23
Paulus losa naa ma, ara denu e nasala'e ao na. Ana mete namemeu basa atahori naa ra, ma 'ola' nae, “Toronoo ngga ra, e! Au 'umburii' sia ia noo rala ndoos. Lamatualain bub'ulu' nae, eni' a 'a'ana ngga losa 'oras ia, au rala ngga meu'.”2 Lele' Ananias rena e 'ola' na'o naa ma, ana namanasa nala seli. Ananias ia,a agama Yahud'i malangga monaen. De ana parenda atahori mana rambarii' deka Paulus ra nae, “To'o bafa na!”
3 Boe ma Paulus naselu noo Ananias nae, “Dei fo Lamatualain to'o bali' nggo. Ho atahori mana 'ona' rii nenerose' noo cet sia dea', te mba'i a namanaa tungga rala' ena. Ho 'endo' sia ia, fo tao ao ma 'ona' ndoos e. Ma mae hukun au tungga hita atoran 'ad'at na. Te ho mulena-langga neu atoran naa, lele' ho denu ara to'o au.”b
4 Atahori mana sia naa ra rena Paulus 'ola' ta'o naa ma, ara 'ai e rae, “Heh! Ho nda mundaa 'ola' ta'o naa neu hita agama Yahud'i malangga monaen ia sa!”
5 Ma Paulus 'ola' nae, “Teb'e, do? Mete ma ta'o naa, na, au 'o'e ma'af. Au nda bub'ulu' eni, hita agama Yahud'i malangga monaen sa. Mema' Lamatualain pake atahori fo sura' nae, ‘'Afi' 'ola' de'ulaka' neu malangga ma ra.’”c
6-8 Lele' Paulus mete-nita atahori mana 'endo' nggero ded'eat agama ra ma, ana bub'ulu' nae, ara bab'anggi dad'i partei rua. Ruma tungga partei Saduki, fo ramahere 'oi atahori mates ra nda rasod'a bali' sa. Ara ramahere 'oi Lamatualain nda ma ate' sia sorga sa. Ma atahori nda ma samana' sa boe. Ruma fai tungga partei Farisi fo ramahere 'oi Lamatualain bisa tao nasod'a bali' atahori mates ra. Ara o ramahere rae, atahori o ma samana' ma Lamatualain ma ate' sia sorga boe.
Boe ma Paulus 'ola' nahere' nae, “Toronoo ngga ra, e! Sad'i basa nggi bub'ulu', au ia, atahori Farisi. Au ama ngga noo ba'i ngga o atahori Farisi boe. Ia naa, hei mae hukun au, huu au 'umuhere 'ae, Lamatualain bisa tao nasod'a bali' atahori mates ra.”d
Paulus 'ola' ta'o naa ma, atahori Saduki ra roo atahori Farisi ra rareresi, de ara esa nda malole noo esa sa. Boe ma ara saranggaa reu rua. 9 Dad'i basa atahori naa ra rareresi losa basa se ramue-raanggi'. Basa ma, meser hira mia partei Farisi rambarii' de rasala'e Paulus rae, “Atahori ia nda sala sa! Seka bub'ulu', mbei ma atahori mates esa samanan, do, Lamatualain aten esa mia sorga, nema 'ola' noo e!”
10 Meser naa ra, 'ola' ta'o naa ena, te ara bau rareresi losa malangga sold'ad'u a namatau. Ana du'a, 'afi' losa ara momoko risa Paulus. Naa de, ana denu sold'ad'u na ra 'onda, fo roo Paulus nisi' mamana nenea' a.
11 Temba neu ma, Lamatua' Yesus natud'u aon neu Paulus. Ana tao manggatee Paulus ralan, nae “Paulus! 'Afi' mumutau! Ia naa, ho 'ola' so'al au sia Yerusalem ia ena. Musuned'a malolole! Dei fo ho o musi 'ola' ta'o naa sia Roma boe.”
Atahori ra ma'ira' fo rae risa Paulus
12-13 Mbila fefetun ma, atahori Yahud'i haa nulu lena ma'ira' fo rae risa Paulus. Ara sumba rae, “Mete ma hai nda fe'e misa Paulus sa, na, hai nda nau mia-minu sa.”
14 Ara so'u basa susumba' ma, reu rafad'e agama Yahud'i malangga na ra noo lasi-lasi 'ad'at ra rae, “Ama ngga ra, e! Hai sumba mae, mete ma hai nda fe'e misa Paulus sa na, hai nda mia-minu sa. 15 Hai hihiim ta'o ia: Ama' se musi mindaa moo malangga sold'ad'u monae' a, fo mo'e mbali e fo moo Paulus misi' mamana nggenggero ded'eat agama. Tao 'ona' a ama' se rae paresa' selu' ded'ea na. Dei fo hai tefa e sia dala' talad'an, fo misa e.”
16 Te Paulus dad'is toun esa rena ara ma'ira' 'ona' naa, de ana nela nisi' mamana nenea' a, fo nafad'e to'o Paulus. 17 Paulus rena basa dad'is na dud'uin ma, ana no'e nala malangga sold'ad'u esa nae, “Ia, au ana ngga. Moo e lai-lai nisi' malangga sold'ad'u monae ma. Te ana nae nafad'e dala' esa.”
18 Boe ma malangga sold'ad'u a noo ana' a nisi' malangga sold'ad'u monae' a. Ana nafad'e nae, “Ama'! Paulus, fo hai minea' a no'e au fo 'oo ana' ia nema nandaa noo ama'. Ana nae nafad'e dala' esa.”
19 Boe ma malangga a nore nendi ana' a nisi' mamana' esa de 'aka' a ru'a se. Boe ma ana natane nae, “Ho mae mufad'e au saa?”
20 De ana' a nafad'e nae, “Atahori Yahud'i hira ma'ira' rae risa to'o Paul. Ara rae rema ro'e ama', fo fetun na, ama' noo to'o Paulus misi' mamana nggenggero ded'eat agama. Ara 'e'ed'ik rae paresa' ramemeu to'o ded'ea na. 21 Te ama' 'afi' tungga hihii na ra. Huu atahori haa nulu lena' ra rae tefa ama' atahori na ra sia dala', fo rae risa to'o Paul. Basa se sumba rae, mete ma sira nda fe'e risa to'o Paul sa naa, sira nda raa-rinu sa. Basa se rahehere ena. Ara rahati' a ama' nataa nae saa.”
22 Malangga a rena nala ana' a dud'uin ma, ana nae, “'Afi' mufad'e esa boe mae, ho 'uma mufad'e au dala' ia.” Basa ma ana denu ana' a bali'.
Ara roo Paulus nisi' hofernor Feliks sia kota Kaisarea
23 Basa ma, malangga sold'ad'u monae' a no'e malangga sold'ad'u rua. Ana parenda se nae, “Sad'ia sold'ad'u mana lao ei', natun rua; ma sold'ad'u mana sae ndara, hitu nulu; ma sold'ad'u mana to'u tee ra, natun rua. Tetemba' ia lii' sio, ama lao misi' Kaisarea leo. 24 Ama o sad'ia ndara esa fee neu Paulus boe. Ama musi moo e malolole losa hofernor Feliks.”
25 Basa ma, ana sura' susura fee hofernor Feliks, ta'o ia:
26 “Ama' hofernor Feliks nenefee had'a-hormat. Sod'a-mole' mia au, Klaud'ius Lisias.
27 Atahori fo au haitua' ia, naran Paulus. Atahori Yahud'i ra to'u rala e, ma ra'e 'a tao risa e. Te au sold'ad'u ngga ra rasala'e e mia atahori Yahud'i ra lima na. Basa ma, au bub'ulu' ana to'u hak atahori Roma. 28 Au 'ae bub'ulu' ta'o bee, de atahori Yahud'i ra rae tao risa e. Naa de, au 'oo e nisi' atahori Yahud'i ra mamana nggenggero ded'eat agama na. 29 Te nda hambu salan saa sa boe. Mema' ana nda tao de'ulaka saa sa boe. De atahori ia nda bisa maso' bui sa, ma nda nandaa noo hukun mate sa. Atahori sia mamana nggenggero ded'eat agama ra ratofa, huu nenori agama na ra esa' a ena na. Naa de, au 'oo bali' atahori ia nisi' mamana nenea' a. 30 Te mbila' na ma, au rena 'oi atahori Yahud'i ruma rala' esa rae risa e. Naa de, au parenda roo tute' atahori ia nisi' ama'. Au o 'ufad'e atahori Yahud'i mana nae tao ded'eat lab'an e, fo rema risi' ama' e. Naa fo ama' rena rae fee sala' saa neu e.
Au susura ngga, ba'u 'a ia ena. Makasi!”
31 Basa ma, basa sold'ad'u ra raote basa ena fo tao tungga malangga a parenda na. Tetemba' naa, ara roo Paulus losa kota esa, naran Antipatris. 32 Mbila' na ma, sold'ad'u mana sae ndara ra roo Paulus rakandoo losa kota Kaisarea. Te sold'ad'u laen ra, bali' Yerusalem reu. 33 Ara losa Kaisarea ma, rendi susura a nisi' hofernor. Ma ara fee Paulus nisi' hofernor lima na. 34 Hofernor baca basa susura a ma, ana natane Paulus nae, “Ho atahori bee se?”
Ma Paulus nataa nae, “Au, atahori mia profinsi Kilikia, ama'.”
35 Hofernor rena Paulus na'o naa ma, ana nahine 'oi Paulus to'u hak atahori Roma. De ana 'ola' nae, “Au mana to'u parenda' sia ia. Dad'i dei fo au mana nggero ded'ea ma. Te ata musi tahani atahori mana rae rad'ed'ea roo ho' ra losa ia dei, fo au fe'e paresa' ded'ea ma ena.” Boe ma, ana denu sold'ad'u ra tao Paulus nisi' sira mamanan, sia ume panggat hofernor sod'an, fo dalahulun mane Herod'es nafefela' a.