Hofernor Festus paresa' Paulus ded'ea na
25
Lele' naa, hofernor feu' a, naran Festus, lali Kaisarea neu fo mulai parenda. Ana leo fai telu' a mia naa ma, ana lao nakandoo Yerusalem neu. 2 Sia naa, agama Yahud'i ra malangga na ra ma atahori moko-monaen laen ra reu randaa roo e fo rae rahine e. Ara o 'ola-'ola' Paulus ded'ean sia sira ne'eb'uen naa. 3 Ara o ro'e, mete ma bisa, na, hofernor denu atahori na ra roo bali' Paulus Yerusalem nema, huu ara rala rala' ena rae tao risa Paulus sia dala' talad'a na.4 Te hofernor nataa 'oi, “Ama ngga ra, e. Ta'o ia. Hela fo ara ranea e sia Kaisarea dei. Te au o 'ae haelai bali' naa 'uu boe. 5 De mete ma hei see hambu koasa fo nggero ded'eat ia, na, tungga moo au Kaisarea 'uu. Mete ma atahori ia tao sala' saa, na, hei bisa mid'ed'ea moo e sia naa.”
6-7 Basa ma, Festus leo mbei ma fai sanahulu mia Yerusalem, dei de fe'e bali' nisi' Kaisarea ena. Lele' naa atahori Yahud'i hira tungga e. Mbila' na ma, hofernor nae paresa' ded'eat naa. De ana denu ara roo Paulus rala neu nandaa noo e.
Paulus rala neu ma, atahori Yahud'i ra rambarii' rereo' rala e, de mulai fee sala' mata'-mata' neu e. Te ara nda bisa ratud'u bukti esa sa boe.
8 Boe ma Paulus nasala'e aon nae, “Ama hofernor. Au nda fe'e tao de'ulaka' saa sa boe. Au o nda tao saa lab'an hai atoran agama Yahud'i ma sa. Au nda tao 'unggenggeo Lamatualain 'uma Hule-o'e Huun sia Yerusalem sa. Ma au o nda tao saa lab'an mana parenda Roma ra atoran na sa.”
9 Te hofernor nae ha'i rala' noo atahori Yahud'i ra. Naa de, ana natane Paulus 'oi, “Ho du'a ta'o bee? Mete ma au nggero ded'ea ma sia Yerusalem, na, ho nau do hoko'?”
10 Paulus rena hofernor natane ta'o naa ma, ana nataa 'oi, “Ama' hofernor, au ia, atahori Roma. De ia naa, au 'umburii' sia ama' hofernor mia manaparenda Roma. Manaparenda Roma mana na'ena hak nggero au ded'ea ngga tungga atoran na. Dad'i au nda nau 'isi' Yerusalem 'uu, fo ne'etu' ded'ea ngga sia naa sa. Ama' bub'ulu', au nda tao sala' saa sa boe, lab'an neu atahori Yahud'i ia ra. 11 Mete ma au tao sala' nandaa noo hukun mate, na, au simbo. Te mete ma saa fo ara 'ola' naa, nda teb'e sa, tungga atoran Roma, nda hambu esa bisa fee au 'uu atahori ia ra lima na ra sa boe. Ara sangga 'a dala', fo rae risa au parsuma 'a. De ia naa, tungga au hak ngga, au 'endi ded'eat ia nisi' mamana nggengero ded'eat huu' a, fo mane monae' keser sia Roma, na'etu' ded'eat ia!”
12 Hofernor rena Paulus na'o naa ma, ana no'e dud'u'at mia nonoo mana tungga nggero ded'eat naa. Basa ma, ana nafad'e Paulus nae, “Huu mo'e hene misi' keser, de ho musi muu sia Roma.” 'ola' basa na'o naa ma, hofernor nate'e ne'eb'uet naa.
Festus no'e dud'u'at mia mane Agripa so'al Paulus
13 Basa ma, atahori Yahud'i ra manen, naran Agripa,a noo feton, naran Bernike, rema sia Kaisarea, fo rae fee had'at neu hofernor feu' a. 14 Ara numban fai hira roo hofernor Festus. Fai' esa, Festus dui Paulus ded'ean neu ru'a se. Ana 'oi, “Ama mane'! Sia Kaisarea ia, hai minea atahori sa, naran Paulus. Dalahulun, hofernor mbaraa' a nda fe'e na'etu' ded'ean sa. 15 Fe'e lai-lai' ia, au Yerusalem 'uu ma, agama Yahud'i ra malangga na ra roo lasi-lasi 'ad'at ra, rema kalaak Paulus, de ro'e au hukun e. 16 Te au 'ufad'e se 'ae, ‘Tungga mana parenda Roma atoran na, au musi paresa' ded'eat ia dei. Atahori mana rad'ed'ea ra musi randaa dei. Au 'ae rena hei fee sala' saa neu e. Ma ana musi hambu nasala'e aon boe. Dei fo au bisa 'u'etu' ded'eat naa, ma 'utud'a' hukun saa neu e.’ 17 De lele' au bali' Kaisarea 'uma ma, atahori Yahud'i hira tungga boe. Mbila' na ma, au paresa' tute' ded'eat naa. Au denu se roo Paulus nema nandaa noo au, fo au bisa bub'ulu' ded'eat ia huu-pata na. 18 Boe ma, atahori Yahud'i ra rambarii' de dui Paulus sala na ra. Te saa fo rafad'e neu au' a, beran nda 'ona' au du'a' a sa. 19 Ara ratofa, huu ara nda rala' esa so'al agama na ra sa. Ma rareresi roo Paulus so'al atahori sa, naran Yesus. Tungga atahori Yahud'i ra, Yesus mate ena. Te Paulus to'u nahere' 'oi Yesus naa, nasod'a bali' ena. 20 Ara rareresi ta'o naa, te huu au atahori feu', de nda 'ita' 'ae 'u'etu' ded'eat agama ia ta'o bee sa boe. Naa de au 'utane Paulus 'ae, ‘'Ona bee na, au 'u'etu' ded'eam ia sia Yerusalem, do?’ 21 Te ana nda nau sa. Ana no'e hene nisi' keser. Naa de au 'u'unggee 'uhere' e, losa ka'e 'ala dei fo haitua e Roma neu.”
22 Mane Agripa rena rala Festus dud'uin ma ana 'oi, “Mete ma bisa naa, au 'ae rena ao ngga mia atahori naa.”
Boe ma Festus nataa 'oi, “Bisa! Dei fo au ator fo fetun na, ama' bisa rena aom mia atahori naa.”
Mane Agripa nae rena Paulus 'o'ola na
23 Mbila' ma, hofernor Festus ator, fo mane Agripa rena Paulus 'o'ola na. Ana o ator fo atahori nae' bisa rena Paulus 'o'olan boe. Malangga sold'ad'u ra ma atahori moko-monaen sia kota Kaisarea, basa se rema rena Paulus. Boe ma, mane Agripa noo Bernike maso' rala rema roo bua-b'au mane na ra. Basa atahori fee had'at neu ru'a se. Lele' basa se ra'ab'ue ena ma, hofernor denu roo Paulus rala neu.
24 Ara roo Paulus ma, hofernor 'ola' 'oi, “Mane Agripa, ama ngga ra, ma toronoo susue ngga ra, e. Atahori ia, naran Paulus. Malangga Yahud'i hira rad'ed'ea roo e. Ruma sia Yerusalem ma ruma sia ia, ara risi' au, fo ra'asusuu' au rae, atahori ia, nda nandaa nasod'a sa ena. 25 Naa de au paresa' e, te nda hambu salan nandaa noo hukun mate sa. Te ana no'e hene nisi' mana parenda ata'. Naa de, nau nda nau sa o, au musi fee ne Roma neu. 26-27 Mete ma au haitua e, na, au musi tao susura. Te ia naa, au musi sura' saa fee mane monae' a? Naa de au 'u'ub'ue basa ama' se, fo rena e. Basa naa, au 'o'e ama mane' Agripa fee au dud'u'at, fo sura' 'uhine susura fee neu mane monae' a. Au du'a na nda malole' sa, mete ma au fee ded'eat ia nisi' keser, te nda 'ufad'e atahori ia salan sa.
Au 'o'ola ngga, ba'u a ia. Makasi.”