4 Tehuu nggubenol nataa nae, “Ama nggala ei. Leo iak. Elan fo ala kena ndia nai Kaisarea dei. Te au boe oo sangga fali lai-lai uni ele uu. 5 De mete ma hambu neme ei mai hambu koasa fo makaneni dede'ak ia, na, ala bole leu sama-sama lo au mini Kaisarea miu. Mete ma memak hataholi ia tao salak hata-hata, na, ei bole madede'a mian nai ele leo.”

6-7 Boe ma Festus leo meda faik sanahulu nai Yerusalem, bei fo ana fali neni Kaisarea neu. Faik ndia, hambu hataholi Yahudi hida tunggan losa ele. Fo'a mai, boe ma nggubenol buka dede'ak ndia. Ana nadenu loo Paulus maso mai nasale ndia.

Ledo-eik Paulus maso neu, boe ma hataholi Yahudi la lambadeik e'on, de ala mulai soli salak mata-matak neun. Tehuu ala ta bisa latudu buti esa boe.

8 Boe ma Paulus nasala'e aon nae, “Ama nggubenol. Au ta tao itak manggalauk hata-hata. Au boe oo, ta tao dede'ak fo laban ai anggama Yahudi heti-heun. Au ta tao anggenggeo Manetualain Uma Ina Huhule-haladoin nai Yerusalem. Ma au boe oo ta tao hata-hata fo laban mana palenda Roma heti-heun.”

9 Tehuu nggubenol sangga matak, ma ha'i dalek neu hataholi Yahudi la. Huu ndia de natane Paulus nae, “O dudu'am leo beek? O makaheik do taa, mete ma au akaneni o dede'am ia nai Yerusalem?”

10 Paulus namanene nggubenol natane leo ndiak, boe ma nataa nae, “Ama nggubenol. Au ia lau-inggu Roma. Ma hatematak ia, au ambadeik nai ama nggubenol matan neme mana palenda Roma fo mana naena haak fo nakaneni au dede'ang tungga ndia heti-heun. De au ta nau uni Yerusalem uu, fo laketu au dede'ang nai ele. Ama mesak kana bubuluk so mae, au ta tao salak hata-hata, fo laban hataholi Yahudi la ia. 11 De mete ma memak au tao salak hata-hata, fo nandaa huku mate, au simbok. Tehuu mete ma hata fo ala kokolak ndia, ta tetebes tungga heti-heuk Roma, ta hambu esa bisa fee au uu hataholi la ia liman. sila kada sangga dalak, fo nau tao lisa au no lou-latak. De hatematak ia, tungga au haak, au oke akahehenek uni mane ina-huuk keser uu, nai mana palenda ina-huuk, nai kota Roma. Ela ndia mesak kana naketu matan dede'ak ia!”

12 Nggubenol namanene Paulus noke leo ndiak, boe ma ana kokolak no nonoon nala, fo mana tungga lakaneni dede'ak ndia. Basa boe ma nafada Paulus nae, “Huu o moke nakahehenek muni keser muu so, de o musi muni kota Roma muu.” Nggubenol kokolak basa leo ndiak, boe ma nate'e nakabubuak ndia.

13 Basa boe ma hataholi Yahudi manen, nade Agripa,^a no feton, nade Bernike, leni Kaisarea leu. Dua sala sangga fee hada-holomata neu nggubenol beuk. 14 Ala leo tataak faik hida lo nggubenol Festus. La'i esa, Festus tui dua sala Paulus dede'an. Nae, “Ama manek! Nai Kaisarea ai kena hataholi esa, nade Paulus. Makahulun nggubenol laak ta hambu lelak naketu dede'an. 15 Bei lalaik ia, neu faik fo au uma Yerusalem, malangga anggama Yahudi malanggan nala ma lasi hadak kala, mai kalaak Paulus salan. Boe ma loke au fo hukun. 16 Tehuu au afada sala ae, ‘Tungga mana palenda Roma heti-heun, au musi palisak dede'ak ndia dei, bei fo aketu huhukun. Hataholi mana madede'ak kala musi lasale dei. Au sangga amanene ei fee salak hata neun. Ma ndia boe oo, musi hambu lelak fo nasala'e aon. Bei fo au bisa aketu dede'ak ndia, ma fee huku hata neun.’ 17 Boe ma ledo-eik au fali uni Kaisarea mai, hambu hataholi Yahudi hida tungga ia mai boe. Fo'a mai, boe ma au buka memak dede'ak ndia. Au adenu sala loo Paulus mai nasale au, fo suek au bisa amanene dede'ak ia nanggatutuu-nambadedein. 18 Basa boe ma hataholi Yahudi la lambadeik, de mulai tui Paulus salan nala. Tehuu hata fo ala tui au ndia, benun ta sama no hata fo au dudu'ak so. 19 Kada ala ta landaa la'e-neu sila anggama hehelin. Ma lasisimbo bafak laban Paulus la'e-neu hataholi esa, nade Yesus. Tungga hataholi Yahudi la, Yesus maten so. Tehuu Paulus mate-mate nae, Yesus nasoda fali so. 20 Lasisimbo bafak leo ndiak, tehuu au hataholi beuk, de au ta bubuluk aketu dede'a anggama ia leo beek. Huu ndia de au atane Paulus ae, ‘Leo beek, mete ma au palisak o dede'am ia, nai kada Yerusalem?’ 21 Tehuu ana ta nau. De noke nakahehenek neni keser neu, nai mana palenda ina-huuk. Huu ndia de au kena ahelen, losa au hambu lelak, fo haituan neni Roma neu.”

22 Mane Agripa namanene Festus tutuin leo ndiak, boe ma nae, “Mete ma bisa, na, au nau amanene aon neme hataholi ndia mai.”

Boe ma Festus nataa nae, “Bisa! Dei fo au heti fo fo'a, na ama bisa mamanene aom, neme hataholi ndia mai.”

23 Fo'a mai, nggubenol Festus heti fo mane Agripa namanene Paulus kokolan. Ana heti fo hataholi no'uk boe oo bisa lamanene Paulus. Fo ndia: malangga soldadu la, ma hataholi ina-huuk kala leme Kaisarea mai. Basa de mane Agripa ma Bernike maso mai pake balo'a manek kala. Boe ma basa hataholi fee hada-holomata neu dua sala. Ledo-eik basa sala lakabubua, boe ma nggubenol nadenu loo Paulus maso dalek neu.

24 Boe ma ala loo Paulus maso dalek neu. De nggubenol mulai kokolak nae, “Mane Agripa, ama sala, ma basa nana hokak kala, fo au fee hada-holomata. Hataholi ia, nade Paulus. Hambu malangga hataholi Yahudi hida ladede'a loon. Boe ma hambu luma leni au mai, mae hataholi leme Yerusalem mai, mae leme ia mai, fo lakaseti au lae, hataholi ia ta nandaa nasoda bali. 25 Huu ndia de au palisak kana, tehuu au ta hambu salan fo nandaa no huku mate. Tehuu ndia mesak kana noke nakahehenek neni mana palenda ina-huuk neu so, huu ndia de nau ta nau, au musi haituan neni kada Roma neu. 26-27 Mete ma au haituan neu, neu ko au musi sulak susula nununik esa. Tehuu hatematak ia, au musi sulak hata, fee mane ina-huuk? Huu ndia de au akabubua ala basa ama sala, fo mamanene ndia. Ama manek Agripa mamanene basan, au amahena ama bisa fee au nanoli-nafadak, fo suek au bisa sulak dede'a mana maso langga utek, fee mane ina-huuk. Au ameda ta malole, mete ma au haitua dede'ak ia neu keser, tehuu ta afada hataholi ia, salan hata.

Au kokolang leo ndiak leo. Makasi.”