Usif Yesus na'uab nok nai' Nikodemus
3
Anmui' naan tuaf es na'ko partei Farisi, kaann ee nai' Nikodemus. In re' naan, atoin Yahudis sin tunggur kou' gwes. 2 Neot es, in neem fa-fai he nateef nok Nai' Yesus. Rarit in nak, “Aam Tungguru! Hai mihiin mak, Uisneno es re' anreek haefan Ko he munoni' kai. Fin rais sanmaakt ein naan, naruru' ma nakrira' bukti nak, Uisneno es re' anfee kuasa naan neu Ko, tua. Karu ka on fa naan ate, batuur rais sanmaakt ein naan ka bisa njarin fa.” 3 Nai' Yesus nataah am nak, “Batuur! Mes Au he u'uab on nai: karu atoni' ka nahonis nafain' ee fa, in ka bisa njair fa Uisneno Iin na.”
4 Rarit nai' Nikodemus nataan am nak, “Mes on mee m'es atoni' bisa nahonis nafain' ee, karu in na'nae nrair!? In ka bisa ntaam anfain fa neu in ainf ee apun nfain no nua, rarit in ainf ee nahonis nafain' ee. Ka neu on re' naan fa, tua!”
5 Nai' Yesus nataah am nak, “Batuur! Mes Au u'uab on nai: atoni' ro he nahoins ee nok oe he kninu', ma nahoins ee nbi smanaf he njair atoin fe'u. Nok ranan naan, na' in bisa ntaam anjair Uisneno Iin na. 6 Fin mansian ii nahoins ee na'ko mansian, mes atoni' in asmanan nahoins ee fe'u na'ko Uisneno In Asmanan. 7 Kais amsanmaak, karu Au u'uab 'ak, ‘Ro he nahonis nafani' ki, he hi mipeni 'moin fe'u.’ 8 Hit tataib ee tok anin. Ain ii nfuu natuin in romin. Hit bisa tneen in a'ruun, mes ka tahiin taan fa tak, in neem na'ko mee, ma he nnao neu mee. Mansian ii sin aar sin re' napenin 'moin fe'u na'ko Uisneno In Asmanan, on naan amsa'. Fin hit bisa tkius tiit Uisneno In Asmaan ee nmoe' atoni' njair fe'u, maski hit ka tahiin fa on mee m'es rasi naan bisa njair.”
9 Rarit nai' Nikodemus nataan am nak, “Nansaa' am es bisa njair on naan, tua?”
10 Nai' Yesus nataah am nak, “Hae, ba'e. Ho mjair tunggur ko'u meu atoin Israelas sin. Nansaa' am es ho ka muhiin fa rasin ia? 11 Au u'uab batuur. Hai mihiin rasin ia. Fin hai mjair saksii nmatoom nok rasin re' hai mkius miit kiim sin. Mes hi ka mtoup reko fa nok hai uab ein. 12 Hi ka mpirsai fa oras Au utoon anmatoom nok rasin re' anjarin nbin pah-pinan. Saa' antein, oras Au utoon anmatoom nok rasin re' anjarin nbin neon gwe tnanan. Tebes! Ro of hi ka mpirsai fa mtein! 13 Ka nmui' fa tuaf es, re' ansae n'ain Uisneno nbi neon gwe tunan amsa'. Suma Au kuuk, es re' Mansian Batuur-Batuur, re' a'saun 'uum u'ko Na.
14 Un-unu' nbi baer ruman ma ma'koro', ka'o Musa nmoe' kauna' noon es na'ko tembaga, rarit nakfiir' ee anbi hau gwes tunan, he too mfaun ein niit ee, ma sin napenin fetin. Rasi on re' naan amsa', ro he njair neu Kau, Mansian Batuur-Batuur re' ia. Sin of nakfirit Kau nbi hau gwes tunan,a 15 he mansian ii sin aar sin re' anpirsai neun Kau napenin 'monit re' batuur re' ka natfeek niit fa.
16 Fin Uisneno nneek niis mansian mese'-mese' aar sin nbin pah-pinan ia. Es naan ate, In nreek haefan Kau, In Aanh fua mese' re' ia. Maut he tuaf-tuaf sin aar sin re' anpirsain neun Kau, ka mabetis-mabatis fa na'ko Uisneno. Nok ranan naan, sin napenin a'monit re' batuur nabar-baar. 17 Uisneno ka nreek haefan Kau fa, In Anah, a'taam 'uum he ufeek atoni' in rais hukun. Mes In nreek haefan Kau he 'soi ufetin atoni' na'ko sin sanat ma penu sin. 18 Uisneno ka nhukun fa atoni' re' npirsai Kau. Mes In nafeek nain hukun neu atoni' re' ka npirsai Kau fa, natuin atoni' naan ka npirsai Kau fa. Au es re' Uisneno In Aanh fua mese' ia.
19 Human on nai: Uisneno nfee me'u he ntana' nbi pah-pinan ia. Mes atoni' nroim nanesib meis'okan, ma nmoni nbi in nanan. Sin ka nromin fa he nmonin nbin me'u, natuin sin i'moe'k ein namre'un. Etun es Uisneno he nhukun sin. 20 Fin mansian ein re' nmo'en amre'ut, anmamuus nok me'u. Sin ka nromin fa he me'u naan antana' sin, maut he me'u naan kais anpukai n'afa sin maufinun. 21 Mes tuaf re' anmoe' natuin rais amnonot ma amneot, sin neman npaumakan he me'u naan antana' sin. Fin me'u naan naruru' ma nakrira' mnak, sin anmo'en natuin Uisneno In romin.”
Usif Yesus ma nai' Yohanis Asranit
22 Rarit Nai' Yesus nok In atoup noin' ein anpoin na'kon kota Yerusalem, mes sin natua ntaahn ein anbin pah Yudea. Anbi bare naan, sin nasranin tuaf. 23-24 Oras naan, usif Herodes ka nataam nai' Yohanis Asranit fa fe' anbi bui je nanan. Rarit nai' Yohanis nasrain tuaf amsa' nbi kuan Ainon, anpaumaak kuan Salim, natuin anmui' oe mata' amfaun anbi bare naan. Onaim too mfaun ein neman piut neu nai' Yohanis he in nasrain sin.b
25 Anbi pirsait Yahudi, anmui' atoran haart es, he nakninu' sin tuak ein, he na' sin bisa n'oen ein. Anbi bare naan, anmui' atoin Yahudis tuaf es, re' anmaka'rasi' nok nai' Yohanis in atoup noin' ein anmatoom nok rasi naan. 26 Rarit sin neman neun nai' Yohanis he natonan am nak, “Aam Tungguru! Ho mumnau, ai' kaah, Tuaf re' naim ko mbi noe Yarden in panin? Tuaf re' ho mak, In re' naan, es re' Kristus. In nasrani msa'! Onaim tuaf ka neem antein fa neu kit! Fin too mfaun ein annaon kuuk an'anin Na!”
27 Nai' Yohanis nataah am nak, “On nai! Atoni' ka bisa nmoe' fa saa'-saa', karu Uisneno re' et sonaf neno tunan ka nfei fa ranan neu ne. 28 Hi mneen kiim. Au utoon 'eu ki maat-maat 'ak, ‘Au re' ia, ka Kristus fa re' hit tpa-pao. Mes Uisneno nreek haefan kau, he uhuun ma 'fei ranan 'eu Kristus. On re' naan, tua!’c
29 Atpaek reta'. Baroit atoin ii nabua nok baroit bifee. Mes in saksii re' nhaek nok ne, neekn ee nmariin oras nneen baroit atoni' na'uab. Nai' Yesus naan, on re' baroit atoni'. Ma au re' ia, on re' In saksii. Etun oras ia, au neek ii nmariin. 30 Re' pentiing ii, In ro he na'nae piut anjair atoin ko'u ma kaes ko'u. On nai te, maut he au 'bi 'kuran ma 'jair atoin ba-baun.”
Atoni' re' nsaun na'ko sonaf neno tunan
31 Nai' Yohanis antuut antein am nak, “In re' ansaun neem na'ko Uisneno et neon gwe tunan, es naan ate In ko'u nneis na'ko are' saa' ii ok-oke'. Mes au, au suma 'uum u'ko pah-pinan ia, es naan ate au huma' mese' on re' mansian pah-pinan sin ok-oke'. Au u'uab anmatoom nok are' kanan rasi neno-neno nbi pah-pinan ia. Mes re' nsaun neem na'ko Uisneno et neon gwe tunan naan, In ro ma'tani' nneis na'ko are' saa' ii ok-oke'. 32 In na'uab anmatoom nok saa' re' In kuun nkius niit ma nneen niit. Mes atoni' ka ntoup reko fa neu saa' re' In na'uab ma natoon. 33 Karu atoni' ntoup saa' re' Tuaf amnemat na'ko faofn ee natoon ee naan, in naruru' bukti msa' nak, in npirsai nak Uisneno In uaban naan, ro batuur. 34 Tuaf naan es re' Uisneno nreek Ee ntaam neem, natoon Uisneno In beno ma ba'an. Fin Uisneno nfee nrair In Asmanan neu Ne ma ka nmui' fa tu'uf. 35 Fin Ama' abit sonaf neno tunan anneek niis In Anah. Ma In annona' ma nfee are' saa' ii ok-oke' neu In Aanh ee In a'niman.d 36 Rarit tuaf-tuaf re' npirsai In Anah naan, sin napenin 'monit re' batuur nabar-baar. Mes tuaf-tuaf re' ka npirsai Je fa, ma ka nmoe' natuin fa In haan manba'an, sin ka napenin fa 'monit naan, fin Uisneno nakrira' In to'os nabaar he nhukun sin.”