23
Antean naan ate, sin nreun nai' Paulus he na'uab namneob on. Rarit in nkius narek-reko' atoin ein re' naan, ma na'uab am nak, “Aok-bian aar ki! Au 'hake 'bi ia, nok neek amneot. Uisneno nahiin kau na'ko au aan'-ana' tar antea neno ia, au neek ii kninu'.”2 Anneen nai' Paulus na'uab on naan ate, nai' Ananias,a in es re' anjair rais pirsait Yahudi sin a'naak ko'u, nato'on nmaet. Onaim in naprenat tuaf re' nhaken nhaumaak nai' Paulus am nak, “Ampaas maan ee paap es neu re' feef naan!”
3 Onaim nai' Paulus in ntoin nai' Ananias am nak, “Of Uisneno npaas anbaras ko. Fin ho on re' nii re' fe' nseet anrari nbi kotin, mes in naan ee naem ein ansoor gwe. Ho mtoko mbi ia, ma mmoe' ho tuam ii, on re' atoni kninu'. Rarit ho he mhukun kau, natuin hit atoran harat. Mes ho re' naan amtanhai atoran naan amsa', oras ho mreun he npaas kau.”b
4 Anneen nai' Paulus na'uab on naan ate, atook apaumaakt ein nakain ee mnak, “Hoe! Ho ka mu'bei' fa he mu'uab on re' naan neu hit a'naak ko'u!”
5 Onaim nai' Paulus nataah sin am nak, “Tebe, oo? Karu on naan, au u'paarn ok 'eu ki, te au ka uhiin fa nak, in re' nee, hit a'naak ko'u. Batuur, Uisneno npaek tuaf he ntui nain nak, ‘Ka nabei' fa he hi mi'uab re'uf meu hi a'naakt ein.’”c
6-8 Oras nai' Paulus niit sin atokos re' he nafekan rais pirsait, in nahiin nak, sin na'kon pukan nua. Bian Saduki, re' sin npirsain nak, amates ka bisa nmonin nfain fa. Sin npirsain amsa' nak, Uisneno ka nmui' fa ameput et sonaf neno tunan. Ma ka nmui' fa smanaf. Pukan es anteni' es re' pukan Farisi, re' npirsain am nak, of Uisneno namonib nafani' amates sin. Sin npirsain amsa' nak, anmui' smanaf, ma Uisneno anmui' ameput et sonaf neno tunan.
Onaim nai' Paulus na'uab naher-heer nak, “Aok-bian aar ki! Asar hi mihiin ok-oke' mak, au re' ia, atoin Farisis kau. Au ama' ma au na'i, atoin Farisis amsa'. Oras ia, hi he mhukun kau, natuin au 'pirsai 'ak Uisneno bisa namonib amates.”
Oras nai' Paulus na'uab on naan ate, atoni' Farisis ma Sadukis sin nmatoen, tar antea sin ka nmaromin fa heen. Rarit sin baits ok anjarin pukan nua.d 9 Onaim afeek rasi naan anmatoen, tar antea taisiub ko'u. Rarit anmui' tungguru na'kon partei Farisi anhaken ma anpeis nai' Paulus. Sin na'uab ein nak, “Atoni' ia, ka nsaan fa! Kais-kaisa' anmu'i smanaf, ai' Uisneno In ameput sonaf neno tunan es, re' neem na'uab nok ne!”
10 Tunggurun naan, na'uab anrarin on re' naan, mes sin nmatoes ii maineun besi, tar soraru 'nakaf naan anmurai namtau. In natenab nak kais-kaisa' sin n'usa' niis nai' Paulus. Onaim in nreun soraurs ein ansanun he nheer nataam nai' Paulus neu benteng.
11 Mabe' te, Usif Yesus neem na'kriir On neu nai' Paulus. Ma In nha'tain nai' Paulus in nekan am nak, “Paulus! Ho kais mumtau! Oras ia, ho mu'uab amrair anmatoom nok Kau nbi Yerusalem ia. Mumnau murek-reko'! Of ho ro he mu'uab on re' naan anbi Roma amsa'.”
Sin nma'akoran he nroor nai' Paulus
12-13 Kiuk ana' te, atoin Yahudis anneis na'ko tuaf bo' haa, sin nma'akoran he na'maet nai' Paulus. Sin nsupan am nak, “Hai ka mroim fa he miah-miun, karu hai ka amroor maan fa nai' Paulus fa fe'.”
14 Sin nsuup anrarin on naan ate, sin nnaon natoon a'naak rais pirsait Yahudi sin a'naakt ein, nok atoni mnasi' harat Yahudi sin am nak, “Sin ama' aar ki! Hai msuup amrair mak, hai ka mroim fa he miah-miun, karu hai ka amroor miis nai' Paulus fa fe'. 15 Hai roim ein nggui on nai: ama' sin ro he mnao mbaiseun soraru 'nakaf, he mtoot je he meik maan nai' Paulus neu baer feek rais pirsait. Ammoe' on re' hi he mparikas mifani' in rasi. Of hai mseun sin ambi raan atnana', he hai mroor miis ne.”
16 Mes nai' Paulus aan moen feu'f es anneen sin rais akorat naan. Rarit in naen neu benteng ma natoon neu in babaf. 17 Anneen anrair aan mone naan in haan tonas ate, nai' Paulus no'en naan soraru 'nakaf es am nak, “Ia, au anah. Ho meik je mnao rabah meu ho a'nakat, fin in he natoon naan uab es.”
18 Onaim sorarus naan neik aan mone naan neu in soraru 'nakaf. In natoon am nak, “Aam! Nai' Paulus re' hit ttaahn ee naan, in nreun kau he 'eik aan mone ia neem neu ko. In he natoon naan ko rais ma'tan-tain es.”
19 Rarit soraru 'nakaf naan anheer neik ri'ana' naan neu baer ruumn es, he sin nua sin anmesen. Onaim in nataan ee mnak, “Ho he mutoon kau uab saa'?”
20 Rarit ri'aan mone naan natoon ee mnak, “Anmui' naan atoin Yahudis fauk anma'akoran he sin nroor niis au baba', nai' Paulus. Sin he neman ntoit ko, tua, he noka' te, ho meik au baba' mnao meu baer feek rais pirsait. Nak, sin aksaa' ein he nparikas au baba' in rais je namnuut. 21 Mes ho kaisa' mutuin sin roimk ein naan, tua. Natuin of anmui' naan tuaf bo' haa, sin of anpao ki nbi ranan he nroor niis au baba', nai' Paulus. Natuin sin nsuup anrarin nak, sin ka naah-ninun fa, karu sin ka nroor naan fa fe' au baab Paulus. Oras ia, sin nabaarb ein anrarin. Suma sin npao ko, he ho mtoin mak saa', tua.”
22 Anneen anrair aan mone naan in uabn ii te, soraru 'nakaf naan nak ee mnak, “Ho kais mutoon meu tuaf es, mak ho uum mutoon kau rasi ia.” In na'uab anrair on naan ate, in nreun aan mone naan he nfain.
Sin neik nai' Paulus neu gubernur Feliks anbi kota Kaisarea
23 Rarit soraru 'nakaf ko'u naan, no'en in soraur a'nakat tuaf nua. In naprenat sin am nak, “Mibarab maan sorarus, tuaf natun nua; ma sorarus re' ansae bikase, tuaf bo' hiut; ma sorarus amneik aunu, tuaf natun nua. Hi mnao nai mabe' ia, anreuk seo, amnao meu kota Kaisarea. 24 Hi mibarab bikaes es neu nai' Paulus. Hi mnao maat ee nok rek-reko, ntea gubernur Feliks.”
25 Rarit in ntui surat neu gubernur Feliks nak, on nai:
26 “Ama' gubernur Feliks re' au 'hormaat 'ain je. Tabe, tua. Ao-mina' ao-reko na'ko kau, Klaudius Lisias.
27 Atoni' re' au 'soun ee neem neu ko ia, kaann ee nai' Paulus. Atoin Yahudis sin anheek je, arakre'o te, sin he nroor niis ne. Neno naan, au soraurs ein es anheer napoitn ee na'ko atoin Yahudis sin a'niimk ein. Rarit au uhiin amsa' nak in nmui' hak too Romas. 28 Au 'aim he uhiin, nansaa' am es atoin Yahudis sin he nroor gwe. Etun es au 'eik je nnao neu atoin Yahudis sin baer feek rais pirsait. 29 Mes sin ka napein fa in nsaan saa'-saa'. Batuur, in ka nmoe' fa maufinut saa'-saa'. Onaim atoni' ia, in ka bisa fa he ntaam bui, ma ka nabei' fa he thukun ta'maet je. Te kaah, afeek rasin re' anbin baer feek rais pirsait naan, sin nmatoen, natuin sin noink ein anmatoom nok rais pirsait ein nasurin. Onaim au 'eik atoni' ia anbi benteng. 30 Noka' te, au upein hanaf nak, atoin Yahudis anma'akoran nrarin he sin nroor gwe. Onaim au es re' uprenat he sin neik je neem neu ko, tua. Au utoon amsa' 'eu atoin Yahudis sin re' anmaka'rais ein nok atoni' ia, he sin neman nbaiseun ko. Maut he ho es re' amneen kuum na'ko sin, saa' re' sin nasaan ee neu ne.
Au surat re' ia, on re' naan, tua. Na'ko au Klaudius Lisias kau, tua.”
31 Rarit soraurs ein re' naan nabaarb ein nrarin, he nanaoba' prenat na'ko sin soraru 'nakaf. Mabe' re' naan, sin nok nain nai' Paulus annaon tar antea kota es, kaann ee, Antipatris. 32 Noka' te, soraur asae bikaes ein ee, sin nnaon naat nai' Paulus ankoon tar antea kota Kaisarea. Mes sorarus bian sin, antebin nfanin neun Yerusalem. 33 Oras sin ntean Kaisarea te, sin nnona' surat naan neu gubernur. Ma sin nana'at nai' Paulus neu ne msa'. 34 Anrees anrair surat naan ate, gubernur ee nataan nai' Paulus am nak, “Ho atoni' mu'ko mee?”
Rarit nai' Paulus nataah am nak, “Aam, au re' ia, atoni' u'ko propinsi Kilikia.”
35 Anneen nai' Paulus nak on naan ate, gubernur ee nahiin nain nak nai' Paulus anmui' hak too Romas. Rarit in na'uab am nak, “Au es re' anaa' aprenat a'bi ia. Onaim au es re' he ufeek ho rasi. Mes hit tpao tuaf ein re' sin natraak ko ntea ia, hena' au uprikas ho rasi.” Rarit in nreun in soraurs ein he ntahan nai' Paulus anbi sin baer jes anbi sonaf gubernur, re' nahunu te usif Herodes anmoe' nain je.