Saulus maso' dad'i Yesus atahori na
9
Lele' naa, Saulus 'aka' a momoko ma tao doid'oso atahori-atahori mana tungga Yesus. Ana o sangga dala' nae nisa se boe. Naa de, ana neu nisi' agama Yahud'i malangga monae na, 2 ma no'e susura koasa fo nendi nisi' malangga ume hule-o'e' ra sia Damsik. Ana no'e nae mete ma nandaa noo atahori mana tungga Yesus Dala Masod'an, mae tou' do ina' o, ana to'u ma pa'a se, fo lea noo se Yerusalem reu.3 Saulus simbo nala susura koasa naa ra ma, noo nonoo na ra Damsik reu. Ara deka kota naa boe, 'aib'oi' ma manggarelo' naronda mia lalai dai tetar Saulus. 4 Boe ma ana na'aloli. Ana rena hara' esa 'ola' noo e nae, “Saulus! Ta'o bee de ho tao doid'oso Au ta'o ia, e?”
5 Saulus natane nae, “Malangga mana 'ola' ia, seka?”
Hara' naa nataa nae, “Au, Yesus, fo ho tao doid'oso' a. 6 Fela fo kota rala muu leo. Dei fo losa naa fo Au 'ufad'e nggo, ho musi tao saa sia naa.”
7 Nonoo na ra o rena hara' naa boe, te nda rita esa-esa sa boe. Boe ma mopo dud'u'a na ra, de ara hie-hie reu' ena.
8 Basa ma Saulus fela nambarii'. Ana nalaa sob'a matan, te nda nita saa sa boe. De ara to'u liman roo e Damsik neu. 9 Saulus nda bisa nita saa-saa sa boe losa fai telu. Ma nda naa-ninu saa sa boe.
10 Sia naa, hambu Lamatua' Yesus atahorin esa, naran Ananias. Lamatua' natud'u matan neu e 'ona' sia meit e, de no'e nae, “Ananias!”
Ana nataa nae, “Ia, Lamatua'!”
11 Lamatua' nafad'e nae, “'Uma dei. Ho muu sangga Au atahori ngga esa. Misi' Dala Ndoos, sia atahori sa naran Yud'as ume na. Sia naa, ho sangga atahori Tarsus esa, naran Saulus. 'Oras ia, ana hule-o'e. 12 Au 'utud'u e, 'ae dei fo atahori esa neu se'u e. Naeni, ho Ananias. De muu ndae limam neu e fo ana nita bali'!”
13 Te Ananias nataa bali' nae, “Ta'o ia, Lamatua'! Hai rena atahori dui-b'engga atahori naa, huu ana na'asususa' Lamatua' atahori na ra sia Yerusalem. Losa ara nda bib'isa' saa ena! 14 Lele' ia, hai rena mae malangga agama Yahud'i ra malangga na ra fee ne koasa fo nema humu basa atahori mana maso' tungga Lamatua' Yesus Dala Masod'a na.”
15 Te Lamatua' 'ola' noo Ananias fai nae, “Mae 'ona' naa o, muu dei! Te Au pili 'ala e dad'i mana soi dala' fee Au, fo ana nendi Hara-lii Malole ngga fee atahori ma mane' mia nusa fea' ra, ma atahori Isra'el ra boe. 16 Dei fo Au 'utud'u e, fo ana bub'ulu' doid'oso' mata' saa nahani e, huu ana tungga Au.”
17 Ananias rena Lamatua' 'ola' ta'o naa ma, ana lao nisi' ume naa, de rala neu. Ana ndae liman neu Saulus, de nae, “'A'a Saul. Lamatua' Yesus fo 'a'a nita mia dala' lele' 'a'a nema, Ana mana denu au 'uma 'undaa 'oo nggo. Ana denu au hule-o'e ma ndae lima ngga, fo 'a'a nita bali'. Ana o nau fo 'a'a simbo Dula-d'ale Meumare na boe.”
18 'Oras naa, Saulus med'a 'ona' 'u'u una' e kufa mia matan, de nita neu' ena. Ana fela, de ara sarani e. 19a Boe ma, ana naa-ninu, de aon o ma'ad'ere bali' boe.
Saulus dui Hara-lii Malole' sia kota Damsik
19b Saulus fe'e leo fai hira fai noo Lamatua' Yesus atahori na ra sia Damsik. 20 Ana nisi' atahori Yahud'i ra ume hule-o'en, de nafad'e se nae, “Rena malolole dei! Mema' Yesus, teb'e-teb'e' Lamatualain Ana na.”
21 Atahori ra titindindii ma bingun rena Saulus 'o'ola na. De ara 'ola-'ola' rae, “Ana mana tao doid'oso Yesus atahori na ra mia Yerusalem, to? Ana nema nae to'u nendi se risi' malangga agama Yahud'i ra malangga na ra! Ta'o bee ia?”
22 Te Saulus soa 'a natud'u bukti 'oi Yesus naa, Kristus fo Lamatualain helu nae haitua eni' a ma'ahulun neu. Saulus nanori 'ona' naa, de atahori Yahud'i ra nda rasenggi' e sa. Naa de, Saulus naran boe nenenehine' sia bee-b'ee.
23 Nda doo' sa ma, atahori Yahud'i ra ra'ab'ue rae tao risa e. 24 Te Saulus rena siu' dud'u'a de'ulaka' naa. Atahori ra tefa e hatu'-rerelon sia lelesu ine' a fo rae risa e. 25 Te tetemba' sa, Saulus nonoo na ra hira reu rala e, de tao e mia boa sa rala ma ra'onda' e tungga kota a tembok na, de ana nela hela kota Damsik.a
Saulus Yerusalem neu
26 Basa ma, Saulus Yerusalem neu. Losa naa, ana sob'a neu na'ab'ue noo Lamatua' Yesus atahori na ra. Te basa se ramatau e, huu rae ne'o ana neu tao aon 'ona' atahori mamahere' mana tungga Lamatua' Yesus. Te dei fo ana to'u se. 27 Te hambu atahori sa, naran Barnab'as. Ana mana fee Lamatua' ded'enu na ra rahine Saulus. Ana dui se, saa fo dad'i neu Saulus mia dala'. Ana o nafad'e nae Saulus nandaa noo Lamatua' Yesus, ma Yesus o 'ola' noo e boe. Ana dui se Saulus mbaranin nafad'e Lamatua' Yesus Dala Masod'an neu atahori sia Damsik.
28 Ara rena ta'o naa ma, basa se simbo Saulus. De ana leo noo se mia Yerusalem. Ana nambarani nafad'e Lamatua' Yesus Hara-lii Malolen neu sud'i 'a see. 29 Ana naselu noo atahori Yahud'i hira mana 'ola' rendi' ded'ea Yunani. Te ara nda nau simbo 'o'olan sa, de ara sangga dala' rae tao risa e. 30 Lamatua' Yesus atahori na ra rena rae atahori sangga dala de'ulaka' ma, ara roo e nisi' kota Kaisarea sia tasi suu na. Basa de ara haitua bali' e nisi' kota Tarsus.
31 Basa boe ma, Yesus atahori na ra mana sia nusa Yud'ea, Galilea, ma Samaria, rasod'a noo dame. Ara ramaheta, ma tungga Lamatualain hihii na. Dula-d'ale Meumaren o tao manggatetee rala na ra boe.
Petrus na'ahahai' tou' esa sia Lid'a
32 Lele' naa, Petrus hii lao ndule bee-b'ee fo neu se'u Lamatua' atahori na ra. Fai' esa ma, ana neu se'u atahori mana leo sia kambo Lid'a. 33 Sia naa, ana nandaa noo tou' esa, naran Eneas. Eni mamalu'u', de nda fela hela mamana susunggun sa too falu ena.
34 Petrus nafad'e e nae, “Eneas! Yesus Kristus nahai' nggo ena. Dad'i fela leo! Mulolole mamana susunggu ma!”
Eneas rena ta'o naa ma, ana fela boe. 35 Basa atahori sia kambo Lid'a noo kambo Saron rita Eneas hai, ma ramahere neu Lamatua' Yesus.
Petrus tao nasod'a bali' mama Tabita
36 Lele' naa, ina' esa naran Tabita leo sia kota Yope sia tasi suu na. (Ina' naa naran sia ded'ea Yunani 'oi, ‘Dorkas’, sosoan 'oi, ‘rusa’).b Ana namahere neu Lamatua' Yesus. Ana tao 'a malole' neu atahori, ma hii tulu-fali atahori mana tud'a-loloe' ra. 37 Fai' esa ma, mama Tabita namahed'i, de mate. Ara rariu e, ma mboti ao-sisin, ma ralololi e sia kama ata'. 38 Ara rena rae Petrus sia Lid'a. Kota naa lao ei' na fai 'e'etu' esa mia Yope. De ara denu atahori rua reu ro'e Petrus 'oi, “Ama'! Hai mo'e ama' nema lai-lai sia Yope dei.”
39 Petrus rena ma, ana fela de tungga se. Losa naa ma, ana nisi' mama Tabita kama na. Ina falu ra sofe kama ma nggae ei-ei. Ara ratud'u Petrus sira bad'u na ra ma bua-b'a'us laen na ra fo mama Dorkas soo fee se lele' ana fe'e masod'a'.
40 Basa ma, Petrus denu se dea reu. De ana sende' lulu-langgan ma hule-o'e. Basa ma, ana heo' mbali mamates a, de 'ola' nae, “Tabita! Fela leo!” 'Aib'oi' ma, ina' a nalaa mata na. Ana nita Petrus ma, ana fela de 'endo'. 41 Petrus to'u liman de nafefela e. Basa ma, ana no'e ina-falu ra ma atahori laen ra, de fee ina' mana nasod'a bali' a neu se.