3 Ai sa'e ofak la'o ela Kaisarea, boe ma fo'a mai, ai losa nai kota Sidon. Malangga soldadu Yulius tao Paulus no malole, ma nafada Paulus fo bole neu tilo nonoon nala nai madak lain. Ndia maksut fo suek ala bisa fee Paulus sudi hata fo ana paluu nai tasi lai.

4 Boe ma ai basa nggai sa'e seluk ofak fo mulai la'o. Tehuu ani soluk belak, losa ofak ndia elaba'ik ta mata neu. Boe ma ala heok ofak, fo tungga pulu Siprus, ma dae Siria laladan, fo suek nana babaak neme ani soluk ndia mai. 5 Boe ma neme ndia mai, ai ha'i dala keke'uk tungga propensi Kilikia ma propensi Pamfilia matan. Boe ma ai losa kota Mira nai nusa Likia. Losa ndia, ai basa nggai konda neme ofak ndia mai. 6 Nai Mira, malangga soldadu Yulius sangga ofa fe'ek, fo mana nau neni Itali neu. Boe ma ana hambu ofak esa, fo neme kota Aleksandria mai, fo sangga neni Itali neu. De nadenu ai basa nggai sa'e mini ofak ndia lain miu.

7 Ai sa'e ofak faik hida so, tehuu ofak ndia elaba'ik ta nau mata neu, huu ani soluk belan seli. Boe ma ai sa'e ofak sota mate malan seli, losa dekak no kota Knidus. Tehuu ani belak bei nakandoo, de ai ha'i dala keke'uk mini pulu Kreta miu, fo suek babaa neme ani ndia mai. Basa bei fo ai tungga solonggook esa, nade Salmone. 8 Ai sa'e ofak sota malan seli tungga solonggook ndia, tungga-tungga pulu Kreta tasi bifin, bei fo ai bisa losa mamanak esa, nade Namo Malole. Mamanak ndia dekak no kota Lasea.

9 Nai ndia, ofa isi la hahae aon faa, huu ai mala dook nai ofak lain, tehuu bei ta losa Itali. Faik ndia, hataholi Yahudi la fai ina-huun Hambu Ambon neme Sala-singgok mai, seli so boe.^a Ndia ndandaan nae, fai ani belak ma lii ina-huuk mulai so. Boe ma ofa isi la latane lae, la'o takandoo do taa. Paulus namanene leo ndiak, boe ma ana mulai kokolak 10 nae, “Basa tolanoo nggala ei. Au oke kokolak faa. Au dudu'a mete ma ita la'o takandoo, na, dei fo ita bisa hambu toto'ak no'uk. Bisa-bisa ofak ia bolo, mopo buas sala, ma ita basa nggata boe oo bisa mate.” 11 Tehuu malangga soldadu ndia, ta nau namanene Paulus. Ana namahele lena neu kada juragan, ma maofak. Sila hihiin sangga kalua neme mamanak ndia mai. 12 Dede'an, ndia Namo Malole ndia ta linok, mete ma ofak musi see nai ndia nandaa no fai lii. De no'uk neme sila mai nau fo ai la'o makandoo, fo mini kota Feniks miu. Ala lamahena, mete ma bisa, na, ai basa nggai leo nai ndia nai fai lii ia. Kota Feniks ndia, pulu Kreta namo sesee neulaun seli, huu nana babaak neme ani bala-konak ma bala-kiik mai, ma nakambo'ik neme lii ina-huuk mai.

13 Neu faik fo ani konas mulai fumbu faa-faa, lae hetuk ala bisa pake ani ndia so, fo la'o leni Feniks leu. Ala lae, “Ani ia neulauk. Mai ita la'o leo!” De ala hela naka ma le'a laa, boe ma ai la'o tungga-tungga tasi bifi. 14-15 Tehuu ai bei ta la'o doo-doo ana, te nggengge neuk ani sanggu mai. (Fo hataholi lae, ‘ani timu-konas’). Ani ndia fumbu heni ofak neni tasi laladan neu. Ofa isi la ta bisa pode lala ofak no natetu, de kada ala ela ofak bonu tungga ani hihiin leo.

16 Ai bonu tungga lii leo ndiak, losa dekak mia pulu anak esa, nade Kauda. Faik ndia, sakoci bei nana mba'ak nai ofak ikon. Boe ma ai sota malan seli hela sakoci neni ofak lain neu. 17 Ledo-eik sakoci nala ofak lain so, boe ma ala mulai feo tali ndule ofak ndia aon, fo nanea boso losak ofak papan nala hu'a heni sala, fo bolo. Sila boe oo bii, boso losak lii tenda ofak ndia, fo hala nai salae metik Sirtis nai Afrika ele. De lakonda naka bonu nai tasi, suek naloe ofak ndia lala'on.

18 Ani sanggu ndia bala ai ofan kii-konak. De fo'a mai, ofa isi la mulai nggali heni ofak fufuan nala, leni tasi dale leu. 19 Fo'a mai bali, ani sanggu bei fumbu belak. De ala tamba bii bali. Huu ndia de ala tao lamada'u ofak, ma nggali tamba fufuan nala bali. Ofak buan nala boe oo, ofa isi la nggali heni sala lenik sila lima hehelin. 20 Leledo-le'odaen ani sanggu ndia, ta hahae faa boe losa faik hida, ma ko'a makate losa ai ta bisa mita ledo ma nduuk kala so. Ai basa nggai ketu ai namahenan so, ma ai mameda mae, ai ta bisa masoda so bali.

21 Ai ta mi'a hata-hata esa boe, faik hida ia so. Boe ma Paulus noke nala basa sala, de kokolak nae, “Basa tolanoo nggala ei! Mete ma ei tungga au kokolang so, fo ita boso la'o ela Namo Malole, neu ko hatematak ia, ita ta hambu toto'ak no'uk leo iak, ma ta taheni hata-hata. 22 Tehuu hatematak ia, au oke ei basa nggei, fo kada tao matetea dalek. Dei fo ita ofan ia nakalulutuk henin. Tehuu boso bii, te ta hambu hataholi mate. 23 Au nau ei basa nggei bubuluk mae, au ia Manetualain hataholin, ma au hambu ues neme Ndia mai. Le'odaek Ana nadenu ata nusa sodan esa mai, nambadeik neu au boboang. Boe ma nafada au nae, 24 ‘Paulus! O ta paluu bii hata esa boe. Dei fo o musi masale mane ina-huuk nai Roma, fo nakaneni o dede'am. Huu Manetualain dalen malole neu o, de Ndia boe oo, nasala'e nala basa hataholi manai ofak ia lain.’ 25 De basa tolanoo nggala ei. Boso ei ma'a-male. Au amahele tebe-tebe neu Manetualain ae, hata fo Ana nafada au le'odaen ndia, dei fo dadik leo ndiak. 26 Tehuu dei fo ofak ia hala nai pulu esa.”

27 Faik ndia, ani-lii nakamiminak ma tao nabonu ai, faik 14 so neme tasi Adria. Tehuu meda fatilada, ofa isi la lameda leo ai dekak mia madak lain so. 28 Boe ma lakonda u'ukuk fo sangga bubuluk oe deman. De ala uku hambu le'a 20. Boe ma ofak mata neu faa bali, de lakonda seluk u'ukuk ndia, ma hambu oe deman le'a 15.^b 29 Basa sala bii, boso losak ofak ndia hala nai batu kanolik. De lakonda naka haa malai ofak ikon. Boe ma ai basa nggai mamahena, fo suek manggaledo lai-lai. 30 Tehuu ofa isi la lala halak, fo sangga lalai la'o ela ofak ndia no nee-neek. De lakonda sakoci fo taok sama leo ala sangga lakonda naka nai ofak langgan.

31 Tehuu Paulus nafada ofa isi la dudu'a manggalaun neu malangga soldadu ma soldadu la nae, “Mete ma ofa isi la ta lahani ofak lain, dei fo ei basa nggei mate.”

32 Soldadu la lamanene Paulus kokolak leo ndiak, boe ma ala tati ketu sakoci talin, fo ela sakoci ndia bonu. De ofa isi la ta lalai so.

33 Fai mulai manggaledo, boe ma Paulus kokoe basa hataholi sila fo la'a. Ana nae, “Sosoda ina dua ia so, kada ita bisa tanggatuuk, fo kada tamahena, ma ta isi ita tein no hata esa boe. 34 De au hule fo suek ita ta'a faa dei, fo ita bisa hambu falik ita balakain. Au amahele ae, dei fo ta hambu esa neme ita mai hambu soe. Ita basa nggata neu ko tasoda!”

35 Paulus kokolak basa leo ndiak, boe ma ana ha'i loti. De ana hule-haladoi noke makasi neu Manetualain, nai basa sala matan. Basa boe ma ana ha'i nala bibiak esa, de na'a. 36-37 Ala lita leo ndiak, boe ma dalen nala latea lasafali. De ala la'a sama-sama boe. Basa ai manai ofak ndia, hataholi 276. Ai basa nggai mi'a. 38 Ai mi'a makabete basa, boe ma ala mulai nggali heni hade-nggandum mala leni tasi dale leu, fo soba tao namada'u ofak ndia.

39 Manggaledo so, ofa isi la lita madak lain. Tehuu ala ta bubuluk pulu beek ndia. Ala lita namo esa, tasi bifin salaek. De lamahena, mete ma bisa, na, ala nau leni ofak ndia nesik batu kanolik kala malai tasi, fo leni tasi bifin ndia leu. 40 De ala tete ela naka la leu tasi dale. Boe ma latanggodo uli neni tasi dale neu, fo suek bisa nakalala'ok ofak ndia. Boe ma ala hela laa anak manai mata, fo suek ani fuu ofak ndia neni tasi bifi neu. 41 Tehuu ofak ndia sa'e nala salaek mbukuk esa nai tasi dale, boe ma hala neu ndia, de ta bisa nangge'o bali. Boe ma lii ana mai mbuka nakalulutu ofak ndia ikon.

42 Ledo-eik soldadu la lita leo ndiak, boe ma sila maksut sangga tao lisa basa hataholi bui la. Ala bii, boso losak hataholi bui la ngga'e leni madak lain leu, de fo'a lalai. 43 Tehuu malangga soldadu Yulius ka'i soldadun nala, huu ana sangga nasala'e Paulus. Boe ma ana palenda, fo basa hataholi mana ngga'e lalelak, lakaboku tasi dale leu, fo ngga'e leni madak lain leu. 44 Boe ma hataholi fo ta mana ngga'e lalelak, ana nadenu fo to'u papak, do sudi hata, fo tungga lii mana neni madak lain neu. De ai basa nggai losa madak lain mia sodak.