Uisneno nreun nai' Abraham he nafuata' nai' Isak
22
Neot es ate, Uisneno nsuu' nai' Abraham, he nahiin nak in natniin Ee, ai' kaah. Rarit In nhaamn ee mnak, “Abraham!”Onaim in nataah am nak, “Au es ia, tua.”
2 Rarit Uisneno nreun gwe mnak, “Amneen murek-reko'! Mait ho aan moen mese' re' ho mneek miis ne naan. Meik je mnao meu pah Moria, he mout gwe njari fua'-turu' neu Kau. Amtea ne te, Au of na' ukrira' ko in baran et a'toe'f es.”
3 Anmeu nfini te, nai' Abraham ankeut hau meto'. Rarit anfuut sin, ma nasaeb sin anbin bikaes keledai. Rarit in nok nai' Isak, ma in ameput tuaf nua nnaon neu bare re' Uisneno nteek ee naan. 4 Sin nnaon neno nua gwen. Ma nmeu te, nai' Abraham napeen niit bare naan anbi 'roo. 5 Onaim in nak neu in tua ameup nua' ein naan am nak, “Hi nua ki mpao kai mbi ia, mok bikaes keledai nggwin! Au 'ok au anah ia, meiki-msae meu ne, he m'onen ma mi'bees meu Uisneno. Rarit of hai mfain iim meu ia.”
6 Rarit nai' Abraham nait hau meot ein naan, ma nasahab nai' Isak sin. Ma in nnaa' neik besi ma ai nuta' amsa'. Oras sin nua sin nnaon bu'-bua' ate, 7 nai' Isak nak in aamf ee mnak, “Aam!”
Rarit nai' Abraham nataah am nak, “Saa', Isak?”
Onait nai' Isak nataan am nak, “Aam, hit he totu 'turu'. Hit teik hau meto' nok ai. Mes a'bib-kase re' he ta'tuur ee ji, es mee?”
8 Nai' Abraham nataah am nak, “Isak! Uisneno of neikn On anfee In a'bib-kaes ana' he njari 'turu'.”
Onaim sin nua sin neiki nsaen piut. 9 Oras sin ntean bare re' Uisneno nakrira' nrair je naan, nai' Abraham anbaik fatu he nmoe' mei 'turu'. Rarit in n'ator hau meot ein anbin mei naan. Onaim in nfuut in aanh ee, natupa' natneenb ee nbi hau meot ein naan. 10 Onaim in nait besi he nroor in anah. 11 Mes nok askeken ate, UISNENO In ameput ankoa' na'ko neon gwe mnak, “Hoe! Abraham! Kaisa' fe'! Ampao kre'o fe'!”
In nataah am nak, “Nansaa', Usi'?”
12 Onait hanaf naan nak, “Kais amroor ri'ana' naan! Kais munsaa'-saa' ne! Oras ia Au uhiin namneo, 'ak ho ro batuur-batuur mutuin Uisneno In romin, es na' ho mubarab murair he mufuat ho aan moen mese' naan neu Ne.”
13 Rarit nai' Abraham niit a'bib-kaes keos gwes, re' in suunk ein na'heeb ok nbin hau aan es in taek ein. Rarit nai' Abraham nnao nheke 'bib-kase naan, ma nout gwe njari 'turu' neu Uisneno, nseka' in anah. 14 Onaim nai' Abraham nakanab bare naan Yehova Yire, (re' in a'moufn ii, ‘Uisneno of nabarab saa' re' hit tperluu’). Etun antea oras ia msa', biak ein na'uab ein am nak, “Anbi 'to'ef UISNENO naan, In of nabarab saa' re' hit tperluu.”
15 Rarit ameput Uisneno naan nkoa' ntein na'ko neon gwe mnak, 16 “UISNENO neikn On nak, ‘Au 'suup 'eik Au kanak, on nai: ho mubarab murair he mfee Kau ho aan fua mese' naan, he njari fua'-turu'. Es naan ate, 17 Au of a'fee tetus nathoe 'eu ko ma 'eu ho sufam-ka'um sin. Sin of anmasaot-baban piut, tar antea ka tsoi' tabei' sin fa, on re' kfuun ein et neno, ma snaen et tais je ninin. Ho anah-upuf sin of niis ma naprenat sin musun. 18 Na'ko ho sufam sin, too uuf-uuf nbin pah-pinan ia of napenin tetus-athoen, natuin ho munaoba' mrair Au prenat.’”
19 Rarit nai' Abraham ma nai' Isak nsanun nfanin ma natefan nok sin ameup nua' ein naan. Ma sin nfanin neun Beer Seba. Onaim sin natuan nbin naan.
Nai' Nahor in sufan-ka'un
20 Neot es, nai' Abraham anneen hanaf nak, in orif nai' Nahor fee bi Milka nahoni' ri'ana' mfaun. 21 Aan moen unu, kaann ee nai' Us. In oirf ee, nai' Bus. Rarit nai' Kemuer (re' njair amaf neu nai' Aram). 22 Rarit nai' Keset, nai' Haso, nai' Pirdas, nai' Jitlaf, ma nai' Betuel. 23 Nai' Betuel naan, bi Ripka in amaf. 24 Mes nai' Nahor nahoni' antein ri'aan nasi na'ko bifee jes, in kaann ee, bi Reuma. In nahoni' nai' Teba, nai' Gaham, nai' Tahas, ma nai' Ma'aka.