Nai' Yesus antuthae atoni' nifun haa
8
1-3 Neot es ate, anmui' too mfaun neem nabuan he nneen Nai' Yesus In uaban. Sin natuin Ee tar antea neno teun gwen. Onaim sin nararin beti'. Rarit Nai' Yesus no'en In atoup noin' ein am nak, “Au 'kasian too mfaun ein ia. Bian neman na'ko bare 'roo, ma nabuan nok kit neno teun gwen, tar antea sin nararin beti'. Reko nneis sin kais annaon nfanin nok tai ruman. Kais-kaisa' sin ntuamafun anbin raan atnana'.”
Nai' Markus 8:1-21
4 Nai' Yesus In atoup noin' ein nataahn am nak, “Aam! Bare ia na'roo na'ko kuan. Onaim hit ka neu fa he ntuthae taan too mfaun ein re' ia!”
5 Nai' Yesus nataan sin am nak, “Hi mmui' utunu' fua' fauk?”
Sin natahan am nak, “Hai mmu'i haa utunu' fua' hiut, tua.”
6 Rarit Nai' Yesus anreun too mfaun ein naan he ntokon anbin afu. Rarit In nait utunu' fua' hiut ein re' naan, ma ntoit makasi neu Uisneno. Rarit In anteib sin pisa'-pisa', ma nfee sin neu In atoup noin' ein. Sin nnaon ma nbatin neun too mfaun ein ok-oke'. 7 Ma sin napenin ika' fak-fauk amsa'. Rarit Nai' Yesus antoit makasi nteni' neu Uisneno anmatoom nok iik' ein naan. Rarit In nreun In atoup noin' ein, he nnaon nbatin nteni' neu too mfaun ein. 8-9 Sin aar sin ok-oke' of oni' atoni' nifun haa. Sin nbukaen tar namsenan. Nbukaen nrarin on naan ate, atoup noin' ein nabuab amnaah neisf ein naheun 'poni hiut. Rarit Nai' Yesus anreek sin he nfanin ok-oke'. 10 Ma oras sin nnaon nfanin on naan ate, Nai' Yesus nok In atoup noin' ein ansaen neu kofa', ma nnaon nabnonon npe'on nefo naan in ninin, neun baer jes, kaann ee Dalmanuta.
Atoin Farisis sin namin ranan he namouf Usif Yesus
11 Oras Nai' Yesus sin antean Dalmanuta, anmui' tuaf na'ko partei pirsait Farisi neman ma natefan nok Ne he nman'iis ein penit. Sin nataan na'kee't Ee, ma sin ntoot Je mnak, “Aam! Mukrira' rais sanmakat he anjari 'tope' re' mamnita' nak, Ho mupein Ho ma'tanim mu'ko Uisneno.”a
12 Nai' Yesus anheer In asnasan, onaim In nak, “Karu Au 'neen hi uab ein naan, Au 'mei' jok! Nansaa' am es hi mtoit rais sanmakat? Kais on naan! Rais sanmakat ro nmu'i msa', mes Au ka 'mo'e 'fee ki fa.”b
13 Rarit Nai' Yesus annao nasaitan sin, ma ansae nfanin nbi kofa' nabua nok In atoup noin' ein. Ma sin nrakan neun nefo naan in panin.
Usif Yesus nanoni' nak, ampanat mirek-reko' atoin Farisis sin rais makopo'
14 Oras Nai' Yesus sin antean nefo naan in atnanan, na' atoup noin' ein namnaun nak, sin nnikan nanin nak, sin ka neik ein fa beti'. Suma sin neik utunu' fua' mese'. 15 Anneen sin na'uab ein anteek utunu' on naan ate, Nai' Yesus nak sin am nak, “Hi ro he mpanat mirek-reko'! Kais hi mtoe mituin usif Herodes ma atoin Farisis sin rais makopo' amre'ut. Sin rais kopo' naan, nahuum on re' muur ii ankumu nseor gwe nok uut, he uut naan nasraat ansae.”c
16 Anneen In na'uab on naan ate, In atoup noin' ein antaka'naan ein. Ma sin na'uab ein nak, “A'naef ee na'uab rais saa'? Of oni' In na'uab on naan, natuin hit ka teik fa utunu'.”
17 Mes Nai' Yesus nahiin sin neek tenab. Es naan ate, In na'uab am nak, “Nansaa' am es hi mi'uab ahaa utunu'? Hi ka mheek maan fa Au sairt ii, oo? Hi roenm ein ro nbufun nmaten! 18 Hi miit amrair meik hi maatm ein, mes hi ka mihiin fa in a'moufun! On re' hi ka miit miit fa fe'! Hi mneen meik hi ruikm ein, mes hi ka mihiin fa saa'-saa'. On re' hi ka mneen miit fa msa'! Hi mnikan maind 19 utunu' fua' niim re' Au 'teib sin pisa'-pisa' ma 'tuthae too nifun niim, ai'? Neno naan hi mibuab maan utuun anesit 'kora' fauk?”
Sin natahan am nak, “'Kora' bo'es am nua, tua.”
20 Nai' Yesus nataan anteni' sin am nak, “Hi mimnau, ai' kaah, neon gwes ii, oras Au 'tebi 'bait utunu' ma 'tuthae too nifun haa? Hi mibuab maan utuun neisf ein naan 'poni fauk?”
Sin natahan am nak, “'Poni hiut, tua!”
21 Onaim Nai' Yesus nak, “Namneo! Hi miit nok hi matam. Mes nansaa' am es hi ka mihiin fa, Au ma'taink ii in amneemn ii na'ko mee?”
Usif Yesus nareko' aforot tuaf es anbi Betsaida
22 Rarit Nai' Yesus sin antean kuan Betsaida. Anbi naan, anmui' tuaf neik atoin aforot es neu Nai' Yesus. Sin ntoot Je he nreo' nareko' atoin aforot naan.
Nai' Markus 8:22-38
23 Onaim Nai' Yesus annaa' atoni' naan in a'niman ma neik je npoi neu kuan ee in kotin. Rarit In npuran hape neu atoni' naan in matan, ma In nreo' gwe. In nataan am nak, “On mee? Ho bisa miit, ai' kaah?”
24 Atoni' naan na'aiti in matan, ma nkius a'rii-'ne'u, ma in nataah am nak, “Tua! Au 'iit mansian ein anbaknaon ein. Mes huumn ee on re' au 'iit hau nggwin esan re' anaot ein!”
25 Ma Nai' Yesus antao nteni' In a'niman neu atoni' naan in matan. Ma atoni' naan ankius naher-heer anteni', ma in nahiin nak in niit reok gwen. Oras ia in bisa niit nok akninu'. 26 Rarit Nai' Yesus anreun atoni' naan he nnao nfain, ma namnaub ee mnak, “Ho mfain nai, mes amnao mutuin raan 'teta'! Kaisa' amnao mfain meu Betsaida.”
Nai' Petrus anmanaku' nak, Usif Yesus naan Kristus, Tuaf re' Uisneno anruur nain Je na'ko unu'
27 Rarit Nai' Yesus sin annaon nfuun am natefan kuan-kuan anbin Kaisarea Filipi. Anbin raan atnana' te, Nai' Yesus nataan In atoup noin' ein am nak, “Karu tatuin too mfaun ein sin uabk ein, sin nak Au re' ia, sekau?”
28 Sin natahan am nak, “Bian sin nak ‘nai' Yohanis Asranit’. Bian sin nak, ‘ka'o Elia, mafefa kninu' Uisneno unu' naan’. Ma bian antein nak, Ho re' ia tuaf es na'ko Uisneno In mafefa kniun ahuunt ein.”e
29 Ma Nai' Yesus nataan anteni' neu sin nak, “Mes natuin hi mahiinm ein ite, Au re' ia, sekau?”
Nai' Petrus nataah am nak, “Ho re' ia Kristus, re' Uisneno anruur nain Je na'ko unu'.”f
30 Mes Nai' Yesus antaar sin mates nak, “Ka nabei' fa he hi mitonan sekau-sekau saa' re' nai' Petrus na'uab ee re' ia!”
Usif Yesus natoon In ma'ne'at ma In a'maten
31 Rarit Nai' Yesus anmurai na'uab neu In atoup noin' ein am nak, “Au re' ia, Mansian Batuur-Batuur Kau. Au of upein rais ha'mu'it amfaun, natuin a'naak haart ein, a'naak rais pirsait Yahudis sin a'naakt ein, ma tunggur agaam ein ok-oke' of antorak Kau. Sin of anroor niis Kau, mes nmeu te,g Au 'moni 'fain.”
32 Nai' Yesus natoon maat-maat on naan, onaim nai' Petrus anheer napaisb Ee, ma nakain Ee mnak, “Aam! Kaisa' mu'uab on naan! Au ka neu he 'konan sin fa, he nniman Ko.”
33 Mes nai' Petrus in uaban naan ka natuin fa Uisneno In romin. Es naan ate, Nai' Yesus nabani' ma nkius In atoup noni' bian ein. Rarit In nakaina' nai' Petrus nok haan ma'tani' mnak, “Hoe! Naan niut reu'f ein sin a'naak kou' gwe in uaban! Mu'roo mu'ko ia! Ho suma mutenab meik tenab mansian, mes tenab naan ka natuin fa Uisneno In romin!”
34 Rarit Nai' Yesus no'en too mfaun he neem nabuan nok In atoup noin' ein. Ma In nanoni' sin am nak, “Atoni' re' anroim he natuin Kau, ro in he naran ma natuin Kau neno-neno! In ro he nnikan nain in roimn ein kuun, ma natuin ahaa neu Uisneno In romin. Maski atoni' he nroor gwe msa', mes in natuin piut, on re' atoni' nasaah in hau nehe he nnao neu in bare 'maten.h 35 Fin atoni' re' anmoin arahaa neu in tuan, of in a'moin ii namneuk on ahaa re' naan! Mes atoni' re' nabarab in tuan he nmaet natuin in njair Au nggwin ma natoon Uisneno In raan a'honis, in of anmoin nabar-baar nok Uisneno.i 36 Amneen, oo! Karu ho mpaar pah-pinan ia in aafn ii oke', mes Uisneno antorak ko, ho mupein saa'? 37 Maski nak ho mroi meik pah-pinan in aafn ii oke' msa', mu'if naan ka neu he ntuik naan fa ho smaanm aan!
38 Mimnau! Mansian batan muni' ia, anmo'en re'uf huma'-huma'. Sin ka nfairoir fa he natuina' Uisneno. Es naan ate, sekau re' namaeb on he natuin Kau, ai' namaeb on he natuin Au noin' ein, Au of umaeb ok amsa' he 'manaku' in tuan a'bi Uisneno In human ma In matan. Fin Au, Mansian Batuur-Batuur re' ia, of Au 'fain 'uum u'ko neno tunan. Ma Uisneno In ameupt ein na'kon neno tunan of naub naan Kau. Oras hai msaun iim mi'ko sonaf neno tunan meik Ama' In pinan ma krahan, of mansian ii na' nahinin nak, amneon ii Au re' ia sekau.