Paulus nasala'e aon nai mane Agripa matan
26
Basa boe ma mane Agripa nadenu Paulus nae, “Hatematak ia, o bisa masala'e o aom. Ai basa nggai mahehele so, fo nau mamanene o.”Paulus botik liman, boe ma ana mulai kokolak nae,
2 “Ama manek Agripa fo au fee hada-holomata. Au ameda amahoko, huu ama mbo'i au fo bole tui ama sala, basa dede'ak fo hataholi Yahudi kalaak au. 3 Au bubuluk ae, ama bubuluk no teteben, ita hataholi Yahudi hadan, ma la'e-neu ita mamaten do masodan. De au hule fo ama mamanene neulalau au.
4 Mulai neme au kadi'i anang mai, ala lanoli au so, fo asoda tungga ita hataholi Yahudi hadan. Sososan au hambu nanolik neme au nggolong; basa de au mai sakola tamba bali neme Yerusalem. Hataholi Yahudi malai Yerusalem, ala bubuluk au dala sodang, ma lalelak tebe-tebe au. 5 Mete ma malangga anggama la nau, ala bisa tui lae, ala lalelak au neme makahulun mai so. Au ia boe oo, maso paltei anggama Farisi. Basa hataholi bubuluk lae, ai hataholi Farisi ia, tungga tea-tea basa hataholi Yahudi anggaman heti-heun.a 6-8 Au ua hataholi Israel neme leo kasanahulu duak kala mai, mahani fo Manetualain tao tungga Ndia hehelun. Heheluk ndia, Ana nafadan neu ita bei-ba'in nala neme makahulun mai so. De losa hatematak ia, ita basa nggata hule-haladoi leledo-le'odaen, fo suek Manetualain hehelun ndia dadi leo. Heheluk ndia isin nae, dei fo Ndia tao nasoda falik hataholi mana matek kala so.
Ama manek Agripa fo au fee hada-holomata. Huu au amahele ae, dei fo Manetualain tao nasoda falik hataholi mana matek kala, huu ndia de ladede'a lo au. Au sangga atane: hatina de hambu neme ei mai ta nau mamahele mae, Manetualain bisa tao nasoda hataholi mana matek so? Neu ko Ana bisa!
9 Memak makahulun au tao sudi hata, fo laban tea-tea basa hataholi mana tungga Yesus, hataholi Nasaret. 10-11 Faik ndia malangga anggama Yahudi malanggan nala fee koasa neu au, fo au uu tao akatoto'ak Yesus hataholin nala sudi lai bee. Au humu sala, boe ma au hela uni sala leni Yerusalem leu, fo andee sala leni bui dale leu. Au boe oo, tungga aketu fo fee huku mate neu sila luma. Au boe oo, maso uni uma huhule-haladoik kala uu, fo tao doidoso sala. Boe ma au akaseti sala fo lalelesi Yesus. La'i no'uk, au husi sala no dale matobik. Sadi au amanene mana lamahele Yesus sudi lai bee, mae losa nusa dea boe oo, au uu husi sala!”b
Paulus tui seluk hata fo nitan ma natotonggo noon
12 Paulus kokolak tuti nae, “La'i esa, malangga anggama Yahudi malanggan nala fee au susula koasa, fo au uu husi Yesus hataholin nala nai kota Damsik. Boe ma au uu. 13 Ama manek Agripa! Ledo-eik ai bei nai dala laladak, meda ledo namatetu, kada nggengge neuk, manggaledok esa neme lalai mai, sa'an tanden ana seli, nandaa neu au ma au nonoo nggala. 14 Ai basa nggai bala miu dae, huu manggaledok ndia sa'an. Boe ma au amanene halak esa kokolak no au, pake dede'a Aramc nae, ‘Wei Saulus! Hatina de o mambue tao doidoso Au makandondoo henin? Toto'ak nalan seli, mete ma o mambue laban Au hihiing makandoo.’ 15 Au amanene halak ndia, tehuu ta ita hataholin. De au atane ae, ‘Ama mana kokolak ia see?’
Boe ma halak ndia nataa nae, ‘Au ia, Yesus, fo o mambue tao doidoson makandoo. 16 Saulus! Fo'a leo! Au atudu aong neu o fo dadik Au hataholi namaheheleng. O musi muu mafada basa hataholi, hata fo leledon ia o mitam neme Au mai so. Dei fo Au atudu tamba o bali, dede'a beuk kala fo o bisa muu mafada basa hataholi. 17 Dei fo o hambu toto'ak mata-matak. Tehuu Au anea o neme hataholi la, fo mana sangga tao lakatoto'ak o, mae neme hataholi Yahudi mai, do neme hataholi fe'ek kala mai. Tetebes! Au adenu o muni hataholi ta Yahudi la muu. 18 O muu buka matan nala, fo suek ala bubuluk, ma lasoda nai manggaledok. Boe ma ala la'o ela dala soda pepekon nala. Ma o musi matudu sala dala soda ndoos. O makambo'ik kasa leme nitu la malangga ina-huun koasan mai, boe ma mua sala leni Manetualain leu. No leo ndiak, Manetualain koka heni basa sala-singgon nala. Sila boe oo, dadik Manetualain hataholin sama-sama lo hataholi fe'ek, fo Manetualain hele nala sala so, huu lamahele Au. Kada ndia fo Au afada neu o, Saulus.”’
Paulus tui ndia uen
19 Paulus kokolak tuti nae, “De ama manek. Au akalala'ok ues fo au simbo aon neme nusa sodak mai so. Losa hatematak ia, au bei tao ues akandoo, ta heok faa boe. 20 Sososan au afada Yesus Dala Sodan neu hataholi Yahudi malai Damsik. Basa boe ma au mai afada basa hataholi Yahudi malai Yerusalem, ma malai propensi Yudea. Basa de au la'o afeok uni hataholi ta Yahudi nusan nala uu. Au kokolak manggaledok ua basa sala, fo ala la'o ela dala soda kasalan nala, ma fee sila aon neu Manetualain. Sila boe oo, musi tao malole nai sila sodan, neu hataholi fe'ek, fo dadik tanda nae, sila dadik hataholi beuk nai Manetualain dalek so.d 21 Huu au tao ues leo ndiak, boe ma hataholi Yahudi la humu lala au, neme Uma Ina Huhule-haladoik nai Yerusalem. Sila boe oo, sangga tao lisa au. 22 Tehuu Manetualain tulun au. Huu ndia de au bei asoda losa hatematak ia. De au bei bisa ambadeik nai ia, fo tui basa hataholi inahuu-kadi'ik la'e-neu Yesus Dala Sodan. Hata fo au afadak ia, basan nandaa no hata fo ba'i Musa, ma Manetualain mana kokola makahulun nala fee nanonolik so. 23 Ala fee nanonolik la'e-neu Karistus, fo ndia Hataholi fo Manetualain helu sangga nadenun mai so. Nae, Ndia musi lemba doidosok, basa na, Ana mate, tehuu basa de Ana dadik hataholi sososak, fo Manetualain tao nasoda falik kana. Dei fo Ndia tao manggaledo hataholi Yahudi la, ma hataholi nusa fe'ek kala malai dae-bafok.”e
24 Paulus bei kokolak fo nafada ndia uen, boe ma Festus tete kokolan no hala malii nae, “Heeh! Paulus! Fama o mamulu so. O bubuluk no'un seli, losa tao nala o langga uten naleo.”
25 Tehuu Paulus nataan nae, “Ama nggubenol fo au fee hada-holomata. Au ta amulu. Basa hata fo au afadak ia, memak tetebes. Au ta dudula. 26 Ama manek Agripa mesak kana bubuluk hata fo au afadak ia. Huu ndia de au ambalani kokolak manggaledok. Au amahele ae, ama manek namanene basa dede'ak ia so, huu hata fo mana dadik ndia so, ta dadi nai mamana nees. Nae, Yesus fo mana matek, nasoda fali so. Basa hataholi boe oo, bubuluk dede'ak ndia so. 27 Neme lele uluk mai, Manetualain mana kokolan nala lafada memak dede'ak ia. Au ambalani ambedak ae, ama manek boe oo, namahele mana kokolak kala sila kokolan, hetu?”
28 Mane Agripa tete tutik ndia kokolan nae, “Wee! Paulus! Ta dook bali, o sangga tao au dadi hataholi Salanik so!”
29 Tehuu Paulus nataa manek nae, “Leo iak, ama. Au hule-haladoi neu Manetualain, fo suek lai-lai do dook, ta kada ama manek, tehuu basa hataholi fo faik ia lamanene au kokolang ia, bisa dadik sama leo au, fo ndia Yesus hataholin! Tehuu sadi ama sala boso dadik hataholi nana kenak sama leo au ia.”
30 Paulus kokolak nate'e leo ndiak, boe ma mane Agripa no fadin Bernike, nggubenol Festus, ma basa hataholi ina-huuk kala fo'a lambadeik fo fali. 31 Ledo-eik ala la'o deak leu, hataholi la kokolak lae, “Hataholi ia ta tao hata-hata, fo nandaa huku maten, do landeen neni bui dale neu!” 32 Boe ma mane Agripa nafada nggubenol Festus nae, “Kasian! Hataholi ia noke nakahehenek neni mana palenda ina-huuk nai Roma neu. Mete ma taa, na, dede'ak ia bisa basan so, ma bisa mbo'in so.”