o tao doidoso Au la'o maroo? Susa laesa' kalu o malena-laka la'o naroo Au hihii-nanau Ka.’ 15 Au amanene haraoe' ria, tehuu ta ita lahenda. De au atane ae, ‘Ramatua' fo ri' dedea' ia, nana bea?’
Haraoe' ria nataa au nae, ‘Au Yesus, fo ri' o tao doidoson la'o naroo'. 16 Saulus! Foa leo! Au atudu ao-ina Ka neu' o, ela o dadi Au lahenda kamahere Ka. O muste mafada basa lahenda ra, hata fo fai' ia, o mita neme Au mai. Neu' ko Au atudu fee selu' o hihii-nanau' bebeu', ela o bisa mafada basa lahenda ra. 17 Neu' ko o hapu susa rupa'. Tehuu Au anea o neme lahenda fo tao rasususa' o, leo mae lahenda Yahudi, do lahenda nusa feke' ara. Tebe! Au adenu o leo lahenda fo ta Yahudi. 18 O muu tao ma mata nara radila', ela ralela' ma rasoda nai makaledo' a dale'. Ma sira muste foa ela eno masoda peko-paki nara, ma o matudu si eno masoda roo-tetu'. O po'i maa si reme nitu ra malaka na kuasa na mai, moo si leo Manetualain reu, ela Ana sae-safe heni sala-siko nara. Sira boe dadi Manetualain lahenda nara, sama-sama ro lahenda feke' fo ri' Manetualain teka-here si; nana huu ramahere Au. Saulus, Au afada o, noi ri naa'.’”
Paulus nafada ria nonoi-lakan
19 Paulus dedea naroo nae, “Papa mane'! Au alala'o nonoi-laka' fo ri' au sipo mata' neme nusatetu-ikutema' a mai. Losa' besa' ia, au bei oi-tao la'o naroo, au ta heo' bai' boe'. 20 Masososa na au tui-beka Yesus Eno Masoda Na fee lahenda Yahudi fo rai Damsik. Basa de au tui-beka fee lahenda Yahudi fo rai Yerusalem, ma rai propensi Yudea katema'. Au la'o rule-feo lahenda fo ta Yahudi nusa nara. Au dedea leleka' neu' basa si, ela ara foa ela sira eno soda' masala nara, ma fee ao-ina nara neu' Manetualain. Nai sira masodan dale' ara muste tao malole soa-neu' lahenda feke', ela dadi tanda nae, sira dadi lahenda bebeu' nai Manetualain dale'.d 21 Huu no au oi-tao leo naa', de lahenda Yahudi ra hopu au nai Uma Mamaso Yahudi Ina nai Yerusalem, fo nau raisa au. 22 Tehuu Manetualain tulu-fali au, huu ria naa, au bisa asoda losa besa' ia. De au bisa apadei nai ia fo tui basa lahenda, aana-bauina' la'e-neu' Yesus Eno Masoda Na. Hata fo au afadan ia, natetu na hata fo ri' ba'i Musa ma Manetualain mana nesi mata fai ulu nara ranori-rafada. 23 Ara ranori-rafada la'e-neu' Kristus, Lahenda fo Manetualain helu nau fee Ni mai, rae Ana muste doidoso, mate Ni, ma Ana dadi lahenda masososa' fo ri' Manetualain feen nasoda selu'. Ria ri' neu' ko neni makaledo' soa-neu' lahenda Yahudi ra, ma lahenda nusa feke' nai dae-ina'.”e
24 Paulus bei tui ria nonoi-tataon, te Festus nahapu-hani Paulus no hara bera' nae, “Paulus! Bate o mamulu ia! O bubulu' dodou-ina', losa o momoo' leo laka ani.”
25 Tehuu Paulus nataa nae, “Papa gubernor fo au hada-horomata. Au ta kamulu'. Basa-basan fo au afada a mema' tebe, au ta oi aneneu' a. 26 Papa mane' Agripa bubulu' matetu', hata fo ri' au dedea ia, au aparani tuin neu' loa na. Au amahere papa mane' namanene basa hihii-nanau' ia ra, nana huu hata mana dadi', ri' Yesus maten ma nasoda selu' a, nana ta dadi nai mamana nafuni'. Basa lahenda ra bubulu' hihii-nanau' ria boe. 27 Neme fai a ulu na mai, Manetualain mana nesi mata nara rafada mema' hihii-nanau' ia, de au aparani apasa' ae, papa mane' boe, mamahere mana nesi mata sira dedea-nafada nara, hete?”
28 Mane' Agripa nahapu-hani ni nae, “Paulus! O mae hatemata' ia, o bisa kokoe au dadi lahenda Kristen!”
29 Paulus nataa mane' a nae, “Leo ia', papa. Au hule-haradoi neu' Manetualain, ela doo' a, do ta doo' a, ta noi papa mane' fa, tehuu basa lahenda fo fai' ia ramanene au dedeak ia, bisa dadi Yesus lahenda nara sama leo' au! Tehuu sadi papa kasa boso' dadi lahenda mana huku' sama leo' au.”
30 Paulus dedea nae leo' naa, boe ma mane' Agripa no feton Bernike, gubernor Festus ma basa malaka bau-ina' sira foa rapadei', de ara fali.
31 Ara dea' reu, ma bei dea rae, “Lahenda ia, ta tao sala' fo ri' naraa hapu huhuku mamates, do ena ni nai bui dale'!”
32 Boe ma mane' Agripa nafada gubernor Festus nae, “Kasian laesa', leo lahenda ia ta hule naae' dedea ia leo nusa' a huu na nai Roma, sona dedea' ia basan ada' ia, ma bisa po'i ni.”