Ara roo Paulus leo Roma reu
27
Boe ma gubernor Festus naetu', fo fee Paulus neu nataa mane' bau-ina' nai Roma, ela naetu' Paulus dedea na nai naa. Ana nahohomu' Paulus no lahenda mana huku feke' hida reu' komendaan esa, nade Yulius, ela noo si leo propensi Italia reu. Yulius nana komendaan neme soldadu fo ri' ranea keser. 2 Fai ria, au (Lukas) ma toranoo' esa, nade Aristarkus, lahenda Makedonia neme kota Tesalonika mai, ami tuka Paulus. Ami basa sa'e ofa' esa neme kota Adramitium mai. Tuka sira hihii na ofa' ria, neu' ko tuli namo-sesee' dododu' nai propensi Asia.3 Ami sa'e ofa' foa ela Kaisarea, balahaa' boe ma ami losa kota Sidon. Komendaan Yulius ta bara'aai Paulus ma nafada ni bole neu dama tia nara nai mada' lain, ela ara bisa fee Paulus sudi ubea' fo ri' parluu nai tasi' lain.
4 Ami basa ae selu' ofa' lain meu, de hela laa, tehuu ani tatada' a nasa na seli, losa' ofa' ria ta la'o mata'. De ara pale ofa' a, fo tuka pulu Siprus no Siria talada, ela ami mahapa' meme ani tatada' a mai. 5 Neme naa' mai, ami sa'e ofa tepa mesi' propensi Kilikia ma propensi Pamfilia mata na. Ami losa kota Mira, nai nusa' Likia. Losa naa, boe ma ami basa onda ofa' ria. 6 Nai Mira, komendaan Yulius saka ofa feke' fo ri' leo propensi Italia neu. Ana hapu ofa' esa, neme kota Aleksandria mai leo Italia neu, de nadenu ami basa sa'e ofa' ria.
7 Ami nai tasi' lain fai' hida so, tehuu ofa' ria ta la'o mata', nana huu ani tatada' a nasa na seli. Ami ero-ero hihii' manenea' kota Knidus, tehuu ani a nasa' a, de ami tepa mesi' pulu Kreta, ela mahapa' neme ani a mai, besa' ko ami mesi' o'oa' esa, nade Salmone. 8 Ami maero' doa' mesi' o'oa' ria, tuka-tuka pulu Kreta a namo na suu na, besa' ko ami bisa losa mamana' esa, nade Namo-sesee' Malole. Mamana' ria nanenea' kota Lasea.
9 Nai naa, mataroos ara hahae ao nara bai', nana huu ami doo' a nai tasi' lain, tehuu bei ta losa propensi Italia. Fai ria lahenda Yahudi ra fai bau-ina' Sae-safe Sala-siko' a basan so.a Ria sosoa na nae, fai nafa-ani ina'. Boe ma mataroos ara ratatane ao' rae, taroo do ta'a. Paulus namanene leo naa', boe ma ana dedea 10 nae, “Basa toranoo kara. Au hule dedea bai'. Au ae kalu ita taroo, bate ita bisa hapu susa dodou'. Bisa-bisa ofa' a bolo, hata ra mopo si, ma ita basa bisa mate.” 11 Tehuu komendaan soldadu ria ta nau namanene Paulus. Ana namahere kadodou na neu' juragan ma manuu ofa' a. Huu fo sira hihii na nau kalua reme mamana' ria mai. 12 Nai Namo-sesee' Malole ria, kalu ofa' ara nafu rai naa la'e fai' nafa-ani, sona ta malole a, de kadodou na nau ami maroo, leo kota Feniks meu. Ara ramahehena' kalu bisa, ami basa mahani' naa nai fai nafa-ani. Kota Feniks nana pulu Kreta namo-sesee' malole ina na, nana huu ana nahapa' neme ani faa lole-onas ma lole-iis, ma nafa bau-ina' ta'a.
Ruli a nai tasi' lain
13 Fai fo ani onas a fufuu ana, boe ma ara raendobuko ani malole de ami bisa leo kota Feniks meu. Ara rae, “Ani malole ia. Mai ita la'o leo!” Boe ma ara hela na'a ma laa a, ami ofa ma tuka-tuka tasi suu'. 14-15 Tehuu ami bei ta maola boe', te ruli a foa. (Fo ri' lahenda rae, ‘ani timu-lole iis’). Ani ria lepa neni ofa a bonu-bonu losa tasi talada'. Mataroos ara rauli doa' ofa' a, de ara rataa' ofa' a bonu-bonu tuka ani a hihii-nanaun.
16 Ami bonu-bonu tuka nafa a, losa manenea' pulu ana' esa, nade Kauda. Fai ria ofa ana' a bei mana heke' nai ofa bui'. Ami hela ofa ana' a leo ofa ina' lain neu, ami maero' doa'. 17 Ofa ana' a losa ofa ina' lain, boe ma ara feo tali neu' ofa' a tei na, ela boso' ofa' a papa nara hu'a henis ma bolo. Ara bii' boso' losa nafa a to'o ofa' a, fo hara nai Sirtis tete na nai Afrika. De ara raonda na'a a ela rakura' ofa' a lai na.
18 Ruli a bara na ami ofa ma, naleu' ii-ona'. Balahaa' boe ma mataroos ara tu'u heni hata rai ofa' lain leo tasi dale' reu. 19 Binesa' ruli ria bei tataa' esa' a losa balahaa' selu, de ara boe-boe bii'. Ela ofa a namakafa, ara tu'u heni selu' hata ra bali. Ofa' a manara nara, mataroos ara tu'u mata nara. 20 Hatu-leledon, ruli ria ta namate bai' boe' losa fai' hida, ma oa keo ina', de ami ta mita ledo a ma ruu' ara. Ami basa mopo namahena mara, ma ami dale mara mae ami ta masoda so'.
21 Fai' hida lala'en, ami ta mia-minu hata esa boe'. Paulus naloo na basa si, de dedea no si nae, “Basa toranoo kara! Soba emi tuka au nafada ka, fo ta la'o ela Namo-sesee' Malole a, tantu besa' ia ita ta hapu susa dodou' leo ia', ma ta rugi hata esa boe'. 22 Tehuu besa' ia, au hule emi matetea dale mara. Neu' ko ita ofa na nalulutu'. Tehuu boso' bii', te ta mate lahenda esa boe'. 23 Au nau emi basa bubulu', au nana Manetualain lahendan, ma au hapu nonoi-laka' neme Ana mai. Leodae' a Ana fee eila'o-limalopen esa neme nusatetu-ikutema' a mai, napadei nai au boboa ka, ana nafada au nae, 24 ‘Paulus! O boso' bii', te neu' ko o muste mataa mane' bau-ina Roma fo parisa' o dedea ma. Huu no Manetualain dale malole Na neu' o, de basa lahenda fo rai ofa' ia lain, Ana fee si rasoda katema'.’ 25 De basa toranoo kara. Boso' etu namahena mara. Au amahere tebe-tebe neu' Manetualain ae, hata fo leodae' a Ana nafada au a, neu' ko dadi leo' naa. 26 Tehuu neu' ko ofa' ia, hara nai pulu esa.”
Ofa a nanenea' mada' a
27 Fai ria, nafa-ani ramina' ami, de ami bonu-bonu fai' sanahulu haa nai Tasi' Adria. Tehuu fatilada, boe ma mataroos ara rameda raan ami manenea' mada' a. 28 Boe ma ara uku oe a, ela bubulu' dedema na, ara uku te dedema na rea dua hulu. Ofa a mata neu selu' bai', boe ma ara uku bali, dedema na rea sanahulu lima.b 29 Basa si bii', boso' losa ofa' ria hara nai batu kusi ra, de ara tu'u na'a haa nai ofa bui'. Ami basa mamahehena, hii' mae doo bea fo malua. 30 Tehuu mataroos ara rala hara' fo roi loi' a foa ela ofa' ria, de ara raonda ofa ana' a, tao uni ara reu raonda na'a nai ofa laka'.
31 Tehuu Paulus nafada sira dudu'a-aafi tadalun ria neu' komendaan no soldadu nara nae, “Kalu mataroos ara ta rahani' ofa' lain, sona neu' ko mate basa emi.”
32 Soldadu ra ramanene Paulus dedea nae leo' naa, boe ma ara tete' etu ofa ana' a tali na, ela ofa ana' ria bonu henin, de mataroos ara ta dadi ralai so'.
33 Saka' makaledo, boe ma Paulus lele'o lahenda sira raa-rinu. Ana nae, “Mamaso' dua ian, ita toi tatuu hihii' a, fo toi tamahehena' a, ma ta tao hata esa neu' ita tein na boe'. 34 De au hule ita taa-tinu bai' dei, ela ita bisa hapu mapii-bara'ai'. Au amahere neme ita basa mai, ta mate esa boe'. Tantu ita basa tasoda!”
35 Paulus dedea basa leo' naa, boe ma ana hai na roti, de hule makasi neu' Manetualain nai sira basa matan, boe ma ana hai na bibia' esa de naa. 36-37 Ara rita leo' naa, boe ma dale nara fali ra ao nara, de basa si raa-rinu bela'. Ami lahenda natun dua hitu hulu nee nai ofa' ria lain. Ami basa mia-minu. 38 Ami mia mabete, boe ma ara mulai tapa heni karong fo hade gandum nai dale' a leo tasi dale' reu, ela ofa' a boe-boe namakafa.
Ofa' a hara
39 Makaledo boe ma mataroos ara rita mada' a. Tehuu ara ta bubulu' pulu bea ria. Ara rita namo esa soroae na. Ara ramahehena' kalu bisa, ara reni ofa' a nesi' batu kusi rai tasi' dale', leo tasi suu' ria neu. 40 Ara tete etu na'a ra tali na, ela si ada' tasi' dale'. Ara raonda uli a leo tasi' dale' neu, ela rauli reni' ofa' a, ma ara hela laa ana' a neu nai ofa laka' ela ani a fuu neni ofa' a leo tasi suu' neu. 41 Tehuu ofa' a hara nai soroae' pupuku' lain nai tasi' dale', de ta nababale so'. Nafa mapepena' ara toto'o ra ofa' a bui na sopu'-sopu.
42 Soldadu ra rita leo' naa, boe ma ara nau raisa katema' lahenda mana huku' ara, nana ara bii, boso' losa lahenda sira ane leo mada' lain reu fo ralai heni ao nara. 43 Tehuu komendaan Yulius horo soldadu nara, nana huu ana nau Paulus nasoda. Ana pareta basa lahenda mana ane malela' ara boku' leo tasi' dale' reu, fo ane leo mada' lain reu. 44 Lahenda fo ta ane ralela', ana nadenu si tai papa' do sudi ubea', fo bonu tuka nafa a leo mada' lain reu. De ami basa losa mada' lain no soda'.