Gubernor Festus parisa' Paulus dedea na
25
Tepo' ria gubernor bebeu' Festus, narali Kaisarea neu fo nalala'o pareta. Ana nai naa noi fai' telu' a, boe ma leo Yerusalem neu. 2 Nai naa, malaka agama Yahudi ra ro malaka feke' ara mai ralelela ao' ro gubernor bebeu'. Nai sira nabuan ria, ara tui Paulus dedea na. 3 Ara hule kalu bisa, sona gubernor nadenu lahenda nara roo fali' Paulus leo Yerusalem neu. Sekonaa te ara rala hara', fo raisa Paulus nai eno talada'.4 Tehuu gubernor nataa nae, “Papa kasa. Leo ia'. Neme' naa ela ara ena ni nai Kaisarea. Huu fo au nau lai-lai fali leo naa' uu. 5 De neme emi mai, bea hapu kuasa fo urus dedea' ia, sona sira sama-sama ro au leo Kaisarea meu. Kalu tebe lahenda ia nasala' ubea', sona emi bole madedea mo ni nai naa.”
6-7 Festus bei nahani' Yerusalem bate fai' sanahulu, besa' ko fali Kaisarea neu. Lahenda Yahudi hida tuka roo ni. Balahaa' boe ma gubernor nau parisa' dedea' ria. Ana nadenu roo Paulus mai nataa ni.
Paulus losa boe ma lahenda Yahudi sira eo raan, ara mulai tu'u feen sala' rupa', tehuu ta ratudu buti esa boe'.
8 Paulus nasala'e aon nae, “Papa gubernor! Au ta parnaa tao asala' hata esa boe'. Au ta tao hihii-nanau' nalena-laka' neu' ami atoran agama Yahudi. Au ta tao akekeo-akakanu Manetualain Uma Mamaso Yahudi Ina Na nai Yerusalem. Ma au ta tao hata esa nalena-laka neu' atoran mana pareta Roma.”
9 Tehuu gubernor nau hai lahenda Yahudi ra dalen, huu ria naa ana natane Paulus nae, “O aafi ma leo' bea? Kalu au parisa' dedea ma nai Yerusalem, o mataa do ta'a?”
10 Paulus namanene gubernor natane nae leo' naa, boe ma nataa nae, “Papa gubernor. Au anaraun Roma. Ma besa' ia, au apadei nai papa gubernor mana pareta Roma matan, fo ri' nanuu haak parisa' au dedea ka tuka atoran. De au ta nau leo Yerusalem uu, fo raetu' au dedea ka nai naa. Papa ri' bubulu' au ta tao asala' hata esa boe', do alena-laka neu' lahenda Yahudi ra. 11 De kalu tebe au tao asala' fo naraa huku maisa au, sona au sipo', tehuu kalu sira dedean ria, ta la'e tuka atoran Roma, ta hapu esa bisa fee au leo lahenda ia ra lima nara uu. Ara saka eno' fo raisa hihii' au. De besa' ia, tuka au haak ka, au aae' dedea' ia leo nusa' a huu na neu', ela mane' bau-ina keser kota Roma, ri' naetu' dedea' ia.”
12 Ramanene Paulus hule nae leo' naa, boe ma gubernor dedea-rao' no nonoon fo ri' parisa' dedea' ria. Basa de nafada Paulus nae, “Huu fo o hule maae' dedea' ia leo keser neu, de o muste leo kota Roma muu.” Gubernor dedea basa nae leo' naa, boe ma ara rasida'.
Festus hule dudu'a-aafi' neme mane' Agripa la'e-neu' Paulus
13 Boe ma lahenda Yahudi ra manen Agripa,a no feto na, nade Bernike, leo Kaisarea reu, fo fee hada-horomata neu' gubernor bebeu'. 14 Ara suku fai' hida ro gubernor Festus. Lai esa boe ma Festus tui dua si Paulus dedea na. Ana nae, “Papa mane'! Nai Kaisarea ia, ami ena lahenda esa, nade Paulus. Maulu na gubernor paraa' a bei ta naetu' ria dedea na. 15 Bei lalai' ia, au nai Yerusalem, malaka agama Yahudi malaka nara ma lasi' ara, mai kolaa' Paulus. Ara hule au huku ni. 16 Tehuu au afada si ae, ‘Tuka atoran mana pareta Roma, au muste parisa' dedea' ria dei. Lahenda madedea ra muste rasasare mata' dei, fo au amanene si rae ana sala ubea', ma ria boe muste nasala'e aon, besa' ko au bisa aetu' dedea' ria, ma fee ni huhuku ubea'.’ 17 Fai fo au fali Kaisarea, lahenda Yahudi hida tuka ia' mai. Balahaa' boe ma au parisa' dedea' ria. Au adenu si roo Paulus mai nataa au, ela au bisa bubulu' dedea' ria huu-pedan. 18 Lahenda Yahudi ra rapadei de mulai tui Paulus sala nara. Tehuu hata fo ara tui a, bera na ta sama no au dale dodoo ka. 19 Sira esa ta neu esa dale' la'e-neu' sira agama na, ma ralelena ao' ro Paulus la'e-neu' lahenda esa, nade Yesus. Tuka lahenda Yahudi ra, Yesus maten so, tehuu Paulus nae, Yesus nasoda selu'. 20 Ara rareresi' leo naa', tehuu au lahenda bebeu', de au ta bubulu' aetu' tao dedea agama ria leo' bea. Huu ria naa, au atane Paulus ae, ‘Leo' bea, kalu au parisa' o dedea ma nai Yerusalem?’ 21 Tehuu ana ta nataa, de ana hule fo naae' dedea' ria leo keser neu, nai nusa' a huu na. Huu ria naa, au ena aheren, losa au hapu lela' sona feen leo Roma neu.”
22 Mane' Agripa namanene Festus tutui na, boe ma nae, “Kalu bisa, au nau amanene mata' neme lahenda ria mai.”
Festus nataa nae, “Bisa! Au dei ator fo balahaa' sona papa bisa mamanene mata' neme lahenda ria mai.”
Mane' Agripa nau namanene Paulus dedea na
23 Balahaa' boe ma gubernor Festus ator fo mane' Agripa, komendaan ara, ma lahenda bau-ina' kota Kaisarea bisa ramanene Paulus dedea na. Boe ma mane' Agripa no Bernike maso' mai pake kakao-papake mane'. Basa lahenda ra fee hada-horomata neu' dua si. Basa si tesa, boe ma gubernor nadenu roo Paulus leo dale' mai.
24 Ara roo Paulus leo dale' neu, boe ma gubernor dedea nae, “Mane' Agripa, papa sara, ma basa manatesa-manatama' fo ri' au hada-horomata. Lahenda ia, nade Paulus. Malaka Yahudi hida radedea ro ni. Ruma reme Yerusalem mai ma ruma rai ia, ara raseti au rae, lahenda ia ta naraa nasoda so'. 25 Huu ria naa, au parisa' ana, tehuu ta hapu ria sala na naraa au huku aisa ni. Tehuu ana hule naae' dedea' ria leo nusa a huu na neu, de nau do ta nau, au muste fee ni leo Roma neu. 26-27 Kalu au fee ni neu, tantu au muste dui' fee si reni susura' esa. Tehuu besa' ia, au dui' ubea' fee mane' bau-ina' a? Huu ria naa, au aloo a papa sara, fo mamanene ni. Basa sona au amahena papa mane' Agripa fee au dudu'a-aafi', ela au bisa dui' hihii-nanau' raa la'e fee mane' bau-ina' a. Au dodoo aan ta malole, kalu au fee dedea' ia leo keser neu, tehuu ta afada lahenda ia sala' ubea'.
Au dedea ka noi ri naa'. Makasi.”