Usif Yesus antuthae bukaet neu tuaf nifu niim anneis
6
1-4 Rarit atoin Yahudis sin neon ko'u ‘Paska’ anpaumaak een. Onaim Nai' Yesus sin annaon neun nefo Galilea in panin. (Nefo naan in kanan es antein, es re' ‘nefo Tiberias’.) Too mfaun ein natuin Ee nbi nee, natuin sin niit naan kuuk rais sanmakat re' In nmoe' sin oras In nareko' ameent ein. Antea neof gwe panin, Nai' Yesus ma In atoup noin' ein ansaen neun kneet es. Rarit sin ntokon nbin naan.5 Oras Nai' Yesus ankius too mfaun ein neman ma nabuan on naan ate, In nataan In atoup noni' tuaf es, kaann ee nai' Felipus, am nak, “Hit bisa tsoos amnahat teu mee he ttuthae too mfaun ein ia?” 6 Batuur Nai' Yesus nahiin anrair In he nmoe' on mee. Mes In na'uab on naan, he nsoba' niit nai' Felipus.
7 Onaim nai' Felipus nataah am nak, “Amoo! Maski tuukn es anmeup neno natun nua msa', mes in kai je ka nanokab fa fe' he nsoos bukaet neu too mfaun ein ia! Maski tuaf es napein bukaet akre'o msa', mes naan ka nanokab fa, tua!”
8 Rarit Nai' Yesus In atoup noin es antein, kaann ee nai' Anderias, es re' nai' Simon Petrus in orif, natoon neu Nai' Yesus am nak, 9 “Aam! Anmui' ri'aan es et ia, neik utunu' fua' niim, nok ika' fua' nua. Mes ka neu fa he nanokab karu he ttuthae too mfaun ein ia, tua!”a
10 Anbi bare naan huun ee seor mafaun. Rarit Nai' Yesus anreun In atoup noin' ein am nak, “Am'ator he sin ntokon ok-oke'!” Onaim sin ntokon. Oras naan, too mfaun ii kah een! Atoin ein anmesen kuuk, of oni' tuaf nifu niim.
11 Rarit Nai' Yesus nait utuun ein naan, onaim In ntoit makasi neu Uisneno. Rarit In nbait neu In atoup noin' ein. Onaim sin nbatin neun too mfaun ein naan. In nmoe' huma' mese' nok iik' ein naan amsa'. Sin ok-oke' nbukaen tar namsenan.
12 Oras sin nbukaen nrarin tar antea namsenan, Nai' Yesus anreun In atoup noin' ein am nak, “Ambubun maan amnaah neisf ein, he kais namre'un ruum am parsuum.” 13 Rarit sin nbubun nafani' mnaah neisf ein naan na'ko utunu' fua' niim, narai sin nahenun nbin a'kora' bo'es am nua.
14 Oras too mfaun ein ankius rais sanmakat re' Nai' Yesus anmoo' je naan ate, sin na'uab ein am nak, “Amoo! In re' ia mafefa kninu' re' Uisneno nba'an he nreek Ee neem.” 15 Nai' Yesus nahiin nak, too mfaun ein naan he na'seek Ee he njair usif. Rarit In nfeen annao, onaim In ansae na'roo nteni' anbi 'toe' aan es, he In bisa nmees kuun anbi naan.
Usif Yesus annao nbi oe je fafon
16 Oras maans ee fe'e nmouf, Nai' Yesus In atoup noin' ein annaon neikin nsanun neun nefo. 17 Nai' Yesus ka neem fa fe', he nabua nok sin. Rarit sin nsaen nbin koof es, onaim anmurain nfo'en neun kota Kapernaum et neof gwe panin. Oras sin anmurai nfo'en on naan ate, anmeis'ook een. 18 Onaim okin anbi nefo naan anmurai npesan neu-mneem, natuin ain ko'u gwe nfuu. 19 Oras Nai' Yesus In atoup noin' ein anfo'en naan, sin oni' nfo'en naan kiru niim een, sin nkius niit Ee nnao neem anbi oe je fafon. In neem anpaumak-maak anbi sin kofa', onaim sin namtaun nmaten. 20 Mes Nai' Yesus na'uab neu sin im nak, “Hoe! Kais mimtau! Au es re' ia.” 21 Nok ranan naan, sin ka namtaun fa gwen. Sin nromin he In nsae neu kofa' nabu-bua nok sin. Sin ka nakeo nanan fa te, kofa' naan antea nrair bare re' sin nsari.
Too mfaun ein nam-naim Usif Yesus
22-24 Noka' on naan ate, too mfaun ein naan anbin neof gwe panin fe'. Sin npaumak-makan nok bare re' Nai' Yesus antoit makasi neu Uisneno, rarit antuthae bukaet neu sin. Sin nahinin am nak, afi naa suma nmui' kofa' mees' aah. Mes Nai' Yesus In atoup noin' ein anpaek kofa' naan he nasaitan bare naan. Ma Nai' Yesus ka nsae fa kofa' naan he nnao nabu-bua nok In atoup noin' ein.
Mes anmui' kofa' bian na'ko kota Tiberias re' neu-mneman nbin bare naan. Rarit oras too mfaun ein nahinin nak, Nai' Yesus nok In atoup noin' ein ka nbin fa naan antein, onaim sin nsaen kofa' bian, he nnao naim Nai' Yesus anbi Kapernaum, anbi neof gwe panin.
Usif Yesus on re' Utunu' re' neiki 'honis
25 Rarit sin nateef Nai' Yesus anbi neof gwe panin. Sin nataan Ee mnak, “Aam Tungguru! Ho mtea ia, es reek ii, tua?”
26 Nai' Yesus nataah am nak, “Amneon ii, on nai: hi ka maim Kau fa natuin hi mkius rais sanmaakt ein. Mes hi maim Kau, natuin Au 'tuthae bukaet 'eu ki, tar hi mimseen. 27 Amneen mirek-reko'! Kais suma mmeup he mipein amnahat re' of anpai ma npuun. Reko nneis hi mmeup he mipeni mnahat re' ntahan piut, re' neiki 'monit amneot ma amnonot re' ka natfeek niit fa. Fin Au re' ia, Mansian Batuur-Batuur. Au es re' bisa 'fee 'monit naan 'eu ki. Fin Ama' abit sonaf neno tunan es re' annona' ma nfee nrair hak naan neu Kau.”
28 Onaim sin nataan am nak, “Karu on naan ate, hai ro he mmoe' on mee, he hai bisa minaob Uisneno In meup gwi, tua?”
29 Nai' Yesus nataah am nak, “Uisneno In meup goan, on nai: hi ro he mpirsai Kau. Fin Uisneno naan, es re' anreek haefan Kau.”
30 Rarit sin nataan antein' ein am nak, “Ama' Ho he mururu' rais sanmakat on mee, he hai bisa mkius, ma mpirsai meu Ko, tua? Onaim Ho he mmoe' saa' meu kai ntein? 31 On re' hit be'i-na'i sin anbukaen utunu' manna anbi baer ruman. Naan anjair on re' matu'i nbi Suur Akninu' Uisneno mnak, ‘In nfeen sin utunu' re' ansaun na'ko neon gwe tnanan, he sin anbukaen.’”b
32 Nai' Yesus nak, “Au utoon 'eu ki, re' batuurn ii, on nai: unu' te, ka ka'o Musa fa es nasanut utunu' naan na'ko neon gwe tnanan neu hi be'i-na'i sin. Fin Tuaf re' nasanut utunu' naan, Au Ama' abit sonaf neno tunan. Oras ia In nabarab ki utunu' msa' na'ko neon gwe tnanan. Mes utunu' re' ia, Utunu' re' batuur re' ntahan nabar-baar. 33 Fin Utunu' re' ia na'ko Uisneno, es re', Ansaun na'ko sonaf neno tunan ma neiki 'honis neu mansian pah-pinan ia.”
34 Rarit sin antotin am nak, “Usi'! Amfee utunu' naan neu kai piut, tua!”
35 Onaim Nai' Yesus na'uab neu sin im nak, “Au re' ia, es re' Utunu' naan. Fin Au es re' 'eiki 'monit re' batuur. Onaim tuaf re' ntaam anjair Au nggwin, ka namnaah antein' ein fa gwen! Ma tuaf re' npirsai Kau, ka nmeno ntein' ein fa gwen!
36 Mes au utoon 'iit ki m'ak, namneo, maski hi miit Kau gwen, mes hi ka mpirsai Kau fa msa'. 37 Te kaah, mansian ein sin aar sin re' Au Ama' npiir sin he njarin Au nggwin, sin of neman n'ain Kau. Ma karu nmui' tuaf neem an'ain Kau, ka neu fa he Au 'ri'u 'porin sin! 38 Fin Au 'saun 'uum u'ko neon gwe tnanan. Au 'uum he 'meup ma 'moe' utuin Au Ama' In romin, fin In es anreek haefan Kau. Au ka 'roim fa he 'meup ma 'moe' utuin Au roimk aa kuuk. 39 Ma In romin on nai: na'ko mansian ein re' sin aar sin re' In npiir sin he njarin Au nggwin, In roim he Au 'bubun 'aan sin ok-oke'. Ka nabei' fa he 'konan tuaf es he namneuk. Mes anbi neon amsoput, Au ro he 'feen sin rasi 'monit anfain. 40 On re' Au u'uab fe'e na, Au Ama' nroim he mansian ein re' sin aar sin re' nahinin ma npirsain neun Kau, es re' In Anah re' ia, sin bisa napenin 'monit re' amneot ma amnonot re' nabar-baar. Rarit of anbi neon amsoput, Au umonib ufani' sin.”
41 Atoin Yahudis sin a'naet ma kaes kou'n ein anmurai na'muun Ee, natuin In nak, “Utunu' na'ko Uisneno naan, es re' Au, re' a'saun 'uum u'ko sonaf neno tunan.”
42 Sin na'uab ein am nak, “On mee es re' ia? Atoni' re' ia, es re' Nai' Yesus, nai' Yusuf in aanh aa, ai'? Hai mihiin In ainaf-amaf sin. Onaim on mee m'es oras ia In nak, ‘Au 'saun 'uum u'ko sonaf neno tunan’? Tapein je na'ko mee?”
43 Nai' Yesus nakain sin im nak, “Hoe! Misnasab hi uab a'munu' naan! 44 Au Ama' abit sonaf neno tunan es re' anreek haefan Kau 'uum 'eu ia. Ka nmui' fa tuaf re' bisa neem neu Kau, karu Au Ama' ka neem naat ee fa. Rarit of anbi neon amsoput, Au umonib ufani' sin. 45 Uisneno In mafefa kniun' ein un-unu' sin antui nitan am nak, ‘Uisneno he nanoni' mansian ein ok-oke'.’ Mansian ein aar sin re' nneen neu Ama' abit sonaf neno tunan, ma nanoin ein na'ko Na, sin neman neun Kau he njarin Au nggwin.c 46 Au re' ia, es re' a'saun 'uum u'ko Uisneno. Onaim suma Au kuuk es re' a'kius 'iit Uisneno. Ka tiit fa tuaf bian re' nkius niit kuun Au Ama' abit sonaf neno tunan.
47 Batuur! Au utoon 'ain ki msa'! Atoni' re' npirsai Kau of napeni 'monit re' amneot ma amnonot re' ka natfeek niit fa. 48 Fin Au re' ia, es re' Utunu' re' neiki 'monit naan. 49 Unu' te, hi be'i-na'i sin anbukaen utunu' manna oras annaon nfuun am nateef anbin baer ruman. Maski sin nbukaen utunu' naan, mes a'roo-'roo te sin nmaten amsa'. 50 Mes Utunu' re' nsaun na'ko sonaf neno tunan oras ia, 'teta'! Fin mansian ein aar sin bole nbukaen. In sairt ii nak, mansian ein re' sin aar sin npirsain neun Kau, ka napasib sin fa na'kon Uisneno ntein. 51 Fin Au re' ia, es re' Utunu' re' neiki 'monit, re' ansaun neem na'ko sonaf neno tunan. Rarit oras Au 'maet, Au 'fee ma 'nona' Au aok ii he mansian ein aar sin re' abitan pah-pinan ia bisa nmonin. Onaim tuaf re' nbukae na'ko Utunu' naan, sin napenin 'monit re' amneot ma amnonot re' ka natfeek niit fa.”
52 Annenan on naan ate, atoin Yahudis sin a'naet ein anmurain nmatoen es nok es am nak, “In na'uab saa' es re' nee? On mee m'es Atoni' ia bisa nfee In aon ee he hit teuk gwe?”
53 Onaim Nai' Yesus natonan sin im nak, “Au u'uab namneo gwah. Au 'ak on nai: Au re' ia, Mansian Batuur-Batuur. Tuaf re' nroim he nmoin namneo ma namnoon, ro he nmafuut nok Kau. Onaim karu hi ka mbukae fa Au aok, ma ka miun fa Au naa', ka tiit fa 'monit re' amneot ma amnonot neu ki.d 54 Fin tuaf re' nbukae Au aok, ma niun Au naa', napein inrair 'monit re' amneot ma amnonot re' nabar-baar. Of anbi neon amsoput, Au umonib ufain' ee. 55 Fin bukaet re' batuur, es re' Au aok. Ma mninut re' batuur, es re' Au naa'. 56 Onaim tuaf re' nbukae Au aok, ma niun Au naa' naan, anmoni nmafuut nok Kau. Ma Au 'mafuut 'ok ne msa'. 57 Au Ama' abit sonaf neno tunan re' nreek haefan Kau naan, In nmoin batuur-batuur. Ma Au upein 'monit re' batuur na'ko Na msa'. Es naan ate, tuaf re' nbukae Au aok, in of napeni 'monit re' batuur amsa' na'ko Kau. 58 Unu' te, hi be'i-na'i sin nbukaen utunu' manna naan re' nsaun neem na'ko neon gwe tnanan. Maski sin nbukaen utunu' naan, mes a'roo-'roo te, sin nmaten amsa'. Mes Utunu' re' nsaun neem na'ko sonaf neno tunan oras ia, 'teta'. Fin tuaf re' nbukae Utunu' re' ia, of napeni 'monit re' batuur.”
59 Nai' Yesus nanoni' rasin re' ia anbi atoin Yahudis sin uim onen es anbi kota Kapernaum.
Too mfaun ein antet-kotin na'kon Usif Yesus
60 Anmui' too mfaun re' natuin Nai' Yesus. Oras sin nnenan In nanoni' on naan ate, anmui' tuaf re' na'uab am nak, “In noni' naan, ma'fena'! Sekau es re' bisa ntoup noni' naan?”
61 Mes Nai' Yesus nahiin nak, sin nmatoen on naan, onaim In nataan am nak, “Noni' ia nasusab ki, oo? 62 Oras hi mkisu mtein Kau, Mansian Batuur-Batuur re' ia, 'sae 'fain 'eu nee, 'eu Au barak unu' naan. Hi of mak on mee?
63 Uisneno In Asmaan ee es re' neiki 'monit re' amneot ma amnonot. Atoni' in aon ee ka bisa fa neiki 'monit re' amneot ma amnonot. Mes Au noin' ein naan na'uun ma na'ba'an anbin Uisneno In Asmanan. Onaim noin' ein naan amsa' neikin a'monit re' amneot ma amnonot neu sin. 64 Mes anmui' tuaf bian na'ko ki re' ka npirsai Kau fa.”
Nai' Yesus na'uab on naan, natuin In nahiin anrair na'ko un-unu', sekau es re' ka npirsai Je fa, ma sekau es re' he na'soos Ee. 65 Rarit In na'uab antein am nak, “Es naan ate, Au utoon a'rair ki m'ak, Au Ama' abit sonaf neno tunan ro he nfei ranan neu tuaf-tuaf fe', na' sin bisa ntaman njarin Au nggwin.”
66 Anmurai oras naan, anmui' tuaf amfaun na'ko In atoup noin' ein antet-kotin na'ko Na, fin sin ka nromin fa he natuin Ee ntein. 67 Rarit Nai' Yesus nataan In atoup noin' ein re' tuaf bo'es am nua' ein naan am nak, “Hi on mee? Hi he mtet-koit mi'ko Kau msa', aa oo?”
68 Mes nai' Simon Petrus nataah am nak, “Usi'! Hai he mnao meu sekau mtein? Ka nmui' fa tuaf bian antein re' bisa natoon kai, on mee he hai bisa mipeni 'monit re' amneot ma amnonot re' nabar-baar. Suma Ho kuum, tua! 69 Ma hai mpirsai Ko, tua. Fin hai mihini mrair mak, Ho es re' Uisneno In Tuaf Akninu' naan, tua.”e
70 Nai' Yesus natoon neu sin im nak, “Au 'piir 'aan ki tuaf bo'es am nua. Mes mimnau! Anmui' tuaf es na'ko ki on re' niut re'uf!” 71 In sairt ii, es re' nai' Judas, nai' Simon Iskariot in anah. Nai' Judas re' naan, tuaf es na'ko In atoup noin' ein tuaf bo'es am nua re' naan. In re' naan, es re' he na'sosa' Nai' Yesus.