Maria boki Ramatua Yesus
2
1-2 Tepo' fo Korenius dadi malaka nai nusa Siria, lai' esa de mane' bau-ina', nade Agustus, ana kalua pareta nae, “Basa lahenda fo rai mana pareta Roma a kuasa na dae', muste fali leo koro nara reu ela dui' asa!” Ria nana besa' ko masososa na mana pareta Roma reke anaraun ara. 3 De basa lahenda ra fali leo koro nara reu fo dui' asa.4-5 Tepo' ria Yusuf leo nai koro Nasaret nai propensi Galilea. Ana nahii' ana feto ana' esa nade Maria, fo ri' nairu so. Yusuf nana mane' Daud tititi-nonosin, de ana muste fali leo Daud kotan Betlehem neu, nai propensi Yudea, ela dui' asa.
Huu ria naa, dua si leo kota Betlehem reu. 6 Fai fo rai naa, boe ma naraa la'e ledo-fai fo Maria saka' boki. 7 Tehuu nai naa ara ta hapu kama nai uma ofu a. Huu ria naa, ara maso' leo bibi oka dale' reu. Boe ma ana boki ana ulu na, ana tou', raluse Ni reni' taisai', ma rapeu' Ana neu' ha'o banda dale'.
Manetualain nafada mana foo ra
8 Hatun ria, mana foo hida ranea bibi nara rai moo' nai kota dea'.
9 Kekeneu te, ara rita Manetualain eila'o-limalopen neme nusatetu-ikutema' a mai. Boe ma Manetualain makaledo Na nahaa rule-feo naa si, de ara bii' raan seli. 10 Tehuu eila'o-limalope ria nafada si nae,
“Emi boso' bii! Nenene matalolole! Huu fo au mai afada emi tutui malole esa. Basa-basan fo ramanene tutui' ia, tantu ramaho'o.
11 Tutui malole ia isi na leo ia':
Fai ia boki Kristus, nai Betlehem mane' Daud kota na.
Kristus nana Lahenda fo Manetualain helu mema' neme ulu' mai.
Manetualain fee Ni mai, fo po'i-tata na lahenda reme sala-siko nara!
Neu' ko lahenda raloo Ni rae, ‘Ramatua'’, huu fo Ria nanuu haak pareta basa-basan!
12 Neu' ko emi malela' Ana leo ia': emi mita Ana boki beu' esa ralusen neni' taisai'. Ana napeu' nai ha'o banda dale'.”
13 Ana dedea basa, boe ma kekeneu te, Manetualain eila'o-limalopen dodou' reme nusatetu-ikutema' a mai rabua ro ni. Ara io-oa Manetualain ma soda rae,
14 “Ami io-oa Manetualain nade Na!
Ana natuu' pareta nai lalai madema.
Manetualain fee mole-dame neu' lahenda nai dae-ina',
fo ri' tao ramaho'o dale Na!”
15 Basa de Manetualain eila'o-limalope nara fali leo nusatetu-ikutema' a reu. Boe ma mana foo sira rafafada ao' rae, “Mai ita leo Betlehem teu dama Ana' ria! Huu fo Manetualain fee hara' neu' ita so.”
16 Boe ma ara ralale leo Betlehem reu. Ara rita Maria no Yusuf ma Ana boki beu', fo ri' napeu' nai ha'o banda dale'.
17 Ara rita Ana' ria, boe ma tui basa-basan rae, “Bisinaa' a Manetualain eila'o-limalopen reme nusatetu-ikutema' a mai rafada ami la'e-neu' Ana' ia!”
18 Basa lahenda ra heran, ramanene mana foo sira tutuin. 19 Tehuu Maria napeda basa mana dadi' sira neu' dale na. Ma ana dodoo nai dale na ela bubulu' ria sosoa na ubea'. 20 Boe ma mana foo sira fali selu' reu dama bibi nara. Ara io-oa Manetualain nade Na. Ma ara hule makasi neu' Ana, nana huu hihii-nanau' fo ramanene ma rita ni a, natetu na Manetualain eila'o-limalope nara nafafadan.
Ara foi Ana boki beu' ria, nade Yesus
21 Boki basa fai' falu, boe ma ara sunat Ana boki beu' ria, tuka ba'i Musa atoran. Boe ma ina-ama nara feen nade, ‘Yesus’. Nade' ria nana, tepo' fo mama na bei ta nairu Ni, te eila'o-limalope neme nusatetu-ikutema' a mai, nafada mema' nade' ria.a
Ara roo Yesus Ana boki beu' ria leo Uma Mamaso Yahudi Ina a neu
22 Ba'i Musa atoran esa nae, ina' fo boki basa fai' haa hulu, sona muste reu tao tuka hadas makamoi ao' a nai Uma Mamaso Yahudi Ina. No ria naa, ara bisa maso' leo uma mamaso' dale' reu sama leo' bale-bale. Huu ria naa Yusuf no Maria leo kota Yerusalem reu, ela tao tuka hadas ria. De ara roo sira Ana boki beun ria leo Uma Mamaso Yahudi Ina dale' neu', fo feen dadi neu' Manetualain nuu-enan.b 23 Sira boe tuka Manetualain atoran a nae, “Basa ina' fo boki na ana ulu' a, kalu tou', sona muste fee ana' ria dadi neu' Manetualain nuu-enan.”c 24 Tuka Manetualain atoran Na, kalu fee ana' ria leo Manetualain neu, sona ina-ama nara muste fee tutunu-hohotu' manupui kateu pasang esa, do kalasi ana tena' dua. Huu ria naa, Yusuf no Maria tao tuka atoran ria.d
Ba'i Simeon nae Ana boki beu' Yesus, nana ri' Kristus fo Manetualain helu mema'
25-26 Tepo' ria, ba'i esa, nade Simeon, leo nai kota Yerusalem. Ria lahenda dale roo-tetu', ma nahii' Manetualain seli. Manetualain Dula-dale Malalao-malalafu Na nafada ni nae, neu' ko nita Kristus dei, besa' ko ana mate. Kristus neu' ko po'i-tata na lahenda Israel ara.
27 Tepo' ria, Manetualain Dula-dale Na noo Simeon leo Uma Mamaso Yahudi Ina a neu. La'e fai ria boe, Yesus ina-ama nara roo Ni leo naa' neu, fo feen dadi neu' Manetualain nuu-enan. 28 Ba'i Simeon nita Ana' ria, de o'o naan, boe ma ana io-oa Manetualain nae,
29 “Io-oa Manetualain!
Manetualain tao tuka hehelu Na neu' au.
De besa' ia, Ana bisa po'i na au,
ela au mate no tesatei-tamadale',
30 nana huu au ita Lahenda fo ri' Manetualain feen mai,
ela po'i-tata na ami meme sala-siko' a mai!
31 Manetualain pake Ana' ia
fo po'i-tata na basa lahenda nusa' a.
32 Ria neu' ko sama leo' makaledo',
fo neni hada-horomata fee Manetualain lahenda Israel nara.
Ria sama leo' makaledo',
fo natudu Manetualain eno Na
fee basa lahenda nusa feke' ara.”e
33 Yusuf no Maria ramanene ba'i Simeon dedea leo' naa la'e-neu' sira Ana na, boe ma ara heran. 34 Boe ma Simeon dedea fee si ua-nale'. Ana nafada Maria nae, “Yesus maman! Neu' ko lahenda dodou' rai Israel tipa-tola' mama Anam ia. Tehuu sira nonoi-tatao nara neu' Ana, neu' ko natuda selu' asa. Mama Anam ia, boe tao na lahenda dodou' dale nara ramaho'o-ratadale. 35 No ria naa, neu' ko Manetualain buka lahenda ra dale nara reu loan. Tehuu o, Maria, neu' ko o hapu doidoso mabera, sama leo' tafa' a pau losa o ate-baam.”
Besa' Hana hule makasi neu' Manetualain, nana huu Yesus
36-37 Ina lasi' esa, nade Hana, nai Uma Mamaso Yahudi Ina a boe. Teu ni falu hulu haa. Papa na nade Fanuel, neme leo Aser. Ana sao teu' hitu, boe ma sao tou na mate ni de mesa' ana. Besa' Hana nana Manetualain mana nesi matan. Nonoi na, ri' hule-haradoi ma puasa nai Uma Mamaso Yahudi Ina a, fo hatu-leledon do'o-tabe neu' Manetualain.
38 Fai ria Simeon dedea no Yusuf ma Maria, besa' Hana nanenea' leo mata neu, de namanene si. Boe ma ana io-oa Manetualain. Ana nafada neu' lahenda kadodou' fo rahani Kristus mamai Na. Ana nae, Ana ria nana Kristus, Mane' fo ri' Manetualain helu basa neu' ko po'i-tata na lahenda Israel ara.
Ina-ama a ro Ana na fali leo koro Nasaret reu
39 Fai fo Yusuf no Maria tao ratetu ba'i Musa atoran ara katema' nai kota Yerusalem, boe ma ara fali leo sira koron Nasaret reu, nai propensi Galilea.f 40 Yesus nambau-ina, boe ma Ana tamba mapii-bara'ai', malela', ma bubulu' hihii-nanau' dodou'. Huu fo Manetualain natudu dale malole Na neu' Ana.
Tate ana' Yesus nai Uma Mamaso Yahudi Ina
41 Tuka-tuka teu', Yusuf no Maria leo kota Yerusalem reu raa feta Paska nai naa.g 42 Tepo' fo Yesus teun sanahulu dua, fai' esa boe ma ara leo Yerusalem reu bela' a, fo raa feta sama leo' bale-bale. 43-44 Fai Paska a basa ni, boe ma Yusuf no Maria fali Nasaret reu sama-sama ro lahenda kadodou-ina' fo ri' fali leo Galilea reu a. Tehuu ara ta bubulu' foa ela Yesus nai Yerusalem. Ara raendobuko Ana la'o sama-sama no tia-lai nara. Tehuu losa ledo leodae', ara ta rita Ni. Boe ma ara rasaka' Ana reu-mai nai kileo-boboki a ma tia-lai nara. 45 Huu no ta rita Ni, de ara ratafali reu saka Ni nai Yerusalem.
46 Ara saka Ni nai naa losa fai' telu, besa' ko rita Ni nai Uma Mamaso Yahudi Ina dale'. Ana natuu' natatane ao' no mesen agama Yahudi ra. 47 Basa lahenda fo ramanene Ni a, ara heran, huu fo Ana bubulu' matetu' Susura Makamoi' a isi-liin, ma Ana bisa nataa sira natatane nara no malole. 48 Ina-ama nara rita leo' naa, boe ma ara heran. Mama Na nae, “Yesus! Ubea' taon de O tao masususa' ami leo' ia? Au oo papa ma laka mara dile meu-mai saka O!”
49 Tehuu Yesus nataa nae, “Ubea' taon de mama mo papa sota maan seli saka Au? Mama mo papa ta bubulu'? Au aparasa nai Au Amak Uman dale'.” 50 Tehuu ara ta bubulu' matetu' Ria maksud Na.