Usif Yesus nareko' atoni' re' niut reu'f ein ansaen ee
5
Rarit Nai' Yesus nok In atoup noin' ein antean nefo Galilea in panin, anbi baer jes re' anteek ee te, nak Gerasa.
Nai' Markus 5:1-20
2-6 Anbi naan, anmui' naan atoin es anniut sae tar in namaun. In natua nbi faut naetf ein. Fai-manas in na'oin neu-mneem nok ao afa' nkoon anbi are' knete' ma 'noonf ein, ma nhunun ka natfeek fa. In ntuut napapa' in aon neik fatu. In ma'tain re'uf. Ka tiit fa es, re' bisa nfuut gwe, maski npaken korenit amsa'. Sin nfuut in haen-niman fani-fani npaken korenit, mes in nafeek koreent ein naan, ma niit besin naan in na'iup sin na'kon in haek ein. In ro ma'tain re'uf, tar antea ka tiit fa tuaf es, re' bisa ntahan naan ee.
Oras Nai' Yesus sin ansanun na'kon kofa', aniut saes naan niit sin na'ko a'roo. In npoi na'ko faut naetf ein, ma in naen an'ain Nai' Yesus ma nri'tuu nbi In matan. 7-8 Oras Nai' Yesus niit atoni' naan ate, In na'uab am nak, “Hoi! Niut re'uf! Ampoi nai mu'ko atoni' ia!”
Rarit atoni' naan anhunun naher-heer am nak, “Hoi! Ho he munsaa' kau? Au uhiin 'ak Ho re' ia Nai' Yesus, Uisneno Akuasat In Anah. Au 'toit Ko he Ho kaisa' mha'mui' kau, joo!”
9 Rarit Nai' Yesus nataan ee mnak, “Ho kaanm ii sekau?”
In nataah am nak, “Au kaank ii nai' Legion, natuin hai mfau re'uf, on re' sorarus batalion-batalion ein!”
10 Niut reu'f ein anpaek atoni' naan he ntoit Nai' Yesus he kaisa' nreun sin he npoin na'kon bare naan.
11 Anhaumaak bare naan, atoni' fauk antitun fafi pukan kou' gwes. Fafin re' naan sin of oni' nifun nua. Sin namin amnahat anbin a'to'ef naan in abnapan. 12 Rarit niut reu'f ein antotin am nak, “Amreun kai he hai mnao mtaam meu fafin nee, tua.”
13 Nai' Yesus antoup sin haan totis naan. Es naan ate, are' niut reu'f ein naan anpoin ma antaman neun fafin naan. Fafi pukan naan, naen ansiksakn ok, ma nasroro nsanun npe'on aisanut ma nmoufun ntean niuf gwe nanan. Ma sin nreem anmaten ok-oke'.
14 Ankius nitan on naan ate, atiut faifn ein namtaun nmaten. Sin naenan nfuun am natefan kuan-kuan mapaumaak ein, ma natonan are' too mfaun ein. Es naan ate, too mfaun ein anpoi neman he nkius nitan kuuk saa' re' anjarin nrair anbi naan. 15 Sin neem natefan nok Nai' Yesus, ma sin niit atoin aniut saes naan antook anbi naan. Mes in teenb ee nareko nrair, ma in anpaek tais. Ma oras sin niit rasi naan sin aar sin namtaun, fin sin nahinin nak sekau es re' nabei' he nriu' napoitan niut reu'f ein na'kon atoni' naan, ro in atoin ma'tain re'uf. 16 Rarit sin aar sin anmaktoon ein nak sin niit nok sin maatk ein nak, atoin aniut saes naan nareko nrair, ma faifn ein anreman nmaten. 17 Rarit sin ntotin teb-tebe he Nai' Yesus annao nasaitan sin pah.
18 Oras Nai' Yesus he nsae nfain neu kofa' naan ate, atoin aniut saes re' nareko nrair naan neem ma ntoit he in bisa nnao nabua nok Nai' Yesus.
19 Mes Nai' Yesus anpeen. In na'uab neu atoni' naan am nak, “Reko nneis ho mfain nai meu ho noont ein. Mutoon meu sin are' kanan rasi re' Uisneno nmo'e nrair sin neu ko. Mutoon meu sin am mak, Uisneno nneek ma nkasian ko!”
20 Rarit atoni' naan annao nfuun am nateef pah es nok nain in koat ein bo'es, re' anteek ee te, nak ‘Dekapolis’. In nsaksii ma natoon are' kanan rasi re' Nai' Yesus anmoe' nrair sin neu ne. Ma are' tuaf-tuaf re' anneen in uaban naan ansanmakan ma na'uab ein nak, “Ro ma'tani', oo!”
Usif Yesus namonib nafani' nai' Yairus in aan feto. Ma bifee ameen naa' anreo' Usif Yesus In baru mnanu'
21 Rarit Nai' Yesus sin ansaen kofa' ma anraak anfanin neun neof gwe in panin. Oras sin ansanun na'ko kofa' naan, too mfaun ein neman ma nauban naan Ee.
Nai' Markus 5:21-43
22 Anbi kota naan, anmui' naan atoin es, in kaann ee nai' Yairus. In es re' a'nakat anbi uim onen kota naan. Oras in niit Nai' Yesus, in nri'tuu nbi Nai' Yesus In matan, 23 ma ntoot Je mnak, “Koi, Aam! Au aan feot gwe fe' toon bo'es am nua. In nameen ma he noi nmaet jen. Ho mkoen Om uum he mturun mureko' maan au anah naan, tua!”a
24 Onaim Nai' Yesus annao natuin nai' Yairus neu in umi.
Oras sin annaon on naan ate, too mfaun ein nokan ma anbeu' Gwe.
25 Anbi too mfaun ein naan, anmui' bifee jes re' napein funan re' nroni kre'o-kre'o ka natfeek niit fa oni' toon bo'es am nua gwen. 26 In narair roit nok in a'mui'k ein he nbaen areko' meens ein. Mes ka tiit fa tuaf es bisa nareko' in menas naan. In naa' ii ka nheut niit fa, tar in menas naan ma'fena'. 27-29 Bifee naan anneen fani-fani anmatoom nok Nai' Yesus. Es naan ate, in nbeu' too mfaun ein naan, he npaumak-maak anbi Nai' Yesus In kotin. In natenab am nak, “Asar au 'reo' 'aan ahaa In baru mnanu', au of ureok.”
Oras in nreo' Nai' Yesus In baur gwe te, nok askeken, naa' naan anheut. In nnaben ate in nareok gwen.
30 Nateef oras naan amsa', Nai' Yesus annaben ate anmui' nenuf re' anpoi na'ko In tuan. Es naan ate, In nabani' ma nkius neu too mfaun ein naan. Rarit In nataan sin am nak, “Sekau es re' anreo' Au baru?”
31 In atoup noin' ein natahan am nak, “Ho mkius Kuum. Too mfaun sin anmabe'un es nok es ate, Ho mutaan am mak, ‘Sekau es re' anreo' Au baru?’”
32 Nai' Yesus ankius sin mese'-mese' he naim tuaf re' anreo' In baur gwe. 33 Anneen Nai' Yesus nataan on naan ate, bifee re' naan namtau ma na'ta'i. Rarit in nri'tuu nbi Nai' Yesus In human ma In matan, ma nmanaku' mnak, “Koi, Aam! Au es re' a'reo' ho baru naan, tua.”
34 Ma Nai' Yesus antoin bifee naan am nak, “Ain! Natuin ho nekam na'teeb batuur neu Kau, es naan ate ho mureok. Ho mfain nai nok neek marinet, fin ho susat naan namsoup gwen.”
35 Oras Nai' Yesus na'uab fe' on naan ate, tuaf neman na'kon nai' Yairus in umi, ma natoon am nak, “Eee, kasian! Ho aan feot gwe, ain ee oek' ein, tua. Kaisa' muhaeba' Uis tungguru mtein!”
36 Mes Nai' Yesus ka nfairoir fa tuaf naan in uaban. Onaim In na'uab neu nai' Yairus am nak, “Kais mumtau! Ampirsai meu Uisneno!” 37 Rarit Nai' Yesus anreun too mfaun ein ok-oke' he namaik antaahn ein nbin naan. Mes In nok ahaa nai' Petrus, nai' Yakobus ma in orif nai' Yohanis, he sin annaon nkonon. 38 Oras sin antean nai' Yairus in umi, sin niit too mfaun an'uurs ein biru ma tainaunus huma'-huma', bian ankaen, ma bian nainin. 39 Nai' Yesus antaam anbi naan. In nataan sin am nak, “Nansaa' am es hi mtaisiub ma mkae on re' ia? Ri'ana' re' ia ka nmaet fa. In suma ntuup kuun.”
40 Oras sin neen Nai' Yesus na'uab on naan ate, sin nmanin nfaer Ee.
Rarit In nreun sin he npoin ok-oke'. In no'en ri'ana' naan in ainaf-amaf, ma nok In atoup noni' tuaf teun, rarit sin aar sin antaman anbin ri'ana' naan in ke'en. 41 Onaim Nai' Yesus annaa' ri'ana' naan in a'niman, rarit In npaek sin uab Aram am nak, “Talita kum!” (Re' neik hit uab ii te nak, “Aan feto! Amfeen nai!”)
42-43 Nok askeken ate, ri'aan feto naan anfeen ma anmurai annao. Nai' Yesus anreek aan feto naan in ainf ee nak, “Amfee ne he naah!”
Are' too mfaun ein re' niit rasi naan ansanmakan. Mes Nai' Yesus antaar sin nok haan ma'tani' mnak, “Kaisa' mitonan es-es mak Au umonib ufani' ri'aan feot amates re' ia!”