2-5 Atoin Farisis sin annaa' naher-heran sin harat atoin Yahudis. Tait i'tope' on re': karu atoni' he nbukae, ro he nafaun in a'niman natuin haart ii in romin. On naan amsa', karu nfain neem na'ko 'masa', sin ro he naniun fe'. Tar antea sin bare' umi 'haan ee msa', on re' 'pika', kraas, pois oe, ro he nsaef sin natuin haart ii in romin, hena' bisa npaek sin he nbukaen.

Karu anmui' atoin Yahudis bian re' ka natuin fa haart ein naan, atoin Farisis sin nato'on.

Es naan ate, sin nato'on oras sin niit Nai' Yesus In atoup noin' ein nbukaen, mes ka nafaun fa sin a'niimk ein natuin haart ii in romin. Rarit sin neman ma nasaan Nai' Yesus am nak, “Nansaa' am es ho atoup noin' ein nbukaen mes sin ka nafaun fa sin a'niimk ein? Naan, sin nraban hit atoran harat na'ko atoni mnais uun ein!”

6-7 Mes Nai' Yesus nataah sin im nak, “Hi re' ia on re' atoni' re' na'uab ate, a'teta', mes hi mmo'e te, a'teta'! Nahunu te, ka'o Yesaya antui nain Uisneno In kabin am nak,

Hi huma' mese' on re' sin imsa'.^a 8-9 Hi misaitan amrair Uisneno In aprenat ma mituin ahaa mansian ii in harat. Hi mahinim ma manoem ein ma'tain re'uf!

10 Nahunu te, ka'o Musa natoon anrair Uisneno In aprenat am nak, ‘Amhormaat hi mahoint ein.’ Antuut antein am nak, ‘Karu tuaf es naseku' in ainaf ai' in amaf, ro he thukun tiis ne.’^b 11-12 Uisneno nanoni' ki on naan, mes hi minoni' 'teta' na'ko naan. Hi mak, ‘Karu tuaf es anba'an anrair he nfee saa' es neu Uisneno, maski in ainaf-amaf ansuus anmaten, mes bare' naan ka bisa npaek je fa he nturun sin, natuin anba'an anrair he nfee je neu Uisneno.’ 13 Es naan ate, fe'e na Au 'ak ki m'ak, hi mporin main Uisneno In romin, ma hi mseek ee meik atoran mansian. Anmui' atoran amfaun re' hi mseek ee nahuum on re' naan.”

14 Rarit Nai' Yesus no'en tuaf bian anbin naan, ma na'uab am nak, “Amneen mirek-reko', he hi mihiin. 15 Are' saa' re' antaman neu atoni' in tain ka nhai'niis fa in tuan. Mes saa' re' anpoi nfain, es re' neik hai'nisit neu in tuan. 16 [Sekau he mneen ate, amneen he muhiin!”]^c

17 Rarit Nai' Yesus nok In atoup noin' ein annaon nasaitan too mfaun ein naan, ma antaman neun uim jes. In atoup noin' ein nataan reta' naan in a'moufun. 18-19 Nai' Yesus nataah sin am nak, “Hi ka mihiin fa msa', aa oo? In a'moufn ii on nai: saa' re' atoni' nbukae je, naan in reko kuun. Mes saa' re' anpoi nfain naan, in es ka reko fa. Saa' re' hit tbukae je, antaam neu hit taik, rarit anpoi nfain. (Usif Yesus In sairt ii nak, atoni' bole nbukae saa'-saa' aah. Ka taras fa.)

20 Mes saa' re' anpoi na'ko atoni' in nekan, naan es re' neik hai'nisit, tar antea Uisneno nmai'niisn ee, ma ka nroim fa he nabua nok ne. 21 Rais re'uf namfau anpoi na'ko atoni' in nekan, on re': tenab amre'ut, rais makonit, rais bakan, rais marorot, 22 rais paru', rais makaket, moe' re'uf, puta-kriut huma'-huma', sinmakat, mantinus, na'uab na're'uf es, nabeo', ka nahiin fa atoran, ma na'naak-faut.

23 Are' 'moe' reu'f ein on re' naan anpoin na'kon atoni' in nekan. Naan es re' nareu' nafani' in tuan. Ma Uisneno nmai'niisn ee msa'.”

24 Rarit Nai' Yesus sin nasaitan bare naan, ma nnaon neun kota es, kaann ee Tirus. Antean bare naan, sin ntaman anbin uim jes, natuin Nai' Yesus In ka nroim fa he biak ein nahinin nak In et re' naan. Mes In ka bisa na'koro' fa.

25-26 Anbi naan, anmui' naan bifee mnais es, re' ka atoin Yahudis fa, re' nahoins ee nbi pah Fenesia et propinsi Siria. Oras in nneen nak Nai' Yesus neem ate, in nnao ma ntoot Je he nriu' napoitan niut re'uf na'ko in aan feto.

27 Nai' Yesus na'uab manporin am nak, “Ri'aan ein sin ro he nbukaen nahunun, rarit na' an'okar amnaah neisf ein neun asun.” [Nok sarit ma'nifa' nak, Nai' Yesus ro he nturun In atoin Yahudis sin fe', na' anturun atoin sona'.]

28 Mes bifee naan nataah am nak, “Namneo, tua! Mes asun naan sin etan mei je nupun. Onaim sin nahan amnaah amouft ein na'ko ri'aan ein sin a'piik ein.” [Nok sarit nak, oras ri'aan ein anbukaen, asun naan napenin amnahat amsa'. Maski Nai' Yesus anturun Iin na kuun, In ro he nkius atoin sona' amsa'.]

29 Anneen on naan ate, Nai' Yesus na'uab am nak, “Wee, bifee ia fe'! Ho uabam naan ro namneo! Es naan ate ho mfain nai, natuin niut reu'f ee anpoi nrair na'ko ho anah.”

30 Rarit bifee naan antebi nfain. Antea in umi te, in anah naan antuup anfiin. Niut re'uf naan anpoi nrair.

31 Rarit Nai' Yesus sin nasaitan kota Tirus, ma nnaon nabnonon npe'on ranan re' et tais je ninin, nkoon kota Sidon. Na'ko naan, sin nnaon nkonon tar antean nefo Galilea. Rarit sin nnaon neu pah es nok kota bo'es, re' sin nteek nain je mnak, ‘Dekapolis’.^d 32 Anbi bare naan, anmui' atoin amuut es, re' ankoos nok. In aok-bian sin neik je nnao neu Nai' Yesus. Sin ntotin he Nai' Yesus antao In a'niman neu amenat naan, he nareok' ee. 33 Onaim Nai' Yesus nasaitan too mfaun ein, ma nnao nmees nok atoni' naan. Nai' Yesus nataam In akrurun neu atoni' naan in ruikn ein nua sin. Rarit In ntao hape nbi In akrurun naan ma anreo' atoni' naan in maan. 34 Nai' Yesus anbaiseun neu neon gwe ma nheer In asnasan, rarit naprenat anpaek sin uab am nak, “Efata!” (In a'moufn ii nak, “Mutfe'i nai!”)

35 In na'uab on ahaa re' naan, mes amenat naan in ruik ein anneen nain oras naan. Ma in maan re' ka na'uab nahiin fa naan, anma'nuur nain amsa', onaim in nmurai na'uab nok reko.

36 Rarit sin nua sin annao nfanin neun too mfaun. Nai' Yesus antaar sin am nak, “Amneen, oo! Kaisa' mitoon meu sekau-sekau mak, Au ureko' urair atoni' re' ia.” Maski Nai' Yesus antaar sin nok ma'tani' amsa', mes sin na'uab ein piut anbin bare-bare. 37 Too mfaun ein re' anneen uab mantonas naan, ansanmakan. Sin na'uab ein am nak, “Ma'tain re'uf! Atoni' re' ia anmoe' are' saa' ii ro reko oke'. Akoost ate, anneen. Amuut ate, na'uab.”