Usif Yesus anmoni nfain!
16
Noka' neon ne'e, atoin Yahudis sin neon onen. Maans ii nmoufu nrari te, bi Maria na'ko kuan Makdala, ma ain Maria (nai' Yakobus in ainaf), nok ain Salome, sin nnao nsosan miin fubona', he noka' te, sin he nnaon nkaik ein neu Nai' Yesus In aon-ta'un natuin sin harat atoin Yahudis.
Nai' Markus 16:1-20
2 Ma noka' neno krei oras snaat ii nsae on naan ate, sin teun sin annaon neun noup fatu naan. 3-4 Anbi raan atnana' sin na'uab ein am nak, “Amoo! Of sekau es re' ntitar na'roba' kit faut ko'u naan na'ko noup gwe in enon? Hit teun kit ka neu ta'bei' je fa. Fatu naan kou' re'uf!”
Mes oras sin ntean bare naan, sin niit fatu naan natnanib anrari. 5 Rarit sin ntaman nkonon anbin noup fatu naan. Mes nok askeken, sin niit atoin muinf es anpaek muti' nariim, antook anbi sin abnapak a'ne'u. 6 Onaim atoin munif naan na'uab neu sin am nak, “Hi kais mimtau! Au uhiin 'ak hi iim he maim Nai' Yesus, atoin Nasaretas naan, re' sin na'mate nrair Je nbi hau nehe. In ka et fa ia. In nmoni nfain jen! Iim he hi mkius kiim bare re' sin natunu' Nai' Yesus In aon-ta'un naan. Ka tiit Ee fa gwen! 7 Onaim hi mfain nai rab-raab! Amnao mitoon meu nai' Petrus sin am mak, Nai' Yesus anmoni nfain jen. In nnao nahunun ki neu pah Galilea. Maut he sin nateef nok Nai' Yesus anbin naan, on re' nahunu te In natonan nrair sin. Onaim hi mfain nai!”a
8 Oras bifeen naan niit noup ruman naan ate, sin naskeken. Onaim sin naen anpoin. Sin nfanin rab-raab. Sin npe'on raan ee te, ma sin ka natonan fa sekau-sekau, natuin sin namtau nmaten.
Usif Yesus nateef nok bi Maria re' na'ko Makdala b
9 Anbi neno krei kik-kiku te, Nai' Yesus annao nakriir' On nahuun neu bi Maria re' na'ko kuan Makdala. Bi Maria re' naan, nahunu te Nai' Yesus anriu' napoitan niut re'uf hiut na'ko in tuan. 10 Oras bi Maria nateef anrair nok Nai' Yesus, in nfain ma natoon neu amfaut ein re' nahunu te sin natuin Nai' Yesus. Sin nabu-buan nok susat ma kaet fe', natuin sin namnau Nai' Yesus In a'maten. 11 Rarit bi Maria na'uab neu sin am nak, “Nansaa' am es hi msuus ma mkae fe'? Kais amnana'reen amtein, natuin Nai' Yesus anmoni nfain jen! Fe'e na, au uteef 'ok Ne!”
Mes sin aar sin antonin am nak, “Ho mupoi!”
Usif Yesus nakriir On neu tuaf nua
12 Rarit Nai' Yesus In atoup noni' tuaf nua annaon neun kuan es. Anbin raan atnana' te, Nai' Yesus nakriir On neu sin, mes In na'bani'. Mes ka 'roo fa on naan ate, sin nahiin Je. 13 Rarit sin nua sin anfanin ma natonan sin aok-bian ein am nak, “Hoe! Hi mneen fe'! Fe'e na hai miteef mok Nai' Yesus anbi ranan!”
Mes sin aok-bian ein antonin am nak, “Heero! Hi kaisa' mipoi on naan!”
Usif Yesus nakriir On neu In atoup noin' ein ok-oke'
14 Rarit Nai' Yesus nateef nok In atoup noni' tuaf bo'es am mese'. Oras naan, sin ntokon ma nbukaen. In naseus sin am nak, “Hi 'naak-fautm ein ii! Atoni' natoon anrair ki mnak sin niit anrair Kau neik sin matak fuak ein, mes hi ka mpirsai fa joo! Hi mak, sin aar sin napoin! Oras ia, Au 'eikn Ok 'uum. Namneo Au 'maet, mes oras ia, Au 'moni 'fain! Hi miit kiim meik hi matam fuam ein.
15 Onaim oras ia hi ro he mnao mfuun am mitefan pah-pinan ia, he mitonan are' mansian ein ok-oke' Au Rais Reko ia.c 16 Sekau re' anpirsai neu Kau, ma nasrain je, of Uisneno nsoi nafeitn ee, he in natua nabar-baar nok Uisneno nbi sonaf neno tunan. Mes sekau re' ka npirsai fa te, of in napein hukun, ma Uisneno nriu' napoitn ee, rarit natua nabaar anbi mone'. 17 Ma re' apirsait neu Kau, of sin nmo'en rais sanmakat huma'-huma', he too mfaun ein nahinin nak sin kuasat naan na'uu ma na'baa' na'ko Uisneno. A'tope' on re': sin bisa nriu' niut reu'f ein neik Au kanak. Of Uisneno nmoe' sin he sin na'uab ein neik uab bian re' sin ka nahiin je fa. 18 Rarit karu sin nnaa' kaun re'uf, ai' sin niun naan raso, sin ka neu he nsiraak ok fa. Karu sin npohon ma n'oen ein neun amenat, amenat naan nareok.”
Usif Yesus na'ait On neu sonaf neno tunan
19 Oras In na'uab anrair nok In atoup noin' ein on naan ate, Uisneno nait nasaeba' Nai' Yesus neu sonaf neno tunan. Anbi naan, In njair Uisneno In tua pirsa'i, he sin nua sin antokon ma napreent ein bu'-bua'.d
20 Rarit In atoup noin' ein nmoe' natuin In aprenat. Sin nnaon neun bare-bare ma natonan are' too mfaun ein anmatoom nok Nai' Yesus In Rais Reko. Uisneno nfee kuasa neu sin, he sin nmo'en are' rais sanmakat re' Nai' Yesus natoon anrarin sin. Onaim too mfaun anpirsain neu Nai' Yesus, natuin sin nahinin nak Rais Reko naan ro namneo.]
Nai' Markus 16:21-21
[NAI' MARKUS NATU'UB IN RETAN, NATUIN TUIS AHUNUT BIAN e
9 Oras bifee teun ein naan nateef nok nai' Petrus sin, sin natonan amfaut ein naan anmatoom nok atoin munif re' na'uab nok sin anbi noup fatu naan. 10 Rarit Nai' Yesus neikn On naprenat In atoup noin' ein, he nnaon ma natoon In Rais Reko neun are' bare-bare, tar antea pah-piin ii tuuk am tuuk. Rais Reko ia naruru' ranan nak Uisneno nsoi nafetin sin na'ko sin saant ein, he sin nmonin piut nok Ne.
Rais Reko ia ro namneo ma namnoon. Es naan ate, in ntahan piut na'ko batan neu batan, tar antea nabar-baar, tua.]