Lahenda mana mete malela ruu', mai dama Yesus
2
Tepo' fo boki Yesus nai koro Betlehem nai propensi Yudea, mane' Herodes a homu pareta. Tepo' ria, lahenda hida reme dae doo' nai timudulu-sepelaka, leo kota Yerusalem mai. Sira lahenda mana mete malela ruu'. 2 Ara losa Yerusalem, boe ma ratane reu-mai rae, “Lahenda Yahudi ra mane na fo ri' besa' ko boki ni a, nai bea? Ami mita ruu' esa nai dulu natudu tanda nae, boki Ni so. Huu ria naa, ami mai do'o-tabe Ni.” 3 Mane' Herodes namanene sira dedea na, boe ma dale na ta tama so'. Ma basa lahenda rai Yerusalem boe ara rameda leo' naa.4 Boe ma mane' Herodes nabubua na malaka agama Yahudi malaka nara ma basa mesen agama ra, de natane si nae, “Soba emi mafada au dei! Kristus, fo ri' Manetualain helu mema' a, boki Ni nai bea?”
5 Ara rataa ni rae, “Papa mane'! Nai koro Betlehem, nai propensi Yudea. Huu fo neme ulu' mai Manetualain mana nesi matan Mika dui' mema' nae leo ia':
6 ‘Emi lahenda Betlehem, nai propensi Yudea.
Boso' mae, emi koro ma,
noi koro aana' de sosoa-raraa' ta'a.
Huu fo neu' ko lahenda bau-ina' esa neme naa' mai.
Neu' ko Ana dadi mana foo soa-neu' Au lahenda Israel kara.’”a
7 Mane' Herodes namanene leo' naa, boe ma naloo namaninino' lahenda mana mete malela ruu' sira. Ana natane si nae, “Fai hida' a ri' emi mita ruu' ria toda nai lalai?” Boe ma ara tui ni. 8 Basa de ana fee si leo Betlehem reu, ma nafada nae, “Emi meu fo saka matabebesa Ana' ria nai naa. Kalu maneta moo Ni, sona matafali mai mafada au. Huu fo au boe saka' uu do'o-tabe Ni.”
9 Ara ramanene basa mane' a dedea na, boe ma reu. Ara rita selu' ruu' fo ri' maulu na parnaa rita ni nai dulu a. Ruu' ria toda nai sira matan, de la'o losa' nate'e naraa no mamana' fo ri' boki Ana' ria.
10 Ara rita leo' naa, boe ma ramaho'o-ratadale raan seli. 11 Ara maso' leo uma ria dale' reu, te rita Ana' a no maman Maria. Boe ma ara sunda' undulaka nara do'o-tabe Ni. Ara buka sira popoti hadia hata-heto mabeli nara, fee Ana' a. Ara fee lilo pilas, kamanyan ma ai-nana boo meni' mabeli.
12 Ta doo bea boe', te ara hapu meis neme Manetualain mai nae, “Emi boso' fali selu' leo mane' Herodes meu.” Huu ria naa, ara fali leo sira nusa-namon reu, resi' eno feke'.
Yusuf asa ralai leo nusa Masir reu
13 Lahenda mana mete malela ruu' sira fali, boe ma Manetualain eila'o-limalopen rai nusatetu-ikutema' a esa mai nafada Yusuf nai meis dale' nae, “Yusuf! Foa leo! Malale fo moo Ana' a, no mama Na leo nusa Masir meu. Leo mahani' naa losa' Au afada emi fai hida' bole fali, huu fo mane' Herodes saka Ana' a fo nau naisan!”
14 Yusuf foa na aon, boe ma noo sao na ma Ana' a, ralai leo nusa Masir reu hatun ria. 15 Ara leo rai naa losa' mate Herodes. No ria naa, natetu na Manetualain dedean, sama leo' neme ulu' mai Ria mana nesi matan Hosea nafada mema' nae,
“Au aloo fali' Au Ana Ka, kalua neme Masir mai.”b
Mane' Herodes a naisa ana aana' ara rai Betlehem
16 Mane' Herodes bubulu', lahenda mana mete malela ruu' sira fufudi' ana, boe ma namanasa naan seli. Ana pareta soldadu nara nae, “Leo koro Betlehem, ma koro' manenea' rai naa. Maisa basa ana aana tou', fo ri' teu' dua leo dae' mai.” Herodes pareta leo' naa, nana huu ana nafarene lahenda mana mete malela ruu' ara tutui na. Ana reken mulai neme masososa na ara rita ruu' a toda nai lalai.
17 Basa hihii-nanau' ia ra dadi, tuka hata fo neme fai a ulu na mai Manetualain mana nesi matan Yeremia dui' mema' nae,
18 “Ramanene lahenda dola-namatani nai kota Rama.c
Rahel dola-namatani,
nana huu mate katema' ana nara.
Ana ta nau lahenda o'oe-nanasi ni,
nana huu ana nara re'es ana so.”d
Yusuf asa fali reme Masir mai
19 Boe ma mate mane' Herodes. Tepo' ria Yusuf asa bei rai Masir. Manetualain eila'o-limalopen nai nusatetu-ikutema' a, natudu ao na neu' ana nai meis dale'. 20 Eila'o-limalope ria nae, “Yusuf! Foa leo! Moo Ana' a no mama Na, fali Israel meu leo. Huu fo lahenda fo ri' nau naisa Ana' a, maten so.” 21 Yusuf namanene leo' naa, boe ma ana foa, de noo fali' asa leo nusa Israel reu.
22 Tehuu ana namanene rae, mane' Herodes anan Arkilaus pareta nai propensi Yudea, de ana bii' fali leo naa' neu. Boe ma Manetualain pareta selu' ana nai meis esa bali nae, “Yusuf, o boso' leo nai Yudea.” Huu ria naa, ana neu leo nai propensi Galilea, 23 nai koro' esa nade Nasaret. No ria naa, natetu-naraa no Manetualain dedea-nafadan, tuka hata fo Ria mana nesi mata nara dui' mema' rae, “Neu' ko ara raloo Ni rae Lahenda Nasaret.”e