3 Fai' esa, bate li'u telu leodae na, nonoo' leo nalamei, ana nita besa-besa Manetualain eila'o-limalopen esa, neme nusatetu-ikutema' a mai, naloon nae, “Kornelis!”

4 Kornelis nita eila'o-limalope fo ri' neme nusatetu-ikutema' a mai, boe ma bii naan seli. Natane nae, “Ubea', Ramatua'?”

Eila'o-limalope ria nataa nae, “Manetualain namanene o huhule-haradoim, ma nafarene o dale malolem neu' basa lahenda ra, ma Ana relu-natanae o. 5 De besa' ia, madenu lahenda reu rala lahenda esa nade, Simon Petrus, nai kota Yope. 6 Ana leo lalai nai lahenda mana keu banda rou' esa uma na, nai tasi a suun. Ria nade Simon boe.”

7 Eila'o-limalope fo ri' neme nusatetu-ikutema' mai a la'o, boe ma Kornelis naloo na atan dua ma soldadun esa, dale na boe nahii' tuka Manetualain. 8 Kornelis tui si basa hihii-nanau' sira, boe ma nadenu si leo kota Yope reu.

9 Balahaa', bate ledo a namatetu, te lahenda fo Kornelis nadenu si a ranenea' Yope so. Oras ria boe, Petrus ae leo Simon uma na lain neu hule-haradoi.

10 Ana hule-haradoi, tehuu namalaa' so. Ana nahani lahenda ra sadia nanaa-nininu' nai mei a. Ana hule-haradoi te Manetualain natudu ni nonoo' leo nalamei. 11 Ana nita nonoo' leo lalai natahu'a, boe ma tema' maloa esa toda mai, bukun haa si mana heke'. Tema' ria mulai londan mai. 12 Nai tema' maloa ria dale', ana nita banda rupa' ara, ri' banda ei haa', manalodo-manarae', ma manupui rupa'.

13 Boe ma namanene haraoe' esa nadenun nae, “Petrus! Foa leo! Hala banda sira fo mua!”

14 Tehuu Petrus nataa nae, “Ta bisa fa, Ramatua'! Boso' tao leo naa'! Huu fo au bei ta parnaa ua banda rupa' leo naa'! Ami lahenda Yahudi maluli banda sira katema'!”

15 Tehuu haraoe' ria balas nae, “Kalu Manetualain nafada nae, hata esa makamoi', sona o boso mae hata ria makekeo-makakanu' bali!” 16 Tema' ria toda mai lai' telu, boe ma nana so'u fali' leo lalai neu.

17 Petrus bei dodoo-tatai neu-mai nau bubulu' meis a sosoa-raraan ubea'. La'e oras ria boe, lahenda fo ri' Kornelis nadenu a losa Simon uma na. Ara rapadei' nai lelesu bafa' a. 18 Ara raloo ra lahenda esa, de ratanen rae, “Ami mai saka lahenda mana mai esa, leo nai uma ia. Nade, Simon Petrus. Bate papa malela' ana, do?”

19 Petrus bei dodoo-tatai nau bubulu' meis a sosoa-raraan, te Manetualain Dula-dale Malalao-malalafu Na nafadan nae, “Petrus. Lahenda^a rai dae', ara mai saka o. 20 O onda fo muu tuka si leo, dale ma boso' doda'. Leo mae sira ta lahenda Yahudi, tehuu boso' mahia' ma boso' tao si reu' lahenda makekeo-makakanu', tuka lahenda Yahudi a hadas na. Huu fo Au ri' adenu si mai rala o.” 21 Boe ma Petrus onda, de neu dama si, ma nae, “Au ri' lahenda fo emi sakan. Tehuu emi parluu au ubea'?”

22 Ara rataa rae, “Komendaan soldadu Roma esa nadenu ami leo ia' mai. Ria komendaan soa-neu' soldadu natun esa. Dale na roo-tetu' ma nahii' Manetualain. Lahenda Yahudi dodou' bubulu' lahenda ia dale malole na. Usele' a Manetualain eila'o-limalopen neme nusatetu-ikutema' a mai, nadenu ami malaka ma hule papa leo uma na muu, fo nau namanene mata' neme papa mai.”

23 Petrus namanene leo' naa, boe ma ana hule si fo hatun ria, suku reu' naa. Balahaa' ara foa, boe ma Petrus la'o sama-sama no si. Ramatua' a lahendan hida rai Yope, tuka ro si boe.

24 Hatun ria, ara suku rai eno', balahaa' besa' ko ara losa kota Kaisarea. Losa Kornelis uma na, te ana nahani si so. Ana naloo na toranoo nara ma tia-lai nara, de tesa rai naa. 25 Petrus saka' maso' leo uma dale' neu, te Kornelis nalai neu soru' ana de sunda' undulakan neu' Petrus ei dae na fo do'o-tabe ni. 26 Tehuu Petrus hela na foan ma nae, “A'a! Mapadei' leo, boso' do'o-tabe au. Huu fo au, lahenda dae-bafo' biasa sama leo a'a boe.”

27 Kornelis namanene leo' naa, boe ma napadei. Dua si dedea lala'o leo uma dale' reu. Petrus nita lahenda dodou' tesa rahani ni nai naa. 28 Ana mete nalelei' asa ma dedea nae, “Toranoo kara emin. Emi bubulu' mema' ami lahenda Yahudi a hadas na. Tuka ami hadas ma, ami ta bole mabua mo lahenda feke' ara, lena-lena' maso leo uma nara dale' meu. Tehuu Manetualain natudu au nae, kalu Ana nafada nae, hata esa makamoi', sona au boso' ae hata ria makekeo-makakanu'. De besa' ia, au ta bisa ahia' lahenda feke' so. Au muste tao si reu' au toranoo boki kara. 29 Huu ria naa, emi meu mala au, boe ma au la'o tuti'. Au ta aeeso', nana huu Ramatua' a nafada au leo naa'. Tehuu soba emi mafada au dei! Emi parluu au ubea' nai ia?”

30 Kornelis tui basa-basan nae, “Fai' haa maneu' a, ledo leodaen, au hule-haradoi nai uma ia. Kekeneu te, tou' esa napadei' nai au mata ka. Kakao-papaken makadila'. 31 Ana naloo au nae, ‘Kornelis! Manetualain namanene o huhule-haradoim ma nafarene o dale malolem neu' basa lahenda ra. 32 De besa' ia, madenu lahenda reu rala lahenda esa nade, Simon Petrus, nai kota Yope. Ana leo lalai nai lahenda mana keu banda rou' esa uma na, nai tasi suu'. Ria nade Simon boe.’ 33 Huu ria naa, au adenu tuti' lahenda reu rala papa. Ami hule makasi dodou', nana huu papa mai tuti'. De besa' ia, ami basa tesa nai ia, ela mamanene basa-basan fo ri' Manetualain nadenu papa mafada ami!”

34 Boe ma Petrus dedea nae, “Au besa' ko bubulu', Manetualain tebe-tebe ta fifika-fafae lahenda ra. Ana ta mete mata' nae, ia lahenda Yahudi ma feke' a ta lahenda Yahudi.^b 35 Leo mae lahenda reme leo bea mai boe, sadi dale nara roo-tetu', hule-haradoi neu' Manetualain, ma tao tuka Ria hihii-nanaun, tantu lahenda ria tao namaho'o Manetualain dale Na. 36 Huu fo emi bubulu' hata fo Manetualain nafada ami lahenda Israel nae, Ana nadenu Kristus, ri' Yesus. Boe ma Yesus maten, ela dame na lahenda dae-bafo' a ro Manetualain. Ma Ana nanuu haak pareta basa lahenda.

37 Emi boe mamanene hata fo dadi nai propensi Yudea katema'. Tutui' ria mulai neme Yohanis nafada lahenda ra nae, ara muste saledale-tue'tei nara. Ma ara muste sarani, fo dadi tanda nae, sira malole ro Manetualain. 38 Ma Manetualain naonda Dula-dale Malalao-malalafu Na ma kuasa Na neu' Yesus, Lahenda Nasaret ria. Boe ma Yesus maso-kalua koro' ara, fo tao hihii-nanau' malole soa-neu' lahenda ra. Ma Ana tulu-fali lahenda fo ri' malaka nitu a tao nasususa' asa. Ana tao leo naa' nana huu Manetualain no Ni la'o naroo. 39 Ami mita mata', hata fo Ana noi-taon nai kota Yerusalem, ma lahenda Yahudi ra nusa-namon katema'.

Leo mae leo' naa, tehuu lahenda londa-lake raisan nai ai kake'. 40 Tebe-tebe Ana mate, tehuu fai' katelu na, boe ma Manetualain feen nasoda selu'. Boe ma Ana natudu ao-ina Na, de lahenda ra bubulu', tebe-tebe Ana nasoda selu'. 41 Tehuu ta basa lahenda ra rita Ni, noi ami. Tepo' fo Ana nasoda selu' a, ami mia-minu sama-sama mo Ni. Manetualain tudu na ami boe, fo dadi sakasii meu tui-beka Yesus Tutui Malole Na fee lahenda dodou' nai basa mamana' ain.

42 De Manetualain nadenu ami fo tui ledo-ledo la'e-neu' Lahenda fo Ana tudu mema' ana neme fai a ulu na mai, ri' Yesus. Ma Manetualain so'u na Yesus dadi Mana Ee Dedea' nae, bea ri' nasoda naroo no Manetualain, ma bea ri' ta'a. Yesus ri' naetu' dedea' lahenda mana mate', ma lahenda masoda'. 43 Neme fai a ulu na mai, Manetualain mana nesi mata nara dedea la'e-neu' Yesus rae, basa lahenda fo ramahere Ni, neu' ko Manetualain sipo' asa, ma sae-safe heni sala-siko nara.”

44 Petrus bei dedea leo' naa, kekeneu te Manetualain Dula-dale Malalao-malalafu Na, onda leo basa lahenda fo ri' ramanene ni a. 45 Petrus nonoon lahenda Yahudi fo ri' tuka roon neme kota Yope, leo Kornelis uma na reu nai kota Kaisarea, ara rai naa boe. Ara rita lahenda kadodou' sira sipo Manetualain Dula-dale Malalao-malalafu Na, ara heran, nana huu besa' ko rita Manetualain naonda Dula-dale Malalao-malalafu Na neu' lahenda ta Yahudi. 46 Ara ramanene lahenda fo ri' rai Kornelis uma na dedea pake dedea rupa', ma ara io-oa Manetualain.

Boe ma Petrus nae, 47 “Emi mita mata'! Lahenda ia ra sipo Manetualain Dula-dale Malalao-malalafu Na sama leo ita boe. De besa' ia, ita sarani si leo. Esa ta horo boe'.” 48 Boe ma Petrus nadenu si sarani Kornelis no basa lahenda fo ri' tesa rai naa, ela ara dadi Ramatua Yesus lahenda nara. Ara hule Petrus fo leo no si fai' hida bali, besa' ko ara feen fali leo Yerusalem neu.