3 Sipo na susura' kuasa ria, boe ma no nonoo nara leo Damsik reu. Ara ranenea' kota ria, kekeneu te, makaledo' esa nahate neme lalai mai, de haa la'e Saulus. 4 Ana leku-bara neu, ma namanene haraoe' esa nae, “Saulus! Saulus! Ubea' taon o tao doidoso Au leo' ia?”

5 Saulus natane nae, “Ramatua' fo ri' dedea ia, nana bea?”

Haraoe' ria nataa nae, “Au Yesus, fo ri' o ese-rumu Ni. 6 Besa' ia, foa fo kota dale' muu leo. Neu' ko nai naa, besa' ko Au afada o muste tao ubea'.”

7 Saulus nonoo nara ramanene haraoe lii' ria, tehuu ta rita lahenda esa boe'. De mopo dudu'a-aafi nara, losa' ta bisa dedea hata-hata esa boe'.

8 Boe ma Saulus foa napadei'. Ana nadila' sudi mata na, tehuu ta nita dae fa. Ara tai ra lima na, de hela roon leo kota Damsik neu. 9 Fai' telu dalen, ana ta nita dae, ma ta naa-ninu hata-hata esa boe'.

10 Nai naa, Ramatua Yesus lahendan esa, nade Ananias. Ramatua' a natudu ao-ina Na neu' ana nonoo' leo nalamei, naloo ni nae, “Ananias!”

Ananias nataa nae, “Ia, Ramatua'!”

11 Ramatua' a nafadan nae, “Mai dei. O muu saka Au lahenda Ki esa. Leo Eno Roo-tetu' a muu, nai lahenda esa nade Yudas, uma na. O saka lahenda Tarsus esa nai naa, nade Saulus. Besa' ia, ana hule-haradoi. 12 Au feen natutudu' ae, neu' ko tou' esa, nade Ananias, mai dama ni. De o muu fo fua lima ma neu' ana ela nita dae.”

13 Tehuu Ananias nataa fali' nae, “Ramatua' leo ia'! Ami mamanene lahenda tui ii-ona' la'e-neu' lahenda ria, huu fo ana tao doidoso Ramatua' a lahenda nara rai Yerusalem, losa' ara ta dadadi' so'! 14 Besa' ia, ami mamanene bali rae, malaka agama ra malaka nara feen kuasa fo mai hopu na laesa' lahenda fo ri' tuka Ramatua Yesus Eno Masoda Na.”

15 Tehuu Ramatua' a dedea selu' no Ananias nae, “Leo mae leo' naa boe, besa' ia muu leo! Huu fo Au teka-here ni ela soi eno', fo neni Au Tutui Malole Ka soa-neu' lahenda nusa feke' ara, mane' ara, ma lahenda Israel ara. 16 Ma neu' ko Au atudu ni, ela ana bubulu' doidoso rupa ubea' nahani ni, nana huu ana tuka Au.”

17 Ananias namanene Ramatua' a dedea nae leo' naa, boe ma leo uma ria neu. Ana fua lima na neu' Saulus ma nae, “A'a Saul. Ramatua Yesus fo ri' a'a leo ia' mai, de mita Ni nai eno talada' a, Ana nadenu au mai dama a'a. Ana nadenu au hule-haradoi ma fua lima ka neu' a'a ela mita dae selu'. Ma Ana nau a'a sipo Ria Dula-dale Malalao-malalafu Na.”

18 No besa' ria boe, Saulus nameda hata esa nonoo' leo ika une' a buka' ela mata na, boe ma ana nita dae tuti'. Ana foa de ara sarani ni. 19a Boe ma naa-ninu, de bara'ai na aon.

19b Saulus bei leo fai' hida no Ramatua Yesus lahenda nara rai kota Damsik. 20 Ma ana leo lahenda Yahudi ra uma mamason dale' neu, boe ma ana nafada si nae, “Emi nenene matalolole! Yesus tebe-tebe Manetualain Anan.”

21 Basa lahenda ra heran ma roi ramakokoa' a ramanene Saulus dedea nae leo' naa. Ara bei dedea rae, “Lahenda ia ri' tao nalulutu' Yesus lahenda nara, nai Yerusalem, hete? Boe ma ana leo ia' mai, fo nau hopu neni si leo malaka agama Yahudi ra malaka nara reu. Leo bea' ia?”

22 Tehuu Saulus nau natudu buti nae, Yesus nana Kristus fo ri' Manetualain helu mema' neme fai a ulu na nae fee Ni mai. Saulus nanori-nafadan leo naa', losa' ana naseki lahenda Yahudi ra. No ria naa, Saulus tao na lahenda boe-boe ralela' ana.

23 Ta doo bea boe' te lahenda Yahudi ra rala hara' fo nau raisa Saulus. 24 Tehuu Saulus hae na dudu'a-aafi tadalun sira. Lahenda ra tepa ni hatu-leledon nai kota a lelesu bafa nara, fo nau raisa ni. 25 Tehuu hatu' esa, boe ma Saulus nonoon hida raonda ni neme tembok lain mai neu' sapai esa dale'. No ria naa, ana nalai la'o ela kota Damsik.^a

26 Basa de Saulus leo Yerusalem neu. Losa naa, boe ma ana nau nabua no Ramatua Yesus lahenda nara. Tehuu basa si bii, huu fo ara raendobuko ana tao aon sama leo' lahenda kamahere' fo tuka Ramatua Yesus. Basa te hopu na si. 27 Tehuu lahenda esa, nade Barnabas. Ana no Saulus leo Ramatua Yesus lahenda nadedenu nara neu, ela ralela' ana. Ana tui si la'e-neu hata fo dadi neu' Saulus nai eno talada'. Ana nafada nae, Saulus nita Yesus, ma Ramatua' a dedea mata' no ni. Ana tui si nae Saulus naparani nafada lahenda nai Damsik, la'e-neu' Ramatua Yesus Eno Masoda Na.

28 Basa si ramanene leo' naa, boe ma ara sipo' Saulus. Ana leo no si rai kota Yerusalem. Ana naparani tui-beka Ramatua Yesus Tutui Malole Na, neu' sudi bea a, ana ta bii-namata'u. 29 Ana natatane ao' no lahenda Yahudi hida pake dedea Yunani. Tehuu ara ta sipo' ria dedea-nafadan, huu ria naa ara saka eno' fo raisa ni. 30 Tehuu Ramatua Yesus lahenda nara ramanene rae, lahenda du'a-aafi tadalu leo naa', de ara roo Saulus leo kota Kaisarea neu. Boe ma ara fee ni fali leo kota Tarsus neu.

31 Yesus lahendan fo rai propensi Yudea, Galilea, ma Samaria rasoda no tesatei-tamadale' ma tamba dodou'. Ara tuka Manetualain hihii-nanaun, de Dula-dale Malalao-malalafu' a tao natetea dale nara.

32 Tepo' ria, Petrus la'o rule-feo basa mamana' ain, neu dama Ramatua' a lahenda nara. Fai' esa boe ma neu dama si rai koro Lida. 33 Ana nita tou' luku esa, nade Eneas, nahani' mamana susukun lain teu' falu so.

34 Petrus nafada ni nae, “Eneas! Besa' ia Yesus Kristus puli na o. De foa leo, mafafau mamana susuku ma!”

Lahenda ria namanene leo' naa, boe ma ana foa tuti'. 35 Basa lahenda rai koro Lida ma Saron, rita Eneas te'e na aon, boe ma basa si ramahere Ramatua Yesus.

36 Tepo' ria, ina' esa nade Tabita, leo nai tasi suu' nai kota Yope. (Ina' ria, nade na nai dedea Yunani rae, ‘Dorkas’, sosoa na nae ‘rusa’).^b Ana namahere Ramatua Yesus. Ma ana tao hihii-nanau' malole kose-kose fee lahenda, ma tulu-fali lahenda manato'a-manataa' ara. 37 Fai ria, mama Tabita namahedi, de maten. Ara radiu ni oe, popoti ra popora na, boe ma reu rapeu' ana neu' kama misi lai' a. 38 Ara ramanene rae, Petrus nai Lida, kota esa la'o ei' neme Yope mai sona, dodoo na bate fai seseri' esa. Ara radenu lahenda dua reu raloo Petrus rae, “Papa! Ami hule papa lai-lai leo Yope muu dei.”

39 Petrus namanene leo' naa, boe ma foa de tuka si tuti'. Losa naa, boe ma ana maso' leo mama Tabita kama na neu. Kama ria henu' no ina-falu ra, ara dola-ramatani rai naa. Ara ratudu Petrus, sira badun ma kakao-papake feke' fo Dorkas rau fee si ri' bei nasoda a.

40 Petrus nadenu si kalua reme kama ria mai. Ana sunda' undulaka na fo hule-haradoi. Boe ma nasare na popora' ria, ma dedea nae, “Tabita! Foa leo!” Kekeneu te, ina' ria nadila' mata na. Ana nita Petrus, boe ma foa natuu'. 41 Petrus tai na lima na, de hela nafoa ni. Boe ma feen leo ina-falu ra ma lahenda feke' fo rai naa.

42 Tutui' ria rule-feo basa mamana' ain nai kota Yope, losa' lahenda dodou' ramahere Ramatua Yesus. 43 Petrus leo fai' hida bali nai tou' esa, nade Simon, uma na. Tou' ria nonoi-laka na, keu banda rou'.