Nai' Kornelis naskau naan nai' Petrus
10
Oras naan, anmui' soraru 'nakaf tuaf es na'ko pah Roma, kaann ee nai' Kornelis. In na'naak sorarus tuaf nautn es. Sin neman na'kon pah Itali, bare 'roo. In natua nbi kota Kaisarea. 2 In, ma in uim je naan ee msa' anneek niis Uisneno. Mes atoni mfaun pah Roma sin bian, ka on fa naan. Era'-era' in nturun ama'mui't ein, ma in n'onen piut-piut neu Uisneno. 3 Neon gwes, of oni' nreuk teun maans ii nteib, in niit nok maat me'u nbi mnitas, Uisneno In ameupt es na'ko sonaf neno tunan, neem ma nhaamn ee mnak, “Kornelis!”
4 Nai' Kornelis niit ameput naan, onaim in namtau nmaet. Rarit in nataan am nak, “On mee, tua?”
Ameput naan nataah am nak, “Uisneno anneen anrair ho onen toits ein, ma In namnau ho nekam arekot meu are' tuaf bian sin. Onaim Uisneno niit ko. 5 Onaim oras ia, amreek tuaf he nnao neu kota Yope, he naskau neik naan atoin es, kaann ee nai' Simon Petrus. 6 In natua et uim jes nbi tais je ninin, nok atoin es re' in meup gwe nakninu' pasu. In kaann ee, nai' Simon amsa'.”
7 Oras ameput sonaf neno tunan annao nasaitn ee, nai' Kornelis no'en in aan ameput tuaf nua, ma nok in soraurs es, re' anneek Uisneno msa'. 8 Oras nai' Kornelis natoon anrair are' rasi naan ate, in nreek haefan sin he nnaon neun kota Yope.
Nai' Petrus neem nateef nok nai' Kornelis
9 Noka' on naan ate, of oni' maans ii na'puup, nai' Kornelis in haef ein anhaumak-maak kota Yope. Oras naan, nai' Petrus ansae ma n'onen anbi nai' Simon in uim je porata' pakan.
10 Nai' Petrus an'onen, mes in nnaben ate namnaah. In npao abiurt ein nabaarb ein bukaet. Ma oras in n'onen on naan ate, Uisneno nakriir ee mnitas. 11 Nak, on re' in niit neon gwe natfe'i, ma isparei mainuan es anboor neem. Isparei naan mafutu' ma makfiri' anbi in suusk ein haa sin. Isparei naan ansaun neem. 12 Anbi isparei jan in nanan, in niit mu'it huma'-huma', esan re': mui' hae haa', anonok, ma koro huma'-huma'.
13 Ma in nneen haanf es anreun gwe mnak, “Pe'u! Amfeen nai! Amroor mui't ein ia. Rarit mubarab sin ma mbukae!”
14 Mes nai' Petrus nataah am nak, “Ka bisa fa, tua! Kais on re' naan! Natuin au ka 'euk 'iit fa mu'it huma'-huma' naan sin siisk ein! Hai atoin Yahudis minunin mu'it ein re' naan sin siisk ein!”
15 Mes hanaf naan nataah am nak, “Karu Uisneno nak baer es kninu' te, ho kaisa' mak an'oemeet!” 16 Isparei naan, anpoi no teun, ma na'ait on anfain neu neon gwe tunan.
17 Rarit nai' Petrus natenab neu-mneem anmatoom nok amnitas naan in a'moufn ii saa'. Nateef oras naan, nai' Kornelis in haef ein neem antean nai' Simon in umi. Sin nhake nrarin anbin eno'. 18 Onaim sin nhaman uim tuaf naan ma nataan am nak, “Hoore, tua! Hai iim maim tuaf es, re' natua ntahan et umi ia. In kaann ee, nai' Simon Petrus. Hi mihiin je, oo?”
19 Oras naan, nai' Petrus natenab mnitas naan in a'moufn ii fe', mes Uisneno In Asmaan Akniun' ee natoon ee mnak, “Hae, Pe'u. Anmui' atoni'a neem naim ko et a'pinan ee. 20 Amsaun he mnao mutuina' sin nai. Kaisa' ho neekm aan nabait. Maski sin re' naan ka atoin Yahudis fa, mes kais ammai'nisin sin, ai' maan sin anjarin atoin 'oemetan, mutuin harat atoin Yahudis. Natuin Au es re' a'reun sin he neem naan ko.” 21 Rarit nai' Petrus ansaun ma nateef nok atoin ein naan, ma nak sin am nak, “Au re' ia, es re' hi maim je. Hi mperluu saa'?”
22 Rarit sin natahan am nak, “A'naak sorarus pah Roma tuaf es, in es re' anreun kai he iim meu ia. In na'naak sorarus nautn es. In neekn ee na'teeb ma namnau Uisneno. Atoin Yahudis amfaun nahiin atoni' ia in arekon. Afi naa, Uisneno In ameput sonaf neno tunan neem ma nreun hai a'nakat, he ntoit ko aam, he uum meu in umi, natuin in he nneen ko, tua.”
23 Anneen anrair on naan ate, nai' Petrus ntoit sin he ntupan fai jes anbi umi naan. Noka' on naan ate, sin nfenan, ma nai' Petrus annao nabua nok sin. Anmui' tuaf fauk na'kon Usif Yesus Iin na re' abitan Yope, annaon nabuan nok sin.
24 Mabe' naan, sin ntupan nbin raan atnana'. Noka' on naan ate, na' sin antean kota Kaisarea. Oras sin ntean nai' Kornelis in umi, in npao nain sin. In nabuab in aasr ein am in aok-bian no mes-mese' anbin naan. 25 Oras nai' Petrus he ntaam neu umi naan ate, nai' Kornelis naen anseun nggoe nbi mone', ma in nri'tuu anbi nai' Petrus in haen, ma na'ruri' he na'besan nai' Petrus. 26 Mes nai' Petrus anfiit nahake' aam Kornelis ma na'uab am nak, “Ba'e! Amfeen amhaek nai! Kais mu'besan kau! Fin au re' ia, mansian on re' ho msa'.”
27 Anneen on naan ate, nai' Kornelis anfeen anhaek. Rarit nai' Kornelis ma nai' Petrus na'uab ein, ma sin annaon ntaman neu uim je nanan. Nai' Petrus niit too mfaun nabuan anbi naan, sin npao nain je. 28 In nkius natefan sin, rarit in na'uab am nak, “Sin au ba'e ma benu' aar ki! Hi mihiin main hai atoin Yahudis hai harat. Karu tatuin harat naan, ka nabei' fa he hai mseor gom mok atoni' pah a'teta'. Saa' ntein he mtaam meu sin umi. Mes Uisneno neikn On nakrira' neu kau mnak, karu In es re' na'uab am nak, baer es kninu', ka nabei' fa he au 'ak bare' naan 'oemetan. Onaim oras ia, au ka mai'nisin fa tuaf bian anteni'. Au ro he 'aan sin anjarin au nonot-asar 'bi au uim je nanan. 29 Es naan ate, oras hi iim maan kau te, au 'feen a'nao 'uum 'ain. Au ka puutr ok fa, natuin Uisneno natoon anrair kau. Onaim hi mitoon kau fe'! Hi mo'en kau he saa'?”
30 Onaim nai' Kornelis anpeo are' rasi nak, “Neno haa akonot, of oni' nreuk teun maans ii nteib, au 'onen a'bi au umi re' ia. Nok askeken ate, atoin es anhake nbi au matak. In paekn ii namaas. 31 Ma in nhaman kau mnak, ‘Kornelis! Uisneno anneen ho onen toits ein, ma In namnau ho nekam arekot neu too mfaun ein. 32 Onaim oras ia, amreun tuaf he nnaon neun kota Yope he naskau neik naan tuaf es, kaann ee nai' Simon Petrus. In natua ntahan et uim jes nbi tais je ninin, et atoin es re' biasa nakninu' pasu. In kaann ee, nai' Simon amsa'.’ 33 Es naan ate, au 'reun tuaf he naen neit ma naskau neik ko uum meu ia, tua. Hai mtoit makasi ma sukuur kou'-ko'u, natuin ho mkoen om uum main, tua. Onaim oras ia, hai mibua he mitniin saa'-saa' re' Uisneno nreun ko he mutoon sin meu kai, tua!”
Nai' Petrus natoon Usif Yesus In Raan A'honis neu tuaf re' ka atoin Yahudis fa
34 Rarit nai' Petrus na'uab am nak, “Oras ia, au fe' uhiin 'ak, Uisneno naan ro nkius mansian ii ok-oke' namnees. In ka npiir fa humaf, nak ia atoin Yahudis, ma bian sin ka atoin Yahudis fa.b 35 Karu nmui' tuaf na'ko uuf mee-mee re' in neekn Ee mne'o, ma n'onen piut neu Uisneno, ma natuin In nromin, tuaf naan anharineb In nekan. 36 Hi mihiin saa' re' Uisneno natoon anrair je neu kai too Isra'el, nak In nsonu' anrair Kristus, es re' Nai' Yesus. Ma Nai' Yesus naan anmaet he narame' mansian ii nok Uisneno. Ma In anjair A'nakat neu mansian ii ok-oke'.
37 Hi mneen mirari msa', saa'-saa' re' anjarin nbin propinsi Yudea nfuun am nateef. Reta' naan anmurai na'ko nai' Yohanis natoon neu too mfaun ein am nak, sin ro he nasaitan sin saant ein. Ma sin ro he nasranin amsa', he njair tanar nak, sin nareko nfanin nok Uisneno. 38 Rarit Uisneno nfee In Asmaan Akninu' neu Nai' Yesus, atoin Nasaretas naan. Uisneno nfee In kuasan neu Nai' Yesus amsa'. Rarit Nai' Yesus anpoi-ntaam kuan am bare, he nmoe' rais reko neu too mfaun ein. In nturun ma nbaab tuaf re' niut reu'f ein sin a'nakat nasusab sin. In nmoe' on re' naan, natuin Uisneno nok Ne piut. 39 Hai re' ia miit meik hai maatm ein kiim saa' re' In nmoe' sin nbin kota Yerusalem, ma anbin pah atoin Yahudis sin nfuun am nateef.
Maski on naan amsa', mes sin nkuus nakfiirt Ee nbi hau nehe tar anmaet. 40 In nmaet batuur-batuur, mes nmeu te, Uisneno namonib nafain' Ee. Rarit In nakrira' In tuan, he njair bukti nak, In anmoni nfain. 41 Mes In ka nakriir On fa neu mansian ii oke', suma neu kai mmees. Oras In nmoni nfain re' naan, hai biasa mbukae mok Ne. Onaim Uisneno anruur kai he njair saksii ma mnao mitoon Usif Yesus In Rais Reko naan meu tuaf amfaun ambi mee-mee.
42 Onaim Uisneno es re' anreun kai he mnao mitoon maat-maat, anmatoom nok Atoni' re' In nruur nain Je na'ko afi unu', es re' Nai' Yesus. Ma Uisneno nait Nai' Yesus amsa' anjair Afeek Rasi, he nafeek nak sekau es re' anmoin piut nok Uisneno, ma sekau es re' kahaf. Nai' Yesus naan, es re' nafeek rasi neu amates ma neu amoint ein. 43 Na'ko afi unu', Uisneno In mafefa kniun' ein anrurun amsa' neu Nai' Yesus naan nak, sekau-sekau re' anpirsai Je, Uisneno of antoup sin ma annoes nain sin saant am penu sin.”
Tuaf re' ka atoin Yahudis fa, sin ntoup Uisneno In Asmaan Akninu'
44 Oras nai' Petrus na'uab on naan fe'e te, nok askeken Uisneno In Asmaan Akninu' neem antaam anbi bifee-atoni' sin ok-oke' re' anneen ee. 45 Anbi naan amsa', anmui' nai' Petrus in partei nggwin atoin Yahudis, re' neem nokan na'kon kota Yope neu nai' Kornelis in umi et kota Kaisarea. Oras sin niit too mfaun ein antoup Uisneno In Asmaan Akninu' naan, sin nsanmakan, natuin sin fe' nitan, nak Uisneno nfee In Asmaan Akninu' neu atoni' re' ka atoin Yahudis fa. 46 Sin nneen bifee-atoni' re' anbin nai' Kornelis in umi, na'uab ein neik uab huma'-huma', ma sin npures ma nbo'is Uisneno.
Rarit nai' Petrus na'uab am nak, 47 “Hi mkius kiim! Sin re' ia, antoup Uisneno In Asmaan ee on re' hit imsa'. Onaim oras ia, iim he tasrain sin nai. Ka tiit fa es, re' he bisa npenan anteni' sin.” 48 Rarit nai' Petrus anreun sin he nasrain nai' Kornelis nok are' bifee-atoni' nbin naan, he sin ntaman too srani' neu Usif Yesus. Rarit sin ntotin, he nai' Petrus natua nabaar nok sin neno fauk antein, na' sin nafetin nai' Petrus he ntebi nfain neu Yerusalem.