23
Losa ndia, boe ma ala ladenu Paulus nasala'e aon. De ana suli natalolole basa hataholi sila, boe ma ana mulai kokolak nae, “Tolanoo nggala ei! Au ambadeik nai ia no dale ndoos. Manetualain bubuluk nae, mulai neme au kadi'ing mai losa hatematak ia, au daleng malalaok.”2 Ananias fo malangga anggama Yahudi la malangga ina-huun namanene Paulus kokolak leo ndiak, boe maa ana luli nalan seli. De ana palenda hataholi fo mana lambadeik dekak Paulus nae, “Famba bafan!”
3 Boe ma Paulus bala Ananias nae, “Dei fo Manetualain famba bala o! Huu o memak hataholi matak leo dii nana dama beuk nai dean, tehuu andae la'a lala dalen bolok so. O manggatuuk nai ia fo tao aok malalaok. Boe ma o sangga huku au tungga ita hadan heti-heun. Tehuu o mesa nggo la'o lena heti-heuk ndia, neu faik fo o fee sala famba au.”b
4 Hataholi malai ndia lamanene Paulus kokolak leo ndiak, boe ma ala ka'in lae, “Heeh! O ta mandaa kokolak leo ndiak neu ita malangga anggaman nala malangga ina-huun ia!”
5 Boe ma Paulus nataa nae, “Tetebes, do? Mete ma leo ndiak, na, au oke ambon, huu au ta bubuluk ae, ndia ndia ita malangga anggaman nala malangga ina-huun. Memak Manetualain pake hataholi so, fo sulak nae, ‘Ei ta bole kokolak manggalauk neu ei malanggam mala.”’c
6-8 Ledo-eik Paulus nita hataholi mana makaneni dede'a anggama ndia, ana bubuluk nae, ala laba'ek dadi paltei dua. Luma tungga paltei Saduki, fo lamahele lae, hataholi mana matek ta bisa nasoda fali. Sila boe oo lamahele lae, Manetualain ata nusa sodan taa. Ma dulak ta boe. Luma bali tungga Paltei Farisi fo lamahele lae, dei fo Manetualain bisa tao nasoda hataholi mana matek kala. Sila boe oo lamahele lae, hambu dulak ma Manetualain naena ata nusa sodak kala lai nusa sodak.
Boe ma Paulus kokolak no hala malii nae, “Tolanoo nggala ei! Sadi ei basa nggei bubuluk mae, au ia hataholi Farisi. Au amang ma au ba'i nggala boe oo, hataholi Farisi. Hatematak ia, ei sangga huku au, huu au amahele ae, Manetualain bisa tao nasoda hataholi mana matek kala.”d
Ledo-eik Paulus kokolak leo ndiak, boe ma hataholi Farisi ma hataholi Saduki la, mulai lasisimbo bafak, losa ala ta landaa so bali. Basa boe ma ala laba'ek leu dua. 9 De hataholi la sila lasisimbo bafak losa dadik naodek. Basa boe ma hambu mesen hida leme paltei Farisi mai, lambadeik fo lasala'e Paulus lae, “Hataholi ia salan taa! See bubuluk, fama hambu dulak, do fama hambu Manetualain ata nusa sodan esa mai kokolak no ndia!”
10 Mesen nala kokolak leo ndiak so, tehuu sila lasisimbo bafan boe tamba bali, losa malangga soldadu ndia bii. Ana dudu'a nae, boso losak ala tao lisa Paulus. De nadenu soldadun nala konda, fo hela loo Paulus maso neni kota musu dale neu.
11 Le'odae boe ma Lamatuak Yesus mai natudu aon neu Paulus. Ana tao natetea Paulus dalen nae, “Paulus! O boso bii, bou! Hatematak ia, o kokolak la'e-neu Au nai Yerusalem ia so. Masaneda neulalau! Dei fo o musi kokolak leo ndiak nai Roma ele boe.”
Hataholi la lala halak fo sangga tao lisa Paulus
12-13 Fo'a fafain, boe ma hataholi Yahudi haa hulu lenak lala halak, fo sangga tao lisa Paulus. Ala soo lae, “Ai ta nau mi'a-minu, mete ma ai bei ta tao misa Paulus.” 14 Ala soo basa leo ndiak, boe ma leu lafada malangga anggama Yahudi malanggan nala ma lasi hadak kala lae, “Ama nggala ei! Ai soo so mae, ai ta mi'a-minu, mete ma ai bei ta tao misa Paulus. 15 Ai hihiin leo iak: ama sala musi miu masale malangga soldadu, fo moke ndia noo Paulus neni mamana naketu dede'a anggama neu. Tao sama leo ama sala sangga palisak seluk ndia dede'an. Dei fo ai te'e sala lai dala laladak, fo tao misa ndia.”
16 Tehuu Paulus feton ana tou anan esa, namanene sila lala halak leo ndiak, boe ma nalai neni kota musu neu, fo nafada Paulus. 17 Paulus namanene basa tou anak ndia tutuin, boe ma noke nala soldadu pangga ina-huuk esa nae, “Ia au anang. O muan lai-lai mini o malangga soldadun miu. Fo ana sangga nafada dede'ak esa.”
18 Boe ma soldadu pangga ina-huuk ndia no tou anak leni malangga soldadu neu. Ana nafada nae, “Ama! Paulus fo ita kenak ndia, noke au ua tou anak ia mai masale ama. Ana sangga nafada dede'a penting esa.”
19 Boe ma malangga soldadu hela no tou anak ndia, leni mamanak esa leu, fo kada dua sala. Boe ma natane nae, “O sangga mafada au hata?”
20 Boe ma tou anak ndia nafada nae, “Hambu hataholi Yahudi hida lala halak so, fo sangga tao lisa to'o Paulus. Ala sangga mai loke ama, fo fo'a, na ama no to'o Paulus neni mamana naketu dede'a anggama neu. Lae, ala tao sama leo sangga palisak lutu-lutuk, to'o dede'an. 21 Tehuu ama boso tungga sila hihiin. Te dei fo hambu hataholi haa hulu lenak sangga te'e ama sala lai dalak, fo ala sangga tao lisa to'o Paulus. Huu basa sala soo so lae, sila ta nau la'a-linu, mete ma bei ta tao lisa to'o Paulus. Hatematak ia, basa sala lahehele so. Lahani kada ama nataa nae leo bee.”
22 Malangga soldadu namanene tou anak ndia tutuin, boe ma nafadan nae, “O boso tui esa boe mae, o mai mafada au dede'ak ia.” Kokolak basa leo ndiak, boe ma nadenu tou anak ndia fali leo.
Ala loo Paulus neni nggubenol Feliks neu nai kota Kaisarea
23 Basa boe ma malangga soldadu ndia, noke nala soldadu ina-huuk dua. Ana palenda sala nae, “Mahehele mala soldadu natun dua; ma soldadu mana sa'e ndala hitu hulu; ma soldadu mana to'u donggi natun dua. Ei la'o memak le'odaen ia li'u sio, mini kota Kaisarea miu. 24 Ei boe oo, sadia ndala esa fee Paulus. Ei musi mian no sodak losa nggubenol Feliks.”
25 Boe ma ana sulak susulak fee nggubenol Feliks nae:
26 “Ama nggubenol Feliks, fo au fee hada-holomata. Soda-molek neme au mai, Klaudius Lisias.
27 Hataholi fo hatematak ia, au haituan neti ia, nade Paulus. Hataholi Yahudi la humu lalan so, ma elaba'ik tao lisan so. Faik ndia, au soldadu nggala leu hela kaluan neme hataholi Yahudi la liman mai. Boe ma au bubuluk ae, ndia naena haak lau-inggu Roma. 28 Au sangga bubuluk, hatina de hataholi Yahudi la nau tao lisan. Huu ndia de au uan neni hataholi Yahudi la mamana maketu dede'a anggaman neu. 29 Tehuu ala ta hambu salan hata-hata. Te memak ana ta tao manggalauk hata-hata. De hataholi ia, ta bisa maso bui, ma ta nandaa hambu huku mate boe. Naa te hataholi malai mamana maketu dede'a anggama lahuu, huu sila nanonoli anggaman, ta landaa. De au uni falik hataholi ia neni kota musu neu. 30 Tehuu fo'a mai, au amanene lae, hambu hataholi Yahudi lala halak so, fo sangga tao lisan. De au palenda memak fo lo hataholi ia neni ama mai. Au boe oo afada hataholi Yahudi la fo mana sangga tao dede'ak laban hataholi ia, fo ala mai lasale ama. Elan fo ama mesak kana, namanene ala soli salak hata neu ndia.
Au susulang kada leo ndiak. Makasi.”
31 Boe ma basa soldadu sila lahehele so, fo tao tungga malangga soldadu palendan. Le'odaen ndia boe oo, ala loo Paulus losa kota esa, nade Antipatris. 32 Fo'a mai, soldadu mana sa'e ndala loo Paulus lakandoo losa kota Kaisarea. Tehuu soldadu fe'ek kala fali leni Yerusalem leu. 33 Neu faik fo ala losa Kaisarea, boe ma leni susulak ndia neu nggubenol. Ma ala fee Paulus neu ndia. 34 Nggubenol lees basa susulak ndia, boe ma natane Paulus nae, “O ia hataholi beek?”
Boe ma Paulus nataa nae, “Au ia, hataholi neme nusa Kilikia mai, ama.”
35 Nggubenol namanene Paulus nae leo ndia, boe ma ana bubuluk nae, ndia memak to'u haak lau-inggu Roma. Boe ma ana kokolak nae, “Au ndia to'u palenda nai ia. De dei fo au mesa nggau akaneni o dede'am. Tehuu ita musi tahani hataholi fo mana sangga ladede'a lo o losa ia, bei fo au palisak o dede'am.” Basa boe ma nadenu soldadu la kena Paulus neu sila mamanan, nai nggubenol uma manen pasan, fo makahulun mane Herodes nambadedein.