Paulus nasala'e aon mia mane Agripa
26
Basa naa ma, mane Agripa denu Paulus 'oi, “Musula'e aom leo. Basa hai mae rena nggo ena.”Boe ma Paulus loo liman, ma 'ola' nae,
2 “Ama mane Agripa nenefee had'a-hormat. Au 'umuho'o, huu ama' fee au 'ola' fo dui neu ama' se, basa dala' saa fo atahori Yahud'i ra rapepenggo neu au' a. 3 Au bub'ulu' ama' nahine teb'e, hai atahori Yahud'i ra 'ad'at ma, ma hai masod'a mate-mori ma ra. Dad'i au 'o'e ama' rena malolole.
4 Eni' a 'a'ana ngga, ara ranori au tungga hita atahori Yahud'i ra 'ad'at na. Fefeun, ara ranori au mia kambo ngga; basa ma 'uma sakola selu' mia Yerusalem. Atahori Yahud'i mana sia Yerusalem ra, bub'ulu' au masod'a ngga, ma rahine au noo malole'. 5 Mete ma malangga agama ra nau, na, ara bisa dui 'oi sira rahine au mia doon neu. Te au ia, maso' partei agama Farisi boe. Basa atahori bub'ulu', hai atahori Farisi ia ra, mana to'u mihere' seli atahori Yahud'i ra atoran agama na.a 6-8 Au 'oo basa atahori Isra'el leo kasanahulu rua' ra mihani Lamatualain tao tungga hehelu-fufuli na. Ana tao hehelu-fufuli' naa eni' a ma'ahulun noo hita bei-ba'i na ra. Naa de, losa ia basa hai hule-o'e hatu'-rerelon fo Lamatualain tao natetu hehelu-fufuli' naa leo. Hehelu-fufuli' naa 'oi, dei fo Lamatualain tao nasod'a bali' atahori mates ra.
Ama mane Agripa nenefee had'at. Huu au 'umehere 'ae, dei fo Lamatualain tao nasod'a bali' atahori mates, naa de ara rad'ed'ea roo au. Au 'ae 'utane: ta'o bee de hei ruma nda nau mimihere mae Lamatualain bisa tao nasod'a bali' atahori mates ra sa? Ana bisa!
9 Dalahulun, mema' au sud'i 'a tao saa, fo lab'an 'uhere' basa atahori mana tungga Yesus, atahori Nasaret a. 10-11 Lele' naa, agama Yahud'i malangga na ra fee au koasa, fo 'uu tao 'u'usususa' Yesus atahori na ra sia bee-b'ee. Au to'u se, ma nore 'oo se Yerusalem rema, fo tao se bui rala reu. Au o tungga 'u'etu' hukun 'isa ruma boe. Au maso' ume hule-o'e' ra, fo tao doid'oso se. Ma 'u'ususuu' se fo rasad'ea Yesus. Au 'uu 'oi se lao hetar noo nasat. Sad'i au rena atahori mana ramahere Yesus sia bee, mae losa nusa fea' o, au 'uu 'oi se!”b
Paulus dui selu' eni lalaon nisi' Damsik
12 Boe ma Paulus 'ola' nakandoo nae, “Lao esa, agama Yahud'i malangga na ra fee au susura koasa fo 'uu 'oi Yesus atahori na ra sia kota Damsik. Boe ma, au o 'uu boe. 13 Ama mane Agripa! Lele' hai fe'e mia dala', mbei ma reorendun, 'aib'oi' ma, manggarelo' sa mia lalai a rondan seli, delo dai au 'oo nonoo ngga ra. 14 Basa hai mi'iloli, huu manggerelon seli. Au rena hara' esa 'ola' noo au nendi' ded'ea Aramc 'oi, ‘Wee Saul! Ta'o bee de ho 'aka' tao doid'oso Au mukundoo' a? Susa neu nggo, mete ma ho 'aka' a lab'an Au hihii ngga.’ 15 Au rena hara' naa, te nda 'ita atahorin sa. De au 'utane 'ae, ‘Malangga mana 'ola' ia, seka e?’
Boe ma haraa' naa nataa 'oi, ‘Au ia, Yesus, fo ho tao doid'oso mukundondoo' a. 16 Saul! Fela leo! Au 'utud'u ao ngga neu ho ia, fo dad'i Au atahori nemehere ngga. Ho musi muu mufad'e basa atahori ra, saa fo mita mia Au fai' ia. Dei fo Au 'utud'u selu' fai, mata-feu' ra, fo bisa muu mufad'e atahori ra. 17 Dei fo ho hambu sususa' mata'-mata'. Te au 'unea nggo mia atahori mana rae ra'asususa' ho ra, mae mia atahori Yahud'i, do mia atahori fea' ra. Teb'e! Au denu nggo misi' atahori nda Yahud'i ra sa. 18 Muu tao mulaa mata na ra, fo rahine ma rasod'a sia manggarelo' a. Naa fo, ara lao hela sira dala masod'a sala na ra. Ho o musi mutud'u se dala masod'a ndoos, ma mbo'i se mia nitu ra malanggan koasan, fo mendi se risi' Lamatualain. Noo ta'o naa, Lamatualain 'ose hendi basa sala na ra. Ma ara o dad'i Lamatualain atahori na ra, 'ona' atahori fea' fo Ana pili nala' ra, huu ramahere Au. Au 'ufad'e ho ba'u a naa ena, Saul.’”
Paulus nafad'e eni ue-tatao na
19 Basa naa ma, Paulus 'ola' nakandoo 'oi, “Ama mane'. Ue-tataos fo au simbo mia sorga naa, au ue-tao ena. Ma au o fe'e ue-tao e, nda 'u'ud'ed'ea' mbei sa boe, losa fai' ia. 20 Fefeun au 'ufad'e Yesus Dala Masod'an neu atahori Yahud'i ra sia Damsik. Basa de au 'uma 'ufad'e atahori Yahud'i mana sia Yerusalem, ma basa profinsi Yud'ea. Basa ma, au lao ndule atahori nda Yahud'i ra nusa na ra. Au 'ola' relo-relo neu basa se, fo ara lao hela dala masod'a sala na ra, ma fee ao na ra neu Lamatualain. Ara musi tao malole sia masod'a na ra neu atahori laen, fo dad'i bukti 'oi sira dad'i atahori feu' ena sia Lamatualain.d 21 Huu au ue-tao ta'o naa, de atahori Yahud'i ra to'u au mia Ume Hule-o'e Huu' sia Yerusalem. Ara o rae tao risa au boe. 22 Te Lamatualain tulu-fali au. Naa de, au fe'e 'usod'a losa ia. Huu naa, au fe'e bisa 'umburii' sia ia, fo dui-b'engga fee basa atahori anak-moko, so'al Yesus Dala Masod'a na. Saa fo au 'ufad'e' ia, ndaa noo basa saa fo ba'i Musa noo Lamatualain mana 'ola-'ola na ra ranori eni' a ma'ahulu na. 23 Ara ranori so'al Kristus, atahori fo Lamatualain helu nae fee nema' a. 'Oi, Ana musi doid'oso, fo mate, te basa na, Ana dad'i 'ona' boa ulu' fo Lamatualain tao nasod'a bali'. Dei fo Ana mana fee manggarelo' neu atahori Yahud'i ra, noo atahori fea' sia raefafo' ia.”e
24 Paulus fe'e 'ola' ue-tataon ma, Festus 'ola' nggero ded'ean nahere' 'oi, “He! Paulus! Mbei ma ho mamulu'. Muhine naen seli, losa 'utam nda matetu' sa.”
25 Te Paulus nataa 'oi, “Ama hofernor nenefee had'a-hormat. Au nda mamulu' sa. Basa saa fo au 'ola' ia, mema' teb'e. Au nda ander-ander sa. 26 Ama Mane Agripa nahine saa fo au 'ufad'e' ia, mema' teb'e. Naa de, au 'umburani 'ola' relo-relo. Au 'umuhere ama mane' rena basa ia ra ena, huu saa fo mana dad'i ena, nda dad'i sia mamana ma'afuni' sa. 'Oi, Yesus mana mate' naa, nasod'a bali' ena. Basa atahori o, bub'ulu' ena boe. 27 Mia dalahulun, Lamatualain mana 'ola-'ola na ra rafad'e basa ena. Au 'umburani 'u'uhehee' 'ae, ama mane' o namahere mana 'ola-'ola' naa ra 'o'ola na ra, to?”
28 Te mane Agripa 'ola' nggero nae, “Weh! Paulus! Nda doo' sa te, ho mae tao au dad'i atahori Kristen ena!”
29 Paulus nataa nae, “Ta'o ia, ama'. Au hule-o'e neu Lamatualain, fo doo', do losa' o, nda 'aka' a ama mane' sa, te basa atahori mana rena neu au 'o'ola ngga ia, bisa dad'i Yesus atahori na ra, 'ona' au boe. Te sad'i ama' se 'afi' dad'i atahori nda nenembo'it, 'ona' au ia sa.”
30 Paulus 'ola' basa ma, mane Agripa noo feton Bernike, ma hofernor Festus, roo basa atahori monaen ra, fela rambarii' de bali'.
31 Lele' ara lao dea reu ma, atahori naa ra 'ola-'ola' rae, “Atahori ia nda tao sala' nandaa noo hukun mate sa. Ma nda nandaa tao e bui rala neu sa!”
32 Boe ma mane Agripa nafad'e hofernor Festus 'oi, “Kasian, o! Atahori ia no'e hene nisi' mamana nggenggero huu' a sia Roma ena. Hoko' na, ded'eat ia basa ena, ma bisa mbo'i e ena boe.”