Usif Yesus anmoni nfain!
24
Neno krei kik-kiuk ana' te, bifeen naan neikin miin fubona' ma bonak re' sin nanutu nrair sin naan, ma nnaon n'anin Nai' Yesus In naten. 2 Oras sin ntean nee ja te, sin nkius niit faut ko'u re' antoeb noup fatu naan, natnani nrair et nini'. 3 Onaim sin ntaam ankonon neu noup fatu naan, mes Nai' Yesus In aon amates ka mnita' fa nbi naan. 4 Onaim sin ntaka'naan ein. Nok askeken ate, atoni' nua anpaken tai arimat, neman nhaken npaumaak sin. 5 Bifeen naan namtaun nmaten, rarit sin nri'tuun ma na'ruir ein ntean afu. Onaim atoin nua' ein naan nataan sin am nak, “Nansaa' am es hi iim maim amoint ii nbi amaets ii in baran? 6 Nai' Yesus ka et fa ia gwen! In nmoni nfain jen. Hi of oni' mnika' main re' In na'uab niit ki oras hi fe' ambi Galilea, ai'? 7 In na'uab nain nak, sin of na'sosa' Mansian Batuur-Batuur re' ia neu amaufiunt ein sin a'niimk ein. Rarit sin nkuus na'maet Je nbi hau nehe. Mes anmeu te, In nmoni nfain.”a8 Annenan on naan ate, na' sin namnau niit Nai' Yesus In uaban unu' naan. 9 Onaim sin ntebi nfanin rabah, he natonan rasin re' ia ok-oke' neu Nai' Yesus In atoup noin' ein tuaf bo'es am mese' ma tuaf-tuaf bian antein re' natuin Nai' Yesus. 10 (Bifeen re' anbin noup fatu naan, esan re': nai' Yakobus in ainaf, es re' bi Maria; bi Maria na'ko kuan Makdala; bi Yohana; ma bifee bian antein. Sin aar sin re' naan es re' annaon ma nareta' rasin re' ia ok-oke' neu Nai' Yesus In haef ein.)
11 Mes oras atoup noin' ein annenan reta' naan, sin nateenb ein am nak, sin napoin.
12 Mes nai' Petrus anpoi ma naen an'ain nopu naan. Antea nee te, in nraitan ntaam, mes in niit ahaa tais re' an'aum Nai' Yesus In aon amates naan anmees. Onaim in ntebi nfain ma nnao naten-tenab am nak, “On mee es re' ia?”b
Atoup noni' tuaf nua nateef nok Usif Yesus anbi ranan Emaus
13 Neno naan amsa', Nai' Yesus in atoup noni' tuaf nua annaon neu kuan es, kaann ee, Emaus. In a'roon ii of oni' kiru bo'es am mese' na'ko kota Yerusalem.c 14 Sin nnaon npe-peon anmatoom rasi re' Nai' Yesus In a'maten. 15 Nok askeken ate, Nai' Yesus neikn On anpaumak-maak sin, ma nnao nabu-bua nok sin. 16 Mes sin ka nahiin Je fa, natuin Uisneno anmoe' sin he sin kais nahiin Nai' Yesus. 17 Onaim Nai' Yesus nataan sin am nak, “Hoe! Hi nua ki mpeo saa'?”
Annenan on naan ate, sin nua sin nasnasan. Sin huumk ein on re' ansusan nmaten. 18 Rarit tuaf es, kaann ee nai' Klopas nataan Ee mnak, “Ho on re' atoin fe'u re' ka muhiin fa saa'-saa' re' anjari nbi Yerusalem. Airoo, rasi ia fe', fe'-fe'u.”
19 Onaim Nai' Yesus nataan sin am nak, “Saa' naa?”
Sin natahan am nak, “Nai' Yesus na'ko Nasaret naan! In batuur-batuur Uisneno In mafefa kninu'. Uisneno anfee Ne kuasa ma In nmoe' rais sanmakat huma'-huma'. In nanoni' atoni' msa' mahiin ii kah een. Too mfaun ein anmariin Ee. Ma Uisneno msa' anmariin Ee.
20 On nai te, mes hai a'naak rais pirsait Yahudi sin a'naakt ein ma atoni mnais haart ein anheek Je. Rarit nanaa't Ee nbi gubernur he nhukun na'maet Ee. Onaim sin nkuus na'maet Je nbi hau nehe. 21 Nahunu te, hai mhaarp Ee mmak, In re' naan, Kristus re' neem he nsoi napoitan hai pah ii na'ko anaa' aprenat pah Roma re' anteir hae kai. Mes maeb es ii, neon niim ii, sin nroor Gwe.
22 Oras ia hai mtaka'nana' mtein. Fe'e na bifee nggwin neman ma natonan am nak, kik-kiuk aan' ii sin nnaon nbin nopu. 23 Mes sin nak, Nai' Yesus In aon amates naan namneuk. Rarit sin niit Uisneno In ameput nua na'kon sonaf neno tunan, re' natonan am nak, Nai' Yesus anmoni nfain! 24 Hai mneen on naan ate, hai partein tuaf fauk naenan n'anin nopu naan. Onaim sin nitan huma' mese' on re' bifeen naan. Sin ka niit fa Nai' Yesus In aon amates naan.”
25 Sin nua sin anpeon nrarin on naan ate, Nai' Yesus nak sin am nak, “Hi moonm ein kah een! Nansaa' am es hi ka mpirsai fa saa'-saa' re' Uisneno In mafefa kniun' ein natoon nain sin neno unu'! 26 Sin ntuin am nak, Kristus naan ro he napein ma'ne'at on re' naan, na' In mapina' ma kraha'.” 27 Onaim Nai' Yesus nanoni' sin are' saa'-saa' ein re' Uisneno In mafefa kniun' ein antui nain sin anmatoom nok Kristus, anmurai na'ko ka'o Musa in tuis ein, tar antea mafefa' bian sin tuis ein amsa'.
28 Oras sin he ntean Emaus, Nai' Yesus anmoe' Jon on re' he nkoon gwen. 29 Mes sin nua sin nasee Je mnak, “Aam! Amtuup mok kai mabe' re' ia, natuin maans ee he nmouf gwen.” Onaim Nai' Yesus anroim ma ntaam nok sin neun umi.
30 Oras sin ntokon he nbukaen ate, Nai' Yesus nait utunu' fua' es. Rarit In n'onen ntoit makasi neu Uisneno, ma In nteib utunu' naan. Oras In nsoron utunu' naan neu sin nua sin, 31 na' sin nahiin nak, Atoni' re' naan, Nai' Yesus. Mes nok askeken ate, In namneuk na'ko sin maatk ein! 32 Onaim sin nua sin na'uab ein am nak, “Hoe! Oras hit tneen In na'uab mafefa kniun' ein sin tuis ein fe'e na, hit tnaben ate hit neek ii on re' napein ha'tanis.”
33 Oras naan amsa', sin nua sin anfain nanin neun Yerusalem. Sin nateef nok Nai' Yesus In atoup noin' ein tuaf bo'es am mese', ma tuaf bian antein' ein nabuan nbin naan. 34 Onaim atoup noin' ein naan natonan tua nua' ein naan am nak, “Batuur! Usif Yesus anmoni nfain! Fe'e na In nakriir On neu nai' Petrus.”d
35 Rarit tua nua' ein naan npeon sin saa'-saa' re' sin nnaben niit sin anbin ranan, tar antea sin nahiin Nai' Yesus, oras In nteib utunu'.
Usif Yesus nakriir On neu atoup noin' ein
36 Oras sin anpe-peon on naan fe', nok askeken ate, Nai' Yesus anhake nbi sin atnaank ein. In nasee sin am nak, “Saloom!”
37 Mes sin naskeken ma namtaun, sin nak oni' aka'taus.
38 Mes Nai' Yesus na'uab am nak, “Nansaa' am es hi mimtau on re' ia? Hi ka mpirsai fa mmak Au 'moni 'fani, oo? 39 Amkius kiim Au 'nimak ma Au haek. Au es re' ia. Ampaumaak he mreo' Kau! Maut he hi mpirsai mmak, Au re' ia, ka aka'taus aa fa. Fin aka'taus ii ka nmui' fa aof, mes hi ok-oke' mkius miit Au aok ii!”
40 Oras In na'uab fe', In nakrira' sin In bikin re' anbin In a'niimk ein ma In haek ein. 41 Sin nmarinan nmaten, natuin Nai' Yesus anmoni nfain jen. Suma sin ntaka'naan ein, natuin sin ka bisa nahiin narek-reko' fa, neu saa' am es anjair on re' naan. Onaim Nai' Yesus nataan sin am nak, “Hi miah saa' ambi ia?” 42 Onaim sin nfee Ne iik tunu' tuuk aan es. 43 Nai' Yesus antoup iik tunu' naan, rarit in neuk gwe nbi sin maatk ein.
44 Onaim In na'uab am nak, “On mee? Hi mimnau oras Au ubua 'ok ki fe', ai'? Au utoon ki oras naan 'ak, are' saa'-saa' re' Uisneno In mafefa kniun' ein antui sin anmatoom nok Kau naan, ro he njarin. Esan re': na'ko ka'o Musa, na'ko mafefa kninu' bian sin, ma na'ko suur Siit Pures-Bo'is sin.”
45 Rarit In natoon neu sin namnuut, he sin nahiin batuur-batuur Suur Akninu' In oetk ein. 46 In na'uab antein am nak, “Uisneno In mafefa kniun' ein antuin nrarin am nak, Kristus re' Uisneno nreek haefan nain Je naan, ro he napein ma'ne'at huma'-huma', rarit In nmaet. Mes of anmeu te, In nmoni nfain. Sin ntui nain sin een! 47 Oras ia, Au 'fee ki kuasa he hi meik Rais Reko ia meu are' uuf ma pah, ammurai mi'ko kota Yerusalem re' ia. Mitonan sin am mak, atoni' re' anmanaku' neu in nsaan ma ntebi nfain neu Uisneno, Uisneno of annoes nain in saant ein ok-oke'. 48 Hi ro he mjair saksii he mireta' mmak, Au upein ma'ne'at, rarit Au 'maet, mes 'moni 'fain. 49 Au of a'sonu' ki Asmaan Akninu' re' Au Ama' anba'an anrair Je. Mes hi ro he mpao mbi kota Yerusalem re' ia, tar antea hi mtoup kuasa na'ko sonaf neno tunan.”e
Usif Yesus na'ait On neu sonaf neno tunan
50 Neon gwes, Nai' Yesus nok sin anpoin na'kon kota in nanan. Oras sin anpaumaak kuan Betania, In nait In a'niman ma na'uab anfeen sin tetus.f 51 In na'uab anfeen sin tetus fe' on naan ate, In na'ait On ansae neu sonaf neno tunan. 52 Ankius nitan on naan ate, sin nri'tuun ma na'besan neun Ee. Rarit sin nfanin neun kota Yerusalem nok neek mariin ko'u. 53 Ansuun-suun neno, sin nabuan anbin Uim Onen Uuf, he nsiin ma npures na'naeb Uisneno.
Aam Teofilus! Au reet matu'in re' ia, utu'ub sin anbin re' ia nai.
Tabe ma haan buseet,
na'ko au, nai' Lukas kau, tua.