Ain Sara' nahoni' nai' Isak
21
1-7 Rarit UISNENO nateaba' neu ain Sara' saa' re' In nba'an anrair je. Nai' Abraham namnais jen, mes ain Sara' na'apu'. Oras in he nahoni', nai' Abraham anmoin naan toon nautn es (100). Antea in oors ate, in nahoni' ri'aan moen jes. Rarit nai' Abraham nakanab ri'ana' naan, nai' Isak (re' in a'moufn ii ‘in main’).Rarit ain Sara' na'uab am nak, “Uisneno nmoe' kau he 'main, natuin oras ia au 'mariin. Biak ein nateenb ein, au ka neu he uhoni' fa 'bi oras au umnais on re' ia. Te kaah, amneon ii, maski au moen je namnais re'-reu'f een, mes au fe' uhoni' 'aan ne ri'aan es. Onaim oras ia, sekau-sekau re' anneen rasi ia te, sin of anmanin on re' au msa'.”
Oras in nmoin naan neno faun, nai' Abraham na'heri' nai' Isak, natuin Uisneno In aprenat.
Sin nriu' ain Hagar am in anah nai' Isma'el
8 Rarit nai' Isak na'nae. Oras sin he nsoer je te, amaf nai' Abraham nmoe' fesat ko'u.
9-10 Neot es, ain Sara' nkius niit nai' Abraham in fee muni' ain Hagar in anah nai' Isma'el anmabuir nok nai' Isak. Onaim ain Sara' na'uab neu in moen je mnak, “Amriu' mupoitan ate na'ko Masir naan nok in anah! Natuin au ka 'roim fa he aet je in aanh ee napein pusaak saa'-saa'. Maut he au anah nai' Isak anmees es re' anpaar nain pusaak ein oke'.”
11 Anneen ain Sara' in uaban naan ate, nai' Abraham nnaben ate ka reko fa, natuin nai' Isma'el naan, in aanh aa msa'. 12 Mes Uisneno na'uab neu nai' Abraham am nak, “Abraham! Ho kais mutenab ho fee muin aan nok in aanh aan. Mutuin ain Sara' in roim naan. Natuin Au 'ba'an a'rair 'ak ho of musuuf mu'ko nai' Isak. 13 Mes Au 'fee tetus amsa' 'eu ho fee muni' naan in anah. Natuin in ho sisim ho naam amsa'. In suufk ein of anjarin uuf es.”
14 Noka' kik-kiku on naan ate, nai' Abraham nabarab oe-beti' neu ain Hagar, ma nasniinb ee oe nbi baer es, re' anmoo' je na'ko pasu. Rarit in nafetin bifee naan ma in anah he nnaon nmesen. Rarit sin nnaon nfuun baer ruman anpaumaak Beer Seba.a
15 Oras sin oe mniun ee oke' te, ain Hagar nasaitan ri'ana' naan anbi hau aan es in mafon. 16 Onaim in natenab am nak, “Karu in natfeek am au 'hak-hake te, au neek ii nsuus anmaet.” Rarit in ntet-koit, ma nnao ntook seor na'roo na'ko ri'ana' naan of oni' meter bo' niim. Rarit in nkae nme'-me'ur.
17 Uisneno nneen nai' Isma'el ankae msa', rarit In ameupt es neem na'ko sonaf neno tunan, ma nhaman ain Hagar am nak, “Hagar! Nansaa' am es ho msuus on re' naan? Kais mumtau, Uisneno nneen anrair ho aanh ee in kaet. 18 Oras ia, mfeen ma mnao mkius ri'ana' naan. Amhaan mau gwe ma mha'tain in nekan, natuin Au of a'moe' in sufan sin anjarin too uuf ma'tain es.”
19 Rarit Uisneno nfei ain Hagar in maatk ein, ma in niit oe maat es anbi naan. Onaim in neik baer oe, ma nnao nakain oe, rarit in neik je ma na'inu' ri'ana' naan.
20-21 Onaim nai' Isma'el nok in ainaf natuan nbin baer ruman Paran. Na'ko neno neu neno, in na'nae, ma in njair atoin akrao reok gwes. Rarit in ainf ee nasaob ee nok bifee muinf es na'ko pah Masir. Rasin ia njarin, natuin Uisneno nok nai' Isma'el.
Nai' Abraham ma usif Abimerek anmaraem ein nbin Beer Seba
22 Oras naan, usif Abimerek, nok in meo pae' makenat, nai' Fikor, neman ma natefan nok nai' Abraham. Usif naan na'uab am nak, “Abraham! Hai mihiin mak Uisneno nok ko. Etun ho mmoe' saa'-saa' aah, ro he njarin on naan. 23 Onaim oras ia, au 'toit ko he msuup ambi Uisneno In matan, mak ho of ka mputa-kriu kau fa, 'ok au anah-upuf sin ok-oke'. Natuin au 'moe' reko 'ok ko, es naan ate ho ro he mmoe' reko mok kau nbi pah ia msa'.”
24 Onaim nai' Abraham nataah am nak, “Reko, tua! Au 'suup.”
25 Mes rarit nai' Abraham natraak neu usif naan am nak, “Aam usi', ho too nggwin nasiik naan au oe maat hain es.”
26 Anneen on naan ate, usif naan nataah am nak, “Ahh! Au fe' a'neen rasi ia. Nansaa' am es ho ka mutoon fa na'ko af-afi naa? Au ka uhiin fa neu sekau es anmoe' on re' naan.”
27-28 Rarit nai' Abraham ma nai' Abimerek nmo'en rasi tfeka'. Nai' Abraham nait bijae ma 'bib-kase ma nfee sin neu usif. Rarit in npiir intein 'bib-kaes tipu' mana' hiut. 29 Rarit uisf ee nataan ee mnak, “Nansaa' am es ho mmoe' on naan?”
30 On nai te, nai' Abraham natoon am nak, “Aam usi'. Amtoup a'bib-kaes tiup ein ia, he njarin tanar nak aam usi' ho mmanaku' mak au es a'hain oe hani' re' ia.”
31 Natuin sin nua sin nmo'en nrarin rasi tfeka' nbin bare naan, es na' sin nakanab bare naan Beer Seba. In a'moufn ii nak ‘Oe 'Hain Supat’.b
32 Sin nsupan nrarin on naan ate, usif nai' Abimerek nok in meo pae' je nfanin on sin pah Filistin. 33 Rarit nai' Abraham nseen hau tamareskac uu' gwes nbi Beer Seba. Anmurai na'ko oras naan, hau naan anjair tanar amnauba' neu nai' Abraham, nak in na'bees neu UISNENO re' Amonit Nabar-baar anbi bare naan. 34 Rarit nai' Abraham natua on re' anao-amnemat tar a'roo nbi atoin Filistinas sin pah.