3 Boe ma, hai lao hela Kaisarea. Mbila' neu ma, hai losa kota Sid'on. Malangga sold'ad'u Yulius tao Paulus noo malole', ma nafad'e e 'oi, bisa muu se'u nonoo ma ra sia mad'a' ata. Ana nae ta'o naa fo, ara bisa fee Paulus sud'i 'a saa fo ana parluu sia tasi' ata.

4 Basa de, basa hai hene bali' 'ofa' mii, de mulai lao. Te ani mata' a, monaen seli, de 'ofa' a nae 'a nda lali' sa. Ara rauli 'ofa', de lao tungga pulu Siprus noo rae Siria talad'an, fo 'ofa' a neneb'ambi'. 5 Mia naa, hai lao tungga tasi' sia profinsi Kilikia noo profinsi Pamfilia mata'. Hai mikindoo misi' kota Mira, sia nusa Likia. Losa naa ma, hai 'onda lao hela 'ofa' a. 6 Malangga sold'ad'u Yulius sangga 'ofa' laen mana nae lao mia Mira nisi' Italia neu. Ana hambu 'ofa' esa nema mia kota Aleksandria, nae lao Italia neu. De ana denu basa hai, hene 'ofa' ata mii.

7 Hai lao fai hira ena, te 'ofa' a nae 'a nda lalii' sa, huu ani mata' a, monaen seli. Hai lao noo sususa mae' a losa kota Knidus. Te anin fe'e seli, de hai lao nggero misi' pulu Kreta, fo neneb'ambi' mia anin a. Basa de, hai tungga tonggo' esa, naran Salmone. 8 Hai lao noo sususa' tungga tonggo' naa, tungga 'a pulu Kreta tasi suu na. Dei de, hai fe'e losa mamana' esa, naran Namo Malole'. Mamana' naa, deka noo kota Lasea.

9 Atahori 'ofa' ra hahae mbei mia naa, huu hai sae 'ofa' doon seli ena, te nda fe'e losa Italia sa. Lele' naa, atahori Yahud'i ra fai monaen, fo ro'e rae, Fai Hambu Ambon Mia Sala-Singgo', basa ena.^a Naa sosoan, fai ree-anin nae losa. Boe ma, atahori 'ofa' ra ratane rae mae sae 'ofa' mikindoo do hoko'. Paulus rena nala ma, ana 'oi, 10 “Toronoo ngga ra, e. Au 'ae 'ola' mbei dei. Mete ma hita sae 'ofa' takandoo, na, hambu sususa' nae'. 'Afi' losa 'ofa' a molo, ma mopo sud'i 'a saa ra, ma hita o mate boe.” 11 Te malangga sold'ad'u a nda nau rena Paulus sa. Ana namahere' a joragan noo tenu 'ofa' a, huu ara rae lao hela mamana' naa. 12 Te sia Namo Malole' naa, 'ofa' ra nafu nda malole' sa sia fai rii-ree. Dad'i sira nae' nau 'a hai lao mikindoo misi' kota Feniks. Ara ramahena 'oi, mete ma bisa, na, basa hai leo sia naa, losa fai rii-ree ia basa. Feniks naa, namo malole' sia pulu Kreta, huu neneb'ambi' mia ani muri-'onas noo ani muri-d'iis, ma nda hambu ree monae' sa.

13 Lele' ani 'onas mulai koe-koe ma, ara rae ne'o sira bisa pake anin naa fo lao risi' kota Feniks. De rafad'e rae, “Ia, ani malole'. De ata lao leo!” Boe ma ara boti' naka ma lea laar, de hai lao' tungga 'a tasi suu na. 14-15 Hai lao nda doo' sa ma, 'aib'oi' ma sanggu anin losa. (Atahori 'oi, ‘ani timu-d'iis’). Anin naa fuu 'ofa' a nendi nisi' tasi' a talad'a na. Atahori 'ofa' ra nda rauli rala 'ofa' sa, de ara tungga 'a anin a.

16 Hai laa-laa tungga ree ra losa deka moo pulu ana' esa, naran Kaud'a. Lele' naa, jukun na fe'e nenepa'a' sia 'ofa moko a dea'. De hai lea jukun naa mita' mamate ma ra 'ofa' ata neu. 17 Jukun a losa 'ofa' ata ma, ara fefeo' tali' ndule 'ofa' aon, fo 'afi' losa papa na ra hu'a, ma 'ofa' a molo. Ara o ramatau, 'afi' losa ree ra mbembesi' 'ofa' a fo ana hara sia sara'ae meti' Sirtis sia Afrika. De ara ra'onda' naka mana doko-d'oko tasi' ralan neu, ra'akukura' 'ofa' a lalao na.

18 Ani monae' naa, humbu hai 'ofam dii-'ona neu. De mbila' neu ma, atahori 'ofa' ra nggari hendi 'ofa' a fufua na ruma tasi' rala reu. 19 Fini-esan fai, ani monae' fe'e seli. De ara boe ramatau. Naa de, ara nggari selu' 'ofa' a fufua na tasi' rala reu, fo tao namanggafa 'ofa' a. 'Ofa' a sud'i 'a saa na ra o, atahori 'ofa' ra nggari se boe. 20 Hatu'-rerelon ani monae' naa nda naloe' mbei sa boe losa fai hira, ma lele' a namafau, de hai nda bisa mita relo noo nduu' sa. Basa hai masaloe, ma mae ne'o nda bisa misod'a sa ena.

21 Hai nda mia-minu saa fai hira ena boe. De Paulus no'e nala basa se, de ana 'ola' 'oi, “Toronoo ngga ra, e! 'Ona' hei tungga 'o'ola ngga fo 'afi' lao hela Namo Malole' a, na, hita nda hambu susa basa ia sa, ma nda runggi saa sa boe. 22 Te ia naa, au 'o'e basa nggi fo mi'imamate' rala ma ra. Dei fo hita 'ofan ia nambalutu. Te 'afi' mimitau, huu atahori esa o, nda mate sa boe. 23 Naa fo basa hei bub'ulu' au ia, Lamatualain atahorin, ma au hambu ue-tataos mia E. Temba' a, Ana denu aten esa mia sorga, nambarii' mia bob'oa ngga. Ana nafad'e au nae, 24 ‘Paulus! 'Afi' mumutau saa boe. Dei fo musi muu mundaa moo mane monae' sia Roma fo ana nggero ded'ea ma. Huu Lamatualain rala malolen soa' neu nggo, naa de Ana tao nasod'a basa atahori mana sia 'ofa' ata ia ra.’ 25 Dad'i toronoo ngga ra, e. Ama 'afi' masaloe. Au 'umehere teb'e saa fo Lamatualain nafad'e au temba' a, dei fo dad'i ta'o naa. 26 Te dei fo 'ofa' ia hara sia pulu esa.”

27 Lele' naa, ree-anin po'a na'amimina' 'ofa' a, de hai laa-laa fai sanahulu haa ena mia tasi Ad'ria. Te mbei ma fai banggi ruan ma, atahori 'ofa' ra med'a na hai deka moo mad'a' ata ena. 28 De ara dou oe' a rae rahine oe' a roroma na. Ara uku ma, ree rua nulu. 'Ofa' a mata neu mbei ma, ara dou selu' oe' a, de hambu oe' a roroman, ree sana hulu lima.^b 29 Basa se ramatau, 'afi' losa 'ofa' a hara neu fatu mbia'. Dad'i ra'onda' naka dea' ra haa' se. Ma basa hai hule-hule', fo manggarelo lai-lai. 30 Te atahori 'ofa' ra rala rala' sa, fo rae rela hela 'ofa' a nee-nee. De ara ra'onda' jukun, fo tao 'ona' rae ra'onda' naka mata' ra.

31 Te Paulus nafad'e dud'u'a de'ulaka na ra neu malangga sold'ad'u noo sold'ad'u ra nae, “Mete ma atahori 'ofa' ra nda rahani 'ofa' ata sa, na, dei fo mate basa nggi.”

32 Ara rena Paulus 'ola' ta'o naa ma, sold'ad'u ra 'ed'i-'etu jukun talin, de hela e laa-laa. Dad'i atahori 'ofa' ra nda rela rala sa.

33 Lele' nae manggarelo ma, Paulus kokoe basa atahori ra fo raa-rinu. Ana 'oi, “Nggarei rua ia, hita 'endo' a, ma hule-hule' a, noo nda taa-tinu saa sa boe. 34 Dad'i au 'o'e fo ata taa-tinu mbei dei, naa fo ata ma'ad'ere bali'. Au 'umuhere 'ae, dei fo hita esa o nda ta'o bee sa boe. Basa hita tasod'a'.”

35 Paulus 'ola' basa ma, ana ha'i roti, ma hule-o'e mbali Lamatualain sia basa se mata na ra. Basa ma, ana ha'i nala poto' esa, de naa. 36-37 Ara rita ta'o naa ma, rala na ra manggatee bali', ma ara tungga raa boe. Basa hai mana sia 'ofa' ata ra, atahori natun rua hitu nulu nee. Basa hai mia. 38 Hai mia mi'ib'eta ma, ara nggari hendi karon are-gandum tasi' rala neu, fo tao ramanggafa selu' 'ofa' a fai.

39 Manggarelo ma, atahori 'ofa' ra rita mad'a' ata. Te ara nda rita' rae, naa pulu bee sa boe. Ara rita retaan esa, de ramahena rae, mete ma bisa, na, rendi 'ofa' tungga fatu mbia' ra sia tasi' naa, fo risi' retaan naa. 40 De ara 'ed'i-'etu tali naka ra sia tasi, ma ra'onda' uli a, fo neuli 'ofa' a. Ara lea laa ana' mana sia mata', fo anin nendi 'ofa' a retaan neu. 41 Te 'ofa' a sara dai mbuku sara'ae' sia tasi' a rala, de hara sia naa, nda na'aunda' saa. Boe ma, ree monae' a popo'a nambalutu 'ofa' a dean.

42 Sold'ad'u ra rita ta'o naa ma, ara rae tao risa atahori bui ra. Ara ramatau, 'afi' losa atahori bui ra, nane mad'a' ata reu, fo rela. 43 Te malangga sold'ad'u Yulius 'ai sold'ad'u na ra, huu ana nae fee Paulus nasod'a. De ana parenda, basa atahori mana nane rahine' ra, nane mad'a' ata reu. 44 Ma ana denu atahori nda mana nane rala' ra sa, to'u papa' do sud'i 'a saa, fo tungga ree ra mad'a' ata reu. Dad'i basa hai losa mad'a' ata noo masod'a'.