Gubernur Festus anparikas nai' Paulus in rasi
25
Oras naan, gubernur fe'u, nai' Festus, nanani' neem anbi kota Kaisarea he nanaoba' in aprenat. In suma namaik anbi naan neno teun gwah, rarit in nnao nkoon neu Yerusalem. 2 Anbi naan, a'naak rais pirsait Yahudi sin a'naakt ein nok a'naet sin neman he nmakhiin ein nok gubernur fe'u naan. Sin nteek naan nai' Paulus in rais je msa'. 3 Sin ntotin, he karu bisa te, gubernur fe'u nreun in atoin ein, he neik nafani' nai' Paulus neem neu Yerusalem. Te kaah, sin anma'akoran nrarin, he nroor niis nai' Paulus anbi raan atnana'.4 Mes gubernur ee nataah sin am nak, “Sin ama' aar ki! On nai. Maut he sin ntaahn ee fe' anbi Kaisarea. Fin au he 'fain rabah on nee. 5 Onaim karu na'ko hi re' ia, anmui' tuaf he n'urus rasi naan, sin nok kau he mnao meu Kaisarea. Karu tebe atoni' naan anmoe' sanat, reko te, hi bole mmaka'rasi mok ne mbi nee jah.”
6-7 Rarit gubernur Festus nabaar fe' nbi Yerusalem of ai' neno bo'es a'saa', na' in ntebi nfain neu Kaisarea. Oras naan, anmui' naan atoin Yahudis fauk nok ne, antea nee. Noka' on naan ate, gubernur ee nfei nafani rasi naan. In nreun he sin neik nai' Paulus, he neem neu in matan.
Oras nai' Paulus antaam anbi naan, atoin Yahudis sin anhaken ma nfuun naan nai' Paulus, rarit sin nmurai nasaan ee nok sanat huma'-huma'. Mes sin ka bisa fa he nakrira' bukti mese' msa'.
8 Rarit nai' Paulus namneob on am nak, “Ama' gubernur. Au ka 'moe' 'iit fa rais sanat saa'-saa'. Au ka 'moe' 'iit fa rasi re' anmaraban nok hai atoran pirsait Yahudi msa'. Au ka 'hai'niis 'iit fa hai Uim Onen Uuf a'bi Yerusalem. Ma au ka 'moe' 'iit fa rasi saa'-saa' he 'raban anaa' aprenat Roma in atoran.”
9 Mes gubernur naan, he naim atoin Yahudis sin neek ein ii he nok ne. Etun es in nataan nai' Paulus am nak, “Ho mutenab, on mee? Ho mromi, ai' kaah, karu au 'urus ho rasi ia anbi Yerusalem?”
10 Anneen gubernur ee in haan tanas, on nai te, nai' Paulus nataah am nak, “Ama' gubernur. Au re' ia, a'mui' hak too Romas. Ma oras ia, au 'haek et anaa' aprenat pah Roma in matan, re' in nmui' hak he n'urus au rasi, natuin atoran prenat pah Roma. Onaim au ka 'roim fa he 'nao 'eu Yerusalem, he nafeek au rasi nbi nee. Ho meikn om muhiin murair mak, au ka 'moe' fa sanat saa'-saa' re' he 'raban atoin Yahudis sin. 11 Onaim karu tebe au 'mo'e 'saan saa'-saa' re' anmatoom nok he nhukun na'maet kau te, au 'toup gwe. Mes karu saa' re' sin na'uab nain je ka batuur fa, natuin in atoran, ka tiit tain fa es he anona' kau neu atoin ein ia sin a'niimk ein. Sin suma naim-naimn ahaa ranan, he nroor na'maet kau ruum aah. Onaim oras ia, natuin au hak ii te, au 'eik au rais ji 'sae 'teni' 'eu uis ko'u keser, anbi pah uuf kota Roma. Maut he in es re' neikn on nafeek rasi ia, tua.”
12 Anneen nai' Paulus na'uab on naan ate, gubernur ee nok in aparikas raisn ein, nabuan ma na'uab ein. Rarit in natoon neu nai' Paulus am nak, “Natuin ho mtoit murair he meik ho rais ji msae mteni' meu keser, es naan ate, ho ro he mnao meu kota Roma.” Na'uab anrair on naan ate, in nreun abuat ein naan he nsisa'en.
Nai' Festus antoit fainekat na'ko usif Agripa nok nai' Paulus in rasi
13 Rarit atoin Yahudis sin uisf ee, kaann ee nai' Agripa,a nok in feotf ee, kaann ee bi Bernike, neman nbin Kaisarea. Sin neman he nmahormaatn ein nok gubernur fe'u naan. 14 Sin natuan nok gubernur Festus sero 'roo. Neon gwes te, nai' Festus natonan sin nok nai' Paulus in rasi mnak, “Aam usi'! Anbi Kaisarea re' ia, hai mtahan atoin es, kaann ee nai' Paulus. Neno naan, gubernur ahuunt ii ka nafeek naan fa in rasi. 15 Neno fauk akoont ein, oras au 'eti 'bi Yerusalem, a'naak rais pirsait Yahudi sin a'nakt ein ma sin atoni mnais haart ein, neman ma natraak nai' Paulus. Rarit sin ntoit kau he au 'huukn ee. 16 Mes au utoon 'eu sin am 'ak, ‘Tatuin atoran prenat Roma, au ro he 'parikas 'aan rasi naan fe', na' au ufeek. A'aa' raisn ee ro he nabuan fe'. Au he 'neen 'aan 'ak hi misaan ee nok saan saa'. Ma in imsa' ro he napein mainuan he namneob on, hena' au bisa ufeek rasi naan, ma thuukn ee nok hukun huma' mee.’ 17 Rarit oras au 'fain 'uum a'bi Kaisarea, atoin Yahudis fauk nok kau neman anbin ia. Noka' te, au 'fei ufani' 'ain rasi naan. Au uprenat sin he neik nai' Paulus neem neu kau, he au 'neen 'iit in rais je in a'naon. 18 Rarit atoin Yahudis sin nbaisenun ma nmurai na'uab ein neu nai' Paulus in saant ein. Mes saa' re' sin natoon sin naan, ka ma'fena' fa nahuum on re' au uteenb ee ji. 19 Sin suma nasuirn ahaa, nmatoom nok sin rais pirsait ein kuuk. Ma sin nasurin nok nai' Paulus, natuin tuaf es, kaann ee Nai' Yesus. Tatuin atoin Yahudis sin, Nai' Yesus naan, anmaten nrair. Mes nai' Paulus naheer aah nak, Nai' Yesus nmonin nfain jen. 20 Sin nasurin on re' naan, mes natuin au atoin fe'u kau, onaim au ka uhiin 'aan fa re' he tafeek rais pirsait ii te, on mee? Etun es au utaan nai' Paulus am 'ak, ‘On mee karu au 'parikas ho rais ji anbi Yerusalem?’ 21 Mes in ka nromif. Onaim in ntoit he neik in rais je nsaen anteni' neu keser anbi pah uuf kota Roma. Etun es au 'taahn ee fe', tar antea au upein mainuan he 'soun ee nnao neu Roma.”
22 Anneen anrair nai' Festus in uabn ii on naan ate, usif Agripa nak, “Karu reko te, au he 'neen kuuk atoni' naan.”
Onaim nai' Festus nataah am nak, “Bisa! Of au 'ator he noka' te, ho mneen kuum mu'ko ne, tua.”
Usif Agripa nroim he nneen nai' Paulus in uaban
23 Noka' te, gubernur Festus an'ator he usif Agripa bisa nneen nai' Paulus in uaban. Ma in an'ator he too mfaun ein bian amsa' nneen nok nai' Paulus. Sin esan re': soraru 'naakf ein, ma a'naet ein na'ko kota Kaisarea. Rarit usif Agripa nok bi Bernike ntaam neman, ma sin npaek ein paek usif. Onaim too mfaun ein na'bees ma nhormaat neu sin nua sin. Oras sin nabuan oke', gubernur ee nreun he nok nai' Paulus antaam neem.
24 Onaim sin neik nai' Paulus antaam. Rarit gubernur ee na'uab am nak, “Usif Agripa, sin ama' aar ki, ma are' taumn ein ok-oke', re' au u'ratan ma 'hormaat 'ain ki. Atoni' re' ia, kaann ee nai' Paulus. Anmui' naan a'nakat atoin Yahudis fauk re' sin namin rasi nok ne. Onaim anmui' tuaf neman neu kau, oras au 'bi Yerusalem ma 'bi Kaisarea, he na'seke' kau nak, atoni' re' ia, in nmoni msa' ka ma'osa' fa. 25 Etun es au 'pariiks ee, mes au ka upein fa in sanat re' natai nok hukun a'maten. Mes in neikn on antoti nrair he nasaeb in rais je annao nkoon neu pah uuf, es na' reko'-re'uf ate, au ro he 'soun ee nnao neu kota Roma. 26-27 Karu au 'soun ee, au ro he 'tui aan suurt es re' anmatoom nok rasi naan. Mes oras ia, au he 'tui 'ak saa' 'eu uis kou' gwe? Etun es, au ubuaba' ki ok-oke', he hi mneen ee. Amneen amrair je te, au 'toit 'eu usif Agripa he nfee naan kau fainekat es, he au 'tui surat re' bisa uis kou' gwe ntoup gwe nok neek reko. Au 'naben ate on re' he ka reko fa, karu au 'sonu' rasi ia annao neu keser, mes au ka utoon fa atoni' ia in sanat.
Au uabk ii na'tuuk na'paar on re' naan, tua.”