3 Hai mpoi mi'ko Kaisarea, noka' te, hai mtean kota Sidon. A'naak sorarus nai' Julius in ka nansaa' fa nai' Paulus, ma nreek nai' Paulus he nnao naim sekau re' in nahiin sin anbi kota naan. In teenb ii, he sin bisa nfeen nai' Paulus saa' re' in nperluu gwe oras sin nbin tasi tnana'.

4 Rarit hai aar kai msae mfain meu bnao oe naan, ma mnao mkoon. Mes anin na'ko bnao oe naan in matan maineun ii kah een, tar antea bnao oe naan ka bisa fa he nnao. Onaim sin ntebi bnao oe naan, ma nnao npeo' puru Siprus ma Siria sin atnaank ein, he nak hai kais mipein anin naan. 5 Na'ko naan, hai mnao mreif tasi nbi propinsi Kilikia ma propinsi Pamfilia sin maatk ein. Hai mnao piut, tar hai mtea kota Mira, et pah Likia. Amtean naan, hai msaun misaitan bnao oe naan. 6 Oras hai mbi Mira, nai' Julius nataif on he naim bnao 'teta' re' he nnao neu pah Itali. In napeni bnao gwes na'ko kota Aleksandria, re' he nnao neu Itali. In nreek kai oke' he msae meu bnao oe naan.

7 Hai mnao maan neno fauk een, mes abnao oe naan ka nnao nten-teni' fa, natuin anin na'ko in matan maineun ii kah een. Hai mhae mmaet, tar amhaumaak kota Knidus. Mes anin naan anfuu naheer fe' amsa', onaim hai mnao mreif meu puru Kreta, he miniinb om mi'ko anin. Rarit hai mkoon paanf es, kaann ee, Salmone. 8 Bnao oe ia, nnao nok susat nana'renat, tar hai mkoon panaf naan, mitun-tuin aah puru Kreta in ninin, na' hai mtean baer jes, kaann ee, Labuan Amasat. Bare naan, anmapaumaakn ein nok kota Lasea.

9 Anbi naan, ameupt ein abnao oe naan nasnasan a'kre'o, fin hai mnao 'roo gwen, mes hai ka mtean Itali fa fe'. Oras naan, Neno Saok Sanat atoin Yahudis ankonon nrair jen.^a In oetn ii nak, ain ko'u ma oik ko'u of he nfoe. Ameupt ein nmaktaan ein he hai mnao mkoon, ai' kaah. Anneen on naan ate, nai' Paulus na'uab am nak, 10 “Au aok-bian aar ki! Au u'uab 'aan akre'o. Au utenab, karu hit he tnao tkoon, of hit tapein suust am nana'renat. Of abnao ia nreman nmaet, baer' ein nreman, ma hit of atmaet oke' msa'.” 11 Mes nai' Julius ka natniin fa nai' Paulus. In npirsai nanesib neu anaa' abnao ma abnao tuaf. Fin sin nabaarb ein he nnao npoin na'kon bare naan. 12 In amreu'n ii, Labuan Amasat naan, in ka mamut fa karu bnao oe ro he nhaek anbi oras oikn ein anfoen. Onaim amfaut ein nak sin nromin he hai mnao mkoon meu kota Feniks. Sin roimk ein ii, karu reko te, hai mitua mtahan ambi naan, tar antea oras oikn ein nasnasan. Kota Feniks naan, puru Kreta in bare re' mamut neu bnao oe, natuin in naniinb on na'ko ain toon, ma ka napein fa okin ko'u.

13 Oras anin haa'-nua' anmurai nfuu kre'o-kre'o, sin nak, ai' ain reko he sin bisa npaek je, he nnaon neu kota Feniks. Sin nak, “Anin ia, reko. Iim he tnao nai!” Onaim sin nasaeb bonit, ma nasaeb layar, ma hai mnao mibnono haa tais je ninin. 14-15 Hai mnao ka 'roo fa te, nok askeken, ain nauts ii nfoe. (Re' hit ii te tak, ‘anin na'ko pasa' neon-saet ma pasa' ponain sin atnaank ein’). Anin naan nfuu bnao naan, neik je neu tais je tnanan. Ameupt ein abnao naan, sin ka bisa nabani' fa bnao. Onaim sin nparaakn aah ee. Ma bnao naan nnao natuin ahaa ain ii in a'romin.

16 Oikn ein npesan kai mtean puur aan es, kaann ee, Kauda. Oras naan, kofa' bai' je natuin kai nbi bnao gwe in koitn ee fe', ma sin nheer ee nok tani. Rarit hai mheer misaeb kofa' ba'i naan, neu bnao gwe tunan. Hai mhae mmaet. 17 Oras kofa' ba'i naan antea bnao gwe tunan, sin npuun bnao naan nok tani nfuun am nateef, he npanat he kais-kaisa' bnao naan in hau 'been ein natpois ein, ma oe tais ii ntaam. Sin namtaun amsa', kais-kaisa' oikn ii anpesan abnao naan, ma npoirn ee neu snae kbatus Sirtis et pah Afrika. Onaim sin nasanut boin atboes, he na'bauna' bnao naan in a'naon ee kre'o.

18 Ain ko'u naan, nasniba' bnao neu 'rii ma 'ne'u. Noka' te, ameupt ein nait inporin brua' bnao naan neun tasi. 19 Anmeu te, anin naan fe' anfoe. Onaim sin namtaun nsesan. Es naan ate, sin nait inporin bnao naan in abrua' bian he nha'kaaf ee. Ma sin nait inporin amsa' bnao gwe in baer mepun. 20 Anin naan ka nasnaas niit fa, fai-manas neno fak-fauk. Niup gwi nsaun afu, tar antea hai ka miit fa manas ma kfuun. Hai neekm ein nabatin ma'tani'. Hai mitenab mak, ia hai ka mmoin fa gwen.

21 Hai ka miah fa neno fauk een. Nai' Paulus no'en sin oke', ma na'uab am nak, “Aok-bian aar ki! Bait hi mroim mituin kau he hit kaisa' tpoi ta'ko Labuan Amasat ate, hit ka tsuus fa on re' ia. Ma hit ka truik fa msa'. 22 Oras ia, au 'toit ki oke', he mha'tain hi neekm ein naan. Of hit abnao re' ia, anpee' pisa'-pisa'. Mes kais mimtau, of ka tiit fa amates. 23 Au 'roimk ii, hi aar ki mihiin mak, au re' ia Uisneno Iin Ja kau. In es re' anfee kau mepu. Fini na, In nreek In ameput tuaf es na'ko sonaf neno tunan, ma in nhake nbi au bnapak. Rarit in natoon kau mnak, 24 ‘Paulus! Kais mumtau kre'o msa'. Ro of ho mtea keser et Roma, he m'urus ho rasi. Natuin Uisneno anneek ko, es hi asaet abnao ia, of ka tiit fa es natfuun. Of ammoin ok-oke'.’ 25 Onaim aok-bian aar ki. Kais hi neekm ein nabatin. Au 'pirsai batuur-batuur 'eu Uisneno, re' In natoon kau fini na, ro of njair on re' naan. 26 Abnao ia of nasrae nbi puur gwes.”

27 Oras naan, anin ma okin anbeos kai mok abnao oe naan, ma npesan kai fai bo'es am haa anbi Tasi Atria. Of oni' fai ji noi natnaan, ameupt ein na'taak ein nak, hai mhaumaak meto'. 28 Rarit sin nasanut rino, he nahiin oe je mnanun. Onaim sin n'uukr ee te, in a'taamn ii, nehe bo' nua. Rarit abnao naan nnao maat anteni', ma sin nasanut nteni' rino naan, ma nahiin nak oe tais ii 'taamn ii nehe bo'es am niim.^b 29 Sin namtaun, kais-kaisa' bnao naan na'rae't on nbi faut puutk ein. Onaim sin nasanut bonit kotif fua' haa. Hai mhar-harap he nmeu nfiin nai. 30 Mes ameupt ein abnao naan anma'akoran he naen nasaitan abnao gwe mninu'-mninu'. Onaim sin nasanut kofa' ba'i, ma nmo'-mo'en on re' sin he nasanut bonit matan.

31 Mes nai' Paulus natoon neu nai' Julius rais re'uf naan nak, “Karu ameupt ein sin ka nbin fa bnao gwe naan ee te, of hi mmaet oke'.”

32 Anneen nai' Paulus na'uab on naan ate, soraurs ein anreif nafeek kofa' bai' je in tani, ma nparaakn ee. Onaim ameupt ein naan ka bisa naenan fa gwen.

33 Anmeu nfin on nai te, nai' Paulus anfuri' sin oke' he nbukaen. In nak, “Krei nua gwen, hit suma bisa tok-took gwah, hit har-haarp aah, ka tiit tain fa saa' es ntaam neu hit taik. 34 Onaim au 'toit ki he reko te, hit tbukae taan akre'o fe', he hit tapein tafani' hit neunk ii. Au 'pirsai 'ak of ka tiit fa tuaf es na'ko hit aar kit tapein siraak. Hit of atmoin oke'!”

35 Na'uab anrair on naan ate, nai' Paulus nait utunu'. Rarit in n'onen neu Uisneno ma ntoit makasi nbi sin maatk ein. Rarit in nait tuuk es, ma nbukae. 36-37 Sin nitan on naan ate, sin neek ein natea nfanin. Rarit sin nbukaen ok-oke'. Hai abit abnao naan, tuaf natun nua mbo' hitu mnee. Hai mbukae oke'. 38 Mimseen on nai te, sin naitin ma n'okar a'kaor maak-gandum sin neun tasi, he nsoba' anha'kaaf abnao naan anteni'.

39 Anmeu saba te, ameupt ein niit meto'. Mes sin ka nahiin fa puru naan in kanan. Ma sin niit tais tuuk es, re' in niin ee masnaen. Onaim sin nharap, karu reko te, sin he neik bnao gwe nnao nabnonon npeo' faut puutk ein, he ntean tais tuka' naan in ninin nok reko. 40 Onaim sin nreif nafeek boint ein nabaran anbin tasi. Rarit sin nasanut kemudi neu tasi, he sin bisa nastiir abnao naan. Rarit sin nasaeb layar ana' abit maatn ee, he ain ee nfuu bnao gwe nnao neu tais je ninin. 41 Mes abnao naan ansae naan snae a'tupus nbi tais je nanan, ma in nasrae nbi naan, ma ka bisa nakbero' nteni' fa gwen. Onaim oik kou' gwin anbeos nakrati' abnao gwe in kotin.

42 Oras soraurs ein nitan on naan ate, sin he nroor niis atoin bui nggwin. Fin sin namtaun, kas-kais atoin buin naan nabha'en neun meto', rarit sin naenan kuuk. 43 Mes a'naak sorarus, nai' Julius, antaar in soraurs ein, natuin in he npanat nai' Paulus. Onaim in naprenat, he sekau-sekau karu nabhae' nahiin, an'ookr ok neu tais je, rarit nabha'en neun meto'. 44 Neu re' sin ka abhae' ahiint ein, in nreun sin he anna'an a'bena' ai' saa'-saa', rarit antaman neun tais je, ma natuin oikn ein npoin neun meto'. Onaim hai mtea meot ee nok ao-mina' ok-oke'.