Nai' Paulus nait in a'niman, rarit in na'uab am nak,

2 “Aam usi' Agripa re' au 'tuna' ma u'ratan ko. Au 'teenb ate, au neek ii nmainua, natuin ho mfee kau mainuan he au u'uab, ma sin ama' aar ki he mneen kau, saa'-saa' re' atoin Yahudis sin nakuu ma ntu'iran sin neu kau. 3 Au uhiin 'ak, ho muhiin batuur, hit atoin Yahudis hit atoran harat, ma hit rasi 'monit ma 'maten. Onaim au 'toit ko he ho mneen murek-reko' au uabk ii, tua.

4 Anmurai na'ko au aan'-ana', sin nanoni' kau gwen he 'moin utuin hit atoin Yahudis hit harat. Nahunu te, nanoni' kau anbi au kuan; rarit au 'uum uskoor a'tamba 'bi Yerusalem. Atoin Yahudis abitan Yerusalem, sin nahiin au 'monik, ma sin nahiin narek-reko' kau. 5 Karu a'naet ein rais pirsait Yahudi sin nromin, sin bisa nareta' nain nak sin nahiin kau na'ko un-unu'. Fin au re' ia, au 'taam partei Farisi. Atoni mfaun sin ok-oke' nahinin nak, hai atoin Farisis, hai es re' ma'tani' mneis mituin rais pirsait Yahudi in atoran.^a 6-8 Au ma too Israelas na'kon sin uuf bo'es am nua sin, hit tpao he Uisneno nmoe' natuin re' In anba'an nain je neu kit. Manba'an re' naan, In natoon anrair je neu hit be'i-na'i na'ko ahunut. Onaim antea oras ia, hit aar kit t'onen fai-manas, he Uisneno In manba'an naan anjair nai. Manba'an naan in aafn ii nak, of In he namonib nafani' amaets ein.

Aam usi' Agripa. Sin nmaka'rais ein nok kau, natuin au 'pirsai 'ak Uisneno of namonib amates. Au he utaan, nansaa' am es tuaf na'ko hi aar ki re' ia, bian ka mroim fa he mpirsai mak, Uisneno bisa namonib amaets ein? Batuur In bisa!

9 Nahunu te, au bisa 'moe' saa'-saa', ma au 'maraban ma'tani' 'eu atoin ein re' natuin Nai' Yesus, atoin Nasaretas naan. 10-11 Oras naan, a'naak rais pirsait Yahudi sin a'naakt ein anfee kau hak he au 'nao ma 'ha'mui' Nai' Yesus Iin na anbin mee-mee. Au 'heek sin, rarit au 'heer 'eik sin neman anbin Yerusalem, ma au utaam sin anbin bui. Au ufeek 'ok he nhukun na'maet bian amsa'. Au 'taam 'eu uim oen ein, ma ha'mui' sin amsa'. Onaim au u'seke' sin he nasuan Nai' Yesus. Fani-fani au 'aim sin nok neek maputu'. Asar au 'neen 'ak apirsait ein neu Nai' Yesus etan mee-mee, maski sin ntean pen-pene 'teta' msa', au 'aim sin piut!”^b

12 Nai' Paulus antuut antein in uabn ii mnak, “Neot es, a'naak pirsait ein sin nfee kau surat kuasa he au 'aim tuaf re' natuin Nai' Yesus anbin kota Damsik. Onaim au 'nao. 13 Aam usi' Agripa! Oras hai mbi raan atnana', of ai' maans ii na'puup, nok askeken, asnaaf es na'ko neon gwe, ntoom kau ma au aok-bian sin imsa'. 14 Hai mtaikoib main amtea afu, natuin asnaaf naan in ma'tanin. Rarit au 'neen haanf es na'uab nok kau neik uab Aram^c nak, ‘Hoe, Saulus! Nansaa' am es ho mha'mui' Kau piut-piut? Amsusat mmaet karu ho mraban Au roimk ii piut.’ 15 Au 'neen hanaf naan, mes au ka 'iit fa in tuan. Onaim au utaan am 'ak, ‘Usi'. Ho sekau ko, tua?’

Rarit hanaf naan nataah kau mnak, ‘Au re' ia, Nai' Yesus re' ho mha'mui' Je piut-piut. 16 Saulus! Amfeen nai! Au ukriir Ok on re' ia, nok in sairt ii on nai: Au 'piir 'aan ko mjair tuaf re' Au 'pirsai. Ho ro he mnao mutoon meu mansian ii ok-oke', saa'-saa' re' ho miit murair sin een neno ia mu'ko Kau. Of Au ukrira' 'teni' ko rais fe'u bian, he ho bisa mutoon meu mansian ii ok-oke'. 17 Of ho mupein susat huma'-huma'. Mes Au 'panat ko u'ko tuaf ein re' he nha'mui' ko, maski na'ko atoin Yahudis, ai' atoin a'teta'. Tebe! Au 'reun ko 'eu atoni' 'teta' re' ka atoin Yahudis sin fa. 18 Ho mnao mfei sin maatk ein ee, he sin bisa nahinin ma nmonin nbin me'u. Rarit sin nasaitan sin raan meis'ookn ein. Ma ho ro he mrurun sin ranan neu 'monit amneot. Ho mufetin main sin mu'ko niut reu'f ein sin a'nakat in kuasan, rarit meik sin meu Uisneno. Nok ranan naan ate, he Uisneno nsaok nain sin saant ein ok-oke'. Ma sin anjarin Uisneno In aanh ein, nabu-buan nok tuaf bian re' Uisneno npiir naan sin, natuin sin npirsain neu Kau. Au uabk ii ntuu' on naan, Saulus!’”

19 Nai' Paulus antuut in uab ein, nak, “Aam usi'. Mepu re' au 'toup gwe na'ko sonaf neno tunan naan, au unaob ee. Tar antea oras ia, au ro he 'meup piut-piut, ka nabei' fa he au 'tet-koit. 20 Nahunu te, au utoon Usif Yesus In Raan A'honis 'eu atoin Yahudis sin anbin Damsik. Rarit au 'uum utoon 'eu atoin Yahudis sin anbin Yerusalem, ma propinsi Yudea nfuun am nateef. Rarit au 'nao 'fuun am uteef atoni' 'teta' sin pah-pah. Au u'uab 'eu sin nok muti' monas, he sin npoin na'ko sin raan penu re' asanat, rarit sin nnona' sin neek ein ma sin tuak ein ii neu Uisneno. Sin ro he nmo'en 'moe' reko neu tuaf bian, he njair tanar nak, sin nmonin fe'u nbi Uisneno.^d 21 Natuin au 'meup on naan, es naan ate atoin Yahudis sin anheek kau nbi Uim Onen Uuf et Yerusalem. Ma sin he nroor niis kau. 22 Mes Uisneno nturun kau. Etun es au 'moin fe' tar antea oras ia. Onaim au bisa 'hake 'bi ia, ma ureta' ki, et ana'-ko'u, rasi re' nmatoom nok Usif Yesus In Raan A'honis. Saa'-saa' re' au utoon sin re' ia, natai nok saa' re' ka'o Musa nok Uisneno In mafefa kniun' ein ii nanoni' nain sin. 23 Sin nanoni' are' saa' ii re' anmatoom nok Kristus, Tuaf re' Uisneno nba'an nain Je he nreek Ee neem. Nak, In ro he nasaah ha'mu'it. Rarit In nmaet. Mes In he njair unu na'ko are' amaets ein re' Uisneno namonib nafain' Ee na'ko 'maten. In es re' he nfee me'u neu atoin Yahudis sin, ma atoni' 'teta' msa' nbi mee-mee nbi pah-pinan ia.”^e

24 Nai' Paulus na'uab ma natoon in meup gwe fe', mes nai' Festus ansenu nfeek in uaban nok haan ma'tani' mnak, “Hoe! Pau'! Ho mumaunu mrair. Ho muhiin bainesi', tar antea nmoe' ho roenm aan namreu'.”

25 Mes nai' Paulus nataah am nak, “Ama' gubernur re' au u'tuna' ko. Au ka umaunuf. Saa'-saa' re' au utoon ee ia, tebe on naan. Au ka u'uab fa rais ruum-ruum. 26 Ama' usif Agripa, ho muhiin kuum, saa' re' au u'uab a'rair sin. Etun au ubrain he u'uab sin muti' monas. Au 'pirsai 'ak ho mneen murair saa'-saa' ein oke', fin saa' re' njair naan ka nbin fa baer ma'koro'. Nak, Usif Yesus re' amates naan, anmoni nfain jen. Are' too mfaun ein ok-oke' nahinin nrarin rasi naan. 27 Na'ko oras ahun-hunut, Uisneno In mafefa kniun' ein natoon nain are' rasin re' ia. Au ubrain he 'atmanpasan 'ak, ho mpirsai msa' mafefa kniun' ein sin uabk ein.”

28 Usif Agripa nsenu nfeek nai' Paulus in uaban am nak, “Hoe! Pau'! Ka 'roo fa te, of ho he mmoe' kau 'jair atoni' Kristen!”

29 Ma nai' Paulus nataah am nak, “On nai, usi'. Au 'onen 'eu Uisneno, he oors ii a'roo ai' haumaka', ka neu fa aam usi' ho mmees jah, mes atoni mfaun ein re' anenat neno ia msa', bisa njarin on re' au, re' Nai' Yesus In aanh ein! Mes asar hi aar ki kais amjair atoin bui on re' au.”

30 Nai' Paulus na'uab anrair on naan ate, usif Agripa nok bi Bernike, ma gubernur Festus, ma a'naet ein anfeen anhaken, ma nasaitan bare naan.

31 Oras sin nnaon npoin, atoin ein re' naan na'uab ein es nok es am nak, “Atoni' re' ia, in ka nmoe' fa saa'-saa' re' natai nok re' he thukun ta'mate, ai' he tataam ee neu bui!”

32 Rarit usif Agripa na'uab neu gubernur Festus am nak, “Airoo. Bait atoni' ia in kais neik in rais je nsae nteni' neu pah uuf kota Roma. Kaah fa te, rasi ia hit tafeek ee, ma tapoitn ee.”