4 Basa fai' hitu hulu, boe ma Yusuf nafada pegawe nara nae, “Nenene! Au hule emi meni au dedea ki ia, meu mafada mane' a mae leo ia': 5 ‘Fai fo au papa ka saka' mate, ana helu au uu atoi popora na nai dae Kana'an. De au hule mane' a po'i au ela uu atoi papa ka. Basa dei au fali leo ia' mai.’”

6 Mane' a namanene leo' naa, boe ma nataa nae, “Kalu o helu leo naa' soa-neu' papa ma, sona muu matoin nai naa.”

7 Yusuf neu natoi papa na. Lahenda dodou' tuka ro ni. Mana tuka' sira, nana mane' a pegawe nara ma lahenda bau-ina' reme Masir. 8 Yusuf a'a-fadi nara ma basa lahenda mana noi nara tuka reu ratoi Yakob. Foa ela nai Gosen, nana noi sao ina nara ro ana aana' ara ma banda-manu nara. 9 Soldadu dodou' tuka boe. Ruma sa'e kareta ma ruma sa'e dara. Huu no mana tuka' ara dodou raan seli, de mana matoi sira ranononda naru na seli.

10 Basa si la'o losa' lena lee Yarden, nai mamana' esa nade Atad. Lahenda biasa popo'o hade nai naa. Yusuf asa boreu papa na mamaten nai mamana' ria. Ma ara mete hatu' hitu bali.

11 Lahenda Kana'an rai naa rita susa leo' naa, boe ma ara dedea rae, “Emi mita', lahenda Masir ara mete mamates, sona ara dola raan seli.” Huu ria naa, lahenda ra fee mamana' ria nade, Abel-Misraim. Sosoa na nae, ‘Lahenda Masir lumata-pinuidun.’

12 Yakob ana nara tao tuka sira hehelu na. 13 De ara o'o reni Yakob popora na, ratoin nai lea' fo nanenea' koro Makpela no Mamre. Abraham asa mamana' ria neme lahenda leo Het, nade Efron, fo ana taon dadi sira mamana roo-raten.

14 Yusuf natoi basa papa na, boe ma no a'a-fadi nara ma lahenda feke' fo ri' reu ratoi, ara fali leo Masir reu.

15 Ara losa Masir, boe ma Yusuf a'a nara mulai bii'. Huu no sira papa na ne'es ana, de ara dedea-rao nara rae, “Emi afi dei! Uni' ko leo Yusuf bei napeda dale' no ita, de ana balas ita tatao tadalu na neu' ana, sona leo' bea?” 16 Boe ma rala hara' de fee reu rafada Yusuf rae leo' ia: “Papa wakil. Ami bei mafarene ita papa na bei nasoda a, ana nadenu ami 17 mafada papa mae, ‘Yusuf muste nafarene heni a'a nara sala-sikon. Nana huu maulu na ara tao tadalu' soa-neu' ana.’ Ami mafarene neme ulu' mai ita papa na do'o-tabe Manetualain. Ami dadi Manetualain ata nara. Huu ria naa, besa' ia ami hule ampon, nana huu ami tao masala' papa.”

Yusuf namanene leo' naa, boe ma ana dola.

18 Boe ma a'a nara mai mata nara, sunda' undulaka nara reu' Yusuf mata na ma ara dedea rae, “Ela papa tao ami dadi papa ata mara.”

19 Tehuu Yusuf nafada si nae, “A'a kara emin! Emi boso' bii'! Noi Manetualain nanuu haak huku lahenda. Tehuu au, ta'a. 20 Maulu na tebe emi mala hara' tao tadalu' soa-neu' au. Tehuu emi hihii-nanau tadalum ria, Manetualain naralin dadi malole. Huu ria naa, Ana so'u au dadi malaka bau-ina', ela lahenda dodou' bisa rasoda. 21 De besa' ia au afada emi, boso' bii' bali. Huu fo au helu neu' ko au relu-atanae emi ma upu-ana mara.”

Yusuf dedean ria, natatama a'a nara dalen.

22 Yusuf no a'a-fadi nara leo rahani' Masir. Ana nasoda losa teu' natun esa sanahulu. 23 Ana bei nita Efraim upu-ana nara. Ma ana nahao-nafati Manase upu nara, si' Makir ana nara.

24 Yusuf nafada a'a nara nae, “A'a kara emin! Au ameda aan, au fai mamate ka nanenea'. Tehuu au amahere Manetualain naboi-nasamao emi. Ria neu' ko po'i-tata na emi meme nusa' ia mai. Ria boe napipipi-nalala'o emi fali leo nusa' fo ri' Ana soo-supa nae fee ba'i Abraham, ba'i Isak ma ita Papan Yakob.” 25 Boe ma Yusuf hule toranoo nara soo-supa rae, “Emi muste helu mai' au. Kalu losa fai na fo Manetualain no fali' emi leo nusa' ria meu, sona emi muste meni au dui-aalu ki boe.”

26 Yusuf maten nai Masir, neu' teun natun esa sanahulu. Ara tao modo-aidoo neu' popora na ma ara tatana etun neu' opa' dale'.