Paulus nasala'e ao na
22
Boe ma, Paulus 'ola' nae “Ama ngga ra noo toronoo ngga ra, e! Au 'o'e nggi rena, te 'ae 'usula'e ao ngga.”2 Lele' naa atahori hetar rena Paulus 'ola' nendi' sira ded'ea na. De ara nee-nee reu' ena, fo rae rena malolole ded'ea na. Boe ma ana 'ola' nakandoo nae, 3 “Sad'i basa nggi bub'ulu' mae, au atahori Yahud'i. Mama ngga bonggi au mia kota Tarsus, sia nusa Kilikia. Te au 'u'umoko mia Yerusalem ia. Meser monae' Gamaliel, mana nanori au. Ana nanori au basa ba'i Musa hohoro-lalanen losa lutu'-lelo'. Au o manggate tungga Lamatualain 'ona' basa nggi boe.a 4 Fai' naa, au nda 'uloe' 'oi ma 'u'usususa' atahori mana tungga Yesus Dala Masod'an sa. Au lea 'endi se, tou' ma ina', risi' Yerusalem, fo tao se bui rala reu. Lele' naa, ruma mate boe. 5 Hita agama Yahud'i malangga monaen noo malangga laen ra o bub'ulu' saa fo au 'ola' ia teb'e! Au nda 'ombo-koson sa. Ara mana fee au susura koasa, fo 'uu to'u atahori mana tungga Yesus ra losa kota Damsik. Sia naa, au 'ae to'u se, fo 'endi se Yerusalem reu. Au du'a 'ae, hela fo atahori mana ma'etu' ded'eat agama ra hukun se.”b
Paulus dui eni lalaon nisi' Damsik
6 Basa ma Paulus 'ola' nakandoo nae, “Lao esa, au lao 'isi' Damsik, fo 'ae sangga atahori mana tungga Yesus ra. Mbei ma relo a namatetu ma, hai mae' a losa kota naa. Te 'aib'oi' ma, manggarelo' sa mia lalai a naronda neu au, 7 de 'u'uloli. Au rena hara' esa 'ola' nae, ‘He, Saulus! Ta'o bee de ho tao doid'oso au ta'o ia?’ 8 Au mema' rena hara' naa, te nda 'ita atahori sa. De 'utane 'ae, ‘Malangga mana 'ola' ia, seka?’
Hara' naa, nataa nae, ‘Au ia, Yesus, atahori Nasaret, fo ho tao doid'oso' a!’ 9 Atahori mana lao' roo au ra o, rita manggarelo' naa, te nda rena hara' naa sa.
10 Boe ma, 'utaa 'ae, ‘Mete ma ta'o naa, na, 'oras ia au musi ta'o bee?’
Hara' naa nafad'e nae, ‘Fela leo, fo kota rala muu. Losa naa fo, Au atahori ngga fe'e nafad'e nggo basa saa fo ho musi tao' ra.’
11 Au rena 'ala ma, au fela rii-rii. Te au nda 'ita saa-saa sa boe ena, huu manggarelo' naa rondan seli. De nonoo ngga ra to'u roo au kota Damsik mii.
12 Sia naa hambu atahori esa naran Ananias. Eni ralan ndoos, ma to'u nahere' ba'i Musa hohoro-lalane na ra. Basa atahori Yahud'i mana leo sia kota naa, hii e ma fee had'at neu e. 13 Ana nema sangga au, ma 'ola' nae, ‘'A'a Saul! Mulaa matam fo mete leo! Te 'a'a matan nalaa ena.’ Ana 'ola' basa ma, au boti' mata ngga, ma bisa 'ita e. 14 Basa ma, ana nanori au nae, ‘Lamatualain, fo hita bei-ba'i na ra hule-o'e neu 'a, ia na, pili nala 'a'a ena. 'A'a ue-tataom, naeni muhine malolole hihii-nanau na. Noo muhine Yesus, fo mia dalahulun, hita ingga-ingga' E tae, “Atahori Meumare'”. Ia na, Lamatualain soi dala' fo 'a'a rena matam mia Yesus. 15 Ana mana pili nala 'a'a, fo muu mufad'e Hara-lii Malolen neu atahori sia bee-b'ee. 'A'a musi mufad'e basa saa, fo mita ma rena mia E 'a. 16 'Afi' muhani doo-d'oo fai. Muu fo mo'e ara sarani 'a'a, fo dad'i tanda 'a'a no'e Lamatua' Yesus 'ose hendi basa sala-kilu ma ra.’”
Lamatualain denu Paulus nendi Hara-lii Malole' fee neu atahori nda Yahud'i ra sa
17 Boe ma Paulus tute 'o'olan nae, “Basa ma, au bali' Yerusalem 'uu. Fai' esa, au 'uu hule-o'e mia Ume Hule-o'e Huu' a ma, Lamatua' natud'u au 'ona' meit e. 18 Au 'ita Yesus. Ma Ana parenda au nae, ‘Ho musi lao hela Yerusalem ia, leo! Huu, atahori mana sia ia ra, nda nau simbo saa, fo ho munori so'al Au' a sa.’
19 Te au nda simbo parenda' naa sa, huu dalahulun, malangga agama ra hii au. De 'utaa 'ae, ‘Ta'o ia, Ama'! Basa se bub'ulu', fai' naa, au lao 'uu sia ume hule-o'e' sia bee-b'ee, fo to'u ma poko atahori mana ramahere neu Ama'. 20 Ara o rahine rae, lele' ara mbia risa Ama' ded'enun, Stefanus, te au mia naa, ma au o nau boe. Lele' ara rad'uru fatu fo mbia e, au mana ator se. Ma au mana 'unea bad'u na ra.’c
21 Au fee nesenened'a' ta'o naa, te Yesus parenda selu' fai nae, ‘Sud'i boe sangga dala' mata'-mata'! Lao hela Yerusalem leo! Au 'ae denu nggo muu sia mamana doo-d'oo' ra, fo munori atahori nda Yahud'i ra sa.’”
22 Atahori hetar rena Paulus 'ola' nae Lamatua' denu e nisi' atahori fea' ra ena ma, ara nda nau rena e sa ena. Basa se ramanasa, ma nggasi randaa rae, “'Afi' rena atahori ia fai! Misa e leo! Ana nda nandaa nasod'a sa ena.”
Sold'ad'u ra rendi Paulus nisi' mamana nenea'
23 Atahori naa ra nggasi ta'o naa ma, ara 'olu bad'u na ra, ma 'ao afu de nggari ata neu, huu ramanasa rala seli. 24 Malangga a nita atahori ramue fai ma, ana denu sold'ad'u ra rendi Paulus nisi' mamana nenea'. Basa ma, ana denu se filo e, naa fo Paulus nataa nae eni tao sala' saa, losa atahori Yahud'i ra rae tao risa e. 25 Ara pa'a Paulus fo rae filo e ma, ana natane bali' sold'ad'u naa nae, “Tungga mana parenda Roma atoran na, bee ka ndaa? Mete ma atahori sa mana na'ena hak atahori Roma hambu ded'eat, hei musi tao ta'o bee? Hei popoko mi'ihulu' e do, hei paresa' mi'ihulu' e?”
26 Sold'ad'u naa rena nala ma, ana neu sangga malanggan lai-lai. Ana nafad'e nae, “Ama'! Atahori ia na'ena hak atahori Roma! Dad'i ama' nae tao saa neu e?”
27 Malangga a rena nala ma, ana neu natane Paulus nae, “'Oi ho mu'ena hak atahori Roma? Naa teb'e, do?”
Paulus nataa nae, “Teb'e! Au to'u hak naa.”
28 Boe ma malangga a nae, “Au o 'ona' naa boe. Au bae naen seli, fo bisa hambu hak naa.”
Te Paulus nataa fai, nae “Au naa, au nda bae saa-saa sa boe. Eni' a mama ngga bonggi au, te au to'u hak naa ena. Ama ngga o to'u hak naa boe.”
29 Ara rena Paulus to'u hak atahori Roma ma, sold'ad'u ra ra'ad'ed'ea'. Ara nda rambarani filo ma paresa' e sa ena. Malangga a nahine nae eni tao sala' nalena-langga atoran ena, huu eni pa'a Paulus ena. Naa de, ana namatau.
Paulus sia mamana nggenggero ded'eat agama Yahud'i
30 Mbila' neu ma, malangga a fe'e nae sangga ded'eat a huu-patan ta'o bee. De ana denu sold'ad'u na ra reu ro'e basa agama Yahud'i malangga na ra noo basa atahori moko-monaen mana biasa nggero ded'eat agama Yahud'i ra, fo ra'ab'ue. Boe ma, ana denu reu sefi Paulus papa'an, fo rendi e nisi' basa atahori naa ra mata na ra.