Paulus se bali' Yerusalem reu
21
Hai mitea basa moo lasi-lasi Kristen mia Efesus ra ma, hai mii sae 'ofa' noo rala susa', de lao tute' misi' pulu Kos. Fefetun ma, hai losa pulu Rod'os. Mia naa, hai lao mikindoo misi' namo sesee' sia kota Patara. 2 Hai 'onda mia Patara, de sae nggati 'ofa' mana nae nisi' profinsi Fenisia deka noo Siria. Hai sae mala 'ofa' naa ma, ara lea naka tute 'a. 3 Nda doo' sa ma, hai mita pulu Siprus sia hai bob'oa dii ma ra, te hai lao seli mikindoo losa nggari naka mia kota Tirus, sia profinsi Siria. Sia naa, atahori 'ofa' ra rae ra'onda' sud'i 'a saa ra mia 'ofa' naa. 4 Huu ara fe'e ra'onda' sud'i 'a saa ra, de hai 'onda fo mii sangga atahori mamahere' ra. Hai mindaa moo se, de leo moo se nggarei esa. Dula-d'ale' nafad'e atahori mana sia naa ra, fo ra'anggee Paulus 'afi' sud'i fee ne Yerusalem neu. 5 Nggarei sa boe ma, hai bali' 'ofa' ata mii. Basa atahori mamahere' ra, tou'-ina', moko-anak, lasi'-soru', roo hai losa tasi suu na. Basa hai sende' lulu-langga ma ra fo hule-o'e sia naa. 6 Basa ma, hai mitea, de hene 'ofa' ata mii ma, ara bali' boe.
7 Hai lao hela Tirus, de tuli mia kota Ptolemais. Mia naa, hai 'onda 'ofa', fo mii sangga atahori mamahere' ra. Hai mindaa se ma, leo moo se fai esa. 8 Mbila' neu ma, hai lao losa kota Kaisarea. Hai 'onda ma numban sia Filipus ume na. Filipus ia, mana nendi na'ahulu' Lamatua' Yesus Hara-lii Malolen sia naa. Ma ana o, esa mia atahori kahitu' fo pili rala' ra, fo fee se banggi nanaat fee ina falu mana sia Yerusalem ra.a 9 Filipus ana feto na ra haa. Lamatualain pake se dad'i mana 'ola-'olan, fo reu dui-b'engga hihii-nanau na.
10 Hai leo moo se fai hira ena ma, atahori sa, naran Agab'us, nema mia profinsi Yud'ea. Lamatualain pake e dad'i mana 'ola-'olan fo nafad'e hihii-nanau na.b 11 Ana nema tute' nisi' hai. Ana ha'i nala Paulus bob'orin, de pa'a neu ei-lima na ra, ma 'ola' nae, “Dula-d'ale Meumare' 'ola' nae: ‘Dei fo atahori Yahud'i ra pa'a bob'orit ia tenu 'enan, 'ona' ia sia Yerusalem. Basa fo, ara fee ne neu atahori nda Yahud'i ra sa lima na ra.’”
12 Hai rena mala atahori ra 'ola' ra'o naa ma, basa hai 'ai Paulus fo ana 'afi' sud'i nisi' Yerusalem neu. Basa hai mana dad'i eni manatungga na ra moo atahori mamahere' sia mamana' naa, mo'e ta'o naa. 13 Te ana nataa nae, “Hoko'! Ta'o bee de hei nggae? Hei mi'isususa' rala ngga ena! Mema' hambu atahori nda hii au sa, huu au tungga Lamatua' Yesus. Te mae ara futu-pa'a au, do risa au, do tao ta'o bee o, au simbo' a.”
14 Hai bub'ulu' Paulus nda nau rena hai sa ena ma, hai hela e neu. Hai mae, “Neu! Hela 'a Lamatualain hihii-nanaun dad'i.”
Paulus se losa Yerusalem
15 Hai leo fai hira mia Kaisarea ma, hai mi'ililinu' sud'i 'a saa ma ra, de lao Yerusalem mii. 16 Atahori mamahere' hira mia Kaisarea o, tungga roo hai boe. Ara roo hai losa ume esa, de sunggu' mia naa. Tenu ume' a naran, Manason. Ana mia pulu Siprus ma ana tungga Lamatua' Yesus doo' ena boe. 17 Hai losa Yerusalem ma, basa toronoo' ra simbo hai roo rala nemeho'ot.
Paulus se reu se'u Yakob'is
18 Mbila' neu ma, basa hai mii mindaa moo Yakob'is. Basa lasi-lasi Kristen ra o ra'ab'ue sia naa boe. 19 Hai esa mitea esa ma, Paulus dui basa saa fo Lamatualain tao fee atahori nda Yahud'i ra sa sud'i 'a saa sia bee-b'ee. Ana 'oi, Lamatua' Yesus soi dala' ena fo ara ramahere E. Ana o dui 'ona bee Lamatualain pake eni, noo basa nonoo na ra, sia ue-tatao' ia. 20 Ara rena basa Paulus dud'uin ma, basa se koa-kio Lamatualain.
Basa ma rafad'e Paulus rae, “'A'a Paul! Sad'i 'a'a bub'ulu', hambu atahori Yahud'i rifon-rifon o ramahere neu Lamatua' Yesus ena boe. Ara o fe'e to'u rahere' hohoro-lalane' fo ba'i Musa fee nggita' a. 21 Te hambu atahori rendi-rendi' ded'ea lena' rae, 'a'a nanori atahori Yahud'i ra sia mamana laen mae, ara nda parluu tungga ba'i Musa hohoro-lalane agama na ra sa. Ara o rafad'e rae, 'a'a 'ai se, fo sud'i sunat ana tou na ra. Ma 'a'a o 'ai atahori sarani' ra fo 'afi' tungga 'ad'at Yahud'i laen ra boe. 22 Dad'i musuned'a, o! Dei fo atahori Yahud'i ra rena 'a'a Paul sia ia ena. Ma atahori mana rena siu' ra, ne'o ramanasa. De ata sangga dala' ta'o bee?
23 Dad'i hai du'a ta'o ia: Atahori haa mia hai e helu-fuli basa moo Lamatualain ena. 'Oras ia, ara rae 'eu mboli langga na ra, fo dad'i tanda 'oi, sira tao tungga hehelu-fufuli na ra ena. 24 De mete ma bisa, na, 'a'a Paul maso' moo se misi' Lamatualain Ume Hule-o'e Huu na. 'A'a o tungga se, fo tao tungga 'ad'at nemeu ao'. 'A'a musi tanggon sira rurunggi 'ad'at na ra. Mete ma 'a'a tao ta'o naa, na, atahori ra bub'ulu' rae, 'a'a fe'e to'u hohoro-lalane agama Yahud'i fo ba'i Musa fee neu nggita' a. Ma ara o bub'ulu' dud'uit fo 'oi, 'a'a 'ai atahori fo 'afi' tungga 'ad'at Yahud'i a, na, 'ombo-koson!c
25 Te soa' neu atahori nda Yahud'i sa mana ramahere Lamatua' Yesus, hita fee se susura ena. Hita tafad'e se hita ne'etun fai' naa tae, sira nda parluu tungga basa hita atoran 'ad'at Yahud'i na ra sa. Te saa fo sira musi rasaned'a, naeni: 'afi' hohongge. 'Afi' ra'ab'ue roo sosonggo' ra. 'Afi' raa saa fo mana tao toronoo Yahud'i ra melumud'u, naeni: 'afi' raa sisi sosonggo'; 'afi' raa raa'; ma 'afi' raa sisi mia banda mana nene'ee nisa' losa raan nda nandali dea neu sa.”d
26 Boe ma Paulus simbo 'o'ola na ra noo malole'. Mbila' neu ma, ana noo atahori kahaa' ra risi' Ume Hule-o'e Huu' a, fo rameu ao na ra tungga hohoro-lalane agama Yahud'i. Basa ma, Paulus nafad'e malangga agama mana sia naa ra nae, fe'e fai hira fai fo, sira tao ratetu hehelu-fufuli na ra ma sira esa-esa' musi fee tutunu-hohotu' neu Lamatualain.
Ara humu rala Paulus mia Ume Hule-o'e Huu' a
27-29 Fai kahitu' fo ara helu tao 'ad'at naa nae basa ma, hambu atahori Yahud'i hira mia profinsi Asia rita Paulus lao nisi' Yerusalem rala, noo nonoon esa, naran Trofimus. Trofimus ia, mia Efesus, ma nda atahori Yahud'i sa. Ara rita Paulus nisi' Ume Hule-o'e Huu' a ma, rae ne'o ana noo Trofimus nisi' naa boe. Matetun, atahori nda Yahud'i sa, nda bole maso' risi' naa sa. Naa de, ara tao naa dad'i dala', fo tao ded'eat. Ara ratatale atahori sia naa, fo humu rala Paulus. Ara eki-randu rae, “Wei! Atahori Isra'el ra, e! 'Ima tulu-fali hai dei! Ia eni, atahori mana nanori sia bee-b'ee nae, nggari hendi hita atahori Yahud'i ra 'ad'at na. Ana o 'ola' de'ulaka Ume Hule-o'e Huu' a ma nema fo nae tao nanggenggeo Lamatualain mamana meumare na!”e
30 Basa atahori Yerusalem ra rena rala ma, ara ramanasa rala seli. Boe ma atahori hetar rela risi' Ume Hule-o'e Huu' a. De ara humu rala Paulus, ma nore roroso e dea neu. Basa ma, ara ena tute' basa lelesu ra.f
31 Lele' ara ramue-raanggi' fo rae tao risa e ma, malangga monae' sold'ad'u Roma rena nemue-naanggi' naa. 32 De ana no'e sold'ad'u na ra roo malangga na ra, fo maso' risi' atahori mana ramue' naa ra. Ara rita sold'ad'u noo malangga na ra ma malangga monae' a rema ma, ara raloe' momoko Paulus. 33 Boe ma, malangga monae' a humu Paulus, ma denu se pa'a e noo rante besi' rua. Basa ma, ana natane atahori ra nae, “Atahori ia, seka? Ana tao sala' saa?”
34 Te ara nda rataa noo hara ise' sa. Ruma rae, “Ana tao ta'o ia.” Te ruma rae, “Ana tao ta'o naa.” De malangga a pusin. Ana nda nahine ded'eat naa huu-patan sa, huu atahori hetar 'eki-randu. Naa de, ana denu rendi Paulus nisi' mamana nenea' a. 35-36 Sold'ad'u ra nore rendi Paulus te, atahori naa ra tungga roo se, de ramue selu'. Ara rae hene rala reu ma, atahori ra rela risi' mata', de sold'ad'u ra musi 'o'o a Paulus, naa fo ara 'afi' nore e fo momoko e. Ma ara o nggasi rahere' rae, “Misa e! Misa e!”
Paulus no'e nasala'e aon mia atahori hetar mata na ra
37 Ara rae maso' risi' ume nenea' a ma, Paulus 'ola' mbali malangga a noo ded'ea Yunani nae, “Ama'! Au bole 'ola' mbei, do?”
Malangga a rena Paulus 'ola' ta'o naa ma, ana nggengger, de natane nae, “Ho mala' ded'ea Yunani? Ta'o bee de ho bisa 'ola' ded'ea Yunani? 38 Mete ma ta'o naa, na, au du'a sala ena. Au 'ae ne'o ho ia, atahori Masir fo ma'ahulun, mana natatale atahori fo ramue. Basa ma, noo atahori rifon haa mana to'u tee-tande', de reu keke sia mamana rou'. Te ho ia, nda eni sa, to?”
39 Ma Paulus nataa nae, “Hoko', ama'! Au, atahori Yahud'i. Mama ngga bonggi au mia kota Tarsus, sia profinsi Kilikia. Au 'o'e ama' mbo'i au, fo bisa 'ola' 'oo atahori ia ra.”
40 Malangga a na'ahei', de Paulus nambarii' mia lelesu mata' a tatab'un ata', ma boti' liman no'e se nee-nee, fo ana nae 'ola'. Boe ma, ana 'ola' nendi' ded'ea Aram fo atahori naa ra ded'ean. (Atahori Ibrani ra sia naa, 'ola' ded'ea Aram.)g