Paulus nasala'e aon
22
Boe ma Paulus mulai kokolak nae, “Ama sala ma basa tolanoo nggala ei! Au oke ei mamanene au, fo au sangga asala'e aong.”2 Faik ndia, hataholi no'uk kala lamanene Paulus kokolak pake sila dede'a hehelin. Boe ma ala nee-nee tutik, fo sangga lamanene neulalau ndia kokolan. Boe ma ana tuti nae, 3 “Sadi ei basa nggei bubuluk mae, au ia hataholi Yahudi. Au inang bonggi au neme kota Tarsus nai propensi Kilikia. Tehuu au ina-huu nai Yerusalem ia. Mana nanoli au nai ia, ndia mese ina-huuk, nade Gamalial. Ana nanoli au basa ba'i Musa heti-heun, losa lutu-lutuk. Au boe oo, manggate tungga Manetualain sama leo ei basa nggei ia.a 4 Fai maneuk au ta hahae uu husi ma tao akatoto'ak hataholi la, fo mana tungga Yesus Dala Sodan. Au hela ua sala, touk ma inak, leni Yerusalem ia mai, boe ma andee sala leni bui dale leu. Faik ndia, hambu luma mate boe. 5 Ita malangga anggama malangga ina-huun ma malangga fe'ek kala, fo mana lakaneni dede'a anggama, basa sala bubuluk lae, hata fo au kokolak ia memak tetebes leo ndiak! Au ta asapepeko. Te sila ndia fee au susula koasa, fo au uu humu hataholi la, fo mana tungga Yesus losa kota Damsik. Nai ele, au sangga humu sala, boe ma hela ua sala leni Yerusalem leu. Au maksut, elan fo hataholi mana maketu dede'a anggama, dei fo huku sala.”b
Paulus tui hata fo nitan ma natonggo noon
6 Boe ma Paulus tuti kokolan nae, “De au la'o uni Damsik uu, fo sangga sala lai ele. Meda ledo namatetu, ai sangga losa kota so. Kada nggengge neuk, te hambu manggahadok esa neme lalai mai la'e au. 7 Boe ma au bala uu dae, de au amanene halak esa kokolak nae, ‘Heeh, Saulus! Hatina de o tao doidoso Au leo iak?’ 8 Memak au amanene halak ndia, tehuu ta ita hataholin. De au atane ae, ‘Ama mana kokolak ia, see?’
Boe ma halak ndia nataa nae, ‘Au ia Yesus, hataholi Nasaret, fo o tao doidoso Au!’ 9 Hataholi mana la'o lanonoo lo au, lita manggaledok ndia, tehuu ta lamanene halak ndia.
10 Boe ma au ataa ae, ‘Mete ma leo ndiak, na, hatematak ia au musi tao hata?’
Halak ndia nafada nae, ‘Fo'a leo, fo maso muni kota dale muu. Nai ndia, dei fo Au afada basa hata fo o musi taon.’
11 Au amanene leo ndiak, boe ma au fo'a ambadeik. Tehuu au ta bisa ita hata-hata so bali, huu manggaledok ndia sa'an. De au nonoo nggala to'u lala au, de loo au maso uni kota Damsik uu.
12 Hambu hataholi esa nai ndia, nade Ananias. Ndia ia, hataholi dale ndoos, ma ana to'u tea-tea ba'i Musa heti-heun nala. Basa hataholi Yahudi fo mana leo nai kota ndia, hiin ma ala fee hada-holomata neun boe. 13 Ana mai sangga au, de kokolak nae, ‘Ka'a Saulus! Malaak o matam fo mita leo! Ka'a matam hai so.’ Ana kokolak basa leo ndiak, boe ma au botik au matang, de au bisa ita ndia. 14 Basa boe ma ana nanoli au nae, ‘Manetualain fo ita bei-ba'in nala hule-haladoi neun, hatematak ia hele nala ka'a so. Ka'a uen, ndia malelak neulalau Ndia hihiin. Ma malelak neulalau Yesus fo neme makahulun mai ita seseik Ndia tae, “Hataholi Malalaok”. Hatematak ia Manetualain soi dalak so, fo ka'a namanene aon neme Yesus mai. 15 Ndia mesak kana hele nala ka'a so, fo muu mafada hataholi sudi lai bee la'e-neu Ndia Tutui Malolen. Ka'a musi mafada basa hata fo ka'a mita no mata hehelim, ma basa hata fo ka'a mamanene neme Ndia mai. 16 Ka'a boso mahani mala dook bali! Muu fo moke sala salani ka'a leo! Fo dadik tanda nae, ka'a noke fo Lamatuak Yesus koka heni basa ka'a sala-singgon nala so.”’
Manetualain nadenu Paulus neni Hala Malole fee hataholi nusak ta Yahudi
17 Boe ma Paulus tuti kokolan nae, “Basa boe ma au fali uni Yerusalem uu. Faik esa, au uu hule-haladoi neme Uma Ina Huhule-haladoik. Ledo-eik au hule-haladoi, Lamatuak natudu au nonook leo me'is. 18 Au ita Yesus. Boe ma Ana palenda au nae, ‘Hatematak ia, o musi la'o ela kota Yerusalem ia leo! Te hataholi malai ia, ta nau simbok hata fo o fee nanonolik la'e-neu Au.’
19 Tehuu au ta simbok palenda ndia no malole, huu makahulun memak malangga anggama la hii au. De au ataa ae, ‘Tehuu leo iak, Ama! Basa sala bubuluk lae, fai maneuk au maso-kalua uma huhule-haladoik sudi nai bee, fo humu ma mbomboko hataholi mana lamahele neu Ama. 20 Sila bubuluk boe, neu faik fo ala mbia lisa Ama nadedenun, Stefanus, au nai ndia boe. Ledo-eik ala lakaduduluk batu fo mbia lisan, au ndia heti sala ma anea badun nala.’c
21 Mae au fee nasanenedak leo ndiak, tehuu Yesus palenda seluk bali nae, ‘Boso sangga to'ok mata-matak! Hatematak ia, la'o ela Yerusalem fo muu leo! Te Au sangga adenu o, muni mamana dook kala muu, fo manoli hataholi ta Yahudi la.”’
22 Neu faik fo hataholi no'uk kala lamanene Paulus kokolak nae, Lamatuak nadenun fo neni hataholi nusa fe'ek neu so, boe ma ala ta nau lamanenen so bali. Basa sala luli, de ala eki landaa lae, “Boso mamanene hataholi ia bali! Tao misan leo! Ana ta nandaa nasoda so.”
Soldadu la loo Paulus neni kota musu neu
23 Ala eki leo ndiak, boe ma ala odu heni badun nala, ma la'u afu, de mbolin lain neu, huu ala luli lalan seli so. 24 Ledo-eik malangga soldadu nita nae, hataholi la sila tao naodek leo ndiak so bali, boe ma ana nadenu soldadun nala hela loo Paulus maso neni kota musu neu. Boe ma malangga soldadu nadenu sala filon, suek ana manaku nae, ana sala hata, losa hataholi Yahudi la nau tao lisan. 25 Ledo-eik ala hengge Paulus fo sangga filon, boe ma natane nasafali soldadu ndia nae, “Tungga mana palenda Roma heti-heun, na bee ndia tetebes? Mete ma hataholi esa naena haak lau-inggu Roma, boe ma ana hambu dede'ak, na, ei musi taon leo beek? Ei mbomboko makahuluk kana, do ei palisa makahuluk kana?”
26 Soldadu ndia namanene leo ndiak, boe ma ana lai-lai neu sangga malangga soldadun. De nafadan nae, “Ama! Hataholi ia naena haak lau-inggu Roma! De ama sangga taon leo beek?”
27 Malangga soldadu namanene leo ndiak, boe ma mesak kana neu natane tutik Paulus nae, “Lae, o maena haak lau-inggu Roma? Tetebes, do?”
Boe ma Paulus nataa nae, “Memak tetebes, ama! Au aena haak ndia.”
28 Boe ma malangga soldadu nae, “Au leo ndiak boe. Au bae belin seli, fo bisa hambu haak ndia.”
Tehuu Paulus nataa nae, “Au ta bae hata-hata. Mulai neme au inang bonggi au, au to'u haak ndia so. Au amang boe oo to'u haak ndia.”
29 Neu faik fo lamanene lae, Paulus to'u haak lau-inggu Roma, boe ma soldadu la sila heok, de ta lambalani filo ma palisak ndia bali. Malangga soldadu ndia bii, huu ana hengge Paulus so, ma bubuluk nae, ana la'o lena heti-heuk so.
Paulus nai mamana naketu dede'a anggama Yahudi
30 Fo'a mai, malangga soldadu ndia bei nau sangga dede'ak ndia huu-oka teteben leo beek. Boe ma nadenu soldadun nala, fo leu loke malangga anggama Yahudi malanggan nala ma basa hataholi ina-huuk, fo mana lateme lakaneni dede'a anggama Yahudi fo lakabubua. Boe ma nadenu leu buka heni Paulus tali besin, de loon neu nasale basa hataholi sila.