Hataholi malelak mana mete nduuk, ala mai tilo Yesus
2
Ledo-eik bonggi Yesus nai nggolo Betlehem nai propensi Yudea, mane Herodes to'u palenda. Faik ndia, hataholi luma leme dook dulu ele mai, leni kota Yerusalem leu. Sila ndia, hataholi malelak mana mete nduuk. 2 Ledo-eik ala losa Yerusalem, ala latane leu-mai lae, “Hataholi Yahudi la manen fo bei fo bonggin ndia nai bee bae? Ai mita nduuk esa nai dulu ele natudu tanda so nae, Ndia nana bonggik so. Huu ndia de ai mai fo sangga makaluku-makatele neun.” 3 Ledo-eik mane Herodes namanene sila kokolan leo ndiak, boe ma dalen nameda ta malole. Huu ndia de basa hataholi malai Yerusalem lameda leo ndiak boe.4 Basa boe ma mane Herodes nakabubua nala malangga anggama Yahudi malanggan nala ma basa mese anggama la, de natane sala nae, “Hena ei mafada au dei! Karistus, fo Manetualain helu memak kana ndia, sangga bonggin nai bee bae?”
5 Boe ma ala lataa lae, “Papa manek, nai nggolo Betlehem, nai propensi Yudea. Huu Manetualain mana kokolan Mika sulak memak kana neme makahulun mai so, leo iak:
6 ‘Wei, ei hataholi Betlehem asa, manai propensi Yudea ele.
Ei boso mae hetuk, ei nggolom ndia,
kada nggolo kadi'i anak fo sosoan taa.
Tehuu dei fo hataholi ina-huuk esa neme ndia mai.
Dei fo Ana dadik mana hoo neu Au hataholi Israel asa.”’a
7 Mane Herodes namanene basa leo ndiak, boe ma ana noke no nee-neek, hataholi malelak mana mete nduuk kala. Boe ma natane sala faik bee ndia, “Ala lita nduuk ndia sadu nai lalai.” Boe ma ala lafadan. 8 Basa de ana nadenu sala leni Betlehem leu ma nafada sala nae, “Ei miu, fo sangga mafeok Kakanak ndia nai ele. Mete ma ei matonggo mian so, na, fali mai mafada au. Huu au boe oo sangga uu akaluku-akatele neun.”
9 Ala lamanene basa manek kokolan, boe ma leu. De lita seluk nduuk fo makahulun litan nai dulu ele. Nduuk ndia sadu neu sila matan, boe ma ana la'ok, de hahae ndandaak neu Kakanak ndia mamana leleon lain.
10 Ala lita leo ndiak, boe ma lamahoko lalan seli. 11 Ala dudi leni uma ndia dalek leu, de lita Kakanak ndia ma inan Maria. Boe ma ala sendek fo lakaluku-lakatele leu Ndia. Basa de ala lofa sila mbomboti hadia bua mabeli la, de ala feen neu Kakanak ndia. Ala fee lilo mbilas, kamanyan, ma ai daa boo menik.
12 Ta dook boe ma ala hambu me'is neme Manetualain mai nae, “Ei boso fali mini mane Herodes miu bali.” Huu ndia de ala fali leni nusan nala leu, tungga dala fe'ek.
Yusuf asa lalai leni Masir leu
13 Ledo-eik hataholi malelak mana mete nduuk kala fali, boe ma Manetualain atan esa neme nusa sodak mai, nafada Yusuf nai me'is dale nae, “Wei, Yusuf! Fo'a lai-lai leo! Ko'o mala Kakanak ndia ma mua inan, fo malai mini Masir ele miu. Leo mahele mima ndia, losa Au afada fai hida ei bole fali, huu mane Herodes sangga Kakanak ndia fo sangga tao nisan!”
14 Boe ma Yusuf fo'a, de noo sao-anan le'odaen ndia lalai leni Masir leu. 15 Ala leo lai ele losa Herodes maten. No leo ndiak, na Manetualain kokolan dadi, sama leo Ndia mana kokolan Hosea nafada memak neme makahulun mai so nae,
“Au oke falik Au Anang, fo kalua neme Masir mai.”b
Mane Herodes tao nisa kakana anak kala lai Betlehem
16 Ledo-eik mane Herodes bubuluk nae, hataholi malelak mana mete nduuk kala laeok kana, boe ma ana luli nalan seli. Ana palenda ndia soldadun nala nae, “Mini nggolo Betlehem ma nggolo-nggolo mana dekak lai ndia. Tao misa basa kakana tou ana kadi'i anak kala, fo teun nala teuk dua dae neu.” Herodes palenda leo ndiak, huu nasaneda hataholi malelak kala sila tutuin. Ana hinggan mulai neme sososan fo lita nduuk sadu nai lalai.
17 Basa dede'ak kala ia dadi, tungga hata fo Manetualain mana kokolan Yermia sulak memak kana neme makahulun mai so nae,
18 “Hambu hataholi namatani nasakekedu nai kota Rama.c
Rahel namatani nakaleleu,
huu mate basa anan nala.
Ta nau hataholi mai kokoe-nanasi ndia,
huu ndia anan nala taak kasa so.”d
Yusuf asa fali leme Masir mai
19 Dook boe ma mane Herodes maten. Faik ndia, Yusuf asa bei lai Masir. Boe ma Manetualain ata nusa sodan esa mai natudu mata-aon neu ndia nai me'is dale. 20 Ata ndia nae, “Wei, Yusuf! Fo'a leo! Mua falik Kakanak ndia no inan, mini Israel miu leo. Huu hataholi mana sangga tao nisa Kakanak ndia, maten so.” 21 Yusuf namanene leo ndiak, boe ma ana fo'a, de noo falik kasa leni Israel leu.
22 Tehuu ledo-eik ana namanene nae, hatematak ia Herodes anan Arkalaus to'u palenda nai propensi Yudea, boe ma ana bii fali neni ndia neu. De Manetualain palendan tungga me'is esa bali nae, “Yusuf, o boso leo nai Yudea.” Huu ndia de ana neu leo nai propensi Galelea, 23 nai nggolok esa nade Nasaret. No leo ndiak, Manetualain kokolan ndia dadik matetuk so, tungga hata fo Ndia mana kokolan sulak memak kana so nae, “Dei fo ala loke Ndia lae, Hataholi Nasaret.”e