Nai' Paulus sin ntebin nfanin neun Yerusalem
21
Hai mmanseon amrair mok atoni mnasi' Kristen sin na'kon kota Efesus nok neek susat ate, hai msae bnao oe, rarit hai mnao mkoon meu puru Kos. Noka' te, hai mok abnao oe naan, ma hai mtean puru Rodos. Mi'ko naan, hai mnao mkoon mok abnao oe meu kota Patara. 2 Anbi naan, hai msaun mi'ko bnao oe naan. Rarit hai msae meu bnao oe 'teta', re' he nnao neu propinsi Finisia, anhaumaak Siria. Oras hai msae bnao oe re' naan, sin nasaeb nain bonit, ma hai mnao. 3 Hai mnao ka 'roo fa te, hai mkius miit puru Siprus anbi hai 'nimam a'rii, mes hai mnao mkoon gwah, tar amtea ma misanut bonit anbi kota Tirus et propinsi Siria. Anbi naan ate, sin he nasanut abnao oe in abrua' ein. 4 Natuin sin nasaun ein bare' fe', hai msaun ma mnao maim apirsait ein. Oras hai miteef mok sin, hai mitua mok sin neno hiut. Apirsait ein abitan naan, napenin hanaf na'ko Uisneno In Asmaan Akninu', he ntaar nai' Paulus he kaisa' nnao nkoon neu Yerusalem. 5 Neno hitu nkono te, hai mfain meu bnao oe naan. Apirsait ein ok-oke', et bifee-atoni', ana'-ko'u, mnasif am munif, annao naat kai ntea tais je ninin. Anbi naan, hai mri'tuu ok-oke' ma m'onen. 6 Rarit hai mmanseon, ma hai msae meu bnao oe naan, onaim sin nfanin ok-oke'.
7 Hai mfeen mi'ko Tirus, rarit hai meis mok kota Ptolemais. Anbi kota naan, hai msaun mi'ko bnao oe, ma hai mnao maim apirsait ein. Hai miteef mok sin, rarit hai mtook mok sin neno mese'. 8 Noka' te, hai mok abnao oe naan, amnao mteni' mi'ko naan, ma mtea kota Kaisarea. Anbi naan, hai mnao mitua mbi nai' Felipus in umi. In re' naan, es re' neik nahun-hunun Usif Yesus In Rais Reko anbi naan. In tuaf es na'ko tuaf hiut re' sin npiir sin anbin Yerusalem he nbatin bukae neu baun ein.a 9 Nai' Felipus anmui' aan feto haa. Uisneno npaek sin njarin In mafefa kninu' he natoon In romin.
10 Oras hai mtook mok sin of neno fauk ate, atoin es, kaann ee nai' Agabus, neem na'ko propinsi Yudea. Uisneno npaek je he njair In mafefa' kninu' he natoon Uisneno In romin amsa'.b 11 In neem nateef nok kai. Rarit in nait nai' Paulus in pasu 'futu', ma in nfuut in haen-niman nok pasu 'futu' naan. Rarit in nak, “Uisneno In Asmaan Akninu' na'uab on nai: ‘Pasu 'futu' re' ia in tuan ii, of atoin Yahudis sin anpuun ee nahuum on re' ia anbi Yerusalem. Rarit sin nanaa't ee neu atoni' 'teta' sin a'niimk ein.’”
12 Amneen atoni' re' naan in uab ein te, hai mtoit batuur-batuur meu nai' Paulus, he kaisa' nnao nkoon neu Yerusalem. Hai, re' in aanh ein kai, ma apirsait ein abitan bare naan, antotin on re' naan amsa'. 13 Mes in ntoin kai mnak, “Kahaf! Nansaa' am es hi mkae on naan? Hi mmoe' he mha'feen au nekak. On nai! Anmui' tuaf re' ka nroim kau fa, natuin au utuin Usif Yesus. Bait maski sin nfuut kau, ai' sin nroor niis kau, ai' sin nmoe' kau on mee-on mee msa', mes au ubarab urair he 'toup.”
14 Oras hai mneen on naan ate, hai mihiin mak nai' Paulus ka nroim he nneen kai fa heen, onaim hai mkoon ee mak, “Neu! He tak on mee! Maut he Uisneno In roimn aa kuun es re' anjair.”
Nai' Paulus sin antean Yerusalem
15 Neno fauk een hai mitua maan ambi Kaisarea te, hai mkikin hai baer' ein, ma hai mnao meu Yerusalem. 16 Anmui' apirsait tuaf fauk na'kon Kaisarea, nok kai msa'. Sin nnao naat kai mtea uim jes, rarit hai mtuup ambi naan. Uim tuaf naan, kaann ee nai' Manason. In na'ko puru Siprus. In natuin Usif Yesus suuk a'roo gwen. 17 Oras hai mtea Yerusalem, hai aok-bian apirsait ein ii, sin ntoup kai nok neek marinet.
Nai' Paulus annao nkius nai' Yakobus
18 Noka' on naan ate, hai aar kai mnao miteef mok nai' Yakobus. Ma are' atoni mnasi' Kristen sin nabua nanin nbin naan. 19 Hai mmataeb es nok es, rarit nai' Paulus na'uab neu kai, suuk a'roo anmatoom nok are' rasin re' Uisneno nmo'e nrair sin anbi mee-mee neu atoni' 'teta'. In nak Usif Yesus anfei ranan he sin npirsain neu Ne. In natoon amsa', on mee m'es Uisneno npaek in tuan ii, nok in aok-bian sin, anbin mepu ia. 20 Oras sin nneen anrair nai' Paulus in reta' on naan ate, sin nmarinan ma anbo'is Uisneno.
Rarit sin na'uab neu nai' Paulus am nak, “Paulus! Asar ho muhiin kuum, atoin Yahudis sin nifun-nifun re' npirsai nrarin neun Usif Yesus. Sin nnaa' naher-heran fe' atoran prenat re' ka'o Musa nahake' nain sin neu kit. 21 Mes anmui' atoni' re' neem naktuta' nak, ho munoni' atoin Yahudis sin anbi bare 'teta' mak, sin kaisa' natuin ka'o Musa in atoran rais pirsait ein. Ma sin natrakan amsa' am nak, ho es amtaar sin he kais natuin harat ma'heri' neu sin aan monen. Ho es re' amtaar atoni' srani', he kais natuin anteni' hit atoin Yahudis atoran harat bian amsa'. 22 Mumnau! Of atoin Yahudis annenan nak ho et ia. Ma aneen uab ain ein naan ate, sin of nato'on. Onaim hit taim raan a'poi' ji, on mee?
23 Onaim hai mtoit on nai: anmui' tuaf haa na'ko hai, re' sin anmui' manba'an nok Uisneno. Oras ia, sin he nkeu sin a'naak ein he njair tanar nak, sin nmo'en nrair sin rais manba'an naan. 24 Onaim karu reko te, ho mtaam mok sin meu Uisneno In Uim Onen Uuf. Ho mutuin sin amsa', he mmoe' mutuina' harat re' he mukninu' ho tuam aan. Ho ro he msutai sin baen re' natuin harat amsa'. Karu ho mmoe' on re' naan, of too mfaun ein nak, ho mnaa' muher-heran prenat pirsait Yahudi fe', re' ka'o Musa nahake' sin neu kit. Ma sin of nahinin reta' re' nak, ho mtaar atoni' sin he kais natuin harat rais pirsait Yahudi, naan rais poi ok-oke'!c
25 Mes neu atoni ka Yahudis fa, re' sin anpirsain neun Usif Yesus, hai msonu' mrair sin surat. Hai mitonan sin anmatoom nok hit atfeka' neno naan nak, sin ka anperluu fa, he natuin hit atoran harat Yahudi sin ok-oke'. Re' sin he namnau he nmoe' natuin sin, esan re': kaisa' nmakaken ma nmakonin karu ka fee-mone fa. Kais anseor gok nok baer fuat. Ma kais anbukaen mnahat re' sin aok-bian Yahudi sin anmai'nisin sin. On re': kais nekun siis fuat. Kais nahan naa'. Ma kais nekun sisi na'ko mu'it re' tuaf anfuut gwe ma nkeer niis ne, tar in naa' ee ka nsai npoi fa.”d
26 Rarit nai' Paulus antoup sin haan totis. Onaim noka' on naan ate, in nok re' tua haa' ein naan, annaon neun Uim Onen Uuf. Onaim sin nakninu' sin tuak ein natuin atoran rais pirsait Yahudi. Rarit nai' Paulus natoon a'naak pirsait re' nbi naan nak, aar neno fauk ate, na' sin nanokab sin haan manba'an. Fin karu oras naan oke' te, sin es-es ate, he nataam nain sin fua'-tuur' ein neu Uisneno.
Anheek nai' Paulus anbi Uim Onen Uuf
27-29 Oras neno hiut he noi namsoup, re' sin nmanba'an he nanokab atoran harat naan, anmui' atoin Yahudis fauk na'kon propinsi Asia, re' sin niit nai' Paulus anna-nao kuun anbi kota Yerusalem nok in partei tuaf es, kaann ee nai' Trofimus. Nai' Trofimus re' ia, na'ko Efesus, ma in ka atoin Yahudis fa msa'. Onaim oras sin niit nai' Paulus antaam anbi Uim Onen Uuf, sin naak of ai' in nok in partei naan antaam neun Uim Onen Uuf in nanan amsa'. Te kaah, atoni' 'teta' ka bole fa he ntaam neu Umi naan. Onaim sin nait rasi re' naan, he njair 'tu'in he sin anmo'en rasi. Onaim sin nmafuarutun nok too mfaun ein anbin re' naan, he sin nheek naan nai' Paulus. Sin nhuun ein ma natonan too mfaun ein am nak, “Hoe! Atoin Israelas ki! Iim he mbaab maan kai. Atoni' re' ia, in es re' nanoni' anbi mee-mee mnak, mait imporin harat atoin Yahudis. In na'uab na're'uf neu Uisneno In Uim Onen Uuf ia msa'. Oras ia anteni', in ntaam he n'oemetab Uisneno In bare kninu' re' ia!”e
30 Annenan on naan, kota Yerusalem in too gwe ok-oke', sin nato'on batuur-batuur. Rarit too mfaun ein naan naen nabuan anbi Uim Onen Uuf. Onaim sin nheek nai' Paulus, rarit sin nheer napoitn ee na'ko Uim Onen Uuf. Rarit sin na'eek nain eon' ein.f
31 Oras sin ntaisibun he nroor niis ne te, sorarus Roma sin a'naak kou' gwes re' npaumaak anbi naan, nneen taisibu naan. 32 Onaim in no'en naan in soraurs ein nok sin a'naakt ein, he sin ntaman neu too mfaun ataisiubs ein sin atnaank ein. Oras sin nkius niit soraurs ein nok sin a'naak ko'u naan neman on nai te, sin nasnasab mabesot neu nai' Paulus. 33 Rarit soraru 'nakaf naan anheek nai' Paulus, ma nreun sin he nfuut gwe nok korein besi nono' nua. Sin nfutu nrair je te, in nataan too mfaun ein am nak, “Atoni' re' ia, sekau? In saant ii saa'?”
34 Mes sin nasurin tonis. Bian nak, “In anmoe' on ia.” Bian nak, “In anmoe' on nee.” Tar antea soraru 'nakaf naan, in a'naakn ee nameen. In ka nahiin fa rasi naan in a'naon, natuin too mfaun ein anhunun ma na'baa' no mes-mese'. Etun es in nreun he neik nai' Paulus annao neu benteng. 35-36 Soraurs ein anheer neik nai' Paulus, mes too mfaun ein re' naan sin natuin ein ok-oke', ma sin ntaisibun antenin. Oras sin he nsaen era' fua', too mfaun ein naan sin nasikan, he nhaken maat. Tar antea soraurs ein naskau nai' Paulus, he too mfaun ein naan kais anbaan na'maet je. Onaim sin nhunun nak, “Amroor miis ne! Amroor miis ne!”
Nai' Paulus namneob in tuan anbi too mfaun ein sin maatk ein
37 Oras sin he ntaman neun benteng on naan ate, nai' Paulus antoit neu soraru 'nakaf naan, anpaek uab Yunani mnak, “Aam! Au bisa u'uab a'kre'o, oo?”
Oras in nneen nai' Paulus na'uab on naan ate, soraru 'nakaf naan naskeek. Rarit in nataan ee mnak, “Ho muhiin uab Yunani msa'? On mee m'es ho mu'uab muhiin uab Yunani? 38 Karu on naan, au utenab a'saan een. Au 'ak of ho re' ia, atoin Masiras, re' nahunu te ho es re' amfuaruut too mfaun ein he sin nraban prenat pah Roma. Rarit in neik too nifu haa, re' sin neikin suni'-kenat, ma sin nnaon neun baer ruman. Mes ho re' ia, ka in fa, ai'?”
39 Nai' Paulus nataah am nak, “Kaah, fa tua! Au re' ia, atoin Yahudis. Au ain honi' nahonis kau anbi kota Tarsus et propinsi Kilikia. Au 'toit he ho mkonan maan kau, he au bisa u'uab 'eu too mfaun ein re' ia.”
40 Soraru 'nakaf naan anroim. Rarit nai' Paulus anfenan nhake nbi era' fua' naan in tunan, ma in nait in a'niman he ntoit sin he sin ntaa'-ta'an he in na'uab. Rarit in na'uab neik sin uab neno-neno, es re' uab Aram. (Fin anbi naan, atoin Ibranis sin na'uab ein anpaken uab Aram).g