Ain Sara' nasaeb on, ma aam Abraham ansuub ee
23
1-2 Ain Sara' nmaet oras in nmoin naan toon nautn es bo' nua mhiut (127). Oras in nmate te, sin natuan nbin kuan Kiryat-Arba (es re' Hebron), et pah Kana'an. Nai' Abraham ankae nsim-simak. Sin nbe'en amsa'.3 Rarit nai' Abraham nnao nateef nok atoin Hetes sin. In na'uab am nak, 4 “Au re' ia suma atoin anao-amnemat. Au ka 'mui' fa bare he 'suub au fee ji. Onaim karu hi mromi te, hi mi'sosa' maan kau afu piis es, he au 'suub au fee je nbi naan.”
5 Sin natahan am nak, 6 “On nai, aam! A'roo-'roo re' ia, hai maan ko mjair atoni mnasi'. Hai mhormaat ko batuur-batuur, tua. Onaim ho mpiir kuum, bare mee es re' reko nneis, re' nmatoom nok ho romim. Hai mroim mituin ahaa ho roim maan, tua.”
7 Rarit nai' Abraham anfeen anhaek ma na'besan auf tuaf ein atoin Hetes sin naan. 8 Rarit in nak, “Karu hi mtoup au haan totis fe'e na te, au 'toit he hi mturun kau he mi'uab mok aam Sohar in aan mone nai' Efron. 9 Amtoit miit, he karu reko te, in na'sosa' kau in nua fatu Makpera, re' et in poo'n ee ninin. In ntoit fak-fauk aah, au 'baen. Au he 'baen ufeek in osan naan anbi hi matam, he njair au pusaak. Au he ubaarb ee he njair hai baer subat.”
10 Oras naan, nai' Efron nok antoko nbi atoin Hetes sin naan. In neikn on anneen nai' Abraham in haan totis naan. Rarit in nhaek ma nataah nai' Abraham anbi atoni mnais ein sin maatk ein am nak, 11 “Kais on naan, aam! On nai. Au 'fee ko po'on naan ruum-ruum aah, nok nain in nuat Makpera naan. Aam, ho msuub ho fee je nbi naan. Au 'nona' afu naan 'bi au atoni mnais ein sin maatk ein. Maut he sin njarin saksii.”
12 Rarit nai' Abraham na'bees antein neu atoin Hetes sin. 13 Onaim in na'uab nok nai' Efron am nak, “On re' naan amsa' reko, mes hi ar-arki mneen miit au haan totis ia fe'. Au he 'soos ufeek afu naan, maut he au 'suub au nggwin nbin naan.”
14-15 Rarit nai' Efron nataah am nak, “Afu naan in oosn ii, suma roi muti' natun haa gwah. Hit he tmatabar osaf naan he saa'? In oosn ii ka manenu' fa. Amnao meik ho fee je he msuub ee nai.”
16 Nai' Abraham nroim natuin osaf naan, on re' nai' Efron na'uab. Onaim nai' Abraham nsoi' roi muti' fua' natun haa, rarit annona' sin neu nai' Efron, anbi atoin Hetes sin maatk ein he sin ok-oke' njarin saksii.
17-19 Es naan ate, nai' Abraham anpaar nai' Efron in afu, njair in pusaak. Es re' afu et Makpera, npaumaak kuan Mamre (es re' Hebron). In nsoos nafeek afu naan nok nain in po'on, in nuat, ma in hau kou'n ee ok-oke'. Atoni mnasi' Hetes sin ok-oke' njarin saksii nak, afu naan nok nain saa'-saa' re' nbi nain naan, nai' Abraham in npaar sin ok-oke'.