8
1a Saulus nai mamana' ria boe. Ma ana sipo' no malole, raisa Stefanus.
Saulus tao doidoso Ramatua Yesus lahenda nara
1b-2 Stefanus mamate na, lahenda hida fo ri' rahii' Manetualain a, reu o'o ra Stefanus popora na, de ratoin, ma ara dola-ramatani ni.
Neme fai ria mai, lahenda mulai tao rasususa' Ramatua Yesus lahenda nara rai kota Yerusalem, losa' ara doidoso raan seli. Ara ralai kofela leo propensi Yudea ma propensi Samaria reu. Basa si ralai, ela noi Yesus lahenda nadedenu nara rai Yerusalem.
3 Tehuu Saulus saka eno' fo tao nalulutu' Yesus lahenda nara. Ana saka si nai basa mamana' ain. Ana maso-kalua uma ra neu saka si. Leo mae ina' do tou', ana hopu neni si, tee si leo bui dale' reu.a
Filipus tui-beka Ramatua Yesus Tutui Malole Na nai propensi Samaria
4 Leo mae lahenda tao rasususa' Yesus lahenda nara, losa' ralai kofela, tehuu ara tui-beka raroo Ramatua Yesus Tutui Malole Na nai basa mamana' ain. 5 Conto leo', lai' esa de Filipus leo kota esa nai propensi Samaria, fo tui-beka fee lahenda ra nae, “Yesus nana Kristus, Lahenda fo ri' Manetualain tudu mema' ana neme fai a ulu na mai.” 6 Lahenda dodou' rita tanda heran fo ri' ana tao a, boe ma rabua ao nara ela nenene ratalolole hata fo ana dedea a.
7 Conto leo', lahenda nitu heke' ara rai naa boe. Nitu ra kalua ela lahenda sira ma rahara rambera ina. Lahenda luku' ara, ma ei hela' ara boe, te'e ra ao nara. 8 Huu ria naa, lahenda fo rai kota ria, ramaho'o raan seli.
9 Nai kota ria, lahenda malela' esa nade Simon. Ana namalada', fo eedi' nala lahenda Samaria ra doo' a so. Ana dedea koao' nae, “Au lahenda kahere'!”
10-11 De nai kota ria, ana aana', lahenda bau-ina', ina-tou', basa si sesei-ooto' lahenda ria nade na rae, “Lahenda ia kahere'! Hata fo ana taon a neme Manetualain kuasa Na mai.” No ria namalada na, de neme ulu mai lahenda dodou' rahii' pake ni.
12 Tehuu besa' ia, ramanene Filipus nanori-nafada si la'e-neu' Manetualain pareta Na. Ma ana pake Yesus nade Na fo natudu eno', ela ara bisa dadi Manetualain lahenda Nara.b Ramanene basa leo' naa, boe ma lahenda dodou' ramahere de dadi Manetualain kileo-bobokin. Huu ria naa, basa si sarani, ina-tou'. 13 Sekonaa te, Simon boe namahere ma nau dadi Yesus lahendan. Boe ma ara saranin, de Filipus bea' neu boe, ana tuka nahere ni. Fai bea ma nita Filipus tao tanda heran, sona noi leleu' laka na nae, “Leo' ia sona kahere'!”
14 Tepo' ria, Ramatua Yesus lahenda nadedenun fo rai Yerusalem ramanene rae, lahenda nai propensi Samaria, ara ramahere Manetualain Tutui Malole Na. Boe ma ara radenu Petrus no Yohanis leo naa' reu. 15-17 Dua si losa naa, ara bubulu' rae, lahenda fo rai naa, bei ta sipo Manetualain Dula-dale Malalao-malalafu Na. Ara sarani pake noi Yesus nade Na. Petrus no Yohanis lalaa lima nara reu' lahenda sira, ma hule-haradoi fo ela lahenda Samaria ra boe sipo Manetualain Dula-dale Malalao-malalafu Na. De lahenda sira sipo tuti' a.
18 Simon nita dua si lalaa lima nara reu' lahenda sira, de ara sipo Manetualain Dula-dale Malalao-malalafu Na. Boe ma Simon fee Petrus no Yohanis doi' ma hule nae, 19 “Papa kasa! Emi fee au kuasa ria boe. Ela fai bea ma au lalaa lima ka neu' bea, sona sira boe sipo Manetualain Dula-dale Malalao-malalafu Na.”
20 Tehuu Petrus nasapaa ni nae, “O ma doi mara hapu kutuk! O dale ma mae o bisa asa Manetualain Dula-dale Malalao-malalafun kuasa Na muni' doi'? Ta'a! Lahenda ta bisa asa Manetualain Dula-dale Malalao-malalafu Na! 21 O ta manuu haak hata-hata esa neu' Manetualain Dula-dale Malalao-malalafu Na, huu fo o dale ma ta roo-tetu'. O soa noi naedi-nafule'! 22 O hahae meme nonoi-tatao tadalu ma mai leo. Malole lena' o hule-haradoi neu' Manetualain, fo kalu bisa, sona Ana sae-safe heni o dudu'a-aafi tadalum. 23 Au bubulu' o henu' no napeda dale', ma hihii-nanau' tadalu' dodou' heke ra o!”
24 Simon hule dua si nae, “Papa kasa! Kalu leo' naa, sona emi hule-haradoi fee au, ela kutuk fo ri' emi mafada a, boso' la'e au.”
25 Petrus no Yohanis tui Ramatua Yesus Tutui Malole Na katema', ma ara tui-beka Manetualain Hara-dasin nai kota ria. Boe ma ara fali Yerusalem reu'. Ara tuli lala'o koro' nai propensi Samaria, fo tui-beka fee lahenda rai naa Ramatua Yesus Tutui Malole Na.
Filipus naneta no pegawe bau-ina' esa neme Afrika mai
26 Manetualain eila'o-limalopen neme nusatetu-ikutema' a mai nadenu Filipus nae, “Ana ki on! O la'o leo ona muu. Tuka eno paraa' neme kota Yerusalem sai leo kota Gasa neu.” 27-28 Filipus namanene na pareta ria, boe ma ana la'o tuti'. Nai eno talada', ana nita lahenda esa. Ria nana lahenda bau-ina' esa neme nusa Etiopia.c Ria ri' urus ina mane' Kandake hata-heton katema'. Ana besa' ko hule-haradoi main neme Yerusalem, ana fali sa'e kareta. Fai ria Filipus nita ni natuu' lees nai kareta lain. Ana lees nai Manetualain mana nesi matan ba'i Yesaya susura na. 29 Boe ma Manetualain Dula-dale Malalao-malalafu Na nadenu Filipus nanenea' leo kareta ria neu, fo naneta no lahenda ria. 30 Ana losa mata te namanene lahenda ria lees nai ba'i Yesaya susura na. Boe ma ana natane nae, “Papa! Papa ka bubulu' hata fo ri' papa lees a, do ta'a?”
31 Lahenda ria nataa nae, “Ta'a. Lahenda muste nafada fee au sosoa-raraan dei, besa' ko au bubulu'. Ae lain mai matuu' mo au nai ia.” 32 Dudui' ria lii na nae leo' ia:
“Ara hela roon sama leo' lahenda hela reni bibi-lopo,
fo saka' halan.
Ria boe sama leo' bibi-lopo ana' fo lahenda kuti bulu Na,
tehuu ta namee.
Ana ta hu'a bafa Na,
ma ta nahara, hara' esa boe'.
33 Ara ramumulu-ramamae' Ana;
Ara raetu' dedea Na ta tuka matetun.
Ara raisa Ni,
sekonaa te Ria salan ta'a.
Huu ria naa, ita ta bisa dedea la'e-neu' Ria tititi-nonosin.”d
34 Lees basa, boe ma lahenda bau-ina' ria natane Filipus nae, “Leo' bea? Ba'i Yesaya dedea la'e ria ao-ina na, do la'e lahenda feke'?”
35 Filipus nanori-nafada tou' ria Ramatua Yesus Tutui Malolen. Ana mulai neme Yesaya susuran bisinaa' a mai, natudu eno' fo tuka Yesus. 36 Ara la'o-la'o, boe ma tou' ria nita oe nai lee a. Filipus bei ta dedea basa boe', te ana nafada Filipus nae, “Papa. Soba mete dei, te oe a ri' naa', de kalu papa mataa, sona ita onda fo sarani au mai' ia leo.”
37 [Filipus sipo' nae, “Kalu papa mamahere tebe-tebe Ramatua Yesus, sona bisa, pupute-aai' ta'a. Ita onda fo au sarani papa leo.”
Ana nataa nae, “Au amahere tebe-tebe Yesus nana Lahenda fo ri' Manetualain tudu mema' Ana neme ulu' mai. Ria nana Manetualain Anan.”]e
38 Boe ma tou' ria nadenu, fo rate'e kareta. Ara onda, de leo oe dale' reu. Filipus sarani ni nai naa.
39 Dua si kalua reme oe dale' mai, boe ma Manetualain Dula-dale Malalao-malalafu Na noo Filipus leo mamana feke' neu. Lahenda bau-ina' ria ta nitan so'. De tou' ria la'o naroo, ma dale na namaho'o naan seli. 40 Tehuu Filipus kekeneu te nai koro' esa, nade Asotus.f Neme naa' mai, ana la'o naroo fo tui-beka fee lahenda ra Yesus Tutui Malole Na. Ana tuli lala'o basa koro' ara, losa kota Kaisarea.