4 Huu ala bei lakonda ofak fufuan nala, boe ma ai konda fo miu sangga hataholi kamahelek kala. Ai matonggo mia sala, boe ma ai leo mia sala sosoda ina esa. Hataholi malai ndia, ala hambu nafafadak neme Manetualain Dulan mai so, fo ka'i Paulus lae, boso neni Yerusalem neu bali. 5 Tehuu basa sosoda ina esa, boe ma ai fali mini ofak lain miu. Basa hataholi kamahelek kala, ina-touk, inahuu-kadi'ik, lasi-mulik, ala loo ai losa tasi bifin. Ai basa nggai sendek fo hule-haladoi sama-sama nai ndia. 6 Ai mate'a basa, boe ma ai hene mini ofak lain miu, ma basa sala fali.

7 Ai mima Tirus mai, de ai tuli kota Ptolemais. Nai ndia, ai konda mima ofak lain mai, de ai miu matonggo mia hataholi kamahelek kala. Ai hambu sala, de ai leo mia sala faik esa. 8 Fo'a mai, ai mima ndia mai, boe ma ai losa kota Kaisarea. Nai ndia, ai miu leo tataak nai Filipus uman. Ndia ndia, fo sososan neni Lamatuak Yesus Tutui Malolen nai ndia. Ma ndia ndia, esa neme hataholi kahituk kala, fo nana hele nalak fo ba'e nana'ak fee ina falu malai Yerusalem.^a 9 Filipus ana fe'on haa. Manetualain pake sala dadik mana kokola, fo tui-bengga Ndia hehelun nala.

10 Neu faik fo ai leo mia sala faik hida so, boe ma hataholi esa, nade Agabus, neme propensi Yudea mai. Manetualain paken dadik mana kokola, fo tui-bengga Manetualain hehelun nala.^b 11 Ana mai nakandoo neni ai mai. Boe ma ana ha'i nala Paulus kalikeen, de hengge lima-ein nenik kalikee ndia. Basa boe ma ana kokolak nae, “Manetualain Dula-dale Malalaon nae leo ia: ‘Makalikeek ia, dei fo hataholi Yahudi la hengge feo lalan leo iak nai Yerusalem. Basa boe ma ala feen neu hataholi ta Yahudi la liman.”’

12 Ai mamanene hataholi ndia kokolak leo ndiak, boe ma ai basa nggai moke Paulus no nakasetik, fo boso neni Yerusalem neu bali. Ai ndia dadik ndia ana mana tunggan, ma hataholi kamahelek kala maleme mamanak ndia mai, moke leo ndiak. 13 Tehuu nataa nae, “Taa! Hatina de ei mamatani leo ndiak? Ei tao mala au daleng nambela so. Leo iak! Hambu hataholi memak ta hii au, huu au tungga Lamatuak Yesus. Tehuu mae ala mba'a feo au, do tao lisa au, do tao leo beek boe oo, au sadia simbok so.”

14 Ledo-eik ai bubuluk mae, Paulus ta nau namanene ai bali, boe ma ai mbo'in mae, “Neu! Ela kada Manetualain hihiin ndia dadi.”

15 Ai leo nai Kaisarea faik hida so, boe ma ai mbembeda balo'as sala, de ai la'o mini Yerusalem miu. 16 Hambu hataholi kamahelek hida leme Kaisarea mai, fo tungga sama-sama lo ai boe. Ala loo ai losa uma esa, de ai sunggu tataak nai ndia. Maumak, nade Manason. Ndia neme pulu Siprus mai. Ma ana tungga Lamatuak Yesus dook ia so. 17 Neu faik fo ai losa Yerusalem, basa tolanoo kamahelek kala soluk ai no dale namahokok.

18 Fo'a mai, ai basa nggai miu matonggo mia Yakobis. Ma basa lasi Salanik kala lakabubua lai ndia boe. 19 Ai mafee hadak esa no esa, boe ma Paulus tui loa-naluk basa hata fo Manetualain tao sudi nai bee so, fee hataholi ta Yahudi la. Nae, Lamatuak Yesus soi dalak so, fo lamahele Ndia. Ndia boe oo tui talo bee, de Manetualain paken, no basa nonoon nala nai ues ia so. 20 Ala lamanene basa Paulus tutuin ndia, boe ma basa sala koa-kio Manetualain.

Basa boe ma lafada Paulus lae, “Ka'a Paulus! Sadi ka'a bubuluk, hambu hataholi Yahudi lifu-lifuk boe oo, lamahele Lamatuak Yesus so. Sila bei to'u lahele heti-heuk, fo ba'i Musa nakondan fee ita boe. 21 Tehuu hambu hataholi fo mana neni dede'a ta tetebes nai ia nae, ka'a nateme nanoli hataholi Yahudi la nai mamana fe'ek mae, sila ta paluu tungga ba'i Musa anggaman heti-heun nala bali. Sila boe oo tui lae, ka'a ka'i sala so, fo ta paluu tao tungga hada sunat fee ana tou anan nala. Ma ka'a boe oo ka'i, fo hataholi salanik kala ta paluu tungga ita hataholi Yahudi hada fe'en nala bali. 22 Masanenedak, bou! Neu ko hataholi Yahudi la dei fo lamanene lae, ka'a Paulus nai ia so. Ma hataholi fo mana lamanene dede'a ta tetebes sila so, neu ko ala luli. De ita nau sangga dala kaluan leo beek?

23 De ai fee hahambuk leo iak: hambu hataholi haa leme ai mai, mba'a heheluk lo Manetualain so. Hatematak ia, ala nggeu momoik langgan nala, fo dadik tanda nae, ala tao tungga basa sila hehelun so. 24 Mete ma bisa, na, ka'a Paulus maso sama-sama no sala mini Manetualain Uma Ina Huhule-haladoin miu. Ka'a boe oo tao tungga sala, fo tao tungga hadak tao nalalao aok. Ka'a boe oo musi tanggon bae sila doin, fo tao tungga hadak ndia. Mete ma ka'a tao leo ndiak, na, dei fo hataholi la bubuluk lae, ka'a bei to'u nahele anggama Yahudi heti-heun, fo ba'i Musa nakondan fee ita. Ma dei fo sila boe oo bubuluk tutuik ndia lae, ka'a ka'i hataholi fo boso tungga hada Yahudi ndia, basa sila pepekok!^c

25 Tehuu soa-neu hataholi ta Yahudi, fo lamahele Yesus so, ita haitua susulak fee sala so. Ita tafada ita nakeketun fai maneuk ndia so tae, ala ta paluu tungga basa ita anggama Yahudi heti-heun. Ala musi lasaneda fo tao tungga, ndia: boso tao eok lo hataholi fo ta sila saon. Boso seseok mia bua sosonggok ma boso mi'a hata fo tao hataholi Yahudi la nunute ei. Fo ndia: boso mi'a mbaa daan; ma boso mi'a mbaa neme banda nana kidu nisak mai.”^d

26 Boe ma Paulus simbok no malole sila hahambun. De fo'a mai, ndia no hataholi kahaak kala sila sama-sama leni Uma Ina Huhule-haladoik leu, boe ma ala tao lalalao aon nala, tungga anggama Yahudi heti-heun. Basa boe ma Paulus nafada malangga anggama manai ndia nae, bei faik hida bali, bei fo ala tao late'e sila hehelun nala. Mete ma faik ndia basa so, na, sila esa-esak musi neni tunu-hotun neu Manetualain.

27-29 Neu faik fo sangga basa fai kahituk, fo ala helu tao basa hadak ndia, hambu hataholi Yahudi hida leme propensi Asia mai, lita Paulus la'ok neni kota Yerusalem neu, sama-sama no nonoon esa, nade Trofimus. Trofimus neme kota Efesus mai, ma ndia ta hataholi Yahudi. De neu faik fo lita Paulus maso neni Uma Ina Huhule-haladoik neu, lae hetuk ndia nonoon Trofimus neni ndia neu boe. Naa te hataholi ta Yahudi ta bole maso neni ndia neu. Boe ma ala pake dede'ak ia dadik to'ok, fo ala tao dede'ak. De ala mbau-edo hataholi malai ndia, fo humu lala Paulus. Ma ala eki lafada hataholi malai ndia lae, “Weei! Hataholi Israel asa! Mai fo tulun ai dei. Hataholi ia, fo mana fee nanonolik sudi nai bee nae, kada nggali heni ita hada Yahudin. Ndia boe oo, kokolak ta malole la'e-neu Manetualain Uma Ina Huhule-haladoin ia. Boe ma hatematak ia bali, ana maso fo sangga tao nanggenggeo Manetualain mamanan fo malalaok ia!”^e

30 Basa kota Yerusalem isin nala lamanene leo ndiak, boe ma dalen nala latobi lalan seli. De hataholi no'uk kala lalai lakahohombu leni Uma Ina Huhule-haladoik leu. Boe ma ala humu lala Paulus, de ala hela loloson neme Uma Ina Huhule-haladoik mai. Basa boe ma ala kena lisak lelesu la.^f

31 Neu faik fo ala lambue sangga tao lisa ndia, boe ma malangga soldadu Roma manai ndia namanene naodek ndia. 32 Boe ma noke tutik soldadun ma sila malanggan nala, de ala maso leni hataholi no'uk fo mana tao naodek leu. Ledo-eik lita soldadu ma malangga ina-huuk mai, boe ma ala hahae mbomboko Paulus. 33 Boe ma malangga soldadu humu nala Paulus, ma nadenu fo ala henggen pake tali besi dua. Ala hengge basa, boe ma malangga soldadu ndia natane hataholi sila nae, “Hataholi ia see? Ana tao sala hata?”

34 Tehuu ta lataa halak esa boe. Hambu luma lae, “Ana tao leo iak so.” Ma luma lae, “Ana tao leo ndiak so.” Boe ma malangga soldadu ndia langgan naleo. Ana ta bubuluk dede'ak ndia huu-okan, huu hataholi no'uk kala sila bobouk landaa. Huu ndia de ana nadenu loo Paulus neni kota musu neu. 35-36 Soldadu la hela loo Paulus, tehuu hataholi la sila tungga sama-sama, ma manggalau tamba bali. Ledo-eik sangga hene edak, hataholi sila lakaluu mata leu. Losak soldadu la musi ndolok Paulus, fo suek hataholi sila boso lu'i lakalulutu ndia. Boe ma ala eki lo hala malii lae, “Tao misa ndia! Tao misa ndia!”

37 Ledo-eik ala sangga maso leni kota musu dalek leu, boe ma Paulus noke malangga soldadu ndia pake dede'a Yunani nae, “Ama! Au bole kokolak faa, do?”

Malangga soldadu namanene Paulus kokolak leo ndiak, boe ma ana nggengge, de nataa nae, “O malelak dede'a Yunani boe? Talo bee de o bisa kokolak dede'a Yunani? 38 Mete ma leo ndiak, na, au neuk sala o. Au dudu'a ae o ia, hataholi Masir fo fai maneuk mbau-edo hataholi fo ala tao nahuuk. Boe ma ana noke nala hataholi mana to'u manala lifun haa, fo leni mamana nees esa leu. Tehuu o ia, ta ndindia, hetu?”

39 Boe ma Paulus nataa nae, “Taa, ama! Au ia hataholi Yahudi. Au inang bonggi au neme kota Tarsus nai propensi Kilikia. Au oke ama mbo'i au, fo au bisa kokolak ua hataholi no'uk kala ia.”

40 Malangga soldadu ndia nakaheik. Boe ma Paulus nambadeik neu edak lain, ma so'uk liman, fo noke sala nee-nee, suek ana sangga kokolak. Basa boe ma ana kokolak pake sila dede'a Aram. (Huu nai ndia, hataholi Ibrani la kokolak pake dede'a Aram).^g