2 Oras naan, too mfaun ein nneen nai' Paulus na'uab anpaek sin uab. Onaim sin ntaa' nanin, he nneen narek-reko' in uaban naan. Onaim in ntuut am nak, 3 “Asar hi aar ki mihiin mak, au re' ia, atoin Yahudis. Au aina' nahonis kau nbi kota Tarsus et propinsi Kilikia. Mes au u'nae 'bi ia, kota Yerusalem. Re' nanoni' kau gwi, es re' tunggur ko'u nbi ia, nai' Gamalial. In nanoni' kau namnuut anmatoom nok ka'o Musa in atoorn ein ok-oke'. Au 'makoe msa' he utuin Uisneno, huma' mese' on re' hi.^a 4 Neon gwes ii, au ka usnaas fa he 'riu' ma 'moe' ususab tuaf ein re' natuin Nai' Yesus In Raan A'honis. Au 'heer 'eik sin, et bifee ma atoni', neman neun Yerusalem, rarit au utaam sin anbin bui. Oras naan, anmui' amates amsa'. 5 Hit rais pirsait Yahudi sin a'naak ko'u, ma a'naak rais pirsait bian amsa', sin nahinin nrarin nak au u'uab 'ak saa' ate, tebe on naan! Au ka upoif. Fin sin es re' anfee kau suur kuasat, he au 'nao 'heek 'aan tuaf-tuaf re' natuin Nai' Yesus, tar a'tea kota Damsik. Anbi naan, au he 'heek sin, rarit au he 'heer 'eik sin neman neun Yerusalem. Au utenab 'ak, maut he afeek rais pirsait ein esan re' anhukun sin.”^b

6 Onaim nai' Paulus antuut antein in uaban naan am nak, “Onaim au 'nao 'eu kota Damsik, he au 'aim sin anbin nee. Of on re' maans ii na'pupu te, aar akre'o te hai he mtea kota naan. Nok askeken ate, anmui' naan asnaaf es na'ko neon gwe, antoom kau. 7 Onaim au 'taikoib 'eu afu, ma au 'neen haanf es na'uab am nak, ‘Hoe, Saulus! Nansaa' am es ho mha'mui' Kau on re' ia?’ 8 Au 'neen hanaf naan, mes au ka 'iit fa tuaf es amsa'. Onaim au utaan am 'ak, ‘Usi', ho sekau ko?’

Rarit hanaf naan nataah kau mnak, ‘Au re' ia, Yesus, atoin Nasaretas, re' ho mha'mui' Je!’ 9 Mes atoni' re' nnaon nabu-bua nok kau, sin niit snaaf naan, mes sin ka nnenan fa hanaf naan.

10 Onaim au utaah am 'ak, ‘Karu on naan, oras ia, au he 'moe' saa', tua?’

Hanaf naan, anreun kau mnak, ‘Amfeen nai, mtaam nai meu kota in nanan. Anbi naan, na' Au utoon ko are' rasin re' ho ro he mmoe' main sin.’

11 Au 'neen urair on naan ate, au 'fena 'haek. Mes au ka bisa 'iit fa saa'-saa' ntein, natuin snaaf re' naan es naforob kau. Onaim au aok-bian sin nnaa' kau, ma nheer kau, onaim hai mtaam meu kota Damsik.

12 Anbi naan, anmui' nain tuaf es, kaann ee nai' Ananias. Atoni' ia, in neekn ee mne'o, ma in annaa' naheran atoran ka'o Musa msa'. Are' atoin Yahudis abitan kota naan, sin nroim je, ma nhormaat ee. 13 In neem naim kau, rarit na'uab am nak, ‘Ba'e! Ho maatm ein naan, narekon nrarin. Es naan ate, amfei ma mkius nai!’ In na'uab anrair on naan ate, au u'aiti' au humak, ma au bisa 'iit ee. 14 Rarit in nanoni' kau mnak, ‘Uisneno, re' hit be'i-na'i sin n'onen neu Ne, oras ia, npiri nrair ko. Ho meup gwe es re' he muhiin murek-reko' In a'romin. Ma muhiin murek-reko' Usif Yesus naan, re' hit tteek Ee te tak, “Atoni Kninu'” ta'ko un-unu'. Oras ia, Uisneno nfei ranan neu ko, he ho mneen kuum mu'ko Usif Yesus. 15 In neikn On anpiir nain ko, he mnao mutoon In Rais Reko neu tuaf-tuaf anbi mee-mee. Ho ro he mutoon are' saa' re' ho miit ma mneen kuum na'ko Na. 16 Kais ampao 'roo-'roo nteni'. Amnao mak sin, he nasrain ko nai, he njair tanar nak, ho mtoti mrair he Usif Yesus ansaok nain ho saant ein.’”

17 Onaim nai' Paulus antuut antein in uaban naan am nak, “Rarit au 'fain 'eu Yerusalem. Neon gwes, au 'nao 'onen a'bi Uim Onen Uuf. Oras au 'onen, Uisneno nakriir On neu kau nbi mnitas. 18 Au 'iit Nai' Yesus. Onaim In naprenat kau mnak, ‘Oras ia, ho ro he mnao musaitan kota Yerusalem nai! Fin abitan bare' ia, sin ka nromin fa he ntoup saa' re' ho munoni' anmatoom nok Kau.’

19 Mes au ka 'roim fa he 'toup prenat naan, natuin un-unu' te, a'naak rais pirsait sin anroim kau. Onaim au utaah am 'ak, ‘Mes on nai, tua! Sin ar-arsin nahinin nak, neno naan au es re' a'poi ma 'taam uim onen anbi mee-mee, au 'heek ma 'beos atoni' re' anpirsai Ko. 20 Sin nahinin nak, oras sin anpoir na'maet Ho haef, nai' Stefanus, au a'bi naan, ma au 'romi msa'. Oras sin nabuab ein fatu he npoir nai' Stefanus, au es re' u'haba' sin, ma au es re' a'tiut sin barun.’^c

21 Au umnaub Ee on re' naan, mes Usif Yesus naprenat nafanik kau mnak, ‘Kais maim rasi 'sukif huma'-huma'! Musaitan Yerusalem oras ia! Natuin Au he 'reun ko he mnao meu bare 'roo nggwin, he munoni' atoni' 'teta' re' ka atoin Yahudis sin fa.’”

22 Oras too mfaun ein anneen nai' Paulus na'uab nak, Uisneno es re' anreun naan ee, he nnao neu atoni' 'teta', sin ka nromin fa he nneen antein' ee. Sin nato'on, rarit sin nhuun ein ok-oke' mnak, “Kais amneen atoni' re' ia! Amroor miis ne! In nmoni msa' ka ma'osa' fa.”

23 Sin nkoa' ein on naan, onaim sin nhoro' nain sin barun, rarit sin nnaun afu skuku' ma na'pene', natuin sin nato'on nmaten. 24 Oras soraru 'nakaf naan niit sin antaisibun nfanin, in nreun in soraurs ein he nheer nataam nai' Paulus neu benteng. Rarit a'nakat naan anreun he nbeos gwe, he in manaku' nak in nmo'en saan saa', tar atoin Yahudis sin he nroor gwe. 25 Oras sin nfuut nai' Paulus he nbeos gwe te, in nniik ma nataan soraur abeost ee mnak, “Natuin atoran prenat pah Roma, mee es namneo? Karu tuaf es in nmui' hak too Romas, rarit in napein rasi, hi he mmoo' je, on mee? Hi mbeos gwe nahunu, oo? Ai' hi mpariiks ee nahuun?”

26 Anneen on naan ate, sorarus naan naim in a'nakat. Onaim in natoon am nak, “Aam! Atoni' ia nmui' hak too Romas! Onaim ho he mmoo' je, on mee?”

27 Anneen on naan ate, soraru 'nakaf naan, in neikn on nataan nai' Paulus am nak, “Nak ho mmui' hak too Romas? Tebe, oo?”

Onaim nai' Paulus nataah am nak, “Tebe, tua! Au 'mui' hak naan.”

28 Rarit soraru 'nakaf naan nak, “Au on naan amsa'. Au 'baen ii ko'u, hena' au upein hak naan.”

Mes nai' Paulus nataah am nak, “Karu au te, ka 'baen fa saa'-saa'. Anmurai na'ko au aina' nahonis kau, au 'naa' 'ain hak re' naan. Au ama' nnaa' hak re' naan amsa'.”

29 Oras sin nnenan nak nai' Paulus anmui' hak too Romas on naan ate, soraurs ein antet-kotin, ma sin ka nabranin fa he nbeos gwe ma nparikas antein' ee. Soraru 'nakaf naan namtau, natuin in es re' anreun he nfuut nai' Paulus. In nahini nrair nak, in tanhai atoran.

30 Noka' te, soraru 'nakaf naan, in naim he nahiin batuur rasi naan in uun ma 'naon ii, on mee. Rarit in nreun in soraurs ein he nnao no'en nabuab tuaf ein re' biasa nafekan rais pirsait Yahudi. Onaim in nreun he nseif nai' Paulus in korenit, rarit sin neik je nnao nateef nok afeek rasin naan ok-oke'.