Nai' Saulus antaam anjair Usif Yesus Iin ja
9
Oras naan, nai' Saulus ansair piut-piut ma nha'mui' Usif Yesus Iin na. In naim ranan he nroor niis sin amsa'. Es naan ate, in nnao neu rais pirsait Yahudi sin a'naak ko'u, 2 ma ntoit suur aprenat he neik sin neu a'naak rais pirsait Yahudi sin anbi sin uim oen ein et kota Damsik. In ntoit he karu in nateef nok apirsait ein neun Usif Yesus In Raan A'honis, et bifee ma atoni', in he nheek ma nfuut sin, ma nheer neik sin neun Yerusalem.3 Antoupu nrair suur apreent ein naan ate, in nok in aok-bian sin annaon neun kota Damsik. Oras in nhaumaak kota re' naan, nok askeken ate, piin es na'ko neno tunan antaha' natetab nai' Saulus. 4 Onaim in ntaikobi ntea nain afu. Rarit in nneen hanaf es na'uab neu ne mnak, “Saulus! Nansaa' am es ho mha'mui' Kau on re' ia?”
5 Nai' Saulus nataan am nak, “Sekau es re' a'uaba' ia, tua?”
Hanaf naan nataah am nak, “Au re' ia, Nai' Yesus, re' ho mha'mu'i. 6 Oras ia, amfeen nai, ma mtaam nai meu kota naan. Anbi naan, Au of utoon ko saa' re' ho he mmo'e.”
7 In aok-bian sin annenan hanaf naan amsa', mes sin ka niit fa sekau-sekau. Onaim sin neek ein namnekun, tar antea sin ka fefa' mese' fa.
8 Rarit nai' Saulus anfeen anhaek. In he nfei in maatk ein, mes in nforo nmaet. Onaim sin nnaa' in a'niman, ma nok ne ntaam neu kota Damsik. 9 Neno tenu mfai tenu 'teme-'teme, in ka niit fa saa'-saa'. Ma in ka naah am niun fa saa'-saa'.
10 Anbi kota naan, anmui' apirsait es, kaann ee nai' Ananias. Usif Yesus neem nakriir On neu nai' Ananias nbi mnitas, ma nak ee mnak, “Ananias!”
Ma nai' Ananias nataah am nak, “Au es ia, tua!”
11 Usif Yesus nbaasn ee mnak, “Uum fe'! Ho mnao he maim Au atoin es. Amnao meu Raan Amne'o, meu atoin es in umi, kaann ee nai' Judas. Anbi umi naan, ho muteef mok atoin es, kaann ee nai' Saulus. In na'ko kota Tarsus. Oras ia, in n'onen. 12 Au 'feen nai' Saulus amnitas amsa' ma utoon ee m'ak, ‘Of anmui' atoin es, kaann ee nai' Ananias, neem nateef nok ko.’ Ho mnao he mtao ho 'nimam he in bisa niit anfain.”
13 Mes nai' Ananias nataah am nak, “On nai, Usi'! Hai mneen amrair beno huma'-huma' anmatoom nok atoni' re' naan. In nha'mui' niis Ho too kniun' ein abitan Yerusalem. Tar antea sin suust ii, ka kre'-re'o fa! 14 Oras ia, hai mneen amteni' nak, a'naak rais pirsait Yahudi sin a'naakt ein anfeen ee kuasat he neem ma nheek nain tuaf-tuaf re' antaam natuin Ho Raan A'honis, tua.”
15 Mes Usif Yesus na'uab anteni' nok nai' Ananias am nak, “Maski on naan amsa', mes oras ia ho ro he mnao! Fin Au 'piir je gwen he nfei ranan neu Kau, maut he in neik Rais Reko neu atoni' na'ko uuf ma pah bian, ma neu uisf ein, ma neu too Isra'el amsa'. 16 Au of utoon ee, he in nahiin, nak ha'mu'it huma' mee es re' npao nain je, natuin in npirsai ma nok Kau gwen.”
17 Anneen Usi' In kabin on naan ate, nai' Ananias annao neu umi naan, rarit in ntaam anbi naan. In ntao in a'niman anbi nai' Saulus am nak, “Ba'e! Usif Yesus re' ho miit Ee nbi ranan oras ho uum, In neikn On es anreun kau he 'uum uteef 'ok ko. In nreun kau he au 'onen ma 'tao au 'nimak 'eu ko, he ho bisa miit amfain. In nroim he ho mtoup In Asmaan Akninu' amsa'.”
18 Oras naan, nai' Saulus annaben ate, saa' es on re' ika' poho' anmouf na'ko in maatk ein, ma in bisa niit anfain nain. Rarit in nfeen ma sin nasrain je. 19a Onaim in naah am niun, tar antea in aon ee na'be'i nfain.
Nai' Saulus natoon Rais Reko anbi kota Damsik
19b Nai' Saulus natua nabaar akre'o fe' nok Usif Yesus Iin na nbi kota Damsik. 20 Ma in nnao ntaam anbi atoin Yahudis sin uim onen, ma in natoon neu sin am nak, “Mitniin mirek-reko'! Batuur-batuur Nai' Yesus naan, Uisneno In Anah.”
21 Are' too mfaun ein ntaka'naan ein ma nsanmakan neu nai' Saulus in uaban naan. Es naan ate, sin na'uab ein am nak, “In re' ia, es re' nha'mui' Usif Yesus Iin na nbi Yerusalem, ai' kaah? Rarit in neem neu ia, he nheek sin ma neik sin nnaon neu a'naak rais pirsait Yahudi sin a'naakt ein! On mee es re' ia!?”
22 Nai' Saulus nroim he nakrira' bukti mnak, Nai' Yesus re' naan, Kristus re' Uisneno nba'an nain Je na'ko afi unu', he nsoun Ee neem. Nai' Saulus nanoni' nok maat-maat tar atoin Yahudis sin ka niis ee fa. Es naan ate, nai' Saulus in akbeorn ii, na'nae piut na'ko oras neu oras.
23 Ankono kre'o na'ko oras naan, atoin Yahudis sin namin ranan he nroor niis nai' Saulus. 24 Mes nai' Saulus annaben nahiin sin tenab naan. Sin anpao nai' Saulus fai-manas anbi eno' 'po'i kota naan, he nroor niis ne. 25 Onaim anbi fai jes ate, nai' Saulus in aok-bian tuaf fauk neman, ma nfaf-boki' naan ee nbi 'ki'u, rarit nasaunt ee na'ko baah-rame mnanu' kota naan. Nok ranan naan, in naen nasaitan kota Damsik.a
Nai' Saulus annao neu Yerusalem
26 Rarit nai' Saulus annao neu Yerusalem. Anbi naan, in he ntaam nabua nok Usif Yesus Iin na. Mes sin aar sin namtausan nai' Saulus, natuin sin nateenb ein am nak, in nmoe' jon he njair on re' antaam apirsait neu Usif Yesus. Rarit na' in he nheek sin. 27 Mes anmui' atoin es, kaann ee nai' Barnabas. In es re' natefa' nai' Saulus nok Usif Yesus In haef ein anbi naan. In natoon neu sin are' rasi re' anjair neu nai' Saulus anbi raan atnana'. In natoon nak nai' Saulus nateef anrair nok Usif Yesus amsa'. Ma Usif Yesus na'uab maat-maat nok ne msa'. Nai' Barnabas natoon amsa' am nak, nai' Saulus ro nabrain he natoon Usif Yesus In Raan A'honis neu abitan Damsik.
28 Annenan on naan ate, sin antoup nai' Saulus. Rarit in natua nok sin anbi kota Yerusalem. In nabrain he na'uab anmatoom nok Usif Yesus In Rais Reko neu sekau-sekau, natuin in ka namtausan fa saa' es. 29 In nmakoni' penit nok atoin Yahudis fauk re' na'uab ein neik uab Yunani amsa'. Mes sin ka nromin fa he ntoup in peint am in uab ein naan, onaim sin namin ranan he nroor niis ne. 30 Mes oras Usif Yesus Iin na annenan am nak, biak ein nateenb ein amre'ut on naan ate, sin naen neik nai' Saulus neu kota Kaisarea et tais je ninin. Rarit sin nreek ee he nnao nkoon neu in kuan, et kota Tarsus.
31 Rarit Usif Yesus Iin na re' abitan propinsi Yudea, propinsi Galilea, ma propinsi Samaria, anmonin nok mamut. Sin nma'baab ein piut. Ma sin nmoe' natuin Usif Yesus In nromin. Ma Uisneno In Asmaan Akninu' nha'tain sin neek ein.
Nai' Petrus nareko' atoin amenat es anbi kuan Lida
32 Oras naan, nai' Petrus biasa nnao neu bare-bare he nkius Usif Yesus Iin na. Anbi neon gwes, in nnao nkius nonot apirsait abitan kuan Lida. 33 Anbi naan, in nateef nok atoin es, kaann ee nai' Eneas. Atoni' naan anbua. Toon faun nggoen, in ka nfeen niit fa na'ko in hara 'tupa'.
34 Nai' Petrus na'uab neu ne mnak, “Eneas! Oras ia, Yesus Kristus nareko' ko. Onaim ho mfeen nai! Amkikin ho bare 'tupa'!”
Anneen anrair on naan ate, in anfeen nain. 35 Oras abitan kuan Lida ma kuan Saron niit nai' Eneas nareok on naan ate, sin aar sin anpirsain neun Usif Yesus.
Nai' Petrus namonib nafani' ain Tabita na'ko in a'maten
36 Oras naan, anmui' bifee jes, kaann ee bi Tabita, re' natua nbi kota Yope et tais je ninin. (Bifee naan, in kanan neik uab Yunani te nak, ‘Dorkas’, re' neik hit uab ii te nak ‘ruus’).b In npirsai neu Usif Yesus. In nmoe' arekot piut neu in aok-bian sin, ma nturun are' ama'mui't ein. 37 Oras naan, ain Tabita nameen, rarit in nmaet. Onaim sin naniu in ta'un, ma sin n'aum gwe, rarit sin natuup ee nbi in ke'en abit fafon. 38 Oras naan, sin nnenan nak nai' Petrus natua ntahan nbi kuan Lida. (Kuan naan, in a'roon ii neno steen es, karu tnao hae ta'ko kota Yope.) Rarit sin nhaefan tuaf nua he nnaon naskau nai' Petrus am nak, “Aam! Hai miskau ko, he mkoen om uum rabah meu Yope.”
39 Anneen haan askaut naan ate, nai' Petrus nok nain sin. Antean bare naan ate, nai' Petrus antaam ma nsae nkoon anbi ain Tabita in ke'en. Ke'en naan naheun nok bifee banu' re' neman ma nkaen nmei'-mei' jok. Sin nakrira' sin baur paekn ein ma pake bian antein re' ain Dorkas ansoo sin, oras in nmoin fe'.
40 Nai' Petrus anreun sin he npoin ok-oke' na'ko ke'en naan. Onaim in nri'tuu ma n'onen. Rarit in nabani' neu amates naan ma na'uab am nak, “Ain Tabita! Amfeen nai, tua!” Nok askeken ate, bifee naan anfei in matan. Oras in nkius niit nai' Petrus, in nfeen ma ntook. 41 Rarit nai' Petrus annaa' in a'niman ma nfiit nafeen ee. Onaim nai' Petrus no'en bifee baun ein ma tuaf bian anbi naan, he nana'at bifee amonit naan neu sin.