Paulus asa fali Yerusalem reu
21
Ami matete'a ao' mo lasi' Kristen Efesus ara no dale hedi', ami sa'e ofa' leo pulu Kos meu. Balahaa', boe ma ami losa pulu Rodos. Neme naa' mai, ami sa'e ofa' leo namo-sesee' kota Patara meu. 2 Nai naa ami onda de kati ofa' fo leo propensi Fenisia meu, nanenea' Siria. Ami ae mala ofa' ria lain, boe ma hela tuti' na'a. 3 Ta doo bea boe', te ami mita pulu Siprus nai ami poo' ii ma, tehuu ami maroo de tu'u na'a nai kota Tirus, nai propensi Siria. Nai naa, ara raonda hata fo ri' fua reni nai ofa' lain. 4 Huu no ara bei raonda hata sira, de ami onda fo meu saka lahenda kamahere' ara. Ami maneta, boe ma ami leo mo si mamaso' esa. Manetualain Dula-dale Na nafada lahenda fo rai naa, de horo Paulus rae ana boso' leo Yerusalem neu bali. 5 Basa mamaso' esa, boe ma ami fali leo ofa' a meu. Basa lahenda kamahere' ara, ina-tou', aana-bauina', lasi-muri' roo ami losa namo-sesee'. Nai naa, ami sunda' undulaka mara hule-haradoi sama-sama. 6 Ami matete'a ao' basa, boe ma ami ae ofa' lain meu, ma sira basa fali reus.
7 Ami sa'e ofa' meme Tirus mai, ami tuli kota Ptolemais. Nai naa, ami onda ofa' a, de meu saka lahenda kamahere' ara. Ami maneta, boe ma ami leo mo si fai' esa. 8 Balahaa', boe ma ami leo kota Kaisarea meu, ami suku nai Filipus uma na. Ria ri' tui-beka masososa Ramatua Yesus Tutui Malole Na nai naa. Ma ria nana esa neme lahenda kahitu' fo ara here si, fo bati nanaa' fee ina-falu rai Yerusalem.a 9 Filipus ana feton haa. Manetualain pake si dadi mana nesi mata fo tui-beka Ria hehelu Na.
10 Ami leo mo si fai' hida, boe ma lahenda esa, nade Agabus, neme propensi Yudea mai. Manetualain pake ni dadi mana nesi mata fo tui-beka Manetualain hehelu Na.b 11 Ana naroo leo ami mai, boe ma hai na Paulus tali-ee na, de ana heke aon ei-liman neni' tali-ee ria. Ana dedea nae, “Manetualain Dula-dale Malalao-malalafu Na nae leo ia': ‘Tali-ee ia ramatua na, neu' ko lahenda Yahudi ra puputu ni leo ia' nai Yerusalem. Boe ma feen leo lahenda fo ta Yahudi ra liman neu.’”
12 Ami mamanene lahenda ria dedea nae leo' naa, boe ma ami fo ria mana tuka dean, ma lahenda kamahere' nai mamana' ria, maseti Paulus fo boso' leo Yerusalem neu. 13 Tehuu ana nataa nae, “Ta'a! Ubea' taon de emi dola leo' naa? Emi tao ma au dale ka nalulutu'. Leo ia'! Mema' lahenda ruma ta rahii' au, nana huu au tuka Ramatua Yesus. Tehuu leo mae ara puputu au, raisa au, do tao au leo' bea boe, au sipo'.”
14 Ami bubulu' Paulus ta nau namanene ami, de ami ta mahahara so'. Ami mae, “Neu! Ela Manetualain hihii-nanaun mori-dadi.”
Paulus asa losa Yerusalem
15 Ami leo fai' hida nai Kaisarea, boe ma ami mafafau hata mara, fo leo Yerusalem meu. 16 Lahenda kamahere' Kaisarea hida, tuka ro ami boe. Ara ro ami losa Manason uma na, de ami suku nai naa. Ria lahenda pulu Siprus ma ana tuka Ramatua Yesus doo' a so. 17 Ami losa Yerusalem, boe ma basa toranoo' lahenda kamahere' ara sipo' ami no namaho'o.
Paulus asa reu dama Yakobis
18 Balahaa', boe ma ami basa meu dama Yakobis. Basa lasi' Kristen ara tesa rai naa. 19 Ami mahomu lima', basa boe ma Paulus tui basa-basan fo ri' Manetualain taon soa-neu' lahenda ta Yahudi rai basa mamana' ain. Nae, Ramatua Yesus soi eno' de ara ramahere Ni. Ana tui nae no eno leo bea' Manetualain pake ni no nonoo nara nai nonoi-laka' ia. 20 Basa si ramanene Paulus tutuin ria, boe ma ara io-oa Manetualain.
Ara rafada Paulus rae, “A'a Paulus! Sadi a'a bubulu', lahenda Yahudi rifu-rifu' ara ramahere Ramatua Yesus, ma ara bei homu rahere atoran fo ri' ba'i Musa naondan neu' ita. 21 Tehuu lahenda ruma tui rai ia rae, a'a manori-mafada lahenda Yahudi rai mamana feke' mae, sira ta parluu tuka ba'i Musa atoran agama nara. Ara tui rae, a'a horo si, boso' sunat ana tou nara tuka hadas sunat. Ma a'a horo fo lahenda sarani' ara boso' tuka ita lahenda Yahudi a hadas feke nara. 22 Mafarerene'! Tantu lahenda Yahudi ra ramanene rae, a'a Paulus nai ia. Ma lahenda fo ri' ramanene dedea tui ria, tantu ramanasa. De ita saka tao eno kalua na leo' bea?
23 De ami hahapu ma leo ia': Ita lahendan haa rahelu' basa ro Manetualain. Besa' ia, ara keu kusi' laka nara, fo tao tanda nae, sira ratetu ra hehelu nara so. 24 Kalu bisa, sona a'a Paulus sama-sama mo si leo Manetualain Uma Mamaso Yahudi Ina Na dale' meu. A'a boe tuka si, fo tao tuka hadas makamomoi ao-ina' a, ma bae sira ongkos nara tuka hadas ria. Kalu tao leo naa', sona neu' ko lahenda bubulu' a'a bei homu mahere atoran agama Yahudi fo ri' ba'i Musa naondan neu' ita. Ma neu' ko ara bubulu' tutui' fo ri' rae, a'a horo lahenda fo boso' tuka hadas Yahudi, nana dedea fufudi' sira!c
25 Tehuu soa-neu' lahenda ta Yahudi fo ri' ramahere Ramatua Yesus, ita haitua fee si susura' so. Ita tafada si fai' naa ra ita naeetun ria tae, sira ta parluu tuka katema' ita atoran Yahudi. Ara muste rafarerene' si': boso' hohoke, boso soko-taku, ma boso' raa hata fo lahenda Yahudi ra rahia' emi. Si': Boso' raa paa sosoko'; paa daa'; ma raa paa' neme banda fo roi pode' raisa' ana.”d
26 Paulus sipo' sira hahapun ria no malole. Balahaa' boe ma ana no lahenda kahaa' sira sama-sama leo Uma Mamaso Yahudi Ina' a dale' reu, de ara tao makamomoi ao-ina nara tuka atoran agama Yahudi. Boe ma Paulus nafada malaka agama nai naa nae, bei fai' hida bali, besa' ko ratetu ra sira hehelu na. Kalu basa fai sira, sona ara muste esa-esa reni sira tutunu-hohotu nara fee Manetualain.
Hopu ra Paulus nai Uma Mamaso Yahudi Ina dale'
27-29 Saka' basa fai kahitu' fo ri' ara helu fo ratetu ra hadas ria, lahenda Yahudi hida reme propensi Asia rita Paulus leo kota Yerusalem neu, sama-sama no nonoon esa, nade Trofimus, lahenda kota Efesus, ria ta lahenda Yahudi. De fai ria rita Paulus leo Uma Mamaso Yahudi Ina dale' neu, ara raendobuko no nonoon Trofimus leo naa' neu boe. Sekonaa te lahenda ta Yahudi, sona ta bole leo naa' reu. Boe ma ara tao ria dadi buku', fo tao dedea'. De ara duduku-papau' lahenda rai naa, ela hopu ra Paulus. Ma ara rafada lahenda fo rai naa rae, “Lahenda Israel emin! Mai fali ami dei. Lahenda ia ri' nanori-nafada nai basa mamana' ain nae, tu'u-tapa heni ita hadas Yahudi. Ria boe dedea ta malole la'e-neu' Manetualain Uma Mamaso Yahudi Ina Na. Besa' ia, ana mai fo tao nakekeo-nakakanu Manetualain mamana malalao-malalafun ia!”e
30 Kota Yerusalem isi na katema' ramanene leo' naa, boe ma ramanasa. De lahenda kadodou' ara ralai reu eo ra Uma Mamaso Yahudi Ina a, homu ra Paulus, de roso roon neme Uma Mamaso Yahudi dale' mai leo dea' neu. Boe ma ara ena etu lelesu ra.f
31 Ara bei rapue nau raisa Paulus, te komendaan soldadu Roma namanene kaco nai naa. 32 Boe ma naloo na soldadu nara ro malaka nara, de leo lahenda mapupue' sira talada reu. Ara rita komendaan bau-ina' a no soldadu nara mai, boe ma ara ta popo'o Paulus so'. 33 Komendaan ria hopu na Paulus, ma nadenu fo ara heke Paulus pake rante besi dua. Boe ma ana natane lahenda sira nae, “Lahenda ia, nana bea? Ana nasala' ubea'?”
34 Tehuu sira esa' ko nataa' aon. Ruma rae, “Ana tao leo ia'.” Ma ruma rae, “Ana tao leo naa'.” Komendaan ria laka na dile, ana ta bubulu' dedea' ria huu-pedan, nana huu lahenda kadodou' sira rahara bela' a. Huu ria naa, ana nadenu fo roo Paulus leo soldadu ra kota musu na neu. 35-36 Soldadu ra hela roo Paulus, tehuu lahenda sira tuka, ma ara boe-boe ramanasa. Ara saka' ae eda-ae' a, boe ma lahenda ra tafaruu mata reu. Losa' soldadu ra roi o'o Paulus, ela lahenda sira lima nara boso' dai ni. Ara rahara rae, “Maisan leo! Maisan leo!”
Paulus nasala'e aon nai lahenda dodou' matan
37 Ara saka' maso' leo kota musu ria dale' reu, boe ma Paulus hule komendaan ria pake dedea Yunani nae, “Papa! Au bisa dedea bai', do?”
Komendaan namanene Paulus dedea nae leo' naa, boe ma ana kekes ara de natane nae, “O boe mala dedea Yunani? Ubea' taon o bisa dedea dedea Yunani? 38 Kalu leo' naa, sona au alela' sala, au ae o lahenda Masir fo ri' fai naa ra ana duduku-papau' lahenda ra tao tasibu. Boe ma noo lahenda mana homu tee-tafa' rifun haa ralai leo mamana lino-nees reu. Tehuu o ta ria fa, hete?”
39 Paulus nataa nae, “Ta'a, papa! Au lahenda Yahudi, mama ka boki au nai kota Tarsus, nai propensi Kilikia. Au hule papa fee au lela', fo bisa dedea o lahenda kakabaina' ia ra.”
40 Komendaan ria sipo'. Boe ma Paulus napadei neu' eda-ae' lain, ma so'u lima na, hule fo ara nenee', te ana saka' dedea. Ana dedea pake dedea Aram. (Nana huu lahenda Ibrani fo rai naa, dedea pake dedea Aram.)g