1b-2 Lele' naa, hambu atahori hira mana manggate tungga Lamatualain. Ara reu ha'i Stefanus ao-sisin fo reu ra'oi e, ma ara nggae ei-ei.

Eni' a fai' naa, atahori ra'asususa' Lamatua' Yesus atahori na ra sia Yerusalem, de ara doid'oso seli. Basa se rela sea-sarangganggaa risi' profinsi Yud'ea ma profinsi Samaria. Hela 'aka' a Yesus ded'enu na ra sia Yerusalem.

3 Te Saulus sangga dala' nakandoo 'a fo tao doid'oso Yesus atahori na ra. Ana sangga se sud'i 'a sia bee-b'ee. Ana maso'-kalua tungga-tungga 'a ume fo sangga se. Mae tou' do ina' o, ana to'u fo tao se bui rala reu.^a

4 'Ona' mae atahori ra'asususa' Yesus atahori na ra, losa ara rela sea-saranggaa, te ara nda raloe' dui Lamatua' Yesus Hara-lii Malolen neu atahori sia bee-b'ee sa. 5 'Ona' a, fai' sa Filipus nisi' kota esa sia nusa Samaria de dui atahori ra nae, Kristus fo Lamatualain dud'u eni' a ma'ahulun, naeni Yesus. 6 Ana tao manad'ad'i manaseli' ra, ma atahori ra ra'ab'ub'ue fo rena malolole 'o'ola na.

7 conto 'ona' a, sia naa o hambu atahori nitu tao' ra. Nitu ra lao hela atahori ra noo randu rahere'. Atahori mamalu'u' roo ei doka' hetar o hai reu' ena boe. 8 Naa de atahori mana sia kota naa ramaho'o seli.

9 Sia naa hambu atahori mahine' sa, naran Simon. Eni' a doo' ena, ana pake nitu mahinen neu atahori Samaria ra. Ana koa-koa' a aon nae, “Au ia, manaseli'!”

10-11 De basa moko-anak, tou'-ina', sia kota naa, 'ola-'ola' Simon naran rae, “Wii! Atahori ia, seli ma! Saa fo ana tao' naa, mia Lamatualain koasa na!” Huu ana nahine pake nitu a mahinen, de atahori ra hii pake e eni' a doo' ena.

12 Te ia naa, ara rena Filipus nanori Lamatualain parendan, ma natud'u dala' fo ara dad'i Lamatualain atahorin, nendi' Yesus nara na. Rena basa ma, atahori nae' ramahere, de maso' dad'i Lamatualain bob'onggi na. Mae tou' do ina', ara nau dad'i ta'o naa. Naa de, ara hambu sarani. 13 Simon o namahere ma nau dad'i Yesus atahori na. De ara sarani e ma ana tungga Filipus sud'i 'a bee reu. Lele' ana nita manad'ad'i manaseli' fo Filipus tao' ra, ana kakaler langgan 'oi, “We! Ia, seli teb'e ma!”

14 Lele' naa, Lamatua' Yesus ded'enu na ra mana sia Yerusalem rena rae atahori sia nusa Samaria ra ramahere Lamatualain Ded'ea-'o'ola na. Basa ma, ara denu Petrus noo Yohanis naa reu. 15-17 Ru'a se losa naa, dei de bub'ulu' atahori mana sia naa ra, nda fe'e simbo Lamatualain Dula-d'ale Meumaren sa. Ara fe'e nenesarani' 'a pake Yesus nara na. De Petrus noo Yohanis ndae lima na ra neu se, ma hule-o'e, ro'e fo atahori Samaria ra o simbo Lamatualain Dula-d'ale Meumare na boe. Boe ma, ara simbo neu' ena.

18 Simon o nita Petrus noo Yohanis ndae lima na ra reu atahori ra, ma ara simbo Lamatualain Dula-d'ale na. De ana loo doi' neu ru'a se, ma no'e nae, 19 “We! Ama ngga ra, e! Fee au koasa naa dei. Fo mete ma au tao lima ngga neu see ata, na, ara simbo Lamatualain Dula-d'ale Meumare na.”

20 Te Petrus bua e nae, “Mate mopo nggo moo doi ma! Mbei ma ho mae ho bisa hasa Lamatualain Dula-d'alen noo doi', do? Hoko'! Atahori nda bisa hasa Lamatualain Dula-d'alen sa. 21 Ho nda ma hak saa-saa sa boe neu Lamatualain Dula-d'alen, huu ralam nda ndoos sa. Ho sangga 'a dala hahambu' soa' neu aom. 22 Doa' tao sala' leo. Malole lena' hule-o'e neu Lamatualain, fo 'ona bee, na, Ana 'ose hendi dud'u'a de'ulaka ma. 23 Au bub'ulu' ho nda nau atahori laen lena' nggo sa, ma hambu de'ulaka' nae' pa'a nggo!”

24 Basa ma, Simon no'e mbali ru'a se nae, “Ama ngga ra, e! Mete ma ta'o naa, na, tulun hule-o'e fee au, fo ded'ea de'ulaka' naa, 'afi' dai au.”

25 Basa naa ma, Petrus noo Yohanis dui Lamatua' Yesus Hara-lii Malolen ma rafad'e Lamatualain Ded'ea-'o'olan sia kota naa. Boe ma ara bali' Yerusalem reu. Tungga-tungga dala', ara tuli kambo-kambo' sia profinsi Samaria, fo dui Lamatua' Yesus Hara-lii Malolen neu basa atahori sia naa.

26 Basa ma, Lamatualain aten esa mia sorga denu Filipus nae, “Ana ngga, e! Lao muu tungga dala' mana 'ona neu. Tungga dala mbaraa' naa mana mia Yerusalem nisi' kota Gasa.” 27-28 Filipus rena parenda' naa boe ma, ana lao neu' ena. Losa dala' naa ma, nita atahori sa. Eni, atahori monae' sa mia nusa Etiopia.^b Ana mana tao mata' neu ratu Kandake hata-heto na ra. Ana fe'e hule-o'e basa mia Yerusalem, de ana bali' noo kareta. Filipus nita e 'endo' baca sia kareta ata. Ana baca Lamatualain mana 'ola-'olan ba'i Yesaya susura na. 29 Lamatualain Dula-d'alen denu Filipus neu deka kareta fo nandaa noo atahori naa. 30 Ana deka boe ma, rena atahori naa baca mia ba'i Yesaya susura na. De ana natane nae, “Ama'! Muhine saa fo baca' naa, do hoko'?”

31 Boe ma, atahori naa nataa nae, “Hoko'. Atahori musi rafad'e au, dei fo 'uhine. La'i 'endo' moo au sia ia.” 32 Susura fo ana baca' naa, liin ta'o ia:

34 Atahori monaen naa baca basa ma, natane Filipus nae, “Ta'o bee? Ba'i Yesaya 'ola' naa neu aon do, 'ola' neu atahori laen?”

35 Basa de, Filipus nanori e Lamatua' Yesus Hara-lii Malole na. Ana dui mia Yesaya susuran naa, ma mia susura laen ra boe, fo natud'u dala' tungga Yesus. 36 Lele' ara fe'e lao-lao' ma, atahori naa nita oe sia loe sa. De ana 'ola' tute Filipus 'o'olan, ma no'e nae, “Ama'. Mete dei! Oe sia naa. Mete ma nau, na, 'onda teu fo sarani au sia ia leo.”

37 [Basa ma Filipus nataa nae, “Mete ma ama' mumuhere teb'e-teb'e Lamatua' Yesus, naa nda saa sa boe. Ata 'onda fo au sarani ama'.”

Ana na'ahei' nae, “Au 'umuhere teb'e-teb'e' Yesus, fo Lamatualain dud'u mia dalahulun neu. Eni, Lamatualain Ana na.”]^d

38 Boe ma, ama' naa denu fee karetan nambarii'. Ara 'onda de oe rala reu. Ma Filipus sarani e.

39 Rua' se dea reu mia oe a ma, Lamatualain Dula-d'ale Meumaren nendi Filipus nisi' mamana fea'. Atahori monaen naa nda nita e sa ena. Dad'i ana lao nakandoo, noo ralan namaho'o seli. 40 Te 'aib'oi' ma Filipus losa kambo' esa, naran Asotus.^e Mia naa, ana lao' nakandoo fo nafad'e Yesus Hara-lii Malolen neu atahori. Ana lao tuli basa kambo' losa kota Kaisarea.