Paulus nasala'e aon
22
Boe ma Paulus dedea nae, “Papa kasa, ma toranoo kara emin! Au hule emi mamanene au, te au saka' asala'e ao ka.”2 Lahenda kadodou' sira ramanene Paulus dedea pake sira dedea na, boe ma nenee' huu fo ara nau nenene Paulus dedea na no malole. Ana dedea naroo nae, 3 “Sadi emi basa bubulu', au lahenda Yahudi. Mama ka boki au nai kota Tarsus, nai propensi Kilikia. Tehuu au ambau-ina nai Yerusalem. Mesen bau-ina' Gamaliel, ri' nanori-nafada lutu-lutu au ba'i Musa atoran nara katema'. Au makate tuka Manetualain sama leo' emi boe.a 4 Fai maneu' ara au ta hahae usi ma tao asususa' lahenda fo tuka Ramatua Yesus Eno Masoda Na. Au hela oo si ina-tou' leo Yerusalem mai, ma tee si leo bui dale' reu, losa' mate ruma. 5 Ita malaka agama na malaka bau-ina na ma malaka feke' mana parisa' dedea' agama, basa si bubulu' hata fo au dedea a, tebe leo' naa! Au ta dedea fufudi', huu fo sira fee au susura kuasa, uu hopu lahenda fo tuka Yesus losa kota Damsik. Nai naa, au nau hopu aa si ma hela oo si leo Yerusalem mai. Au maksud ka, ela lahenda mana ee dedea' agama, dei huku si.”b
Paulus tui hata fo nita ma namanene
6 Paulus dedea naroo nae, “De au leo Damsik uu saka si rai naa. Bate ledo a namatetu, ami saka' losa bendar. Kekeneu te makaledo' esa nahate neme lalai mai, haa la'e au. 7 Au leku-bara uu, ma amanene haraoe' esa nae, ‘Saulus! Saulus! Ubea' taon o tao doidoso Au leo ia'?’ 8 Au amanene haraoe' ria, tehuu ta ita lahenda. Boe ma au atane ae, ‘Ramatua' fo ri' dedea ia, nana bea?’
Haraoe' ria nataa nae, ‘Au Yesus, lahenda Nasaret, fo ri' o tao doidoso Ni!’ 9 Lahenda fo ri' la'o ro au a, rita makaledo' ria, tehuu ara ta ramanene haraoe' ria.
10 Boe ma au ataa ae, ‘Kalu leo' naa, sona besa' ia au muste tao ubea'?’
Haraoe' ria nafada nae, ‘Foa fo kota dale' muu leo. Neu' ko nai naa, besa' ko Au afada basa-basan fo o muste taon.’
11 Au amanene leo' naa, boe ma foa apadei, tehuu ta ita dae so', nana huu makaledo' ria tande na seli. Au nonoo kara tai ra au, de hela roo au leo kota Damsik uu.
12 Nai naa, lahenda esa, nade Ananias. Ria lahenda dale roo-tetu', ma homu nahere ba'i Musa atoran ara. Basa lahenda Yahudi fo leo rai kota ria, rahii' ana ma hada' ana. 13 Ana mai saka au, ma dedea nae, ‘A'a Saulus! Madila' mata ma mita dae leo! Huu fo a'a mata ma te'e na aon.’ Ana dedea nae leo' naa, boe ma au boti' laka ka de ita ni. 14 Boe ma ana nanori-nafada au nae, ‘Manetualain fo ri' ita bei-ba'i nara do'o-tabe Ni a, besa' ia teka-here na a'a. A'a nonoi-laka ma ri' bubulu' matalolole Ria hihii-nanaun, ma malela' Yesus fo ri' neme fai a ulu na ita taloo tae, “Lahenda Malalao-malalafu'”. Besa' ia Manetualain soi eno' ela a'a mamanene mata' neme Yesus mai. 15 Ria ri' teka-here na a'a fo tui-beka Tutui Malole Na soa-neu' lahenda nai basa mamana' ain. A'a muste mafada basa-basan fo a'a mita ma mamanene neme' Ana mai. 16 A'a boso' mahani bali! Muu hule si fo sarani a'a, ela dadi tanda nae, a'a hule Ramatua Yesus sae-safe heni sala-sikom.’”
Manetualain nadenu Paulus tui-beka Tutui Malole fee lahenda nusa' fo ta Yahudi
17 Paulus dedea naroo nae, “Boe ma au fali Yerusalem uu. La'i esa de au hule-haradoi nai Uma Mamaso Yahudi Ina. Au hule-haradoi, boe ma Ramatua' a natudu au, nonoo' leo meis. 18 Au ita Yesus, Ana pareta au nae, ‘Besa' ia, o muste la'o ela kota Yerusalem! Nana huu lahenda fo rai ia, ta sipo' o manori-mafada la'e-neu' Au.’
19 Tehuu au ta sipo' pareta ria, nana huu maulu na malaka agama ra rahii' au. De au ataa ae, ‘Tehuu leo ia', Ramatua'! Sira basa bubulu', fai naa ra, au ri' maso-kalua uma mamaso' nai basa mamana ain, fo hopu ma popo'o lahenda fo ramahere Ramatua' a. 20 Sira bubulu', fai fo pia raisa Ramatua' a lahenda nadedenum Stefanus, au nai naa, ma au sipo'. Ara raunu batu fo pia ni, au ri' ator asa ma au anea sira badu nara.’c
21 Au fee nafarerene' leo' naa, tehuu Yesus pareta bali nae, ‘Boso' saka eno rupa' bali! Besa' ia foa ela Yerusalem, fo la'o leo! Au saka' adenu o leo mamana doo' ara muu, manori-mafada lahenda fo ta Yahudi sira.’”
22 Lahenda kadodou' sira ramanene Paulus dedea nae, Manetualain nadenu ni leo lahenda nusa feke' a neu, boe ma ara ta rahii' ramanene so'. Basa si ramanasa, de rahara bela' a rae, “Boso mamanene lahenda ia bali! Maisan leo! Ana ta naraa nasoda so'!”
Soldadu ra roo Paulus leo kota musu neu
23 Ara rahara rae leo' naa, boe ma olu heni badu nara, ma ara huru afu kari lain neu, nana huu ramanasa raan seli. 24 Komendaan ria nita lahenda sira tao kaco bali, boe ma nadenu soldadu nara hela roo Paulus leo kota musu dale' neu, ma fepa ni, ela ana manaku nae, ria tao sala' ubea', losa lahenda Yahudi ra nau raisan. 25 Ara heke ra Paulus fo saka' fepa ni, boe ma ana natane natafali' soldadu ria nae, “Tuka mana pareta Roma atoran na, tea na ri' ubea'? Kalu nusa Roma anaraun esa nala dedea', emi muste taon leo' bea? Emi fepa maulu' ana, do sadi ko emi parisa' maulu' ana?”
26 Soldadu ria namanene leo naa', boe ma lai-lai neu saka komendaan na, de ana tui ni nae, “Papa! Lahenda ia, anaraun nusa Roma! De papa saka' taon leo' bea?”
27 Komendaan namanene leo' naa, boe ma neu natane Paulus nae, “O mae o anaraun Roma? Tebe, do?”
Paulus nataa nae, “Mema' tebe! Au anaraun nusa' ria.”
28 Komendaan ria nae, “Au boe leo naa'. Au bae doi' dodou', besa' ko dadi anaraun nusa' ria.”
Tehuu Paulus nataa nae, “Kalu au, ta bae hata-hata esa boe'. Mulai neme mama ka boki au, au homu haak ria so. Au papa ka boe homu haak ria.”
29 Soldadu ra ramanene Paulus nae, ria anaraun Roma, boe ma ara heo', ta raparani fepan ma parisa' ana so'. Komendaan ria bii', nana huu ana heke na Paulus, ma bubulu' ana nalena-laka atoran.
Paulus nai mamana parisa dedea agama Yahudi
30 Balahaa' boe ma komendaan ria, nadenu soldadu nara reu raloo malaka agama Yahudi malaka nara ma basa lahenda bau-ina' mana parisa dedea agama Yahudi rabua, huu fo ana nau bubulu' matetu' dedea' ria tute na huu ubea'. Boe ma ana nadenu reu buka heni Paulus rante na, fo roon neu nataa sira basa.