8
1a Nai' Saulus nok anbi bare naan amsa', ma in nroim he sin nroor niis nai' Stefanus amsa'.
Nai' Saulus anha'mui' Usif Yesus Iin na
1b-2 Oras nai' Stefanus anmaet, tuaf fak-fauk re' nneek Uisneno, sin nnaon nait in ta'un, ma neik je he nsuub. Sin nkaen nmei'-mei' jok.
Na'ko neno naan, atoni' anmurai nha'mui' Usif Yesus Iin na nbi kota Yerusalem, tar antea sin nsusan nmaten ma nha'mui' jok. Rarit sin naen anbaits ok neun propinsi Yudea ma propinsi Samaria. Sin aar sin naenan, mes Usif Yesus In haef ein sin esan re' nabaran anbin Yerusalem.
3 Nai' Saulus naim ranan piut he nareu' pukan apirsait neu Usif Yesus. In naim sin anbin mee-mee. In npoi-ntaam umi he naim sin. In nheek et bifee ma atoni', ma nataam sin anbin bui.a
Nai' Felipus nareta' Usif Yesus In Rais Reko neu abitan propinsi Samaria
4 Maski sin nasusab nonot apirsait neu Usif Yesus tar antea sin naenan nsiksaakn ok, mes sin ka nasnasan fa he nsaksii Usif Yesus In Rais Reko neu sekau-sekau nbi bare mee-mee. 5 On re' oras naan, nai' Felipus nnao nbi kota es et propinsi Samaria, ma natoon neu sin am nak, Nai' Yesus naan, es re' Kristus, re' Uisneno nruur ma nreek nain Je na'ko unu'. 6 Oras too mfaun ein niit rais sanmakat re' in nmoe' sin, sin nabuan ma natniin narek-reko' in uaban.
7 Tareta' on re': anmui' are' aniut saes ein anbin naan amsa'. Ma niut re'uf sin npoi nasaitan sin nok haan hunun ko'u. Are' ameen bua' ma ameen hae hera' sin, nareok nanin oras naan. 8 Es naan ate, abitan kota naan anmarinan nmaten.
9 Anbi kota naan, anmui' atoin ahiint es, kaann ee nai' Simon. Nahunu te, in npaek in reu' raut ein neu abitan Samaria. In na'naeb in tuan, ma na'uab am nak, “Sekau on re' au!”
10-11 Onaim munif ai' mnasif, bifee ai' atoni' anbi kota naan anteek in kaann ee piut am nak, “Airoo! Atoni' ia, ma'tain besi! Saa'-saa' re' in nmoe' sin, neman na'ko Uisneno In kuasat!” Natuin are' in re'un re' naan, es naan ate, sin npaek je na'ko unu'.
12 Mes oras ia, sin nnenan nai' Felipus nanoni' sin anmatoom nok Uisneno In aprenat. In natoon neu sin ranan he bisa sin ntaam njarin Uisneno Iin na, npaek Usif Yesus In kanan. Oras sin nneen anrarin, too mfaun ein anpirsain, ma sin ntaman njarin Uiseneno In nonot-asar. Bifee-atoni' ntaman on naan. Rarit nasrain sin. 13 Nai' Simon anpirsai msa' ma ntaam anjair Usif Yesus Iin ja. Onaim sin nasrain je. Rarit in nnao nok nai' Felipus anbi mee-mee. Oras in niit rais sanmaakt ein re' nai' Felipus anmoe' sin, in nki'un am nak, “Hoe! Re' ia, ro ma'tani'!”
14 Oras naan, Uisneno In haef ein re' abitan Yerusalem annenan nak, abitan propinsi Samaria sin anpirsain nrarin neu Uisneno In Rais Reko. Onaim sin nsonu' nai' Petrus ma nai' Yohanis he nnaon neu bare naan. 15-17 Oras sin nua sin antean bare naan ate, sin nahinin nak, apirsait ein re' naan ka ntoupun fa fe' Uisneno In Asmaan Akninu'. Fin sin suma nasranin npaek Usif Yesus In kanan. Rarit nai' Petrus nok nai' Yohanis antao sin a'niimk ein anbi sin, ma sin n'onen antotin he abitan Samaria napein Uisneno In Asmaan Akninu' msa'. Ma sin napein nanin Asmaan Akninu' naan.
18 Oras naan, nai' Simon niit atoin nua' ein naan antao sin a'niimk ein anbi apirsait ein, onaim sin napein Uisneno In Asmaan Akninu'. Rarit nai' Simon annona' roit neu nai' Petrus ma nai' Yohanis, ma in ntoti mnak, 19 “Sin aam ein! Hi mfee kau kuasat naan amsa'. Maut he oras au 'tao au 'nimak 'eu sekau-sekau te, sin napenin Uisneno In Asmaan Akninu' msa'.”
20 Mes nai' Petrus naskaar ee mnak, “Kasat neu ko, mok ho roit ein naan! Ho mak of oni' ho bisa msoos Uisneno In Asmaan Akninu' meik roit? Kahaf! Ka tiit fa es he bisa nsoos naan Asmaan Akninu'! 21 Ho ka mmui' fa hak saa'-saa' meu Uisneno In Asmaan Akninu', natuin ho nekam nanan nameis'ook. Ho suma mami haa akar. 22 Musnaas nai mu'ko ho saant am penu sin! Reko nneis, ho m'onen ma mtoit meu Uisneno, he karu reko te, In nnoes nain ho tenab amre'ut naan. 23 Au uhiin 'ak, ho neekm aan naheun nok maufinu ma sinmakat, ma nmui' rais re'uf amfaun re' anfuut ko fe'!”
24 Rarit nai' Simon antoit sin nua sin am nak, “Sin ama' aar ki! Karu on naan ate, hi m'onen maan kau fe', he kasat re' hi mteek ee naan, kais antoom kau.”
25 Rarit nai' Petrus ma nai' Yohanis natoon Usif Yesus In Rais Reko ok-oke', ma sin natoon amsa' Uisneno In Kabin ma Prenat neu abitan kota naan. Rarit sin nua sin ntebi nfanin neun Yerusalem. Oras sin nnaon raan, sin neis nokan kuan-kuan nbin propinsi Samaria, he natoon Usif Yesus In Rais Reko neu abitan naan.
Nai' Felipus nateef nok kaes kou' gwes na'ko Afrika
26 Rarit ameput Uisneno na'ko sonaf neno tunan nreun nai' Felipus am nak, “Ba'e! Ho mnao nai mutuin ranan re' an'ain haa'-nua. Mutuin raan amnaa' na'ko kota Yerusalem ma mnao mkoon meu kuan Gasa.” 27-28 Oras in nneen on naan ate, nai' Felipus anpoi nnao nain. Oras in nbi ranan naan, in niit atoin es. Atoni' re' naan kaes kou' gwes na'ko pah Etiopia.b In es re' anpao ma n'urus a'mui'f ein na'ko uis bifee pah Etiopia. Uis bifee naan, sin nteek ee te nak, Kandake. Kaes ko'u re' naan, fe' nok an'onen anbi kota Yerusalem, ma oras naan in nsae kreet he nfain neu sin pah. Oras nai' Felipus niit ee, kase naan antook ma nrees anbi kreet ee in nanan. In nrees anbi surat na'ko ka'o Yesaya, Uisneno In mafefa kninu'. 29 Uisneno In Asmaan Akniun' ee nreun nai' Felipus he nnao nhaumak-maak kreet naan, he nateef nok kaes ko'u naan. 30 Ma oras in nhaumaak ate, in nneen atoni' naan anrees na'ko ka'o Yesaya in surat. Onaim in nataan am nak, “Aam! Ho muhiin saa' re' ho mrees ee naan, ai' kaah?”
31 Rarit atoni' naan nataah am nak, “Kaah fa, tua. Ro he nmui' tuaf he natoon kau fe', hena' au uhiin. Amsae uum he mtook mok kau mbi ia.” 32 Tuis re' in nrees ee naan, in haan ee, nak on nai:
“Sin nheer anfoont ee, on re' atoni' nheer 'bib-kase,
he neik je he nroor gwe.
In njair on re' 'bib-kaes ana' re' atoni' nkateir in funun,
mes in ntaa' kuun.
In ka nfei fa in fefan,
ma ka nataah fa fefa' mese' msa'.
33 Rarit sin na'aakn ee;
Sin nafekan rais poi ntoom ee.
Oras naan, sin nroor niis ne,
te kaah, in ka nmui' fa sanat saa'-saa'.
Onaim hit he tak saa' antein?”c
34 Anrees anrair on naan ate, kaes ko'u naan nataan nai' Felipus am nak, “On mee? Ka'o Yesaya antui neu in tuan ii oo, ai' in ntui anmatoom nok atoni' 'teta'?”
35 Rarit nai' Felipus nanoni' kaes ko'u naan neik Usif Yesus In Rais Reko. In nmurai na'ko ka'o Yesaya in tuis re' naan, ma in natoon ranan neu Usif Yesus. 36 Oras sin annaon fe', kaes ko'u naan niit oe. Ma in nsenu nfeek nai' Felipus in uaban, neik haan totis am nak, “Ba'e! Ho mkius miit fe', anmui' oe es nee. Karu ho mromi te, atsaun he ho musrain kau nai.”
37 [Ma nai' Felipus nataah am nak, “Karu ho mpirsai batuur-batuur meu Usif Yesus ate, ka nmui' fa ekat. Au uskau he tsaun he au usrain ko, tua.”
Rarit in nmanaku' am nak, “Au 'pirsai batuur-batuur 'ak, Nai' Yesus re' naan, Uisneno es re' anruur ma nreek nain Je na'ko unu'. In re' naan, Uisneno In Anah.”]d
38 Onaim atoni' naan anreun he nasnasab in akreet. Rarit sin nsanun ma ntaman nbi oe naan in nanan. Ma nai' Felipus nasrain je nbi naan.
39 Oras sin npoin na'ko oe, Uisneno In Asmaan Akniun' ee neik nai' Felipus annao neu baer sona'. Kaes ko'u naan ka niit antein' ee fa. Kase naan annao nkoon nok neek marinet ko'u. 40 Nai' Felipus anpoi nbi kuan es, kaann ee Asotus.e Na'ko bare naan, in nnao piut ma natoon neu too mfaun ein Usif Yesus In Rais Reko. In neis nok kuan-kuan tar antea kota Kaisarea.